ពលរដ្ឋខេត្តកំពង់ស្ពឺ ប្រមាណ ៣០០គ្រួសារ ត្អូញត្អែរចំពោះភាពយឺតយ៉ាវនៃអាជ្ញាធរខេត្តក្នុងការដោះស្រាយបញ្ហាកាប់ឆ្ការព្រៃដែលប៉ះពាល់ដីសហគមន៍។ ទោះយ៉ាងណា មន្ត្រីសាលាខេត្តបញ្ជាក់ថា មូលហេតុនៃការយឺតយ៉ាវនោះ ដោយសារអាជ្ញាធរមមាញឹកក្នុងការដោះស្រាយបញ្ហាជម្លោះដីធ្លីនេះច្រើនពេក ដូច្នេះអាជ្ញាធរដោះស្រាយបញ្ហាណាដែលចាំបាច់សិន។
ពលរដ្ឋដែលរស់នៅតំបន់មានជម្លោះដីធ្លីនោះឲ្យដឹងថា ពួកគាត់បានជូនដំណឹងនៃការកាប់ព្រៃ និងប៉ះពាល់ដីសហគមន៍នោះដល់អាជ្ញាធរខេត្តរួចរាល់ហើយ ប៉ុន្តែមកទល់ពេលនេះ អាជ្ញាធរខេត្តហាក់មិនអើពើចំពោះកង្វល់របស់ពលរដ្ឋឡើយ។
ពលរដ្ឋសុំមិនប្រាប់ឈ្មោះឲ្យដឹងនៅថ្ងៃទី១៦ ខែមិថុនា ថា លោក ហ៊ុន ចូច ដែលមានឥទ្ធិពលលើសលប់នៅតំបន់នោះ អះអាងថា លោកជាប្អូនធម៌របស់លោកនាយករដ្ឋមន្ត្រី ហ៊ុន សែន បានកាន់កាប់ និងកាប់ឆ្ការដីព្រៃរបស់សហគមន៍មកទល់ពេលនេះកាប់អស់ដីចំនួន ២០ហិកតារ។ ជាងនេះទៀត ពេលពលរដ្ឋណាសម្ដែងឥរិយាបថប្រឆាំងចំពោះការកាប់បំផ្លាញព្រៃសហគមន៍នោះ ត្រូវបុរសរូបនេះបានយកកាំភ្លើងគំរាមពលរដ្ឋថែមទៀត។
ពលរដ្ឋដដែលឲ្យដឹងបន្តថា ដីសហគមន៍ជាង ៣ពាន់ហិកតារដែលត្រូវលោក ហ៊ុន ចូច កាប់ឆ្ការនោះ បានធ្វើឲ្យប៉ះពាល់ដល់ដីពលរដ្ឋរស់ភូមិស្ដៅវស្សា ឃុំទ័ពមាន ស្រុកថ្ពង ខេត្តកំពង់ស្ពឺ។
ឆ្លើយតបនឹងការលើកឡើងរបស់ពលរដ្ឋនេះ មន្ត្រីសាលាខេត្តកំពង់ស្ពឺ ដែលចូលកាន់តំណែងថ្មីសុំមិនឲ្យបញ្ចេញឈ្មោះឲ្យដឹងថា មន្ត្រីសាលាខេត្តកំពុងដុតដៃដុតជើងដោះស្រាយបញ្ហាទាំងនោះជូនពលរដ្ឋ រីឯបញ្ហាដែលនៅសេសសល់ អាជ្ញាធរខេត្តនឹងបន្តដោះស្រាយនៅពេលបន្តបន្ទាប់។
មន្ត្រីដដែលបញ្ជាក់ថា លោកជាមន្ត្រីទើបឡើងកាន់តំណែងថ្មី ដូច្នេះលោកមិនទាន់ក្ដាប់បញ្ហាដែលកើតមាននៅខេត្តនេះគ្រប់ជ្រុងជ្រោយនោះទេ ដូច្នេះលោកសុំឲ្យពលរដ្ឋអត់ធ្មត់បន្តិចសិន ហើយទុកឲ្យអាជ្ញាធរចាត់ចែងដោះស្រាយបញ្ហានេះនៅពេលខ្លីខាងមុខ។
ពលរដ្ឋជាច្រើនបានមកកាន់កាប់ដីដែលមានជម្លោះតាំងពីឆ្នាំ២០០៥ មក។ អ្នកមានឥទ្ធិពលនៅតំបន់មានជម្លោះបានប្រមូលដីលក់ឲ្យលោក ហ៊ុន ចូច។ លោក ហ៊ុន ចូច បានប្រើគ្រឿងចក្រឈូសឆាយដីធ្វើឲ្យប៉ះពាល់ដីតំបន់នោះ។
បញ្ហាជម្លោះដីធ្លីតំបន់នេះមានស្ថានភាពធ្ងន់ធ្ងរនៅដើមខែមិថុនា ឆ្នាំ២០១៣ មកទល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។