ប្រជាពលរដ្ឋមួយចំនួនរស់នៅលើដីអភិវឌ្ឍន៍ដំរីផុង ក្នុងភូមិព្រៃទាយ ឃុំត្រពាំងភ្លាំង ស្រុកឈូក ខេត្តកំពត បានតវ៉ានៅថ្ងៃអាទិត្យទី៤ មករា ថា ពួកគាត់ត្រូវបានមនុស្សមួយក្រុមដែលអះអាងថា ស្គាល់មន្ត្រីថ្នាក់កំពូល ចុះមកបង្ខំពួកគាត់ឲ្យលក់ដីទៅឲ្យពួកគេថោកៗ ហើយថែមទាំងគំរាមរឹបអូសយកដីទទេ បើប្រជាពលរដ្ឋណាហ៊ានតវ៉ា ឬជំទាស់មិនព្រមលក់។ ប្រជាពលរដ្ឋសម្ដែងការព្រួយបារម្ភយ៉ាងខ្លាំងខ្លាចបាត់បង់ដីផ្ទះនិងដីកសិកម្មដែលរដ្ឋាភិបាលបានចែកជូនពួកគាត់ ជាដីសម្បទានសង្គមកិច្ច ដើម្បីរស់នៅសាងជីវភាពថ្មីលើដីនេះ។
ប្រជាពលរដ្ឋរស់នៅដីសម្បទានអភិវឌ្ឍន៍ដំរីផុងម្នាក់ ដែលសុំមិនបញ្ចេញឈ្មោះ ឲ្យដឹងទាំងភ័យខ្លាចថា គាត់សោកស្ដាយដីរបស់គាត់ និងដីប្រជាពលរដ្ឋផ្សេងទៀតដែលរដ្ឋាភិបាលបានចែកឲ្យ ហើយមិនបានប៉ុន្មានឆ្នាំផង បែរជាពេលនេះរងការគំរាមពីសំណាក់ឈ្មួញលាក់មុខយកឈ្មោះអ្នកធំបង្ខំប្រជាពលរដ្ឋឲ្យលក់ដីក្នុងតម្លៃថោកៗ នៅពេលដែលប្រជាពលរដ្ឋមិនចង់លក់៖ «ចែកឲ្យហើយហ្នឹង ទាំងដីកសិកម្ម ដីលំនៅឋាន ត្រូវក្រុមហ៊ុនបំពារបំពានឈូសយកហើយឲ្យតម្លៃថោកៗ គឺទទួលសំណងតិចតួចបំផុត»។
ចំណែកលោក ហេង សឿន អតីតមន្ត្រីក្នុងមូលដ្ឋានអភិវឌ្ឍន៍ដំរីផុង និងជាតំណាងអ្នកតវ៉ាមួយរួបដែរនោះ បញ្ជាក់ថា ប្រជាពលរដ្ឋមិនបានដឹងអំពីឈ្មោះក្រុមហ៊ុននោះទេ គ្រាន់តែដឹងថា មានប្ដីប្រពន្ធពីរនាក់ដែលប្រជាពលរដ្ឋហៅថា លោកជំទាវ ហៀង ឃុនឌី ជាប្រពន្ធ និងប្ដីជាឯកឧត្ដម ឈ្មោះ អាំ ផល្លីន ចុះមកទិញដីពីប្រជាពលរដ្ឋ ដោយប្ដីប្រពន្ធទាំងពីរបានប្រកាសថា ពួកគាត់ចុះមកទិញដីឲ្យមន្ត្រីថ្នាក់កំពូល៖ «ដល់ពេលអ៊ីចឹង ប្រជាជនអត់លក់ តែគាត់ថា សម្ដេច ជា ស៊ីម សម្ដេច ហេង សំរិន សុំមកទិញដូរដីហ្នឹង។ អ៊ីចឹង ដីហ្នឹងគាត់ទិញដូរអត់មានស្របច្បាប់ទេ បើតាមខ្ញុំដឹង ដីហ្នឹងក្នុង១ហិកតារ ៣០០ ៤០០ហ្នឹង ហើយប្រជាពលរដ្ឋណាអត់លក់គាត់ដកយកទទេ ជាសម្បត្តិរដ្ឋ»។
លោក ហេង សឿន និយាយថា មានពាក្យចចាមអារ៉ាមថា ដីដែលគេព្យាយាមទិញពីប្រជាពលរដ្ឋថោកៗនេះ គឺចង់លក់បន្តទៅឲ្យក្រុមហ៊ុនជប៉ុន មួយដើម្បីដាំម្រេច។
វិទ្យុអាស៊ីសេរី មិនអាចទាក់ទងមន្ត្រីខុទ្ទកាល័យ លោក ហេង សំរិន ប្រធានរដ្ឋសភា និងលោក ជា ស៊ីម ប្រធានព្រឹទ្ធសភាបាននៅថ្ងៃអាទិត្យទី៤ មករា ដើម្បីសុំការឆ្លើយតបចំពោះការអះអាងនេះ។
រីឯអាជ្ញាធរមូលដ្ឋាន និងអាជ្ញាធរខេត្តកំពត ក៏មិនអាចទាក់ទងបានដែរ។
ចំណែកមន្ត្រីសិទ្ធិមនុស្សលីកាដូ (Licadho) ប្រចាំខេត្តកំពត លោក ម៉ម កេសី បញ្ជាក់ថា លោកមិនបានដឹងព័ត៌មានអំពីការគំរាម ឬបង្ខំប្រជាពលរដ្ឋឲ្យលក់ដីនៅតំបន់អភិវឌ្ឍន៍ដំរីផុងទេ ហើយលោកនឹងចុះទៅអង្កេតរឿងនេះនៅពេលឆាប់ៗ។
បើតាមប្រជាពលរដ្ឋ តំបន់អភិវឌ្ឍន៍ដំរីផុង ដែលមានដីទំហំជាង ៥០០ហិកតារ ត្រូវបានរដ្ឋាភិបាលផ្ដល់ជូនជាដីសម្បទានសម្រាប់ប្រជាពលរដ្ឋក្រីក្រប្រមាណ ១០០គ្រួសារ មកពីស្រុកពីរ គឺស្រុកឈូក និងស្រុកទឹកឈូ ដោយក្នុងនោះមានដីសម្រាប់សង់សាលារៀន សង់មណ្ឌលសុខភាព និងដីសម្រាប់សង់ទីផ្សារ និងធ្វើកសិកម្មជាដើម ដែលអភិបាលខេត្តកំពត លោក ខូយ ឃុនហ៊ូរ បានចុះហត្ថលេខាប្រគល់ជូនប្រជាពលរដ្ឋកាលពីខែវិច្ឆិកា ឆ្នាំ២០១១៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។