តំណាងប្រជាពលរដ្ឋចំនួន ៤ភូមិ នៅខេត្តកំពង់ឆ្នាំង បានធ្វើដំណើរមកភ្នំពេញ ដើម្បីដាក់ញត្តិជូនស្ថាប័នរដ្ឋាភិបាល ស្នើឲ្យជួយបញ្ឈប់សកម្មភាពប្រើគ្រឿងចក្ររបស់ក្រុមហ៊ុន ខេ.ឌី.ស៊ី (KDC) ដែលកំពុងឈូសឆាយទៅលើដីធ្លីពលរដ្ឋជិត ៩០គ្រួសារនៅឃុំតាជេស។
តំណាងពលរដ្ឋឃុំតាជេស ប្រមាណ ៨០នាក់ បានប្រមូលផ្តុំគ្នាតវ៉ានៅមុខតុលាការសាលាឧទ្ធរណ៍នៅព្រឹកថ្ងៃចន្ទ ទី២៣ ខែមិថុនា ឆ្នាំ២០១៤។ ប្រជាពលរដ្ឋបានដាក់ញត្តិជូនខុទ្ទកាល័យលោកនាយករដ្ឋមន្ត្រី ហ៊ុន សែន តុលាការសាលាដំបូង និងក្រសួងយុត្តិធម៌ជាដើម។
តំណាងពលរដ្ឋឈ្មោះ លោក សៀង ហេង ឲ្យដឹងថា គោលបំណងនៃការដាក់ញត្តិនេះ គឺស្នើឲ្យរដ្ឋាភិបាលជួយដោះស្រាយទំនាស់ដីធ្លី ដែលត្រូវក្រុមហ៊ុន ខេ.ឌី.ស៊ី របស់អ្នកស្រី ជា ខេង ប្រើគ្រឿងចក្រជីកប្រឡាយ និងធ្វើរបងព័ទ្ធរំលោភយកដីធ្លីពលរដ្ឋជិត ៩០គ្រួសារ៖ «បើគ្មានដំណោះស្រាយពីក្រុមហ៊ុន ឬរដ្ឋាភិបាល និងអាជ្ញាធរពាក់ព័ន្ធផ្សេងៗទេ គឺពួកខ្ញុំមានតែទៅកាន់កាប់នៅលើដីផ្ទាល់ និងប្រឈមជាមួយក្រុមហ៊ុន។ បច្ចុប្បន្ននេះក្រុមហ៊ុននៅតែមានៈធ្វើរបងព័ទ្ធ»។
ពលរដ្ឋរងគ្រោះផ្សេងទៀតក៏បានទទូចដល់លោកនាយករដ្ឋមន្ត្រី ហ៊ុន សែន ជួយបញ្ឈប់សកម្មភាពចក្រក្រុមហ៊ុន ខេ.ឌី.ស៊ី របស់អ្នកស្រី ជា ខេង ដែលត្រូវជាភរិយាលោក ស៊ុយ សែម រដ្ឋមន្ត្រីក្រសួងរ៉ែនិងថាមពល ឲ្យបានឆាប់៖ «ដាក់ពាក្យបណ្ដឹងទៅក្រសួងយុត្តិធម៌ ដើម្បីឲ្យជួយអន្តរាគមន៍ទៅខាងក្រុមហ៊ុន ខេ.ឌី.ស៊ី ដើម្បីឲ្យផ្អាកឈូសឆាយ និងធ្វើរបងនៅលើដីមានទំនាស់។ ក្រុមហ៊ុន.ខេ.ឌី.ស៊ី របស់អ្នកស្រី ជា ខេង ប្រពន្ធឯកឧត្ដម ស៊ុយ សែម រដ្ឋមន្ត្រីក្រសួងរ៉ែ និងថាមពល។ ខាងក្រុមហ៊ុនហ្នឹងគេបានធ្វើរបង និងជីកប្រឡាយហ៊ុមព័ទ្ធដីពលរដ្ឋពួកខ្ញុំ មានផ្ទៃដីជាង ៥០០ហិកតារ»។
មន្ត្រីតំណាងខុទ្ទកាល័យប្រមុខដឹកនាំ និងមន្ត្រីតុលាការ ឬក្រសួងយុត្តិធម៌ជាដើម ចេញមកទទួលយកញត្តិ ប៉ុន្តែមិនបានបញ្ជាក់ថា នឹងដោះស្រាយនៅពេលណាទេ។
ទាក់ទិនបញ្ហានេះ តំណាងក្រុមហ៊ុន ខេ.ឌី.ស៊ី លោក ថៃ ហ៊ី បានបដិសេធមិនធ្វើអត្ថាធិប្បាយតាមទូរស័ព្ទទេ នៅថ្ងៃចន្ទ ទី២៣ ខែមិថុនា។
បន្ទាប់ពីបានដាក់ញត្តិជូនស្ថាប័នរដ្ឋាភិបាល តំណាងពលរដ្ឋមានទំនាស់ដីធ្លីនៅឃុំតាជេស ក៏បានដាក់ញត្តិជូនការិយាល័យឧត្ដមស្នងការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ដើម្បីស្នើឲ្យលោក សុរិយា ស៊ូប៊ែឌី (Surya Subedi) អ្នករាយការណ៍ពិសេសអង្គការសហប្រជាជាតិ ជួយអន្តរាគមន៍ទៅរដ្ឋាភិបាល ឲ្យដោះស្រាយវិវាទនេះជូនពួកគាត់។
តំណាងពលរដ្ឋឃុំតាជេស ឲ្យដឹងថា ទំនាស់ដីធ្លីជាមួយក្រុមហ៊ុន ខេ.ឌី.ស៊ី របស់អ្នកស្រី ជា ខេង ភរិយា លោក ស៊ុយ សែម កើតមានតាំងពីឆ្នាំ២០០១ មកម្ល៉េះ។ ទំនាស់នេះប្រជាពលរដ្ឋ ធ្លាប់បានដាក់ពាក្យបណ្ដឹងជូនអាជ្ញាធរពាក់ព័ន្ធខេត្តកំពង់ឆ្នាំង និងដាក់ជូននាយករដ្ឋមន្ត្រី ហ៊ុន សែន ទីស្ដីការគណៈរដ្ឋមន្ត្រី ស្ថាប័នព្រះមហាក្សត្រ ក្រសួងរៀបចំដែនដីនគរូបនីយកម្មនិងសំណង់ គណៈកម្មាធិការសិទ្ធិមនុស្សរដ្ឋាភិបាល អង្គភាពប្រឆាំងអំពើពុករលួយ ក្រសួងយុត្តិធម៌ ស្ថាប័នតុលាការ ស្ថាប័នរដ្ឋសភា និងព្រឹទ្ធសភា សរុបមានចំនួន ១១០បណ្ដឹងរួចមកហើយ ប៉ុន្តែស្ថាប័នទាំងនេះមិនបានដោះស្រាយជូនទេកន្លងមក។ ផ្ទុយទៅវិញ បើជាបណ្ដឹងរបស់អ្នកស្រី ជា ខេង វិញ សូម្បីតែតាមទូរស័ព្ទ ក៏ស្ថាប័នទាំងនោះចាត់ការដោយប្រញាប់ប្រញាល់ដែរ។ ជាក់ស្ដែងមានតំណាង ៧នាក់ ត្រូវតុលាការចាប់ដាក់ពន្ធនាគាររ និងពលរដ្ឋចំនួន ១២នាក់ផ្សេងទៀតជាប់បណ្ដឹងនៅតុលាការ។
ពលរដ្ឋឃុំតាជេស ចាត់ទុកទង្វើរបស់មន្ត្រីតុលាការ និងស្ថាប័នរដ្ឋខាងលើបង្ហាញឲ្យឃើញពីការរើសអើងក្នុងការផ្តល់យុត្តិធម៌រវាងអ្នកមាននិងអ្នកក្រីក្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។