ចៅក្រមស៊ើបសួរនៃសាលាដំបូងរាជធានីភ្នំពេញ បន្តសាកសួរពលរដ្ឋពីរនាក់ គឺឪពុក និងកូន ក្នុងសំណុំរឿងជម្លោះដីធ្លីជាមួយក្រុមហ៊ុន ឃុន សៀ។
លោក លី ស្រ៊ាខេង និងកូនស្រី កញ្ញា លី សៀវម៉ិញ ប្រាប់អ្នកសារព័ត៌មាននៅក្រោយពេលសាកសួរនៅព្រឹកថ្ងៃទី៤ ខែធ្នូ ថា ចៅក្រមបន្តសាកសួរពួកគាត់ទាក់ទងនឹងការចោទប្រកាន់ថា បានរារាំងម្ចាស់អចលនទ្រព្យមិនអោយធ្វើរបង។ កញ្ញា លី សៀវម៉ិញ បញ្ជាក់ថា ទោះជាត្រូវចាប់ដាក់ឃុំ ក៏ក្រុមគ្រួសារនាងនៅតែប្រកាន់ជំហរទាមទារសំណងតាមតម្លៃទីផ្សារ ជាថ្នូរនឹងចាកចេញពីដីទំនាស់។ នាងសំណូមពរអោយចៅក្រមស៊ើបអង្កេត រកយុត្តិធម៌អោយពួកនាង។
បន្ទាប់ពីសាកសួររួច អ្នកទាំងពីរក៏ត្រូវនាំត្រឡប់ទៅឃុំបណ្ដោះអាសន្ននៅមន្ទីរអប់រំកែប្រែទី១ ឬព្រៃសវិញ រង់ចាំនីតិវិធីតុលាការ។ ចៅក្រមស៊ើបសួរ និងព្រះរាជអាជ្ញារង បានចោទប្រកាន់អ្នកទាំងពីរនូវបទចោទធំៗចំនួន៣ គឺបទរារាំងម្ចាស់អចលនទ្រព្យ គឺក្រុមហ៊ុន ឃុន សៀ មិនអោយធ្វើរបង បទបំផ្លិចបំផ្លាញទ្រព្យសម្បត្តិ និងបទបរិហារកេរ្តិ៍។ ពួកគេត្រូវបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស កាលពីថ្ងៃទី១៨ ខែវិច្ឆិកា។
ក្រុមគ្រួសារ លោក លី ស្រ៊ាខេង ដែលរស់នៅក្នុងសង្កាត់បឹងកក់១ ខណ្ឌទួលគោក ធ្លាប់រងការប្រមាថស្ទើរផុតជីវិត ដូចជាការបោះពស់វែកចូលផ្ទះ និងបង្កអគ្គិភ័យ ជាដើម។ ចំណែកកូនស្រី គឺកញ្ញា សៀវម៉ិញ ធ្លាប់ត្រូវក្រុមជនអន្ធពាលកាប់ជាច្រើនកាំបិត។ ហេតុការណ៍ទាំងនោះ កើតឡើងបន្ទាប់ពីក្រុមហ៊ុន ឃុន សៀ បានទទួលសិទ្ធិពីរដ្ឋាភិបាលកាលពីឆ្នាំ២០១០ ដែលអាចក្លាយជាម្ចាស់ដីនៃតំបន់អតីតសាលាសង្កាត់បឹងកក់១ និងទីស្នាក់ការគណបក្សប្រជាជនកម្ពុជា កាលពីឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។