តំណាងរាស្ត្រគណបក្សប្រជាជនកម្ពុជា មណ្ឌលកំពង់ឆ្នាំង អ្នកស្រី កែ ច័ន្ទមុនី នៅព្រឹកថ្ងៃទី២១ ខែសីហា ចុះសួរសុខទុក្ខអ្នកភូមិឡពាង ចំនួនជាង ៧០នាក់ ដែលកំពុងស្នាក់នៅក្នុងតំបន់បឹងកក់។ អ្នកស្រីបានបដិសេធញត្តិស្នើសុំដំណោះស្រាយរឿងដីធ្លីរបស់អ្នកភូមិ ប៉ុន្តែបានសន្យាថា នឹងទទួលយកសំណូមពរនោះនៅពេលអ្នកភូមិវិលត្រឡប់ទៅភូមិវិញ។
តំណាងអ្នកភូមិឡពាង ហៅការចុះសួរសុខទុក្ខរបស់តំណាងរាស្ត្រគណបក្សប្រជាជនកម្ពុជា ខេត្តកំពង់ឆ្នាំងនេះ ថាជាល្បែងពន្លត់កំហឹងអ្នកភូមិដែលដើរពីខេត្តនោះមកដល់ភ្នំពេញ ស្វែងរកការជួយអន្តរាគមន៍ពីនាយករដ្ឋមន្ត្រី ហ៊ុន សែន រឿងជម្លោះដីជាមួយក្រុមហ៊ុន ខេ.ឌី.ស៊ី (KDC)។
ក្រុមអ្នកភូមិឡពាង ដែលកំពុងស្នាក់នៅតំបន់បឹងកក់ ប្រកាន់ជំហរមិនត្រឡប់ទៅភូមិវិញឡើយ គឺនៅតែតស៊ូទាមទាររកអន្តរាគមន៍ពីប្រមុខរដ្ឋាភិបាល និងស្ថាប័នពាក់ព័ន្ធអោយជួយដោះស្រាយរឿងដីធ្លី និងដោះលែងអ្នកភូមិ ៥នាក់ដែលកំពុងជាប់ឃុំ។
តំណាងអ្នកភូមិឡពាង អ្នកស្រី អ៊ុំ សុភី ថ្លែងថា តំណាងរាស្ត្រគណបក្សប្រជាជនកម្ពុជា ប្រញាប់ប្រញាល់មកលួងលោមអ្នកភូមិឡពាង ឲ្យត្រឡប់ទៅខេត្តកំពង់ឆ្នាំងវិញ ព្រោះខ្លាចធ្លាក់តំណែងបើយោងតាមប្រសាសន៍នាយករដ្ឋមន្ត្រី កាលពីដើមសប្ដាហ៍នេះ។
អ្នកស្រីថាអ្នកភូមិមិនចាញ់កលនេះទេ បើពិតជាចង់ដោះស្រាយ គឺដោះបញ្ហាតាំងពីមុនអ្នកភូមិមិនទាន់ចាកចេញពីភូមិឡពាង មកភ្នំពេញម្ល៉េះ៖ «ព្រោះថា ពួកខ្ញុំជាប្រជាពលរដ្ឋ អ្នកស្រែចំការ ត្រូវការដី បើអស់ដី ក៏អស់ឆ្នាំបាយ និងអស់ជីវិតខ្លួនឯងដែរ។ សម្រាប់ខ្ញុំ ប្រហែលជាគ្មានទំនុកចិត្តលើគាត់ទេ ព្រោះថា ពួកខ្ញុំមិនជឿជាក់ក្នុងការដោះស្រាយរបស់គាត់ទេ បើគាត់ដោះស្រាយគឺដោះស្រាយបានយូរណាស់ហើយ មិនអូសបន្លាយរយៈពេលជិត ១០ឆ្នាំទេ ដែលឲ្យពួកខ្ញុំតស៊ូយ៉ាងវេទនា ត្រូវគេវ៉ៃ ធ្វើបាប ចាប់ម្ដាយក្មេកខ្ញុំដាក់គុក ឥឡូវនេះចាប់ទាំងប្តីខ្ញុំដាក់គុកទៀត»។
អ្នកស្រី អ៊ុំ សុភី បន្តថា បើទោះជាប្រកាន់ជំហរដូច្នេះក្តី ក៏ពួកគាត់បានស្នើអោយតំណាងរាស្ត្រគណបក្សប្រជាជនកម្ពុជា មណ្ឌលកំពង់ឆ្នាំង អ្នកស្រី កែ ច័ន្ទមុនី ដែលចុះសួរសុខទុក្ខអ្នកមកពីភូមិឡពាង សុំដោះស្រាយសំណើចំនួន ៣ចំណុច៖ «ទី១ ដោះលែងសកម្មជនដីធ្លីទាំង ៥នាក់មកវិញ ឲ្យមានសុវត្ថិភាពដោយគ្មានលក្ខខណ្ឌ។ ទី២ សុំឲ្យដោះស្រាយរឿងដីធ្លីរបស់ពួកខ្ញុំមកវិញជាបន្ទាន់។ ទី៣ បញ្ឈប់ក្រុមហ៊ុននោះ ធ្វើរបងជាបន្ទាន់ ហើយដោះស្រាយប្រគល់ដីឲ្យពួកខ្ញុំវិញមក»។
អ្នកតំណាងរាស្ត្រគណបក្សប្រជាជនកម្ពុជា អ្នកស្រី កែ ច័ន្ទមុនី ថ្លែងថា អាជ្ញាធរដឹងពីសុខទុក្ខ និងការលំបាករបស់អ្នកភូមិឡពាង ទើបអ្នកស្រីមកស្នើសុំឲ្យអ្នកភូមិត្រឡប់ទៅវិញ ហើយចាប់ផ្ដើមដោះស្រាយបញ្ហា អ្នកជាប់ពន្ធនាគារ ៥នាក់សិន។ អ្នកស្រីក៏បានសុំឲ្យពលរដ្ឋដែលបានឡើងមកភ្នំពេញ សរសេរឈ្មោះក្នុងញត្តិសុំដោះស្រាយបញ្ហានៅភូមិឡពាងនោះ ងាយស្រួលដឹងចំនួនអ្នកតវ៉ាពិតប្រាកដ៖ «ឥឡូវយើងដោះម្ដងទាំងអស់ គឺដោះមិនចេញទេ ឥឡូវគិតសំណូមពរធ្វើម៉េច ដោះលែងមនុស្ស ៥នាក់នោះសិន»។
ចំពោះអ្នកស្រី ទេព វន្នី តំណាងអ្នកភូមិបឹងកក់ ថ្លែងកោតសរសើរអ្នកភូមិឡពាង ដើរមកភ្នំពេញ មិនបាន១សប្ដាហ៍ផង ធ្វើឲ្យតំណាងរាស្ត្រគណបក្សប្រជាជនកម្ពុជា ចុះជួបផ្ទាល់ដល់កន្លែងស្នាក់នៅបណ្ដោះអាសន្ន។ ផ្ទុយពីអ្នកភូមិបឹងកក់ មិនដែលមានតំណាងរាស្ត្រគណបក្សប្រជាជនកម្ពុជា មកសាកសួរម្ដងណាទេ ព្រោះការតវ៉ានៅភ្នំពេញ ជិតផ្ទះតំណាងរាស្ត្រទាំងនោះពេក៖ «តំណាងរាស្ត្រពេញមួយភ្នំពេញ នៅក្បែរៗហ្នឹងទាំងអស់។ តំណាងរាស្ត្រគណបក្សប្រជាជនច្រើនណាស់ អត់ដែលឃើញចុះមកសួរសុខទុក្ខពួកខ្ញុំទេ បើថា ចុះមកដាក់កងកម្លាំងមក ដំបងឆក់ ខែល កាំភ្លើង វ៉ៃយកៗតែម្ដង ហើយនិងចាប់ដាក់គុក។ នេះខ្ញុំជូនព័ត៌មានឲ្យបងប្អូនឲ្យដឹងទេ ទោះបីជាមិនទាន់មានដំណោះស្រាយជាផ្លូវការថា គាត់ដោះស្រាយជូនបងប្អូនក៏ដោយ ក៏ជានិមិត្តសញ្ញាមួយថា បងប្អូនមានតម្លៃ មានក្តីសង្ឃឹមខ្លះហើយ ទោះមិនមានច្រើនក៏តិចៗដែរ ដោយសារគាត់ទទួលស្គាល់ថា បងប្អូនជាអ្នកឡពាង»។
តំណាងអ្នកភូមិឡពាង អ្នកស្រី អ៊ុំ សុភី បញ្ជាក់ថា ផ្ទៃដី ១៨២ហិកតារ ដែលអ្នកភូមិឡពាង ៨២គ្រួសារ រង់ចាំការដោះស្រាយទាមទារដីនោះមកវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។