ក្រុមប្រជាពលរដ្ឋបញ្ជាក់នៅថ្ងៃទី១២ ខែធ្នូ ថា ក្រុមអ្នកភូមិទន្ទឹងរង់ចាំចម្លើយ ឬដំណោះស្រាយពីអាជ្ញាធរទាំងអស់សង្ឃឹម ខណៈដែលសំណើសុំកិច្ចអន្តរាគមន៍របស់ខ្លួនតាំងពីឆ្នាំ២០១០ មិនទទួលបានលទ្ធផលអ្វីសោះ។
ប្រជាពលរដ្ឋរស់នៅភូមិត្រពាំងត្រាច ចំនួន ៣៣គ្រួសារ ដែលបាននាំគ្នាផ្ដិតមេដៃប្ដឹងមេភូមិរបស់ខ្លួនទាក់ទងនឹងបញ្ហាប្រព្រឹត្តអំពើពុករលួយក្នុងរឿងដីរួមរបស់ភូមិ និងការនិយមបក្សពួក កំពុងតែព្រួយបារម្ភអំពីសុវត្ថិភាព បន្ទាប់ពីមេភូមិឈ្មោះ មាស សៀប បានគំរាមប្ដឹងប្រជាពលរដ្ឋចាប់ដាក់គុក និងចោទប្រកាន់ពួកគាត់ថាជាមនុស្សរបស់គណបក្សប្រឆាំង។
ប្រជាពលរដ្ឋម្នាក់ក្នុងចំណោម ៣៣គ្រួសារ លោក ថន ថៃ មានប្រសាសន៍ថា មេភូមិបានប្រើពាក្យគំរាមកំហែងមកលើប្រជាពលរដ្ឋជាច្រើនលើកច្រើនសា និងបានព្រមានប្ដឹងបកទៅប្រជាពលរដ្ឋវិញទាក់ទងនឹងរឿងដីរួមរបស់ភូមិនេះ៖ «នៅបុណ្យសង្ឃទានគេនៅក្នុងភូមិហ្នឹង ដល់ពេលគេចប់បុណ្យពេលថ្ងៃត្រង់ គាត់លើកថា អ្នកដែលប្ដឹងហ្នឹង គឺជាគណបក្សប្រឆាំង។ ហ៊ុន សែន អី ហេង សំរិន អី ជា ស៊ីម អី ខ្ញុំធ្លាប់ទៅគុយទាវជាមួយហើយ អ្នកឯងប្ដឹងអីប្ដឹងទៅ គាត់ថាអ៊ីចឹង។ គាត់និយាយហ្នឹងគឺខែ៦ ឆ្នាំ២០១៣»។
ចំណែកពលរដ្ឋម្នាក់ទៀតបានថ្លែងក្នុងលក្ខខណ្ឌសុំមិនបញ្ចេញឈ្មោះឲ្យដឹងថា នៅអំឡុងឆ្នាំ២០០៩ ខណៈដែលខាងមន្ត្រីសុរិយោដីខេត្តកំពង់ឆ្នាំង ចុះវាស់វែងផ្ដល់ប្លង់កម្មសិទ្ធិជូនប្រជាពលរដ្ឋ ស្រាប់តែមេភូមិត្រពាំងត្រាច បែងចែកដីរួមភូមិ ដែលមានទំហំជាង ១ហិកតារជា ៥ចំណែកទៅឲ្យបក្សពួករបស់ខ្លួន ហើយឃើញបែបនេះប្រជាពលរដ្ឋក្នុងភូមិមិនសុខចិត្ត ក៏នាំគ្នាផ្ដិតមេដៃប្ដឹងមេភូមិរូបនោះទៅអាជ្ញាធរឃុំ រហូតដល់ខេត្ត តាំងពីឆ្នាំ២០១០ ក៏ប៉ុន្តែរហូតមកដល់ពេលនេះនៅមិនទាន់ឃើញមានដំណោះស្រាយអ្វីនៅឡើយ។
វិទ្យុអាស៊ីសេរីមិនអាចទាក់ទងមេភូមិត្រពាំងត្រាច លោក មាស សៀប ដើម្បីសុំការពន្យល់ជុំវិញការចោទប្រកាន់របស់ប្រជាពលរដ្ឋនេះបានទេ នៅថ្ងៃទី១២ ខែធ្នូ។ ចំណែកអភិបាលខេត្តកំពង់ឆ្នាំង លោក ឈួរ ច័ន្ចឌឿន ក៏មិនអាចសុំការអត្ថាធិប្បាយជុំវិញបញ្ហានេះបានដែរ ដោយទូរស័ព្ទរបស់លោកមានអ្នកលើកជំនួស ហើយប្រាប់ថា លោកកំពុងជាប់រវល់។
ទោះជាយ៉ាងណា អភិបាលស្រុករលាប្អៀរ លោក ឈឹម វុទ្ធា មានប្រសាសន៍បញ្ជាក់ថា ករណីនេះលោកបានចុះសិក្សា និងបញ្ជូនរបាយការណ៍ទៅសាលាខេត្តរួចហើយ ក៏ប៉ុន្តែលោកបដិសេធមិនធ្វើអត្ថាធិប្បាយពិស្ដារជុំវិញករណីនេះតាមរយៈទូរស័ព្ទនោះទេ នៅថ្ងៃទី១២ ខែធ្នូ៖ «បាទៗ! អាហ្នឹងយើងកំពុងតែដោះស្រាយហើយ ខ្ញុំកំពុងរាយការណ៍ជូនទៅខេត្តពាក់ព័ន្ធនឹងបញ្ហាទីតាំងកន្លែងបេឡារបស់ភូមិត្រពាំងត្រាចហ្នឹង ខ្ញុំក្ដាប់បានហើយ។ យោងតាមស្មារតីប្រជុំរបស់ខេត្តពីលើកទី ៥៤ហ្នឹង គឺឧត្ដមអភិបាលខេត្តលោកឲ្យខ្ញុំចុះស្រាវជ្រាវ ដើម្បីរាយការណ៍ជូនខេត្តវិញ ឥឡូវខ្ញុំបានរាយការណ៍ជូនខេត្តហើយ អ៊ីចឹងចំណុចហ្នឹងលោកចាំទំនាក់ទំនងទៅខាងខេត្តទៀត ដឹងហើយសាច់រឿងហ្នឹង»។
ក្រុមប្រជាពលរដ្ឋបានស្នើសុំឲ្យរដ្ឋាភិបាល និងមន្ត្រីជំនាញពាក់ព័ន្ធជួយពន្លឿនការដោះស្រាយ និងយកដីដែលពួកគាត់កំពុងទាមទារនោះមកធ្វើសម្បត្តិរួមវិញ ដើម្បីជាផលប្រយោជន៍របស់ប្រជាពលរដ្ឋក្នុងភូមិត្រពាំងត្រាច ទាំងមូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។