ការអភិវឌ្ឍប្រព័ន្ធប្រឡាយមេរំដោះទឹកជំនន់ នៅក្នុងខេត្តបន្ទាយមានជ័យ កំពុងបង្កផលប៉ះពាល់ដល់ដីស្រែរបស់ប្រជាពលរដ្ឋជាច្រើនគ្រួសារ នៅក្នុងឃុំរហាត់ទឹក ស្រុកមង្គលបុរី ខេត្តបន្ទាយមានជ័យ។ ក្រុមអ្នកភូមិទាំងនោះបញ្ជាក់ថា មានគ្រឿងចក្រជាច្រើនគ្រឿងកំពុងជីកកកាយដីស្រែរបស់ពួកគាត់ជាបន្តបន្ទាប់ ប៉ុន្តែពួកគាត់ពុំទទួលបានសំណងនៃផលប៉ះពាល់នោះឡើយរហូតមកទល់ពេលនេះ។
កសិករជាច្រើនគ្រួសាររស់នៅឃុំរហាត់ទឹក ស្រុកមង្គលបុរី បានអំពាវនាវសុំឲ្យរដ្ឋាភិបាល និងអាជ្ញាធរខេត្តបន្ទាយមានជ័យ គិតគូរដោះស្រាយសំណងលើផលប៉ះពាល់ដីស្រែជូនពួកគាត់។ ដីស្រែជាច្រើនកន្លែង ត្រូវបានគេដាក់គ្រឿងចក្រជាច្រើនគ្រឿងជីកកកាយសាងសង់ប្រព័ន្ធប្រឡាយមេនៅក្នុងខេត្តបន្ទាយមានជ័យ។
ការអភិវឌ្ឍប្រព័ន្ធប្រឡាយមេនេះ បានប៉ះពាល់លើដីស្រែកសិករចំនួនពីរភូមិ ក្នុងឃុំរហាត់ទឹក ស្រុកមង្គលបុរី ខេត្តបន្ទាយមានជ័យ។ អ្នកភូមិថ្លែងថា ប្រព័ន្ធប្រឡាយមេនោះមានទំហំធំ ដែលមានទទឹងជាង ៤០ម៉ែត្រ ត្រូវបានគេដាក់គ្រឿងចក្រជីកអស់រយៈពេលជាច្រើនថ្ងៃ។
អ្នកភូមិឈ្មោះ អ៊ុក កុសល បញ្ជាក់ថា ដីស្រែពួកគាត់ត្រូវបានគេដាក់គ្រឿងចក្រទៅជីកកកាយធ្វើប្រឡាយ ប៉ុន្តែអ្នកភូមិជាម្ចាស់ដីស្រែទាំងនោះពុំបានដឹងនោះឡើយ។
លោកស្រីថា អ្នកភូមិខ្លះពុំមានដីស្រែច្រើននោះទេ។ ជារៀងរាល់ឆ្នាំ ពួកគាត់បានពឹងផ្អែកលើមុខរបរធ្វើស្រែតែប៉ុណ្ណោះ៖ «ដីខ្ញុំប៉ះប្រហែលបីទៅបួនរ៉ៃដែរ គេធ្វើហើយ ប៉ុន្តែគេធ្វើគេអត់ប្រាប់យើង ហើយសំណងក៏អត់មានដែរ។ ខ្ញុំអស់ដីស្រែ ចង់ឲ្យគេជួយសំណងខ្លះអ៊ីចឹង ព្រោះអីខ្ញុំអត់មានអីទេ មានតែស្រែបន្តិចបន្តួច ពេលគេធ្វើអស់ខ្ញុំអត់មានដីស្រែធ្វើ»។
អ្នកភូមិឈ្មោះ សេន ស្រី បញ្ជាក់ថា សកម្មភាពគ្រឿងចក្រកំពុងជីកប្រឡាយបន្តទៅប៉ះពាល់លើដីស្រែ និងដីភូមិរបស់អ្នកស្រុកជាច្រើនគ្រួសារទៀតនៅក្នុងភូមិ៖ «ដីហ្នឹងដីរបស់ខ្ញុំទេ ប៉ុន្តែខ្ញុំធ្វើស្រែប្រាំង។ អ៊ីចឹងខ្ញុំជីកប្រឡាយដាក់លូអស់ប្រហែលជិត ២ពាន់ដុល្លារ។ ដល់ពេល អ៊ីចឹងទៅ ឃើញគេគូសចំណុចសូន្យកន្លែងហ្នឹង ហើយប៉ះពាល់លូមួយកន្លែង ហើយប៉ះពាល់ដីភូមិនេះមួយកន្លែងទៀត»។
ទោះយ៉ាងណា រហូតមកដល់ពេលនេះគេនៅពុំទាន់ដឹងច្បាស់ ពីទំហំនៃផលប៉ះពាល់លើដីស្រែរបស់អ្នកភូមិទាំងនោះជាក់លាក់នៅឡើយ។
ទាក់ទិនបញ្ហានេះ មន្ត្រីនាំពាក្យសាលាខេត្តបន្ទាយមានជ័យ លោក អ៊ុំ រាត្រី បញ្ជាក់ថា នៅខេត្តបន្ទាយមានជ័យ បានរងគ្រោះដោយសារទឹកជំនន់រយៈពេលបីឆ្នាំជាប់គ្នា។
ក្រោយពីមានគ្រោះទឹកជំនន់ជាបន្តបន្ទាប់មកនេះ ក្រសួងធនធានទឹកបានលើកគម្រោងស្ថាបនាប្រឡាយមេរំដោះទឹកនេះឡើង ប៉ុន្តែសកម្មភាពគ្រឿងចក្រសព្វថ្ងៃនេះ គឺបន្តមកពីគម្រោងចាស់ពង្រីកប្រឡាយមេមួយខ្សែ ចេញពីស្រុកបវេល ខេត្តបាត់ដំបង ឆ្លងកាត់ស្រុកមង្គលបុរី ឆ្ពោះទៅក្រុងសិរីសោភ័ណ។
ពាក់ព័ន្ធទៅនឹងការលើកឡើងរបស់អ្នកភូមិ លោកបញ្ជាក់ថា កន្លងមកនៅពេលមានការលើកគម្រោងសាងសង់អ្វីមួយ អាជ្ញាធរតែងតែជូនដំណឹងដល់ប្រជាពលរដ្ឋឲ្យបានដឹង ដើម្បីពិនិត្យ និងដោះស្រាយផលប៉ះពាល់៖ «ផលប៉ះពាល់ហ្នឹង ខាងក្រសួងគាត់ចាត់ចែង វាមិនដែលអត់ទេ កន្លងមកដូចជាប្រឡាយដែលត្រូវពង្រីក យើងខ្ញុំបានចុះសិក្សាផលប៉ះពាល់ជាមួយពួកគាត់។ យើងខ្ញុំតែងតែពិភាក្សាលើសំណូមពរដោះស្រាយសំណងជូនប្រជាពលរដ្ឋ។ យើងធ្វើបានរហូតប្រឡាយ៤ ទៅ ១០គីឡូម៉ែត្រ។ យើងទទួលបានជោគជ័យ ប៉ុន្តែមិនដឹងថា គម្រោងបន្តនេះស្រុកមង្គលបុរី នេះមិនដឹងថា អាជ្ញាធរជាមួយធនធានទឹក។ ខ្ញុំនឹងស្រាវជ្រាវបន្តទៀតជាមួយអាជ្ញាធរមូលដ្ឋានខេត្ត»។
វិទ្យុអាស៊ីសេរី មិនអាចសុំការបញ្ជាក់ពី លោក យឹម ប៊ុនរ៉ុម ប្រធានមន្ទីរធនធានទឹកខេត្តបន្ទាយមានជ័យ ជុំវិញករណីនេះបានទេ។
ប៉ុន្តែអភិបាលខេត្តបន្ទាយមានជ័យ លោក គោ ស៊ុំសារឿត ថ្លែងថា ការស្ដារប្រព័ន្ធប្រឡាយមេនៅក្នុងខេត្តបន្ទាយមានជ័យ នេះ ជាគម្រោងថ្នាក់ជាតិ ដោយមានកិច្ចសហការជាមួយអាជ្ញាធរខេត្តបន្ទាយមានជ័យ។ គម្រោងនេះចាប់ផ្ដើមអនុវត្តក្នុង១ឆ្នាំ ៨គីឡូម៉ែត្រ ចាប់ពីឃុំបត់ត្រង់ ទៅឃុំរហាត់ទឹក ស្រុកមង្គលបុរី ខេត្តបន្ទាយមានជ័យ។ ការដោះស្រាយផលប៉ះពាល់ គឺជាការទទួលខុសត្រូវរបស់មន្ត្រីថ្នាក់មូលដ្ឋាន។
លោកបញ្ជាក់ថា រហូតមកដល់ពេលនេះមានរបាយការណ៍ជុំវិញផលប៉ះពាល់នេះពីថ្នាក់មូលដ្ឋានមកបង្ហាញថា មានប្រជាពលរដ្ឋមួយគ្រួសាររងផលប៉ះពាល់ ហើយសហគមន៍នៅមូលដ្ឋានបានដោះដូរដីស្រែជូនពលរដ្ឋមួយគ្រួសារនោះរួចរាល់ហើយ៖ «ខាងស្រុកគេរាយការណ៍មក គឺមានតែមួយគ្រួសារប៉ះពាល់ដីធំជាងគេ ហើយខាងឃុំគាត់បានស្រុះស្រួលគ្នាកាត់ដីភូមិឲ្យ ដល់បងប្អូនមានបញ្ហាទៀត ខ្ញុំអត់ដឹងដែរ មិនទាន់មានអ្នកណារាយការណ៍មកផ្សេងទៀត។ ខ្ញុំអត់ទាន់ដឹងទេ ចាំមើលឆែកត្រួតពិនិត្យមើល ហើយមានមធ្យោបាយអីសម្របសម្រួលគ្នាឲ្យស្រួល ឲ្យបានផលប្រយោជន៍រួមទាំងអស់គ្នា ចាំមើលខ្ញុំឲ្យក្រុមការងាររបស់ខេត្តចុះទៅជួយពិនិត្យមើល ព្រោះយើងធ្វើជួយបងប្អូនកាត់បន្ថយភាពក្រីក្រ»។
ទន្ទឹមគ្នានេះ លោកអភិបាលខេត្តបញ្ជាក់ថា ក្រសួងធនធានទឹកមានគម្រោងពង្រីកប្រឡាយមេមួយខ្សែទៀតនៅក្នុងខេត្តបន្ទាយមានជ័យ ដើម្បីរំដោះទឹកជំនន់ដែលហូរចាក់ពីប្រទេសថៃ កាត់ក្រុងប៉ោយប៉ែត ជន់លិចខេត្តបន្ទាយមានជ័យ។ រយៈពេលកន្លងមក លោកឧត្ដមសេនីយ៍ កែ គឹមយ៉ាន ក្រោយពីធ្វើការសិក្សាពីផលប៉ះពាល់រួច បានធ្វើរបាយការណ៍ដាក់ជូនលោកនាយករដ្ឋមន្ត្រី ហ៊ុន សែន ដើម្បីមានវិធានការស្ដារប្រព័ន្ធប្រឡាយចាស់ៗ ទាំងនៅក្នុងខេត្តបន្ទាយមានជ័យ ដើម្បីរំដោះទឹកចូលទៅក្នុងបឹងទន្លេសាប។ យ៉ាងណាក៏ដោយ គម្រោងនេះនៅពុំទាន់មានការអនុម័តនៅឡើយ។
ទោះយ៉ាងណា គេសង្កេតឃើញថា របាយការណ៍ស្ដីពីផលប៉ះពាល់របស់មន្ត្រីថ្នាក់មូលដ្ឋាន ដែលមានកិច្ចសហការជាមួយមន្ទីរធនធានទឹកខេត្តបន្ទាយមានជ័យ នេះ គឺបានធ្វើផ្ទុយពីការអះអាងរបស់អ្នកភូមិ។ មិនត្រឹមតែប៉ុណ្ណោះ ក្រុមអាជ្ញាធរមូលដ្ឋានថែមទាំងភូតកុហកថា ពួកគេពុំបានដឹងពីគម្រោងអភិវឌ្ឍន៍នេះថែមទៀត។
ក្រុមអ្នកភូមិថ្លែងថា ការសាងសង់ប្រឡាយមេនេះមានផលប៉ះពាល់ច្រើនទៅលើដីស្រែរបស់អ្នកភូមិ។ ដីស្រែខ្លះប៉ះទាំងស្រុង និងដីស្រែអ្នកភូមិខ្លះ ត្រូវគ្រឿងចក្រកាយអស់ពាក់កណ្ដាល៖ «ការអភិវឌ្ឍមួយនៅឃុំរហាត់ទឹក កំពុងធ្វើប្រឡាយនៅលើដីស្រែរបស់កសិករ ប៉ុន្តែប្រជាជនអត់បានដឹងព័ត៌មាននៃការអភិវឌ្ឍ មេភូមិមេឃុំក៏អត់ដឹង ប្រជាជនខ្លះគាត់បានសួរអ្នកឈូសឆាយថា ខាងរដ្ឋគេធ្វើ ប៉ុន្តែខាងភូមិឃុំនៅតែអត់ដឹងដដែល បើគិតទៅវាប៉ះឡើងពីរភូមិ ភូមិកាមុល ឆ្លងទៅភូមិចក ឃុំរហាត់ទឹក ស្រុកមង្គលបុរី ប៉ះពាល់ខ្លះអស់រលីងទៅខ្លះទៀតអស់ពាក់កណ្ដាល»។
ប្រជាពលរដ្ឋនៅឃុំរហាត់ទឹក ស្រុកមង្គលបុរី ដែលមានដីស្រែប៉ះពាល់នោះ ក្រៅពីការអំពាវនាវសុំរដ្ឋាភិបាលគិតគូរសំណងជូនពួកគាត់នោះ ពួកគាត់ក៏បានស្នើឲ្យក្រុមការងារអាជ្ញាធរខេត្តបន្ទាយមានជ័យ ចុះទៅពិនិត្យទីតាំងដីស្រែជាក់ស្ដែងដែលកំពុងបាត់បង់ ដោយសារការអភិវឌ្ឍប្រព័ន្ធប្រឡាយមេនៅក្នុងខេត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។