តំណាងរាស្ត្រគណបក្សសង្គ្រោះជាតិ បានថ្កោលទោស និងចាត់ទុកការប្រើអំពើហិង្សារបស់កម្លាំងសមត្ថកិច្ចខេត្តកំពង់ឆ្នាំង មកលើអ្នកភូមិឡពាង ដែលមានជម្លោះដីធ្លីជាមួយក្រុមហ៊ុន ខេ.ឌី.ស៊ី (KDC) គឺជាទង្វើអមនុស្សធម៌។ ការថ្លែងបែបនេះ គឺនៅបន្ទាប់ពីតំណាងរាស្ត្រគណបក្សប្រឆាំងចំនួន ៥រូប ចូលសួរសុខទុក្ខអ្នកភូមិដែលកំពុងជាប់ឃុំនៅពន្ធនាគារ ៥នាក់ នៅថ្ងៃទី២១ ខែសីហា។
មន្ត្រីគណបក្សប្រឆាំងស្នើឲ្យរដ្ឋាភិបាលពិនិត្យមើលឡើងវិញនូវការប្រើប្រាស់កម្លាំងប្រដាប់អាវុធទៅបង្ក្រាបប្រជាពលរដ្ឋដែលមានតែដៃទទេក្នុងសកម្មភាពតវ៉ារឿងដីធ្លីរបស់ខ្លួន។ ក្នុងចំណោមអ្នកជាប់ឃុំទាំង ៥នាក់ គឺមាន៣នាក់មានអាការស្ពឹកក្បាល និងជើង បន្ទាប់ពីមានការបង្ក្រាបដោយកម្លាំងសមត្ថកិច្ចចម្រុះ កាលពីព្រឹកថ្ងៃទី១២ ខែសីហា ឆ្នាំ២០១៤។
តំណាងរាស្ត្រមណ្ឌលខេត្តកំពង់ឆ្នាំង នៃគណបក្សសង្គ្រោះជាតិ លោក គី វណ្ណដារ៉ា មានប្រសាសន៍ថា សមត្ថកិច្ចបានប្រើដំបងវាយសំពងទៅលើពលរដ្ឋចំកន្លែងសំខាន់ៗជាច្រើនកន្លែង ដែលអាចបណ្ដាលឲ្យមានគ្រោះថ្នាក់ដល់ជីវិត។ លោកបញ្ជាក់ថា ក្រុមរបស់លោកកំពុងសិក្សា និងទាក់ទងទៅស្ថាប័នពាក់ព័ន្ធទាំងអស់ក្នុងរឿងដីធ្លីនៅឡពាង ដើម្បីដោះស្រាយតាមផ្លូវច្បាប់ក្នុងពេលឆាប់ៗ៖ «បានជួប៤នាក់ដែលនៅក្នុងនោះមានពីរនាក់នៅតែឈឺក្បាល ប៉ុន្តែម្នាក់ឈឺហើយប្រអប់ដៃគាត់ដែលរយះហ្នឹងស្នាមរបួសគាត់នៅតែដេរនៅឡើយហើយនៅឈឺ ហើយម្នាក់ទៀតគាត់ឈឺក្បាលដែរ ប៉ុន្តែភ្នែកគាត់ខាងស្ដាំហ្នឹងរៀងងងឹត ហេតុអ្វីបានឈឺក្បាលដោយសារគេវាយគាត់ត្រូវក្បាល ហើយម្នាក់ទៀតដែលយើងមិនបានជួបនៅពន្ធនាគារទេ គឺយើងជួបនៅក្នុងមន្ទីរពេទ្យបង្អែកខេត្តកំពង់ឆ្នាំងនៅក្នុងបន្ទប់សង្គ្រោះបន្ទាន់គេវាយគាត់ត្រូវក្បាលដែរធ្វើឲ្យមួយកំណាត់ខ្លួនចុះទៅខាងក្រោម ជើងគាត់ទាំងពីរហ្នឹងមិនអាចកម្រើកបាន»។
ទាក់ទងបញ្ហានេះស្នងការនគរបាលខេត្តកំពង់ឆ្នាំង លោក ប្រាក់ វុឌ្ឍី បដិសេធមិនធ្វើអត្ថាធិប្បាយអ្វីឡើយ ដោយលោកប្រាប់ថាកំពុងជាប់ប្រជុំ។ ប៉ុន្តែកន្លងទៅខាងសមត្ថកិច្ចធ្លាប់បញ្ជាក់ប្រាប់វិទ្យុអាស៊ីសេរី ថា ហេតុការណ៍ដែលបានកើតឡើងកាលពីថ្ងៃទី១២ ខែសីហា គឺមិនមែនជាការបង្ក្រាបឡើយ ប៉ុន្តែជាការអនុវត្តដីការបស់តុលាការ និងមិនចង់ឲ្យពលរដ្ឋដាក់ម៉េក្រូដើរស្រែកតវ៉ាតាមផ្លូវជាតិ ដែលធ្វើឲ្យប៉ះពាល់ដល់សណ្ដាប់ធ្នាប់សាធារណៈ ហើយបើចង់តវ៉ាត្រូវសុំច្បាប់ជាមុនឲ្យបានត្រឹមត្រូវ។
ជនសង្ស័យម្នាក់ក្នុងចំណោម ៥នាក់ គឺលោក ស្ងួន ញឿន ថ្លែងក្នុងសំឡេងខ្សេវៗនៅក្នុងមន្ទីរពេទ្យបង្អែកខេត្តកំពង់ឆ្នាំង ថា មុននឹងបញ្ជូនមកដល់ពន្ធនាគាររូបលោកត្រូវបានសមត្ថកិច្ចចម្រុះវាយនឹងដំបង និងយកជើងជាន់យ៉ាងដំណំ។ ចំណែកម៉ាស៊ីនថតរូបចំនួនពីរគ្រឿងដែលមានសកម្មភាពសមត្ថកិច្ចធ្វើបាបពលរដ្ឋ និងរូបថតភស្តុតាងមួយចំនួនទៀតទាក់ទងនឹងរឿងដីធ្លីជាមួយក្រុមហ៊ុន ខេ.ឌី.ស៊ី ត្រូវបានសមត្ថកិច្ចចាប់បោកចោល ហើយក៏បាត់អស់នៅអំឡុងពេលនៃការប្រតាយប្រតប់ចាប់ខ្លួនលោកនោះ៖ «ជើងហ្នឹងអត់ដឹងដែរព្រោះតែជើងហ្នឹងស្ពឹក ក្បាលក៏វាស្ពឹកជាមួយតែគ្នាអីចឹង។ គេវាយក្បាលមួយដំបង ហើយវាធាក់ ហើយវាជាន់យកស្បែកវាជាន់ក្បាលខ្ញុំញីទៅនឹងដីទៀត។ ខ្ញុំសូមអំពាវនាវទៅដល់ប្រមុខរាជរដ្ឋាភិបាល និងអង្គការផ្សេងៗ ពិសេសគឺម្ចាស់ជំនួយដែលផ្ដល់ជំនួយមកដល់កម្ពុជាសព្វថ្ងៃនេះមេត្តាជួយពិនិត្យមើលក្រុមហ៊ុននីមួយដែលមកអនុវត្តមកវិនិយោគទុននៅក្នុងប្រទេសកម្ពុជាកុំឲ្យធ្វើអភិវឌ្ឍន៍ ដើម្បីយកទឹកភ្នែករាស្រ្តមកអភិវឌ្ឍន៍ខ្ញុំអត់ត្រូវការទេ»។
អនុប្រធានកម្មវិធីដីធ្លី និងធនធានធម្មជាតិ នៃសមាគមអាដហុក (Adhoc) លោក ចាន់ សុវ៉េត ទទូចឲ្យមានការដោះលែងអ្នកភូមិទាំង ៥នាក់ ដែលកំពុងជាប់ពន្ធនាគារទាំងឈឺខ្លួន និងឈឺទាំងចិត្តក្នុងរឿងដីធ្លីរបស់ពួកគាត់ទៀតនោះ។ លោកបន្តថា ការដើរជាក្បួនរបស់អ្នកភូមិដោយថ្មើរជើងមកតវ៉ារឿងដីធ្លីនៅភ្នំពេញ មិនមែនជារឿងខុសឆ្គងឡើយ ប៉ុន្តែអាជ្ញាធរក្នុងខេត្តនេះទេដែលអសមត្ថភាព និងធ្វើឲ្យពួកគាត់លែងទុកចិត្តក្នុងការដោះស្រាយរឿងដីធ្លីនេះ ទើបពួកគាត់ប្រើជម្រើសតវ៉ាចុងក្រោយបែបនេះ៖ «វាជាការគួរឲ្យភ័យខ្លាចណាស់នៅពេលដែលយើងបានឃើញទិដ្ឋភាពដែលអាជ្ញាធរប្រើប្រាស់កម្លាំងរបស់គាត់ទៅវាយកម្ទេច ចាក់ចោលរបស់របរអ្នកភូមិ នៅពេលដែលគាត់ធ្វើដំណើរមកតាមផ្លូវ ហើយទាំងអស់នេះមិនមែនធ្វើឡើងដោយសមរម្យទេ ធ្វើដោយភាពច្រងេងច្រងាងធ្វើឡើងដោយគេហៅថាខឹងសម្បារក្រេវក្រោធជាមួយនឹងក្រុមអ្នកភូមិឡពាងតាំងពីដើមមកអ៊ីចឹង។ គប្បីត្រូវតែមានការប្រើយុទ្ធសាស្ត្រខ្លះ ព្រោះអាជ្ញាធរមានសមត្ថកិច្ចសុទ្ធតែក្រុមមន្ត្រីជំនាញទាំងអស់អីចឹងគប្បីប្រើប្រាស់ជំនាញផ្ទាល់ខ្លួនធ្វើកិច្ចការងារឲ្យវាត្រឹមត្រូវទៅ»។
ជម្លោះដីធ្លីរវាងអ្នកភូមិនៃឃុំតាជេស ស្រុកកំពង់ត្រឡាច ខេត្តកំពង់ឆ្នាំង និងក្រុមហ៊ុន ខេ.ឌី.ស៊ី បានកក្រើកឡើងវិញតាំងដើមខែមិថុនា ឆ្នាំ២០១៤ គឺនៅបន្ទាប់ពីក្រុមហ៊ុនបានដាក់គ្រឿងចក្រ និងកម្លាំងកម្មកររាប់រយនាក់ ដើម្បីធ្វើរបងព័ទ្ធលើដីដែលអ្នកភូមិអះអាងថា កំពុងមានជម្លោះជាមួយពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។