គណៈកម្មការចម្រុះដែលមានសាលារាជធានីភ្នំពេញ ភាគីតំណាងដោយក្រុមហ៊ុន ផាន អ៊ីម៉ិច អង្គការមិនមែនរដ្ឋាភិបាល និងសហគមន៍ បានសម្រេចគោលការណ៍រួមគ្នាមួយ ដោយសន្យាថានឹងដោះស្រាយបញ្ចប់ជម្លោះដីធ្លីនៅសហគមន៍បុរីកីឡា ឲ្យបានឆាប់។
ក៏ប៉ុន្តែ គោលការណ៍នេះមិនបានធ្វើឲ្យជម្លោះដ៏រ៉ាំរ៉ៃនេះមានភាពស្ងប់ស្ងាត់ទេ។ ផ្ទុយទៅវិញ បានធ្វើឲ្យមានភាពចម្រូងចម្រាសបានកើតឡើងមួយជាន់ទៀត បន្ថែមលើការតវ៉ារបស់សកម្មជនដីធ្លីក្នុងពេលកន្លងទៅ។
ប្រជាពលរដ្ឋដែលមានឯកសារនៅក្នុងដៃម្នាក់ៗ បានរត់ឆ្លេឆ្លាចុះឡើងក្រោយពីពិនិត្យសេចក្ដីប្រកាសឈ្មោះអ្នកដែលត្រូវទទួលបានសិទ្ធិរស់នៅបុរីកីឡា និងឈ្មោះអ្នកដែលត្រូវចាកចេញរួច។ សេចក្ដីប្រកាសនោះ ត្រូវបានអាជ្ញាធរខណ្ឌ៧មករា បិទនៅនឹងជញ្ជាំងសាលាខណ្ឌ។
លោកស្រី ជុំ ង៉ាន់ តំណាងសហគមន៍បុរីកីឡា ក្នុងចំណោមតំណាងមួយចំនួនទៀត ព្រមានក្រោយពីដឹងថា ឈ្មោះរបស់លោកស្រីត្រូវចាកចេញពីបុរីកីឡា ថា លោកស្រី និងសកម្មជនដទៃទៀតដែលមានឈ្មោះត្រូវចាកចេញ នឹងនៅតែតស៊ូលុះជីវិតចុងក្រោយ ប្រសិនបើពួកគេមិនបានរស់នៅនឹងបុរីកីឡា ទេ។ លោកស្រីបន្តថា បើផ្អែកលើគោលនយោបាយដែលប្រកាសដោយគណៈកម្មការចម្រុះ គឺអ្នកតវ៉ាសព្វថ្ងៃមានលក្ខខណ្ឌគ្រប់គ្រាន់នឹងទទួលបានសិទ្ធិរស់នៅបុរីកីឡា នេះហើយ។ លោកស្រី ជុំ ង៉ាន់ បន្តថា «ឥតយុត្តិធម៌ចំពោះពួកខ្ញុំទេ ទាំងអស់គ្នា ៥៦គ្រួសារហ្នឹង។ តវ៉ាទៀត នឹងតវ៉ាទៀតតទៅទៀត លុះត្រាតែជីវិតចុងក្រោយដាច់ប៉ិតបានឈប់»។
ការប្រកាសនៅក្នុងសន្និសីទកាសែតកាលពីព្រឹកថ្ងៃទី២០ មីនា នៅសាលារាជធានីភ្នំពេញ នាយករដ្ឋបាលសាលារាជធានីភ្នំពេញ លោក មាន ចាន់យ៉ាដា ឲ្យដឹងថា ប្រជាពលរដ្ឋដែលអាចទទួលបានផ្ទះនៅបុរីកីឡា គឺត្រូវយោងលើលក្ខខណ្ឌវិនិច្ឆ័យណាមួយក៏បាន ក្នុងចំណោមទាំងបួនប្រភេទ គឺមានឯកសារគ្រប់គ្រាន់ ដូចជាសៀវភៅស្នាក់នៅ និងសៀវភៅសន្សំប្រាក់នៅក្នុងសហគមន៍ ជួលផ្ទះគេគិតចាប់ពី ៣ឆ្នាំឡើងដោយរស់នៅជាប់លាប់។ ក្រៅពីនេះ អ្នកដែលស្នាក់នៅអចិន្ត្រៃយ៍មុនចុះអង្កេតឆ្នាំ២០០៣ បើទោះជាមិនមានឯកសារគ្រប់គ្រាន់ក៏ដោយ។ ចំណែកអ្នកដែលមានសិទ្ធិបានផ្ទះនៅភូមិអណ្ដូង ក្នុងសង្កាត់គោករការ ដែលមានចម្ងាយជាង ១០គីឡូម៉ែត្រពីរាជធានីភ្នំពេញ លក្ខណៈវិនិច្ឆ័យ គឺថា ឯកសារផ្លូវច្បាប់មិនគ្រប់គ្រាន់ ដូចគោលការណ៍វិនិច្ឆ័យទាំង ៤ប្រភេទនេះ។ ក្រៅពីនេះ អ្នកដែលទទួលបានគោលនយោបាយជាលុយវិញ គឺអ្នកនោះមានឯកសារកោសលុប មិនពិតប្រាកដ បើទោះជាធ្លាប់បានស្នាក់នៅក្នុងសហគមន៍បុរីកីឡា ហើយក្តី។
យ៉ាងណាក៏ដោយ ប្រជាពលរដ្ឋភាគច្រើនដែលមានប័ណ្ណអង្កេត សៀវភៅស្នាក់នៅ ព្រមទាំងប័ណ្ណសន្សំប្រាក់ និងធ្លាប់ចូលជាសមាជិកសហគមន៍ផង ប្រតិកម្មប្រឆាំងការមិនអនុញ្ញាតឲ្យពួកគេទទួលបានផ្ទះពីរដ្ឋនៅបុរីកីឡា។ ក្រុមសហគមន៍បានប្រកាសភ្លាមៗដែរថា នឹងប្រមូលផ្ដុំគ្នាតវ៉ាជាថ្មីទៀតប្រឆាំងចំណាត់ការនេះ។
របាយការណ៍ដែលចេញដោយសិទ្ធិលំនៅឋាន បង្ហាញថា ប្រជាពលរដ្ឋសេសសល់ចុងក្រោយនៅសហគមន៍បុរីកីឡាចំនួន ១៥៤គ្រួសារ ក្នុងចំណោមគ្រួសារសរុប ១.៧៧៦គ្រួសារ ក្នុងនោះមានតែ ២៦គ្រួសារប៉ុណ្ណោះ ដែលទទួលបានផ្ទះពីរដ្ឋនៅបុរីកីឡា។ ដោយឡែក ៨៩គ្រួសារ ទទួលបានផ្ទះនៅភូមិអណ្ដូង។ ក្រៅពីនេះ ៣៩គ្រួសារផ្សេងទៀតក្នុងចំណោមនោះ ទទួលបានរបបគោលនយោបាយជាលុយ។
នាយករដ្ឋបាលសាលារាជធានីភ្នំពេញ លោក មាន ចាន់យ៉ាដា ឲ្យដឹងថា តួលេខដែលមាននេះ គឺនៅមិនទាន់ប្រាកដថាអាចថេរនៅឡើយទេ ពោលគឺនៅមានការប្រែប្រួលទៀត។ យ៉ាងណា លោកអះអាងថា ការបង្កើតគណៈកម្មការចម្រុះនៅពេលនេះ គឺចង់ដោះបញ្ចប់បញ្ហាដ៏រ៉ាំរ៉ៃនេះហើយ ដើម្បីបញ្ចៀសការតវ៉ានៅតាមទីសាធារណៈដូចក្នុងពេលកន្លងទៅ។ លោកបន្តថា «គឺពេលវេលាដែលយើងយកនេះ គឺយើងមិនមែនអត្តនោម័តិដោយសាលារាជធានី ឬអត្តនោម័តិនេះ គឺជាការពិភាក្សាគ្នារួមរវាងក្រុមការងារ»។
លោក សៀ ភារម្យ នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន ថ្លែងថា ទម្រាំមានក្រុមការងារនេះឡើង គឺភាគីម្ខាងៗប្រកាន់គោលជំហររៀងៗខ្លួន ស្ទើរមិនអាចរកចំណុចរួមបានរហូតមកដល់ពេលនេះ។ យ៉ាងណាក៏ដោយ លោក សៀ ភារម្យ យល់ឃើញថា ថ្វីបើដំណោះស្រាយខ្លះប្រជាពលរដ្ឋនៅមិនទាន់ពេញចិត្ត ក៏ប៉ុន្តែលោកបញ្ជាក់ថា ពួកគេអាចនៅមានសិទ្ធិតវ៉ាចាប់ពេលនេះរហូតដល់ចុងខែមេសា។ លោកបន្តថា «មិនទាន់អស់ឱកាសទេ គឺយើងនៅមានសិទ្ធិ និងមានលទ្ធភាពនៅក្នុងការតវ៉ាដាក់សាក្សី ដាក់ភស្តុតាងបន្ថែមទៀត»។
បើទោះជាអាជ្ញាធររាជធានីភ្នំពេញ បានព្រមានហើយថា នឹងមិនអនុញ្ញាតឲ្យមានការតវ៉ាជាសាធារណៈទៀតក៏ដោយក្រោយពីដោះស្រាយរួចនេះ ក៏ក្រុមសហគមន៍ដែលមិនទាន់សុខចិត្តអះអាងថា បើដំណោះស្រាយនេះនៅតែមិនអាចផ្ដល់យុត្តិធម៌ត្រឹមត្រូវទេ ពួកគេនឹងបន្តយុទ្ធនាការទាមទារជាថ្មីទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។