ប្រជាពលរដ្ឋជនជាតិដើមភាគតិចព្នង នៅស្រុកអូររាំង ខេត្តមណ្ឌលគិរី មិនទទួលយកការសម្របសម្រួលកាត់ដីដែលមានផលប៉ះពាល់ប្រជាពលរដ្ឋ ចេញពីដីសម្បទានសេដ្ឋកិច្ចក្រុមហ៊ុនមេហ្គាហ្វើស (Mega First Corporation Berhad) តាមរយៈយន្តការរបស់អាជ្ញាធរស្រុកឡើយ។
ចំណែកមន្ត្រីអាជ្ញាធរ អំពាវនាវឲ្យប្រជាពលរដ្ឋពិចារណាយោគយល់ដល់គម្រោងអភិវឌ្ឍន៍របស់រាជរដ្ឋាភិបាល ដើម្បីផលប្រយោជន៍ជាតិ និងប្រជាពលរដ្ឋនៅតំបន់នោះ។
ការដោះស្រាយវិវាទដីធ្លីរបស់សហគមន៍ជនជាតិដើមភាគតិចនៅឃុំដាក់ដាំ ស្រុកអូររាំង ខេត្តមណ្ឌលគិរី មិនបានលទ្ធផលល្អទេ ដោយសារតែអ្នកភូមិនៅតែបន្តទាមទារឲ្យលុបចោលអាជ្ញាប័ណ្ណផ្តល់ដីសម្បទានរបស់ក្រុមហ៊ុនមេហ្គាហ្វើស ដើម្បីរក្សាតំបន់នោះទុកអភិរក្សសម្រាប់វប្បធម៌ប្រពៃណីជនជាតិដើមភាគតិច។
អាជ្ញាធរខេត្តមណ្ឌលគិរី ចាត់វិធានការដោះស្រាយញត្តិតវ៉ារបស់ពលរដ្ឋភ្លាមៗ បន្ទាប់ពីអ្នកភូមិដង្ហែញត្តិជាក់ជូនអាជ្ញាធរខេត្ត កាលពីថ្ងៃទី២ ខែឧសភា។ អាជ្ញាធរស្រុកអូររាំង និងអាជ្ញាធរឃុំដាក់ដាំ បានអញ្ជើញតំណាងអ្នកភូមិប្រមាណ ៤០នាក់មកពីភូមិចំនួនពីរក្នុងឃុំប៊ូស្រា និងបីភូមិក្នុងឃុំដាក់ដាំ មកប្រជុំគ្នានៅភូមិពូលេះ នៅព្រឹកថ្ងៃទី៣ ខែឧសភា។
ក្នុងកិច្ចជួបប្រជុំគ្នានេះ តំណាងសហគមន៍ លោក ទឺយ ធិ អះអាងថា អាជ្ញាធរបានសម្របសម្រួលឲ្យតំណាងចាស់ទុំសហគមន៍ ចង្អុលបង្ហាញទីតាំងមានផលប៉ះពាល់ ដើម្បីកាត់ចេញពីដីសម្បទាន ក៏ប៉ុន្តែអ្នកភូមិមិនយល់ស្របទៅនឹងយន្តការដោះស្រាយបែបនេះឡើយ។ ចាស់ទុំ និងប្រជាពលរដ្ឋ ទាមទារឲ្យរាជរដ្ឋាភិបាល និងក្រសួងពាក់ព័ន្ធ លុបចោលអាជ្ញាប័ណ្ណផ្តល់ដីនៅតំបន់នោះ ប្រយោជន៍រក្សាទុកព្រៃឈើ ប្រភពទឹក និងតំបន់វប្បធម៌អ្នកភូមិអភិរក្សទុកជាប្រយោជន៍ផ្នែកបរិស្ថាន និងដើម្បីរក្សាវប្បធម៌ប្រពៃណី និងជីវភាពរស់នៅរបស់ជនជាតិដើមភាគតិច ដែលរស់អាស្រ័យផលអនុផលព្រៃឈើនៅតំបន់នោះ៖ «អភិបាលស្រុកគេមកពិភាក្សាព្រឹកហ្នឹង ទាំងអស់គ្នានិយាយ ចាស់ៗទាំងអស់និយាយខ្លាំងៗដែរ។ ប្រជាពលរដ្ឋមិនឲ្យទេតំបន់ហ្នឹង ឲ្យតែជាប់ភូមិទាំងប៉ុន្មានត្រង់ហ្នឹងមានខ្មោចផង មានព្រៃត្រណមផង គេសែនព្រេន ការកូនចៅ កន្លែងហ្នឹងគេអត់ឲ្យទេ»។
ក្រសួងបរិស្ថាន បានផ្តល់ដីជាង ៩ពាន់ហិកតារពីតំបន់កង់រឡង់ ជាប់ដែនជម្រកសត្វព្រៃភ្នំណាមលៀ រហូតទៅទល់នឹងព្រំដែនប្រទេសវៀតណាម ទៅឲ្យក្រុមហ៊ុនមេហ្គាហ្វើស វិនិយោគដំណាំកសិឧស្សាហកម្ម ក៏ប៉ុន្តែសហគមន៍ជនជាតិដើមភាគតិចព្នង នៅតំបន់នោះអះអាងថា តំបន់នោះ គឺជាអតីតភូមិចាស់បុរាណរបស់ពួកគាត់មានប្រមាណ ១០ភូមិ ដែលបន្សល់នូវផ្នូរសពដូនតា ដំណាំហូបផ្លែ និងដើមរកា និមិត្តរូបប្រពៃណីរៀបការជនជាតិដើមភាគតិច តំបន់សែនព្រេន និងជាពិសេស តំបន់នោះជាតំបន់ព្រៃស្រោង ជម្រកសត្វព្រៃ និងមានអូរធម្មជាតិចំនួនពីរ ជាប្រភពទឹកសំខាន់សម្រាប់ពលរដ្ឋជនជាតិដើមប្រើប្រាស់ជាច្រើនភូមិ។
ទាក់ទិនករណីនេះ មេឃុំដាក់ដាំ លោក សម វណ្ណី សម្ដែងទុទ្ទិដ្ឋិនិយមចំពោះការជួបប្រជុំគ្នានេះ ពីព្រោះលោកថា មិនចេះដោះស្រាយបញ្ហាជាមួយសហគមន៍នោះឡើយ៖ «អាហ្នឹងរដ្ឋជាមួយសហគមន៍ ខ្ញុំមិនចេះឆ្លើយទេ សុំប៉ុណ្ណឹង»។
ចំណែកអភិបាលស្រុកអូររាំង លោក នង ទុណ្ណារី ចាត់ទុកការបដិសេធដំណោះស្រាយសម្របសម្រួលរបស់អាជ្ញាធរ ថាជាជំហានដំបូងដែលសហគមន៍មិនទាន់បានយល់ដឹងស៊ីជម្រៅពីផែនការអភិវឌ្ឍន៍ និងលក្ខណៈបច្ចេកទេសដែលរាជរដ្ឋាភិបាលបានចុះកិច្ចសន្យាជាមួយក្រុមហ៊ុន មុននឹងផ្តល់អាជ្ញាប័ណ្ណធ្វើអាជីវកម្មឲ្យក្រុមហ៊ុន។ លោកថ្លែងថា នឹងព្យាយាមបន្តជជែកជាមួយចាស់ទុំតំណាងសហគមន៍ ផ្ដោតទៅលើផលប៉ះពាល់ប្រជាពលរដ្ឋ និងការអភិវឌ្ឍរបស់រាជរដ្ឋាភិបាល ដើម្បីបង្កើនការយល់យោគរវាងការអភិរក្សរបស់សហគមន៍ និងការអភិវឌ្ឍរបស់រាជរដ្ឋាភិបាល៖ «គាត់បានលើកឡើងអ៊ីចឹង ប៉ុន្តែពាក់ព័ន្ធបញ្ហាហ្នឹង ខ្ញុំឲ្យគាត់ពិចារណា និងជជែកគ្នា។ ខ្ញុំនឹងព្យាយាមជួបគាត់ ដើម្បីជជែកគ្នាក្នុងលក្ខណៈគ្រួសារ ក្នុងនាមជាអាជ្ញាធរជាមួយពលរដ្ឋឲ្យមានការជិតដិតគ្នា ហើយយោគយល់គ្នា ដើម្បីរក្សាផលប្រយោជន៍ជូនគាត់ រក្សាផលប្រយោជន៍ជូនរដ្ឋាភិបាល និងក្រុមហ៊ុនដែលគាត់បានចំណាយទុន»។
ទោះជាយ៉ាងនេះក្តី មន្ត្រីសមាគមការពារសិទ្ធិមនុស្សអាដហុក (adhoc) ខេត្តមណ្ឌលគិរី លោក សុក រដ្ឋា កត់សម្គាល់ថា នេះជាលើកដំបូងដែលអាជ្ញាធរមូលដ្ឋានឈរលើដំណោះស្រាយពិភាក្សាជាមួយពលរដ្ឋសហគមន៍ ស្ដីពីផលប៉ះពាល់ទាក់ទិនការផ្តល់ដីសម្បទានសេដ្ឋកិច្ច។ លោកថា មិនទាន់ហួសពេលទេ ព្រោះក្រុមហ៊ុនទើបដំណើរការឈូសឆាយ។ ហេតុនេះ អាជ្ញាធរត្រូវសុំគោលការណ៍ផ្អាកសកម្មភាពឈូសឆាយរបស់ក្រុមហ៊ុនជាបណ្ដោះអាសន្ន ហើយបន្តពិភាក្សាជាមួយសហគមន៍ដោយតម្លាភាព និងផ្តល់យុត្តិធម៌ពិតប្រាកដដល់ជនជាតិដើមភាគតិចនៅតំបន់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។