ប្រជាពលរដ្ឋប្រមាណ ៥០នាក់ តំណាងឲ្យ ៥០គ្រួសារ ដែលរងផលប៉ះពាល់ពីគម្រោងសាងសង់ផ្លូវដែកនៅក្រុងប៉ោយប៉ែត ខេត្តបន្ទាយមានជ័យ កាលពីព្រឹកថ្ងៃទី១៦ ខែកក្កដា នាំគ្នាតវ៉ានៅមុខសាលាក្រុង ទាមទារឲ្យអាជ្ញាធរពាក់ព័ន្ធដោះស្រាយសំណងប៉ះពាល់ឲ្យបានសមរម្យ។ អ្នកភូមិ បញ្ជាក់ថា កន្លងមកអាជ្ញាធរផ្ដល់សំណងដល់ប្រជាពលរដ្ឋតិចតួចពេក មិនសមស្របទៅនឹងតម្លៃនៃទំហំដែលរងផលប៉ះពាល់ឡើយ។
ប្រជាពលរដ្ឋដែលទៅតវ៉ានៅសាលាក្រុងប៉ោយប៉ែត អំពាវនាវឲ្យអាជ្ញាធរខេត្តបន្ទាយមានជ័យ និងមន្ត្រីពាក់ព័ន្ធដោះស្រាយសំណងប៉ះពាល់ និងផ្ដល់ប័ណ្ណកម្មសិទ្ធិដីធ្លីស្របច្បាប់ដល់ពួកគាត់ឲ្យបានឆាប់។
តំណាងប្រជាពលរដ្ឋដែលប៉ះពាល់ពីគម្រោងសង់ផ្លូវដែកម្នាក់ គឺលោក ឆេង ប៊ុនហាក់ រស់នៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ថ្លែងនៅថ្ងៃទី១៦ កក្កដា ថា ប្រជាពលរដ្ឋដែលរងផលប៉ះពាល់ពីគម្រោងសាងសង់ផ្លូវដែកប្រមាណ ៥០គ្រួសាររស់នៅក្រុងប៉ោយប៉ែត ដោយគ្រួសារខ្លះទទួលបានសំណងពីរដ្ឋាភិបាលជាង ១០ដុល្លារ ៣០ដុល្លារ និងខ្លះទៀត ៥០០ដុល្លារអាមេរិកជាដើម។
លោកអះអាងថា ប្រជាពលរដ្ឋដែលប៉ះពាល់នោះ រួមមានដី ផលដំណាំ និងផ្ទះសម្បែង ចំណែកឯសំណងដែលរដ្ឋផ្ដល់ឲ្យពួកគាត់វិញតិចតួច មិនសមស្របទៅនឹងតម្លៃដែលខូចខាតឡើយ៖ «រដ្ឋាភិបាលមិនគោរពទៅតាមគោលនយោបាយរបស់ធនាគារអភិវឌ្ឍន៍អាស៊ី (ADB) នោះទេ។ ពួកយើងខ្ញុំទាមទារនេះ ដើម្បីឲ្យរដ្ឋាភិបាលផ្ដល់ដី និងសំណងផ្សេងទៀតដែលរងផលប៉ះពាល់ជូនពួកយើងខ្ញុំ ទៅតាមតម្លៃទីផ្សារបច្ចុប្បន្ន»។
ឆ្លើយតបនឹងបញ្ហានេះអភិបាលរងក្រុងប៉ោយប៉ែត លោក ម៉ែន សុភ័ណ្ឌ មានប្រសាសន៍ថា ផែនការរបស់រដ្ឋាភិបាលផ្ដល់សំណងជូនប្រជាពលរដ្ឋដែលមានដីប៉ះពាល់ពីគម្រោងសាងសង់ផ្លូវរថភ្លើងចំនួន ៧ម៉ែត្រ និងផ្ដល់សំណងតាមភាពជាក់ស្ដែង។
ចំណែកឯគ្រួសារដែលប៉ះពាល់តិចតួច គឺផ្ដល់សំណងជាប្រាក់បន្តិចបន្តួច ប៉ុន្តែពួកគាត់អាចរស់នៅលើដីនោះបណ្ដោះអាសន្នបាន ដោយគ្រាន់តែជៀសឲ្យផុតពីចំណុចផ្លូវរថភ្លើងចំនួន ៧ម៉ែត្រនោះចេញ។
លោកបន្តថា ប្រជាពលរដ្ឋដែលធ្វើការតវ៉ានោះភាគច្រើនប៉ះពាល់បន្តិចបន្តួច និងគ្រួសារខ្លះរស់នៅតំបន់នោះដែរ តែពុំមានផលប៉ះពាល់ទេ៖ «ប្រជាពលរដ្ឋគាត់អត់ចង់នៅទីតាំងចាស់ដែលធ្លាប់រស់នៅទេ គាត់ចង់ចាកចេញទៅនៅទីតាំងថ្មីវិញ។ បញ្ហានេះ ខាងសាលាក្រុងយើងអត់មានលទ្ធភាពដោះស្រាយឲ្យពួកគាត់បាននោះទេ។ ប៉ុន្តែបន្ទាប់ពីការនេះទៅ យើងនឹងនាំបញ្ហានេះដាក់ទៅថ្នាក់លើដើម្បីដោះស្រាយបន្ត»។
ទោះជាងយ៉ាងនេះក្ដី ប្រជាពលរដ្ឋទាមទារឲ្យអាជ្ញាធរចេញប័ណ្ណកម្មសិទ្ធិដីធ្លីស្របច្បាប់ ប្រសិនបើអាជ្ញាធរតម្រូវឲ្យពួកគាត់រស់នៅលើដីនោះបន្តទៀត ជៀសវាងការបណ្ដេញចេញ។ ប៉ុន្តែអាជ្ញាធរពុំបានផ្ដល់ប័ណ្ណកម្មសិទ្ធិដីធ្លីជូនពួកគាត់នោះទេ។
មន្ត្រីសម្របសម្រួលអង្គការលីកាដូ (Licadho) ខេត្តបន្ទាយមានជ័យ លោក ភុន ឈិន មានប្រសាសន៍ថា ករណីដោះស្រាយសំណងពីផលប៉ះពាល់គម្រោងសាងសង់ផ្លូវរថភ្លើងនៅក្រុងប៉ោយប៉ែត កន្លងទៅ អាជ្ញាធរពាក់ព័ន្ធហាក់មានអំពើពុករលួយនៅក្នុងនោះ។
លោកស្នើឲ្យគណៈកម្មការដោះស្រាយផលប៉ះពាល់ពីគម្រោងនេះ សិក្សាស្រាវជ្រាវឡើងវិញឲ្យបានច្បាស់លាស់ និងមានភាពសុក្រឹតយុត្តិធម៌៖ «ព្រោះកន្លងមក យើងទទួលដំណឹងថា ប្រជាពលរដ្ឋដែលរងផលប៉ះពាល់ពិតប្រាកដមិនទទួលបានការដោះស្រាយនោះទេ។ ចំណែកឯអ្នកដែលមិនមានការប៉ះពាល់សោះ បែរជាទទួលបានសំណងទៅវិញ»។
កន្លងទៅប្រជាពលរដ្ឋដែលរងផលប៉ះពាល់ពីគម្រោងសាងសង់ផ្លូវដែកប្រមាណ ៥០គ្រួសារនោះធ្លាប់តវ៉ាឲ្យអាជ្ញាធរពាក់ព័ន្ធដោះស្រាយផ្ដល់សំណងប៉ះពាល់ឲ្យសមស្របតាមភាពជាក់ស្ដែងជាច្រើនលើកច្រើនសាមកហើយ។ រហូតមកទប់ពេលនេះ ពុំទាន់ទទួលបានលទ្ធផលនៅឡើយទេ។អ្នកភូមិទាំងនោះ ព្រមានថា ប្រសិនបើអាជ្ញាធរពាក់ព័ន្ធមិនដោះស្រាយសមស្របទេ នោះពួកគេនឹងធ្វើការតវ៉ាជាថ្មីទៀតក្នុងពេលឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។