ដីព្រៃសហគមន៍នៅខេត្តបាត់ដំបង ត្រូវគេឃុបឃិតគ្នាកាប់បំផ្លាញអស់ជាច្រើនរយហិកតារ ដើម្បីយកមកធ្វើជាកម្មសិទ្ធិស្របច្បាប់។ ប្រភពបានអះអាងថា ការកាប់រុករានដីព្រៃសហគមន៍នោះ គឺមានក្រុមមនុស្សជាអ្នកមានអំណាច និងអង្គការក្រៅរដ្ឋាភិបាលមួយដែលជាអ្នកឈរនៅពីក្រោយខ្នង ជំរុញឲ្យប្រជាពលរដ្ឋចេញមុខកាន់កាប់ដីនោះ ដើម្បីឈរឈ្មោះឲ្យក្រុមនិស្សិតវាស់វែងធ្វើប្លង់កម្មសិទ្ធិ បន្ទាប់មកលក់បន្តទៅឲ្យអ្នកមានលុយកាក់ជាអ្នករស់នៅសហរដ្ឋអាមេរិក។
ដីព្រៃសហគមន៍ទំហំជាង ១.៣០០ហិកតារ នៅឃុំព្រៃត្រឡាច ស្រុករុក្ខគិរី ខេត្តបាត់ដំបង ត្រូវបានគេកាប់រុករាន និងដាក់គ្រឿងចក្រឈូសបំផ្លាញព្រៃនៅតំបន់នោះ។ សកម្មភាពនេះបានកើតមានក្នុងរយៈពេលប៉ុន្មានខែចុងក្រោយនេះ ដោយមានជាប់ពាក់ព័ន្ធជាមួយអាជ្ញាធរមូលដ្ឋាន និងមន្ត្រីជាន់ខ្ពស់ក្នុងខេត្តបាត់ដំបង ដែលគេសង្ស័យថាជាអ្នកការពារជនល្មើសពីក្រោយខ្នង។
ប្រភពសុំមិនបញ្ចេញឈ្មោះ បានថ្លែងប្រាប់វិទ្យុអាស៊ីសេរី ថា រដ្ឋាភិបាលបានចេញប្រកាសរក្សាដីព្រៃសហគមន៍ព្រៃត្រឡាច ទំហំ ១.៣៣៧ហិកតារ ប៉ុន្តែដីព្រៃសហគមន៍នោះត្រូវគេឃុបឃិតគ្នាកាប់បំផ្លាញអស់ជាច្រើនរយហិកតារ ហើយមន្ត្រីជំនាញ និងអាជ្ញាធរពាក់ព័ន្ធ បានចុះទៅបង្ក្រាបចាប់បានមនុស្សជាច្រើននាក់ ប៉ុន្តែក្រោយមក មានកិច្ចអន្តរាគមន៍ពីមន្ត្រីជាន់ខ្ពស់ខេត្តបាត់ដំបង ឲ្យដោះលែងអ្នកទាំងនោះទៅវិញ៖ «ប្រជាពលរដ្ឋយើងបានចាប់ម្ដងហើយ ប៉ុន្តែមានការអន្តរាគមន៍ពីខាងខេត្តទៅកុំឲ្យប៉ះពាល់ គាត់ធ្វើកិច្ចសន្យាគាត់ម្ដងហើយ កាលនុះ ៤នាក់ ហើយបានធ្វើកិច្ចសន្យាឲ្យគាត់ទៅវិញ ព្រោះគាត់ពុំដឹងខ្លួនស៊ីឈ្នួលគេទេ»។
ប្រភពបង្ហើបឲ្យដឹងទៀតថា រូបភាពនៃការកាប់បំផ្លាញព្រៃសហគមន៍នោះ គឺពួកគេបានយកគ្រឿងចក្រដាក់នៅផ្នែកខាងក្នុងព្រៃសហគមន៍ ឈូសព្រៃ ហើយរក្សាទុកព្រៃសហគមន៍នៅផ្នែកសងខាង ដើម្បីបន្លំភ្នែកមហាជន។ ហើយករណីនេះ សហគមន៍ការពារព្រៃឈើនៅឃុំព្រៃត្រឡាច បានរៀបចំធ្វើពាក្យបណ្ដឹងដាក់ទៅស្ថាប័នជំនាញ និងថ្នាក់លើឲ្យជួយដោះស្រាយ ប៉ុន្តែក្រោយមកបានស្ងប់ស្ងាត់ទៅវិញ។
អភិបាលស្រុករុក្ខគិរី លោក ពេជ្រ ម៉ាឡៃ បដិសេធថាលោកពុំទាន់ទទួលបានរបាយការណ៍ជុំវិញការកាប់បំផ្លាញព្រៃសហគមន៍នោះមានទំហំប៉ុនណានោះទេ៖ «ខ្ញុំអត់ទាន់ទទួលបានលទ្ធផលច្បាស់លាស់ថាប៉ុនណាអីប៉ុនណាទេ សហគមន៍ជាមួយរដ្ឋបាលព្រៃឈើ ជាមួយអាជ្ញាធរមូលដ្ឋានឃុំ គាត់បានចុះធ្វើការងារហ្នឹង»។
ទោះជាមានការអះអាងដូច្នេះក្ដី ប៉ុន្តែប្រភពបានលើកឡើងថា សហគមន៍ព្រៃត្រឡាច និងអាជ្ញាធរមូលដ្ឋាន មានការភ័យខ្លាចអំណាចរបស់មន្ត្រីជាន់ខ្ពស់ និងប្រភពខ្លះនិយាយតគ្នាថា សហគមន៍ការពារព្រៃឈើនោះ និងអាជ្ញាធរមូលដ្ឋាន ក៏ជាអ្នកផ្សំគំនិតដូចគ្នា ទើបក្រុមជនខិលខូចអាចចូលទៅកាប់ព្រៃសហគមន៍នោះបាន។
កាលពីមុនរដូវចូលឆ្នាំខ្មែរ មន្ត្រីរដ្ឋបាលព្រៃឈើ បានដឹកនាំកម្លាំងចុះទៅពិនិត្យទីតាំងដីព្រៃសហគមន៍ព្រៃត្រឡាច ប៉ុន្តែពុំទទួលបានលទ្ធផលជោគជ័យនោះទេ។
នាយខណ្ឌរដ្ឋបាលព្រៃឈើបាត់ដំបង លោក លី ជូបៀង បញ្ជាក់ថា កន្លងទៅនេះ ជំនាញរដ្ឋបាលព្រៃឈើ បានដឹកនាំកម្លាំងចុះទៅបង្ក្រាបការកាប់បំផ្លាញព្រៃសហគមន៍ព្រៃត្រឡាច ប៉ុន្តែពួកគេជួបឧបសគ្គច្រើន៖ «ពីព្រោះរឿងនេះវាស្មុគស្មាញច្រើនហើយ ដេញ និងចាប់ហើយ នៅតែអត់រៀង ឧបសគ្គហ្នឹង។ មនុស្សដូចជាមិនយល់ ប្រហែលជាគាត់យល់ថាតាំងទីលំនៅទៅ ប្រហែលជាបានកម្មសិទ្ធិបានជាគាត់ធ្វើអ៊ីចឹង»។
ប្រភពបានឲ្យដឹងថា ក្រុមមនុស្សជាអ្នកឈរនៅពីក្រោយប្រជាពលរដ្ឋ ដែលកំពុងរំលោភបំពានលើដីព្រៃសហគមន៍នោះ និងកំពុងបញ្ចុះបញ្ចូលក្រុមនិស្សិតស្ម័គ្រចិត្ត ដើម្បីឲ្យពួកគេចុះវាស់វែងដីនោះចេញប្លង់កម្មសិទ្ធិស្របច្បាប់។ ហើយចំណុចនេះ ក្រុមនិស្សិតកំពុងមានការខ្វែងគំនិតគ្នាថែមទៀត។
លោក លី ជូបៀង បញ្ជាក់ថា រដ្ឋាភិបាលបានចេញប្រកាសកំណត់ដីព្រៃសហគមន៍ព្រៃត្រឡាច មានទំហំ ១.៣៣៧ហិកតារ ដោយមានកំណត់ព្រំប្រទល់ច្បាស់លាស់ ដើម្បីរក្សាព្រៃឈើនៅតំបន់នោះ។ កន្លងមក វិធានការបង្ក្រាបពុំមានប្រសិទ្ធភាព ដូច្នេះហើយគេបានបង្កើតគណៈកម្មការចម្រុះថ្មីមួយទៀត ដើម្បីចុះបង្ក្រាបការកាប់ទន្ទ្រានរុករានដីព្រៃសហគមន៍នោះឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។