ក្រុមហ៊ុនមួយបានយកកម្លាំងប៉ូលិស និងក្រុមសន្តិសុខរបស់ខ្លួន ចូលឈូសឆាយដីព្រៃការពាររបស់ជនជាតិដើមភាគតិចព្នងក្នុងខេត្តក្រចេះ។ ពលរដ្ឋថា ការឈូសឆាយដីព្រៃនេះ ស្មើនឹងសម្លាប់ពួកគេ ហើយពេលនេះពលរដ្ឋកំពុងស្វែងរកអន្តរាគមន៍ពីសង្គមស៊ីវិល និងស្ថាប័នរដ្ឋ។
ត្រាក់ទ័រពីរគ្រឿងរបស់ក្រុមហ៊ុនដូវទឺសៃហ្គន ឈូសឆាយលើដីព្រៃការពារជនជាតិដើមភាគតិចព្នង បើទោះជាមានការតវ៉ាពីក្រុមប្រជាពលរដ្ឋ មិនឲ្យឈូសឆាយក្ដី។ ក្រុមសន្តិសុខចំនួន១០នាក់របស់ក្រុមហ៊ុនទទួលបានកិច្ចការពារពីកម្លាំងប៉ូលិស បានយកត្រាក់ទ័រពីរគ្រឿង មកឈួសឆាយដីនោះ បានពីរថ្ងៃមកហើយ គិតដល់ថ្ងៃទី២៩ ខែវិច្ឆិកា។
ប្រជាពលរដ្ឋរស់នៅក្នុងភូមិផ្អែរ ឃុំថ្មី ស្រុកចិត្របុរី ខេត្តក្រចេះ ឲ្យដឹងថា កម្លាំងក្រុមហ៊ុនដែលឈូសឆាយនេះ មិនស្ដាប់ការទាមទាររបស់ពលរដ្ឋស្នើឲ្យបញ្ឈប់ឡើយ។ លោកថា ការរស់នីរបស់ជនជាតិដើមភាគតិចព្នង ប្រចាំថ្ងៃគឺត្រូវការព្រៃឈើជាចាំបាច់ ព្រោះអ្នកភូមិគ្មានអ្វីទីពឹងក្រៅពីព្រៃឈើទេ៖ «អំពាវនាវសុំឲ្យជួយផង ! អ្នកណាអាចជួយបានជួយផង បើអស់ព្រៃគឺអ្វីអស់អ្វីៗទាំងអស់»។
ក្រុមហ៊ុនដូវទឺសៃហ្គន មានបញ្ហាដីធ្លីជាមួយប្រជាពលរដ្ឋចាប់តាំងពីខែមេសាឆ្នាំ២០១៤ ដែលវិនិយោគលើផ្ទៃដីចំនួន៩ពាន់ហិកតារ (ប្រាំបួនពាន់ហិកតារ)។ ពលរដ្ឋចំនួន១៧៩ បានដាក់ពាក្យប្ដឹងទាស់ចំពោះការឈូសឆាយនេះ មកសមាគមការពារសិទ្ធិមនុស្សអាដហុកប្រចាំខេត្តក្រចេះ។
ទោះបែបនេះក្ដី ឆ្លើយតបចំពោះការចោទប្រកាន់របស់ពលរដ្ឋ តំណាងក្រុមហ៊ុនដូវទឺសៃហ្គន លោក កែវ សុវណ្ណ ថ្លែងថា ក្រុមហ៊ុនមិនទាន់បានឈូសឆាយនៅលើដីព្រៃនេះទេ ដោយគ្រាន់តែជាការកំណត់ព្រំដីប៉ុណ្ណោះ។ ចំពោះករណីដែលថា មានកម្លាំងប៉ូលិស ចុះមកការពារគ្រឿងចក្រ តំណាងក្រុមហ៊ុនរូបនេះ ថាក្រុមហ៊ុនលោកមិនដឹងឡើយ នេះជាចំណាត់ការអាជ្ញាធរស្រុក៖ «អត់មានការឈូសឆាយទេ គឺមានតែកាយព្រំ យើងមិនបានធ្វើអីលើដីគាត់ទេ»។
បន្ទាប់ពីមានការចូលឈូសឆាយនេះ ក្រុមប្រជាពលរដ្ឋនាំគ្នា មកសុំអន្តរាគមន៍ពីអភិបាលខេត្តក្រចេះ ប៉ុន្តែមិនបានជួបលោកអភិបាលទេ ព្រោះជាថ្ងៃសម្រាក។
យ៉ាងណាក៏ដោយ អភិបាលស្រុកចិត្របុរី ខេត្តក្រចេះ លោក សួន ញ៉ាក មានប្រសាសន៍ថា កម្លាំងប៉ូលិសដែលចុះអន្តរាគមន៍នោះ គឺខ្លាចក្រុមពលរដ្ឋដុតគ្រឿងចក្ររបស់ក្រុមហ៊ុន ដែលធ្វើសកម្មភាព។ លោកអភិបាលស្រុកថា កន្លងមកអាជ្ញាធរស្រុក បានចុះដោះស្រាយចំនួន០៩ដងមកហើយ។
លោកបន្តថា អាជ្ញាធរមិនអាចផ្ដល់ដីព្រៃការពារបន្ថែម ដូចដែលពលរដ្ឋទាមទារឡើយ៖ «យើងខ្លាចពលរដ្ឋទៅបំផ្លាញគ្រឿងចក្ររបស់ក្រុមហ៊ុន យើងភ័យណាស់ខ្លាចមានអំពើហិង្សា»។
សង្គមស៊ីវិលទាមទារឲ្យរដ្ឋាភិបាល និងអាជ្ញាធរខេត្ត ផ្ដល់អាទិភាពជាចម្បងដល់ជនជាតិដើមភាគតិច ជាជាងការអភិវឌ្ឍន៍ខ្វះការអភិរក្ស។ អ្នកសម្របសម្រួលអង្គការសិទ្ធិមនុស្សអាដហុក លោក ហេង ភារៈ មានប្រសាសន៍ថា ប្រសិនបើអាជ្ញាធរមិនគិតគូរ ជនជាតិដើមភាគតិចទេ អាចនឹងធ្វើឲ្យពួកគេ ប្រើអំពើហិង្សាដើម្បីដោះស្រាយបញ្ហា។ លោកថា ការឈូសឆាយនេះ នឹងធ្វើឲ្យបាត់បង់ទំនៀមទម្លាប់ប្រពៃណីជនជាតិដើមភាគតិច៖ «ក្នុងនាមយើងជាសង្គមស៊ីវិលព្រួយបារម្ភខ្លាចកើតមានអំពើហិង្សាណាមួយ បើសិនដោះស្រាយបែបនេះ»។
ក្រុមប្រជាពលរដ្ឋទាមទារដីព្រៃការងារពីអាជ្ញាធរស្រុកចំនួន១ពាន់ ហិកតារបន្ថែម ប៉ុន្តែអាជ្ញាធរស្រុកផ្ដល់ឲ្យបានតែ ៥៣០ហិកតារប៉ុណ្ណោះ។
ក្រុមជនជាតិជនដើមភាគតិចព្នងដែលមានបញ្ហាដីធ្លី លើកឡើងថា ប្រសិនបើអាជ្ញាធរខេត្តក្រចេះមិនអាចរកដំណោះស្រាយជួនពួកគេបាន ពួកគេនឹងនាំគ្នាមកតវ៉ានៅភ្នំពេញ រកអន្តរាគមន៍ពីលោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។