អតីតយុទ្ធជនដែលពិការ និងគ្រួសារយោធិនដែលពលីជីវិត និងរំសាយចំនួនប្រមាណ ៥០នាក់ តំណាងឱ្យ ២៣០គ្រួសារ ក្នុងភូមិ២ នៅឃុំអូរសំព័រ ស្រុកម៉ាឡៃ ខេត្តបន្ទាយមានជ័យ នាំគ្នាដាក់ញត្តិរឿងដីធ្លីនៅខុទ្ទកាល័យនាយករដ្ឋមន្ត្រីនៅភ្នំពេញ នៅថ្ងៃទី២៩ សីហា។
អតីតយុទ្ធជនដែលពិការ គ្រួសារយោធិនពលី និងយោធិនរំសាយចំនួន ៥០នាក់ ដែលមកដាក់ញត្តិនៅខុទ្ទកាល័យលោកនាយករដ្ឋមន្ត្រី ហ៊ុន សែន នោះ គឺដើម្បីស្វែងរកជំនួយអន្តរាគមន៍ឱ្យដោះស្រាយបញ្ហាដីធ្លីរបស់ពួកគាត់ ដែលត្រូវក្រុមហ៊ុនថៃ រឹបអូស។
តំណាងគ្រួសារជនពិការនៅភូមិបឹងជង្រុក ឃុំអូរសំព័រ ស្រុកម៉ាឡៃ ខេត្តបន្ទាយមានជ័យ គឺលោក កែវ យ៉យ ថ្លែងថា ដីរបស់ពួកលោកចំនួន ២៣០គ្រួសារ ដែលមានបញ្ហា គឺត្រូវបានឈ្មួញលួចទៅលក់ឱ្យក្រុមហ៊ុនថៃ ហើយដេញពួកលោកចេញ៖ «ដីខាងខ្ញុំអត់បានលក់ទេ តែមេមួយចំនួនវាក្បត់ពីឧត្ដមគតិប្រជាជន របស់ជនពិការ វាលួចយកទៅលក់មិនឱ្យបង្កបង្កើតផលអីទេ តែដីខ្ញុំត្រូវខ្ញុំនៅ។ គោលនយោបាយរបស់រាជរដ្ឋាភិបាល និងសម្ដេចតេជោ គាត់ប្រគល់ឱ្យខ្ញុំម្នាក់ ៥ហិកតារ ត្រូវតែខ្ញុំនៅ។ ខ្ញុំអត់មានលក់មានដូរអីទេ តែជនមួយចំនួនលួចលក់របស់ខ្ញុំ។ ពីមុនមិនទាន់មានទេបង្កាន់ដៃ។ តែបច្ចុប្បន្ន កំពុងតែសុំតេជោឱ្យជួយប្លង់រឹង ដែលកាន់កាប់ទៅមុខទៀត កុំឱ្យគេដេញ កុំឱ្យគេលួចលក់តទៅទៀត កុំឱ្យស្រេចតែគេថា ព្រោះគេមានរដ្ឋអំណាច ខ្ញុំមានតែជើងពិការទៀត»។
លោកបញ្ជាក់ថា ដីជាង ២ពាន់ហិកតារ គឺជាដីនាយករដ្ឋមន្ត្រីប្រកាសចែកឱ្យជនពិការ ៥ហិកតារមួយគ្រួសារ ដើម្បីចិញ្ចឹមជីវិតនៅក្រោយពេលធ្វើសមាហរណកម្មអតីតកងទ័ពខ្មែរក្រហម នៅឆ្នាំ១៩៩៦។
តំណាងជនពិការមួយរូបទៀតរស់នៅភូមិក្បាលទំនប់ ឃុំអូរសំព័រ ដដែល គឺលោក លី ខ្លី មានប្រសាសន៍ថា ដីរបស់ពួកលោកត្រូវបានអតីតមេបញ្ជាការរបស់ពួកលោកដែលមានឈ្មោះ ព្រាប សារុន មេបញ្ជាការកងពលតូច៥១ ម៉ៅ គិរី នាយសេនាធិការវរសេនាធំអឺ៦៧ និង រស់ ធឿន ជាមេបញ្ជាការរង លួចលក់ឱ្យក្រុមហ៊ុនថៃ មួយឈ្មោះ ហៃ សួ៖ «មេដែលលួចលក់ហ្នឹង គឺមេ លោក ម៉ៅ គីរី រស់ ធឿន និងលោក ព្រាប សារុន ឃុបឃិតជាមួយ ទឹម ម៉ន ជាមេឃុំ។ គាត់ចង្អុលថា នេះដីគាត់មួយរយហិកតារ មេឃុំវាយត្រាឃុបឃិតគ្នា លួចលក់បាត់។ ម្នាក់ទៀតឆ្លើយថា នេះដីខ្ញុំមួយហិកតារ ឃុបឃិតគ្នាវាយត្រាលួចលក់បាត់ អត់ឱ្យប្រជាពលរដ្ឋម្ចាស់ដីដឹងទេ រហូតដល់ខ្ញុំបាទទាំងអស់គ្នាសហការគ្នារករឿងប្ដឹងផ្ដល់លិចកើតមក ក្រុមហ៊ុនគេបង្ហាញថា នេះដែលមេឯងលក់។ អ៊ីចឹងយើងចាប់បានក្រដាសហ្នឹងមក ដាក់ពាក្យបណ្ដឹងកាន់តែធ្ងន់ជាងមុនទៀត។ កាន់តែខ្លាំងរហូតដល់ចូលខុទ្ទកាល័យគណៈរដ្ឋមន្ត្រី រហូតចូលភូមិគ្រឹះសម្ដេច យើងយកក្រដាសហ្នឹងមកដាក់ទាំងអស់ ក្រដាសដែលយើងចាប់បានពីក្រុមហ៊ុន បង្ហាញថាមេលក់ហ្នឹងណ៎ា យើងបន្សល់ទុកទល់សព្វថ្ងៃអត់ទាន់បាត់បង់ទេ»។
លោក លី ខ្លី បញ្ជាក់ថា នៅពេលនេះ ក្រុមហ៊ុនដែលបានទិញនោះបានជួលទាហានឱ្យយាមការពារ មិនអនុញ្ញាតឱ្យពួកគាត់ចូលទៅធ្វើស្រែចម្ការបានទេ។ លោកថា បញ្ហាដីធ្លីរបស់ពួកលោក បានអូសបន្លាយជាង ៧ឆ្នាំហើយ ហើយក៏ជាលើកទីពីរដែរដែលលោកមកដាក់ញត្តិរកអន្តរាគមន៍ពីនាយករដ្ឋមន្ត្រី។ នៅព្រឹកថ្ងៃទី២៩ សីហា មន្ត្រីខុទ្ទកាល័យបានចេញមកទទួលញត្តិរបស់ជនពិការទាំងនោះ ហើយប្រាប់នឹងផ្ដល់ដំណឹងដល់ពួកគាត់តាមក្រោយ។
នៅល្ងាចថ្ងៃដដែល លោក លី ខ្លី ឱ្យដឹងថា អតីតអភិបាលខេត្តបន្ទាយមានជ័យ គឺលោក អ៊ុង អឿន បានមកសម្របសម្រួលឱ្យពួកគាត់ត្រឡប់ទៅផ្ទះវិញ ហើយសន្យាថា នឹងពិនិត្យមើលឯកសារពាក់ព័ន្ធឡើងវិញ ហើយដោះស្រាយនៅថ្នាក់មូលដ្ឋានជាថ្មី។
កម្លាំងសន្តិសុខខណ្ឌដូនពេញ ក៏ព្យាយាមបណ្ដេញពួកគាត់ចេញពីកន្លែងដើមពោធិ៍មុខវត្តបទុម បន្ទាប់ពីដាក់ញត្តិហើយ ដោយរង់ចាំទទួលដំណឹងនៅពេលក្រោយ៖ «យើងបានដាក់ញត្តិដាក់អីរៀបចំហើយ។ ខាងខុទ្ទកាល័យរបស់សម្ដេច លោកបានទទួលញត្តិរបស់បងប្អូនហើយ។ អ៊ីចឹងសុំឱ្យបងប្អូនវិលត្រឡប់ទៅវិញ ដើម្បីចាំទទួលដំណឹងពីខុទ្ទកាល័យ។ ចំពោះការប្រមូលផ្ដុំនៅទីនេះ គឺមិនអនុញ្ញាតទៀតទេ។ បើបងប្អូនអស់ភារកិច្ចដាក់ញត្តិហើយ សុំឱ្យវិលត្រឡប់ទៅវិញ ឬក៏មានផ្ទះបងប្អូននៅពេលនេះ អាចរំសាយនៅពេលនេះ»។
ទោះជាព្យាយាមក្រាញនៅទីនោះក្ដី រហូតដល់ល្ងាចថ្ងៃទី២៩ សីហា ដដែល ពួកគាត់សម្រេចរំសាយគ្នាវិញ នៅពេលដែលកងសន្តិសុខបង្ខំពួកគាត់ចំនួន ១៣នាក់ ឱ្យឡើងឡានត្រឡប់ទៅផ្ទះវិញ ហើយជាង ៣០នាក់ផ្សេងទៀត ទៅតាមមធ្យោបាយខ្លួនឯង។
លោក លី ខ្លី តំណាងជនពិការទាំងនោះ ថ្លែងថា មិនបានលទ្ធផលល្អទេ ព្រោះមិនបានបង្កាន់ដៃបញ្ជាក់ការទទួលញត្តិពីខុទ្ទកាល័យ។ លោកសន្យាថា ពួកលោកនឹងមកភ្នំពេញទៀត ប្រសិនបើការដោះស្រាយនៅថ្នាក់ខេត្តមិនបានលទ្ធផលល្អ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។