ក្រុមអង្គការសង្គមស៊ីវិល រិះគន់រដ្ឋាភិបាល និងស្ថាប័នពាក់ព័ន្ធមួយចំនួន ដែលពុំសូវយកចិត្តទុកដាក់ដោះស្រាយបញ្ហាដីធ្លីនៅតំបន់ខេត្តជាប់ឆ្នេរសមុទ្រ។ ពួកគេថា ការព្រងើយកន្តើយនេះ បណ្ដាលឲ្យជម្លោះដីធ្លីកើនឡើង ហើយបណ្ដាលឲ្យប្រជាពលរដ្ឋកាន់តែជួបការលំបាកគ្រប់បែបយ៉ាង។ ចំពោះការរិះគន់នេះ មន្ត្រីរដ្ឋាភិបាលលើកឡើងថា ដោយសារតែក្រុមអង្គការសង្គមស៊ីវិលទាំងនោះខ្វាក់ ថ្លង់ ពុំបានមើលឃើញចំណាត់ការរបស់រដ្ឋាភិបាល។
ការរិះគន់លើរដ្ឋាភិបាលដឹកនាំដោយ លោក ហ៊ុន សែន និងស្ថាប័នពាក់ព័ន្ធនេះ ធ្វើឡើងក្នុងសន្និសីទសារព័ត៌មានស្ដីពីបញ្ហាដីធ្លីនៅខេត្តជាប់ឆ្នេរសមុទ្រ ដែលរៀបចំឡើងដោយអង្គការសមាគមការពារសិទ្ធិមនុស្ស ហៅកាត់ថា ច្រាក់ (CHRAC) នៅថ្ងៃទី២១ ខែមីនា នាសណ្ឋាគារហ៊ីម៉ាវ៉ារី (Himawari)។
មន្ត្រីសង្គមស៊ីវិល និងតំណាងសហគមន៍មានជម្លោះដីធ្លី លើកឡើងពីជម្លោះដីធ្លីដែលកើតឡើងនៅខេត្តកោះកុង ខេត្តព្រះសីហនុ ខេត្តកំពត និងខេត្តកែប ដោយសារកំណើននៃគម្រោងវិនិយោគអភិវឌ្ឍន៍ ក្រោមរូបភាពសម្បទានសេដ្ឋកិច្ច ការជួលទីតាំងរយៈពេលវែង និងជួលកោះឲ្យទៅក្រុមហ៊ុនឯកជនក្នុងស្រុក និងបរទេស ដើម្បីធ្វើពាណិជ្ជកម្ម ធ្វើសណ្ឋាគារ រីហ្សត (resort) និងរមណីយដ្ឋានទេសចរណ៍ ជាដើម ដោយគ្មានពិគ្រោះយោបល់ និងសិក្សាវាយតម្លៃឲ្យបានច្បាស់លាស់។
ប្រធានផ្នែកដីធ្លីនៃសមាគមការពារសិទ្ធិមនុស្សអាដហុក លោក ឡាត់ គី មានប្រសាសន៍ថា ស្ថានភាពដីធ្លីក្នុងខេត្តទាំង៤ នៅតែគួរឲ្យព្រួយបារម្ភ ព្រោះថា រដ្ឋាភិបាលហាក់គ្មានយន្តការដោះស្រាយច្បាស់លាស់ឡើយ។ លោកថា កន្លងមក ការដោះស្រាយទំនាស់ដីធ្លី គឺគ្មានតម្លាភាព និងគណនេយ្យភាព បណ្ដាលឲ្យប្រជាពលរដ្ឋបាត់បង់ទីលំនៅ បាត់បង់មុខរបរ និងចាកចោលភូមិ-ស្រុក ដើម្បីស្វែងរកមុខរបរថ្មីសម្រាប់ចិញ្ចឹមក្រពះ៖ « ហើយពិបាកក្នុងការរកដំណោះស្រាយ។ ដំណោះស្រាយ គឺអន្តរក្រសួងបង្កើត ប៉ុន្តែអន្តរក្រសួងបង្កើត ព្យាយាមសម្របសម្រួលឲ្យអ្នកភូមិចេញ មិនបានអនុវត្តតាមគោលនយោបាយស្បែកខ្លាដែលរាជរដ្ឋាភិបាល បានដាក់ចេញដើម្បីឆ្វៀលដីដោះស្រាយបញ្ហាឡើយ »។
តំណាងប្រជាពលរដ្ឋនៅឃុំកោះស្ដេច ស្រុកគីរីសាគរ ខេត្តកោះកុង ដែលកំពុងមានបញ្ហាទំនាស់ដីធ្លីជាមួយក្រុមហ៊ុន យូញៀន ឌីវីឡុបមែន គ្រុប (Union Development Group Co., Ltd) បានរៀបរាប់ថា ទំនាស់ដីធ្លីរបស់ពួកគាត់បានអូសបន្លាយជាច្រើនឆ្នាំមកហើយ។ ពួកគាត់ព្រមដោះដូរតែដីចម្ការតែប៉ុណ្ណោះ ចំណែកដីភូមិមិនបានយល់ព្រមឡើយ តែក្រុមហ៊ុននៅតែគំរាមឲ្យពួកគាត់ចាកចេញ។ លោកបន្តថា ទុក្ខសោកក្រោយពីបញ្ហាដីធ្លីនេះកើតឡើង ទោះរៀបរាប់មួយសប្ដាហ៍ក៏មិនអស់ផង៖ « ទី១ ជីវភាពរស់នៅមិនបានពេញលេញឡើយ ព្រោះក្រុមហ៊ុនតែងតែឈូសឆាយមុខក្រោយរហូត ហើយទី២ ដកគ្រូមិនឲ្យបង្រៀនសិស្ស និងទី៣ មានវត្តតែមិនឲ្យលោកគង់ សម្រាប់ប្រជាពលរដ្ឋធ្វើបុណ្យ »។
របាយការណ៍របស់អង្គការសង្គមស៊ីវិល បង្ហាញថា ករណីទំនាស់ដីធ្លីមាននៅតាមខេត្តជាប់ឆ្នេរសមុទ្រមានចំនួន ៤១ករណី នៅមិនទាន់ដោះស្រាយចប់នៅឡើយ។
ប្រធានអង្គការស្រាវជ្រាវជាតិកម្ពុជា ហៅកាត់ថា ស៊ី.អ៊ិន.រ៉ូ (CNRO) លោក សុខ សុខុម មានប្រសាសន៍ថា បើទោះបីជាកម្ពុជា មានច្បាប់ជាច្រើនក្តី ប៉ុន្តែនៅតែមិនអាចទប់ស្កាត់អ្នកមានអំណាច អ្នកមានលុយ ឲ្យឈប់ដណ្ដើមដីពីប្រជាពលរដ្ឋឡើយ។ លោកសង្កេតឃើញថា កន្លងមក ទោះបីជាប្រជាពលរដ្ឋបានរស់នៅកាន់កាប់ដីរបស់ពួកគាត់ជាច្រើនទសវត្សរ៍ និងមានប្លង់កម្មសិទ្ធិស្របច្បាប់ក្តី ក៏នៅតែអាជ្ញាធរបណ្ដេញចេញ ដោយចាត់ទុកថាជាដីសាធារណៈរបស់រដ្ឋ ប៉ុន្តែបើសម្រាប់អ្នកមានលុយមានអំណាច គឺគ្មានបញ្ហាអ្វីទាំងអស់៖ « បើផ្អែកទៅលើកត្តាច្បាប់មានច្រើនណាស់ ប៉ុន្តែការអនុវត្តវាអត់ប្រសិទ្ធភាព »។
សង្គមស៊ីវិលថា កត្តាធ្វើឲ្យជម្លោះដីធ្លីបន្តរាលដាលមិនមានការថមថយ ព្រោះស្ថាប័នពាក់ព័ន្ធមិនអាចដោះស្រាយបញ្ហាជម្លោះដីធ្លីប្រកបដោយប្រសិទ្ធភាពនោះទេ ហើយស្ថាប័នរបស់ជាតិទាំងនោះ មានការប្រព្រឹត្តអំពើពុករលួយជាប្រព័ន្ធ។
ចំពោះការរិះគន់នេះ អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន លើកឡើងថា គឺជាធម្មជាតិរបស់ក្រុមអង្គការសង្គមស៊ីវិល ដែលតែងតែធ្វើជាខ្វាក់ ថ្លង់ ពុំបានមើលឃើញពីចំណាត់ការដោះស្រាយរបស់រដ្ឋាភិបាល៖ « ការដែលគាត់លើកឡើងថា រដ្ឋាភិបាលអត់មានដោះស្រាយ គឺគាត់ខ្វាក់ ឬថ្លង់ គេប្រាប់តើ ! យើងឃើញសកម្មភាពរបស់ចៅហ្វាយខេត្តកំពង់សោម គឺគាត់ចុះទៅទៀត មិនត្រឹមតែចុះ គឺគាត់បង្កើតហ្វេសប៊ុកទៀត ដើម្បីសុំយោបល់ឲ្យប្រជាពលរដ្ឋ និងសម្ដេចតេជោ។ គេដោះស្រាយជាបន្តបន្ទាប់ហើយតើ »។
យ៉ាងណាក៏ដោយចុះ ក្រុមអង្គការសង្គមស៊ីវិល អំពាវនាវដល់រាជរដ្ឋាភិបាល និងក្រសួងមានសមត្ថកិច្ចគ្រប់លំដាប់ថ្នាក់ ជួយពន្លឿនការដោះស្រាយបញ្ហាដីធ្លីរបស់ប្រជាពលរដ្ឋជាប់ឆ្នេរសមុទ្រទាំង ៤ខេត្តឲ្យបានឆាប់រហ័ស និងទប់ស្កាត់បញ្ហាការចាក់ខ្សាច់ចូលសមុទ្រ យកធ្វើជាកម្មសិទ្ធិ និងបូមខ្សាច់ដោយខុសច្បាប់ ដែលធ្វើឲ្យបាត់បង់ធនធានធម្មជាតិ ជាពិសេសបញ្ឈប់ការផ្តល់ឆ្នេរសមុទ្រទៅឲ្យក្រុមហ៊ុនឯកជនជាអ្នកគ្រប់គ្រង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។