មន្ត្រីប៉ូលិសស្រុកអូរយ៉ាដាវ ខេត្តរតនគិរី អះអាងនៅថ្ងៃអង្គារ ទី១៨ ខែមិថុនា ឆ្នាំ២០១៣ ថាបានផ្តល់កន្លែងការពារសុវត្ថិភាពចំពោះមន្ត្រីមូលដ្ឋានភូមិមួយរូប ដែលរងការគំរាមបាញ់សម្លាប់ពីមន្ត្រីយោធា គឺលោក ឯម សំអន ជាមេបញ្ជាការរងវរយោធាការពារព្រំដែនលេខ១០២ នៃយោធាខេត្តរតនគិរី។
អធិការប៉ូលិសស្រុកអូរយ៉ាដាវ លោក ម៉ា វិចិត្រ មានប្រសាសន៍បញ្ជាក់ថា លោកបានសុំកិច្ចអន្តរាគមន៍ពីស្នងការដ្ឋាននគរបាលខេត្ត និងអាជ្ញាធរខេត្តជួយបញ្ឈប់សកម្មភាពមន្ត្រីយោធា ដែលបានធ្វើការគំរាមកំហែងសម្លាប់មេភូមិជាច្រើនលើក។ លោកបន្តថា សកម្មភាពគំរាមបាញ់សម្លាប់នេះ កើតឡើងដោយសារតែរឿងដីព្រៃទំហំប្រមាណ ១ហិកតារ ដែលមន្ត្រីយោធានោះខឹងថាប្រធានភូមិមិនព្រមវាស់វែងឲ្យខ្លួន ដើម្បីដាក់ឲ្យក្រុមនិស្សិតវាស់វែងចេញប័ណ្ណកម្មសិទ្ធិ៖ «ធ្វើឲ្យប្រជាពលរដ្ឋគាត់មានការភ័យខ្លាច ធ្វើអ្វីមួយឲ្យវាមានពាក់ព័ន្ធផ្លូវច្បាប់។ វាអត់ត្រឹមត្រូវ ព្រោះខ្ញុំជាមេរក្សាសន្តិសុខនៅក្នុងស្រុក ខ្ញុំមិនឲ្យប្រជាពលរដ្ឋខ្ញុំភិតភ័យពីស្ថាប័នណាដែរ»។
មេបញ្ជាការរងវរយោធា១០២ លោក ឯម សំអន មានប្រសាសន៍បញ្ជាក់ថា លោកមិនមានចេតនាបាញ់សម្លាប់ប្រធានភូមិនោះទេ ប៉ុន្តែដោយសារកំហឹង លោកប្រើពាក្យគំរាមតែប៉ុណ្ណោះ ដើម្បីដាក់គំនាបឲ្យប្រធានភូមិដោះស្រាយដីរបស់លោកដែលប្រធានភូមិបានកាប់ឆ្ការព្រៃយក ហើយដាក់ឲ្យក្រុមនិស្សិតវាស់វែងយកជារបស់ផ្ទាល់ខ្លួនវិញ។
លោកបន្តថា ដីតំបន់នោះលោកបានបោះបង្គោលទុកជាដីសម្រាប់គ្រួសារលោកជាយោធា នៅជាប់នឹងព្រំដែនតាំងពីឆ្នាំ២០០៨ ប៉ុន្តែប្រធានភូមិ និងអ្នកភូមិបានកាប់ឆ្ការយកអស់ ហើយដាក់ឲ្យក្រុមនិស្សិតវាស់វែងចេញប័ណ្ណកម្មសិទ្ធិកាត់ចេញពីដីក្រុមហ៊ុនសម្បទានសេដ្ឋកិច្ច៖ «គាត់ហ្នឹងខូចទៅរំលោភរបស់គេរបស់ឯង អាងតែគាត់ប្រធានភូមិ អាជ្ញាធរដែនដីនៅហ្នឹង ដីគាត់ពីរបីកន្លែង ហើយគ្នានេះអត់មានដីមួយចំអាមសោះ។ គ្មានប៉ុនប៉ងស្អីទេ តែយើងស្រវឹង យើងនិយាយខ្លាំងបន្តិចទៅណា!»។
ប្រធានភូមិឡំ លោក សេវ លីន មានប្រសាសន៍បញ្ជាក់ថា លោកមិនបានកាប់ឆ្ការយកដីនោះទេ គឺប្រជាពលរដ្ឋក្នុងភូមិជាអ្នកកាប់ឆ្ការព្រៃយកដីនោះ ប៉ុន្តែមន្ត្រីយោធាមកគំរាមបាញ់សម្លាប់លោកចំនួនបីលើក ឲ្យលោកវាស់វែងកាត់ដីនោះប្រគល់ទៅឲ្យមន្ត្រីយោធាវិញ។ លោកបន្តថា មន្ត្រីក្រុមប្រឹក្សាឃុំបានអញ្ជើញភាគីពាក់ព័ន្ធមកដោះស្រាយនៅសាលាឃុំ ប៉ុន្តែមន្ត្រីយោធានៅតែមិនព្រមបញ្ឈប់សកម្មភាពគំរាមសម្លាប់នេះទេ៖ «ខ្ញុំរត់ទៅខ្ញុំខ្លាចនៅផ្ទះម្នាក់ឯង ហើយគេថាស្អែកធ្វើម៉េចខ្ញុំទៅជួបឯងនៅភូមិឡំ ខ្ញុំមិនយកដីទេ ផ្តាច់ជីវិតបាញ់ចោលតែម្តង»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តរតនគិរី លោក ឆាយ ធី មានប្រសាសន៍បញ្ជាក់ថា លោកបានចុះអង្កេតករណីនេះផ្ទាល់ និងរកឃើញថា មន្ត្រីយោធាពិតជាគំរាមតាមទូរស័ព្ទ និងបានទៅដល់លំនៅឋានប្រធានភូមិ តាមលក្ខខណ្ឌដែលបានគំរាម។ លោកចាត់ទុកថា នេះជាចេតនាប៉ុនប៉ងមនុស្សឃាត មន្ត្រីយោធាត្រូវតែទទួលខុសត្រូវចំពោះមុខច្បាប់៖ «មេភូមិគាត់ភ័យស្លន់ស្លោនៅពេលទទួលការគំរាមតាមទូរស័ព្ទភ្លាមៗ ហើយដាក់លក្ខខណ្ឌជាមួយគាត់ទៀត ថាបើមិនបានវាស់ដីប្រគល់ឲ្យគាត់ទេ គេនឹងមកបាញ់សម្លាប់ដល់ផ្ទះ»។
យ៉ាងនេះក្តី មន្ត្រីយោធា លោក ឯម សំអន មានប្រសាសន៍បញ្ជាក់ថា នៅថ្ងៃទី១៩ ខែមិថុនា មេបញ្ជាការយោធាខេត្តបានកោះហៅលោកឲ្យចូលខ្លួនទៅបញ្ជាការដ្ឋាន ដើម្បីបំភ្លឺករណីនេះ។ ចំណែកលោក សេវ លីន សម្ដែងការភ័យខ្លាចពីសុវត្ថិភាព និងកំពុងបន្តលាក់ខ្លួននៅទីមានសុវត្ថិភាពនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។