ប្រជាពលរដ្ឋដែលមានទំនាស់ដីធ្លីនៅស្រុកអូរជ្រៅ ខេត្តបន្ទាយមានជ័យ ប្រមាណជាង ១០០នាក់ នៅព្រឹកថ្ងៃទី១៦ មីនា នាំគ្នាតវ៉ានៅមុខសាលាឃុំអូរបីជាន់ ដើម្បីឲ្យអាជ្ញាធរឃុំដកមេភូមិចេញពីតំណែង។ អ្នកភូមិបញ្ជាក់ថា ហេតុដែលតវ៉ានេះ ដោយសារមេភូមិមិនព្រមដោះស្រាយរឿងទំនាស់ដីធ្លីតាមការស្នើសុំរបស់ប្រជាពលរដ្ឋ និងប្រកាន់បក្សពួកនិយមទៅលើក្រុមអ្នកមានទ្រព្យធន។
ក្រុមប្រជាពលរដ្ឋដែលតវ៉ានោះ សម្ដែងការមិនពេញចិត្តចំពោះសកម្មភាពដោះស្រាយដីធ្លីរបស់មេភូមិថ្នល់បត់នេះ ថាជាដើមចមនាំឲ្យបញ្ហាទំនាស់ដីធ្លីរបស់ប្រជាពលរដ្ឋចេះតែអូសបន្លាយទៅមុខជាបន្តបន្ទាប់។
តំណាងប្រជាពលរដ្ឋម្នាក់ គឺលោក អ៊ុក តាំង រស់នៅភូមិថ្នល់បត់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ថ្លែងនៅរសៀលថ្ងៃទី១៦ មីនា ថា មេភូមិថ្នល់បត់ ដោះស្រាយទំនាស់ដីធ្លីក្នុងភូមិបម្រើផលប្រយោជន៍ឲ្យក្រុមអ្នកមានទ្រព្យធនមួយក្ដាប់តូច ហើយមិនស្ដាប់យោបល់ស្នើសុំពីសំណាក់ប្រជាពលរដ្ឋក្នុងភូមិនោះទេ។
លោកបន្តថា កន្លងមកប្រជាពលរដ្ឋសុំឲ្យគាត់ដោះស្រាយតាមលិខិតរបស់អាជ្ញាធរថ្នាក់ជាតិដែលបានផ្ដល់ឲ្យប្រជាពលរដ្ឋនាពេលមក ប៉ុន្តែមេភូមិរូបនេះមិនបានដោះស្រាយឲ្យប្រជាពលរដ្ឋឡើយ៖ «ឲ្យដកមេភូមិចេញពីតំណែង ព្រោះមេភូមិមិនប្រក្រតីទៅឃុបឃិតយកដីប្រជាពលរដ្ឋលក់ ហើយបដិសេធមិនទទួលស្គាល់រាល់ឯកសារថ្នាក់ជាតិដែលប្រជាពលរដ្ឋទទួលបានទាំងអស់»។
វិទ្យុអាស៊ីសេរី មិនអាចទាក់ទងមេភូមិថ្នល់បត់ គឺលោក ថា ទន ដើម្បីអត្ថាធិប្បាយជុំវិញបញ្ហានេះបានទេ នៅថ្ងៃទី១៦ មីនា។ ប៉ុន្តែមេឃុំអូរបីជាន់ លោក សួង មឿន មានប្រសាសន៍បញ្ជាក់ថា ការដោះស្រាយរឿងទំនាស់ដីធ្លីអូសបន្លាយនេះមិនមែនជាកំហុសរបស់មេភូមិ ឬអាជ្ញាធរមូលដ្ឋាននោះទេ។ ចំណែកឯការស្នើសុំឲ្យដកមេភូមិនេះ លោកថា មិនអាចធ្វើទៅតាមការទាមទាររបស់ប្រជាពលរដ្ឋភ្លាមៗ ដោយមិនមានការស្រាវជ្រាវនោះឡើយ៖ «រឿងនេះយើងកំពុងគិត គឺយើងមិនហានសន្និដ្ឋានថាខាងណាខុស ឬត្រូវនោះទេ ហើយរឿងនេះទាល់តែយើងស្រាវជ្រាវឲ្យដឹងការពិតទាំងសង្ខាងទើបយើងអាចធ្វើទៅកើត»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ចន្ទគា មានប្រសាសន៍ថា ការតវ៉ារបស់ប្រជាពលរដ្ឋនេះដោយសារពួកគាត់អស់ជំនឿចំពោះការដឹកនាំរបស់មេភូមិ ដែលកន្លងមកប្រជាពលរដ្ឋខាតបង់អស់ទ្រព្យសម្បត្តិ ដើម្បីឲ្យមេភូមិយកទៅប្រើប្រាស់ដោះស្រាយរឿងដីធ្លីដែលមានទំនាស់នោះ ប៉ុន្តែពុំទទួលបានលទ្ធផលទេ៖ «បើមេភូមិគ្មានសកម្មភាពណាមួយបម្រើប្រជាពលរដ្ឋទេ គួរតែដកមេភូមិនោះចេញពីតំណែងទៅ ហើយតែងតាំងអ្នកផ្សេងណាដែលសមត្ថភាពបម្រើប្រជាពលរដ្ឋជំនួសមេភូមិនោះវិញ»។
ដីធ្លីដែលប្រជាពលរដ្ឋមានទំនាស់នោះមានចំនួនជាង ៨០០ហិកតារ ជាកម្មសិទ្ធិរបស់ប្រជាពលរដ្ឋជាង ១៦០គ្រួសារនៅភូមិថ្នល់បត់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ អ្នកភូមិអះអាងថា ទំនាស់ដោះស្រាយមិនចេញនេះកើតឡើងដោយសារមេភូមិឃុបឃិតគ្នាកាត់ដីនោះទៅឲ្យក្រុមអ្នកមានទ្រព្យធន ក្នុងរូបភាពចែកឲ្យប្រជាពលរដ្ឋដែលមានព្រំប្រទល់ដីជាប់គ្នានៅភូមិបឹងស្នោ ឃុំស្លក្រាម ស្រុកស្វាយចេក ខេត្តបន្ទាយមានជ័យ។ រឿងទំនាស់នេះប្រជាពលរដ្ឋបានតវ៉ាឲ្យអាជ្ញាធរដោះស្រាយតាំងពីឆ្នាំ២០១០ រហូតមកទល់បច្ចុប្បន្នពុំទទួលបានលទ្ធផលនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។