ស្ថិតក្នុងជីវភាពក្រីក្រ អ្នកស្រី ឈុត ឡាក់ កាលពីអំឡុងខែកញ្ញា បានសម្រេចកប់សពកូនប្រុសអ្នកស្រី ដែលស្លាប់ដោយសារថ្នាំពុលនៅក្បែរផ្ទះដែលមានផ្ទៃដីប្រមាណ ៤អា នៅសេសសល់ពីដីចម្ការរបស់គាត់ប្រមាណ ៤ហិកតារ ដែលក្រុមហ៊ុនសម្បទានឈ្មោះ សំណាង អង្គរ បានឈូសឆាយយកដីវិនិយោគដំណាំកៅស៊ូ។
មួយថ្ងៃបន្ទាប់នៃការកប់សពកូនប្រុសនោះ អ្នកស្រី និងប្ដី បានសម្រេចចិត្តគាស់សពនោះចេញពីផ្នូរ ដោយក្តីអាណោចអាធ័ម បន្ទាប់ពីក្រុមសន្តិសុខក្រុមហ៊ុនព្រមានថា ដីដែលកប់សពនោះ ជាដីក្រុមហ៊ុន ហេតុនេះក្រុមហ៊ុននឹងឈូសឆាយផ្នូរនោះចោល ប្រសិនអ្នកស្រីមិនគាស់សពនោះចេញវិញ៖ «ច្រើនលើកច្រើនសាហើយ កូនក៏ស្លាប់លើដីហ្នឹង។ ងាប់មួយខែមុនហ្នឹង ងាប់កន្លែងដីហ្នឹង។ ខ្ញុំរវល់ដើររកប្ដី គេដេញចាប់ដើររកប្ដី មកកូនស្លាប់នៅឯផ្ទះ»។
អ្នកស្រី ឈុត ឡាក់ អាយុ ៥០ឆ្នាំ នៅសល់កូនម្នាក់ និងចៅកំព្រាម្នាក់ក្នុងបន្ទុក។ អ្នកស្រីរស់នៅចំណុចបង្គោលគីឡូម៉ែត្រលេខ១០៩ តាមផ្លូវជាតិលេខ៧៦ ក្នុងឃុំពីរធ្នូ ស្រុកស្នួល ខេត្តក្រចេះ។ ប្ដីអ្នកស្រីមានឈ្មោះ ជីន ចះ បានក្លាយជាមនុស្សបាក់ស្មារតីភ័យខ្លាច ខណៈក្រុមកងរាជអាវុធហត្ថការពារក្រុមហ៊ុន បានព្យាយាមដេញបាញ់ដើម្បីចាប់ខ្លួនគាត់ ដោយសារតែគាត់បានតវ៉ាពីក្រុមហ៊ុនឈូសឆាយយកដីគាត់កាលពីដើមឆ្នាំ២០១៣។
អ្នកស្រីមានប្រសាសន៍បញ្ជាក់ថា នេះគឺជាក្តីឈឺចាប់ដែលគ្រួសារអ្នកស្រីទទួលបានពីគោលនយោបាយចាស់សកម្មភាពថ្មីរបស់រាជរដ្ឋាភិបាលអាណត្តិមុន បន្សល់ឲ្យគាត់ជាប្រជាពលរដ្ឋក្រីក្រដែលពឹងផ្អែកលើដីធ្វើកសិកម្មចិញ្ចឹមជីវិត៖ «ខ្វះស្អីដូងស្វាយមានទាំងអស់ហ្នឹង ប៉ុន្តែគេមិនឲ្យខ្ញុំដាំ ម្តងហើយម្តងទៀតៗ រហូតទល់នឹងឥឡូវហ្នឹង ខ្ញុំលំបាកវេទនា ឲ្យអភិបាលស្រុកគាត់ជួយដោះស្រាយ គាត់ចេះតែបន្លាយៗទល់មកឥឡូវហ្នឹង»។
ទុក្ខត្រួតលើទុក្ខ ខណៈប្ដីប្រពន្ធនេះបានយកសពកូនទៅបូជា ភ្លៀងធ្លាក់ខ្លាំងមិនអាចបូជាសពកូនបានរួចរាល់ គាត់ក៏សម្រេចប្រមូលចំណែកសពដុតមិនឆេះទៅកប់ជាថ្មីទៀត លើដីក្បែរសសរផ្ទះនោះវិញ។
រហូតមកទល់បច្ចុប្បន្ន អ្នកស្រី ឈុត ឡាក់ មិនបានបោះបង់បំណងទាមទារដីរបស់គាត់ ដែលក្រុមហ៊ុនរំលោភយកនៅឡើយ។ ជាងមួយឆ្នាំកន្លងទៅនេះ គាត់ស្វែងរកកិច្ចអន្តរាគមន៍ពីមន្ត្រីអាជ្ញាធរមូលដ្ឋាន និងមន្ត្រីការពារសិទ្ធិមនុស្ស ជួយស្វែងរកយុត្តិធម៌ ឲ្យក្រុមហ៊ុនកាត់ដីប្រគល់មកគ្រួសារអ្នកស្រីវិញ តាមអ្វីដែលប្រមុខរាជរដ្ឋាភិបាលអះអាងថា ដីប្រជាពលរដ្ឋកាន់កាប់ជាក់ស្តែងស្ថិតក្នុងបរិវេណដីសម្បទាន ត្រូវវាស់វែងចេញប័ណ្ណកម្មសិទ្ធិជូនពលរដ្ឋ។
ក្រុមហ៊ុន សំណាង អង្គរ ទទួលបានដីសម្បទាននៅស្រុកស្នួល ជាង ១.២០០ហិកតារ កាលពីឆ្នាំ២០១១ ប៉ុន្តែអ្នកភូមិច្រើនគ្រួសារ រស់នៅក្នុងភូមិជាមួយ អ្នកស្រី ឈុត ឡាក់ អះអាងថា ក្រុមហ៊ុននេះមិនបានវាស់វែងកាត់ចេញផលប៉ះពាល់ដីធ្លីប្រជាពលរដ្ឋត្រឹមត្រូវឡើយ។
អ្នកភូមិឈ្មោះ អែល ម៉ាន មានប្រសាសន៍បញ្ជាក់ថា ក្រុមអាជ្ញាធរមូលដ្ឋានបានព្យាយាមដោះស្រាយគោលនយោបាយវាស់វែងកាត់ដីប្រជាពលរដ្ឋចេញពីដីសម្បទាន ក៏ប៉ុន្តែក្រុមហ៊ុនយល់ព្រមកាត់ចេញតែដីមួយផ្នែក ក្នុងចំណោមដីមួយផ្នែកធំរបស់អ្នកភូមិ មកឲ្យអ្នកភូមិកាន់កាប់ ហើយដីអ្នកភូមិមួយផ្នែកត្រូវក្រុមហ៊ុនកាត់យក។ ចំណែកដី អ្នកស្រី ឈុត ឡាក់ ត្រូវក្រុមហ៊ុនកាត់យក បើទោះបីដីនោះអ្នកភូមិ និងអាជ្ញាធរមូលដ្ឋាន ទទួលស្គាល់ថា អ្នកស្រីបានដាំដុះតាំងពីឆ្នាំ២០០៧ មុនពេលក្រុមហ៊ុនទទួលបានដីសម្បទាននៅតំបន់នោះ៖ «តាមចំណារនាយករដ្ឋមន្ត្រី ចេញថ្ងៃទី៧ ខែ៥ ឆ្នាំ២០១២ ថាដីដែលប្រជាពលរដ្ឋអាស្រ័យផល ហើយមានផ្ទះសម្បែងអ៊ីចឹង ត្រូវវាស់ឲ្យគេ ហើយខាងក្រុមហ៊ុនមុនបានធ្វើតាមផង អាជ្ញាធរស្អីខាងមុខគេឲ្យ តើគេឲ្យតែឲ្យមិនគ្រប់ប្រជាពលរដ្ឋ ក្នុងមួយគ្រួសារគេឲ្យ ២ហិកតារ ទោះដីនោះប៉ះពាល់ដីកៅស៊ូយ៉ាងណា គេធ្វើឲ្យគ្រប់តែ ២ហិកតារ។ គាត់យកអារបស់ច្រើនរួច»។
របាយការណ៍អង្កេតរបស់មន្ត្រីឃ្លាំមើលសិទ្ធិមនុស្សនៃសមាគមអាដហុក (ADHOC) ខេត្តក្រចេះ អោយដឹងថា ដំណាំហូបផ្លែមានខ្នុរ ស្វាយនៅលើដីរបស់ អ្នកស្រី ឈុត ឡាក់ បានផ្តល់ផល។ ដូច្នេះ បង្ហាញថា ដីនេះម្ចាស់ដីបានដាំដុះច្រើនឆ្នាំមកហើយ។ ចំណែកមន្ត្រីភូមិឃុំ ក៏បានចុះហត្ថលេខាលើឯកសារបញ្ជាក់ថា ដី អ្នកស្រី ឈុត ឡាក់ កំពុងកាន់កាប់ជាក់ស្តែងមានជិត ៥អា និងដីរងផលប៉ះពាល់ដោយក្រុមហ៊ុនកាត់យកមានជិត ៤ហិកតារ។
មន្ត្រីផ្នែកអង្កេត លោក ហេង ភារៈ កត់សម្គាល់ថា ដីរបស់គ្រួសារ អ្នកស្រី ឈុត ឡាក់ បានរស់នៅ និងធ្លាប់បានធ្វើកសិកម្មតាំងពីឆ្នាំ២០០៧ រហូតមក។ ហើយបច្ចុប្បន្ន ត្រូវក្រុមហ៊ុនឈូសឆាយយកត្រឹមជើងសសរផ្ទះអ្នកស្រី។ លោកបន្តថា បានអន្តរាគមន៍ដាក់ពាក្យប្ដឹង និងជួបពិភាក្សាជាមួយអាជ្ញាធរស្រុកពាក់ព័ន្ធករណីនេះហើយ ប៉ុន្តែមន្ត្រីអាជ្ញាធរស្រុកមិនទាន់ដោះស្រាយបញ្ហានេះបាននៅឡើយ។ លោករំពឹងថា ក្នុងអាណត្តិដឹកនាំរបស់រាជរដ្ឋាភិបាលថ្មីនេះ អាជ្ញាធរមូលដ្ឋាននឹងយកចិត្តទុកដាក់ស្វែងរកដំណោះស្រាយ ឲ្យក្រុមហ៊ុនប្រគល់ដីជូនគ្រួសារក្រីក្រនេះវិញ៖ «យើងបានទៅជួបលោកអភិបាលស្រុក គង់ គឹមនី រួចហើយ។ យើងកំពុងត្រៀមយុទ្ធសាស្ត្រនៅពេលរដ្ឋាភិបាលថ្មីនេះ យើងអាចនឹងបញ្ជូនសំណុំរឿងហ្នឹងមកខេត្ត ឬអាចទៅថ្នាក់ជាតិទៀត។ ដោយសារលោកអភិបាលស្រុកគាត់មានទំនាក់ទំនងល្អដែរ គាត់ថារង់ចាំគាត់ដោះស្រាយសិន តែអ្វីដែលជាការរង់ចាំវាយូរអ៊ីចឹងណា!»។
ដូចគ្នានេះដែរ ប្រធានរដ្ឋបាលសាលាស្រុកស្នួល លោក អ៊ូ ដានី ទទួលស្គាល់ដែរថា គ្រួសារ អ្នកស្រី ឈុត ឡាក់ ពិតជាអ្នកក្រីក្រ ហើយអាជ្ញាធរស្រុកបានព្យាយាមកោះអញ្ជើញភាគីទាំងពីរមកដោះស្រាយបញ្ហានេះ កាលពីបីខែមុន ប៉ុន្តែមិនបានសម្រេច។ លោកអះអាងថា អាជ្ញាធរស្រុកមិនបានបោះបង់ចោលការស្វែងរកដំណោះស្រាយក្នុងរឿងនេះទេ៖ «មេឃុំគាត់បានបញ្ជាក់អ៊ីចឹងដែរ អ៊ីចឹងឲ្យគាត់ដាក់ពាក្យបណ្ដឹងមក យើងសុខចិត្តដោះស្រាយតាមនីតិវិធី។ ខាងក្រុមហ៊ុនខ្ញុំអញ្ជើញគាត់ពីរ គាត់អត់មានចូលខ្លួនមកៗតែអី»។
ទោះជាយ៉ាងនេះក៏ដោយ បំណងរបស់ អ្នកស្រី ឈុត ឡាក់ គឺអង្វរដោយទទូចសុំឲ្យមន្ត្រីអាជ្ញាធរមូលដ្ឋាន ពិសេសប្រមុខរាជរដ្ឋាភិបាលអាណត្តិថ្មី ប្រញាប់រួសរាន់ចាត់វិធានការរកយុត្តិធម៌ គឺសុំឲ្យក្រុមហ៊ុនប្រគល់ដីមកវិញ ដើម្បីគាត់បានដាំដុះចិញ្ចឹមជីវិតតទៅមុខទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។