កិច្ចប្រជុំរកដំណោះស្រាយរឿងទំនាស់ដីធ្លីរវាងអ្នកភូមិនៅស្រុកម៉ាឡៃ ប្រមាណ ៣៦០គ្រួសារ ជាមួយក្រុមហ៊ុន ហៃ សួគ៌ និងលោកឧកញ៉ា លី អ៊ុតនី នៅសាលាខេត្តបន្ទាយមានជ័យ នៅព្រឹកថ្ងៃទី៨ តុលា ពុំទទួលបានលទ្ធផលទេ។ មន្ត្រីអង្គការសង្គមស៊ីវិលលើកឡើងថា ហេតុផលដែលរកដំណោះស្រាយគ្មានច្រកចេញនេះ ដោយសារខ្វះមន្ត្រីជំនាញផ្នែកសុរិយោដីចូលរួម។
ក្រុមប្រជាពលរដ្ឋដែលមានទំនាស់ដីធ្លីនៅស្រុកម៉ាឡៃ សម្តែងការសោកស្ដាយដែលមិនបានទទួលដីត្រឡប់មកវិញតាមក្ដីរំពឹងទុកដែលអាជ្ញាធរថា នឹងដោះស្រាយបញ្ចប់បញ្ហា ហើយប្រគល់ដីឲ្យអ្នកភូមិចំនួនមួយគ្រួសារ ៥ហិកតារនោះឡើយ។
តំណាំងអ្នកភូមិម្នាក់ដែលបានចូលរួមរកដំណោះស្រាយនៅសាលាខេត្តបន្ទាយមានជ័យ លោក មិន ធី រស់នៅភូមិអូរស្អំ ឃុំអូរទំព័រ ស្រុកម៉ាឡៃ ថ្លែងថ្ងៃទី៨ តុលា ថា ប្រជាពលរដ្ឋជាច្រើនគ្រួសារ រួមទាំងលោកផង ស្នើឲ្យអាជ្ញាធរពាក់ព័ន្ធដោះស្រាយរឿងទំនាស់ដីធ្លីបន្តទៀត ដើម្បីបានដីជាកម្មសិទ្ធិស្របច្បាប់យកទៅដាំដុះចិញ្ចឹមជីវិត៖ «ឲ្យវាចប់ទៅ កុំពិបាកប្រជាពលរដ្ឋ មើលទៅវាត្រាំត្រែង រ៉ាំរ៉ៃជាង ៦-៧ឆ្នាំមកហើយ។ ទាមទារធ្វើម៉េចឲ្យតែវាឆាប់ចប់ទៅ ប៉ុន្តែឥឡូវនេះ អត់ទាន់ទៅណាទេ គឺដំណាក់កាលនេះ គឺនៅពង្រឹងនៅស្រែសិន»។
ឆ្លើយនឹងបញ្ហានេះ អភិបាលខេត្តបន្ទាយមានជ័យ លោក គោ ស៊ុំសារឿត មានប្រសាសន៍បញ្ជាក់ថា អាជ្ញាធរខេត្តមិនទាន់សម្រេចយ៉ាងណានៅឡើយចំពោះផ្ទៃដីដែលមានទំនាស់នេះទេ។ បន្ទាប់ពីមានការសាកសួរភាគីទំនាស់ទាំងសងខាងនៅក្នុងអង្គប្រជុំ អាជ្ញាធរបានសន្និដ្ឋានថា ដីនោះប្រជាពលរដ្ឋបានលក់ទៅឲ្យភាគីម្ខាងទៀតរួចហើយ។
ទោះជាយ៉ាងនេះ លោកឲ្យដឹងទៀតថា អាជ្ញាធរខេត្តនឹងស្រាវជ្រាវបន្តទៀតដើម្បីដោះស្រាយបញ្ចប់ជម្លោះក្នុងពេលឆាប់ៗ៖ «យើងត្រូវយកទស្សនវិស័យមួយ ធ្វើម៉េចឲ្យមានការធ្វើសម្បទានគ្នាទៅវិញទៅមក។ មានន័យថា ឥឡូវគូទំនាស់មួយចំហៀងមានដី គូទំនាស់មួយចំហៀងទៀតថាអត់ដី គ្មានដីទៅចុះ ប៉ុន្តែមិនមែនអត់ទេ គាត់ទៅរំលោភយកអាកន្លែងដែលថាគាត់ចង់បានណោះ ទៅកាន់កាប់យកតែម្ដង។ យើងនឹងធ្វើការត្រួតពិនិត្យ ថាតើគាត់អត់មែន ឬក៏អត់? បើតាមរបាយការណ៍របស់បងប្អូនគាត់មានដីរួម ហើយកាត់លក់អាដីរបបរបស់គាត់ ហើយមានដីកន្លែងផ្សេងទៀតដែរ»។
ទោះជាយ៉ាងនេះក្ដី មន្ត្រីអង្គការសង្គមដែលបានចូលរួមរកដំណោះស្រាយក្នុងអង្គប្រជុំនៅសាលាខេត្តនោះដែរ កត់សំគាល់ថា ការដោះស្រាយវិវាទដីធ្លីរបស់អាជ្ញាធរនេះ ធ្វើឡើងដោយសារមានលិខិតអន្តរាគមន៍ពីគណៈកម្មការសិទ្ធិមនុស្សទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា ចុះថ្ងៃ២៥ កញ្ញា ឆ្នាំ២០១៤។ លិខិតបង្គាប់ឲ្យសាលាខេត្តបន្ទាយមានជ័យ ដោះស្រាយវិវាទដីធ្លីដល់ប្រជាពលរដ្ឋដែលជាអតីតយុទ្ធជនពលី ពិការ និងយោធិនកាត់រំសាយចំនួន ២៣០គ្រួសារ។
មន្ត្រីសម្របសម្រួលអង្គការលីកាដូ (Licadho) ប្រចាំខេត្តបន្ទាយមានជ័យ លោក ភុន ឈិន មានប្រសាសន៍ថា ហេតុដែលអាជ្ញាធរដោះស្រាយទំនាស់ដីធ្លីគ្មានច្រកចេញនោះ ដោយសារពុំមានអ្នកជំនាញផ្នែកដីធ្លីចូលរួមសិក្សាស្រាវជ្រាវរកការពិតរវាងភាគីទំនាស់ទាំងសង្ខាងនៅឡើយ។
លោកបន្តថា សង្កេតឃើញវិវាទដីធ្លីជាច្រើនក្នុងខេត្តបន្ទាយមានជ័យ កន្លងមក កម្រឃើញប្រជាពលរដ្ឋទៅស្វែងរកដំណោះស្រាយនៅស្ថាប័នរៀបចំដែនដីនគរូបនីយកម្ម និងសំណងណាស់៖ «ជាទូទៅ គេដោះស្រាយក្នុងនាមរដ្ឋបាលសាលាខេត្ត ក្នុងនាមអធិការកិច្ចអីអ៊ីចឹងទៅ។ អ៊ីចឹងយន្តការដែលគេបានតម្រូវថា ឲ្យជាអ្នកមានតួនាទីក្នុងការដោះស្រាយបញ្ហាហ្នឹង គឺឃើញថា កន្លងហ្នឹងខាងរដ្ឋបាលខេត្តយើង អត់បានប្រើប្រាស់នីតិវិធីហ្នឹងទេ។ អ៊ីចឹងហើយទើបធ្វើវាអត់មានសេចក្ដីសម្រេចណាមួយ។ អ៊ីចឹងយើងទទួលស្គាល់ថា ខេត្តបានធ្វើការងារច្រើន ដូចជាការសម្របសម្រួលអី ប៉ុន្តែគាត់ធ្វើមិនមែនក្នុងមានគណៈកម្មការសុរិយោដី។ អ៊ីចឹងដល់គាត់ធ្វើ អ៊ីចឹងមានន័យថា ជាលទ្ធផលគឺរកមិនបានសេចក្ដីសម្រេចមួយ»។
ដីធ្លីដែលមានទំនាស់ដែលលើកយកទៅពិភាក្សានៅសាលាខេត្តបន្ទាយមានជ័យ ទំហំប្រមាណជាង ១.២០០ហិកតារ មានទំនាស់រវាងប្រជាពលរដ្ឋប្រមាណជាង ៣៦០គ្រួសារ ស្ថិតក្នុងឃុំចំនួន ៣ គឺឃុំបឹងបេង ទួលពង្រ និងឃុំអូរទំព័រ របស់ស្រុកម៉ាឡៃ ខេត្តបន្ទាយមានជ័យ។ ផ្ទៃដីមួយផ្នែករបស់ប្រជាពលរដ្ឋនេះមានទំនាស់ជាមួយលោកឧកញ៉ា លី អ៊ុតនី និងមួយផ្នែកទៀតមានទំនាស់ជាមួយ ក្រុមហ៊ុន ហៃសួគ៌ ចាប់តាំងពីឆ្នាំ២០០៨ រហូតមក។ រឿងទំនាស់នេះផ្ដើមចេញពីភាពមិនច្បាស់លាស់ទៅលើកម្មសិទ្ធិកាន់កាប់ជាលក្ខណៈបុគ្គលរបស់មន្ត្រីយោធិនកាត់រំសាយដែលទទួលបានដីបែងចែកតាមគោលនយោបាយរបស់រដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។