អាជ្ញាធរខេត្តកំពត បានអះអាងថា នឹងចុះវាស់ដីជូនអ្នកភូមិ និងអតីតកម្លាំងប្រដាប់អាវុធជាង ២០០គ្រួសារ នៅឃុំតេជោអភិវឌ្ឍន៍ នៅថ្ងៃទី១៥ ខែកញ្ញា។ ការអះអាងនេះ គឺបន្ទាប់ពីពលរដ្ឋជិត ៤០០នាក់ ឡើងមកតវ៉ានៅទីលានប្រជាធិបតេយ្យរាជធានីភ្នំពេញ កាលពីថ្ងៃទី១៣ ខែកញ្ញា។
អ្នកភូមិជាច្រើនគ្រួសារ នៅក្នុងឃុំតេជោអភិវឌ្ឍន៍ ស្រុកឈូក អះអាងនៅថ្ងៃ១៥ ខែកញ្ញា ថា អាជ្ញាធរខេត្តកំពត មិនបានចុះវាស់ដីឲ្យពួកគាត់ដូចការសន្យាកាលពីថ្ងៃច័ន្ទ ទី១៤ ខែកញ្ញា នោះទេ។
តំណាងអ្នកភូមិតវ៉ាដីធ្លីនៅឃុំតេជោអភិវឌ្ឍន៍ លោក លី គឹមហុង អះអាងថា ពួកគាត់រង់ចាំក្រុមមន្ត្រីចុះវាស់ដីតាំងពីព្រឹកមកដល់ល្ងាចថ្ងៃ១៥ ខែកញ្ញា ប៉ុន្តែមិនមានវត្តមានក្រុមការងារខេត្តចុះវាស់ដីឲ្យពួកគាត់ដូចការសន្យាទេ៖ «ដីសង្គមកិច្ចនៅទីនោះអត់មាន ១ចំអាមណាទំនេរសម្រាប់សង្គមកិច្ចទេ គឺសុទ្ធតែដីពលរដ្ឋ។ គាត់ចែងអនុក្រឹត្យមកប្លន់ដីរាស្ត្រយកទៅឲ្យសោធនមួយចំណែកគ្រាន់ជាលេសទេ តែការពិតគឺគាត់ចង់បានឲ្យក្រុមហ៊ុន»។
ដូចគ្នាដែរតំណាងពលរដ្ឋភូមិតេជោក្បាលដំរី ឃុំតេជោអភិវឌ្ឍន៍ សុំមិនបញ្ចេញឈ្មោះឲ្យដឹងថា កាលពីថ្ងៃ១៣ ខែកញ្ញា ពួកគាត់ឡើងតវ៉ានៅទីលានប្រជាធិបតេយ្យ ស្រាប់តែអាជ្ញាធរស្រុកឈូក និងខេត្តកំពត សន្យាថា នឹងវាស់ដីឲ្យនៅថ្ងៃ១៥ ខែកញ្ញា។ នៅថ្ងៃនេះ គាត់រង់ចាំមន្ត្រីថ្នាក់ខេត្ត និងស្រុកមកវាស់ដីឲ្យគាត់ តែបែរជាមិនឃើញមកទៅវិញ។ លោកថា កន្លងមកមានការវាស់ដីអ្នកភូមិដែលក្រីក្រខ្វះខាតមិនបានរស់នៅក្នុងដីខ្លួនជាប់លាប់ ត្រូវបានគេវាស់ឲ្យអ្នកទិញដីធ្វើចម្ការ និងក្រុមហ៊ុន។
លោកថា ការវាស់ដីក្រោយក្រុមយុវជនស្ម័គ្រចិត្តដកទៅនោះ គឺវាស់តាមអនុក្រឹត្យថ្មីលេខ ២១៩ ដែលបែងចែកដីឲ្យយោធិនពិការ និងសោធននិវត្តន៍ ដែលវាស់ប៉ះលើដីពួកគាត់រស់នៅភូមិចាស់។ ពួកគាត់ឡើងទៅតវ៉ានោះ គឺសុំឲ្យអាជ្ញាធរវាស់ដីតាមអនុក្រឹត្យលេខ ២៥៩ ចេញឆ្នាំ២០១២ ដែលជាអនុក្រឹត្យបញ្ជាឲ្យវាស់ដីបែងចែកឲ្យអ្នកភូមិក្នុងឃុំតេជោអភិវឌ្ឍន៍។
លោកថា នៅក្នុងឃុំតេជោអភិវឌ្ឍន៍នេះ គ្មានដីសង្គមកិច្ចទេ មានតែដីពលរដ្ឋកាន់កាប់អាស្រ័យផលពីឆ្នាំ២០០០ មក។ លោកថា ដីគាត់កាន់កាប់ទំហំ ៣,៥ហិកតារ ថ្មីៗនេះត្រូវបានគេបោះបង្គោលថ្ម និងបង្គោលឈើចូល ទើបពួកគាត់ឡើងតវ៉ានៅទីលានប្រជាធិបតេយ្យ៖ «ប្រជាពលរដ្ឋថ្មីមកទិញដីហ្នឹងសុទ្ធតែមានប្លង់ពីភូមិ ពីឃុំ ដល់ពេលគេទាក់ទងតាមរយៈភូមិ ឃុំហ្នឹង គេលក់ដីឲ្យហ្នឹង គេធ្វើប្លង់ឲ្យតែម្ដង។ ដូចថៅកែម្រេច គេរៀបចំលក់ដីហ្នឹងទៅ គេធ្វើប្លង់ឲ្យទៅ។ដូចថៅកែមួយមកពីកំពង់សោម មកទិញដីហ្នឹងទៅ គេធ្វើប្លង់ឲ្យអ្នកហ្នឹង គេបានប្លង់ទៅ។ ដល់ប្រជាពលរដ្ឋខ្ញុំរស់នៅពិតប្រាកដ រស់នៅតាំងពីមិនទាន់បង្កើតភូមិ ឃុំស៊ីញ៉េទទួលស្គាល់ពីមេឃុំចាស់ លោក ទុំ គល់ ពីមុនមកនោះ គេអត់ធ្វើប្លង់ឲ្យ»។
បន្ថែមលើនោះតំណាងអ្នកភូមិតេជោអន្លង់ក្មេងលេង មិនបញ្ចេញឈ្មោះដែរ អះអាងថា គាត់កំពុងរង់ចាំអាជ្ញាធរចុះមកវាស់ដីបែងចែកឲ្យគាត់កាន់កាប់ទំហំ ១ហិកតារ ប៉ុន្តែមិនឃើញចុះមកវាស់ទេ៖ «បើតាមអភិបាលស្រុកថា ថ្ងៃនេះគេនឹងមកវាស់វែង។ ដោយឡែកប្រជាពលរដ្ឋ រង់ចាំមើលទល់នឹងម៉ោងនេះអត់ទាន់ឃើញគាត់មកផង»។
អភិបាលស្រុកឈូក លោក វ៉ែន ស៊ីថា ថ្លែងថា លោកមិនបានចូលរួមវាស់ទេ ប៉ុន្តែក្រុមការងាររបស់សាលាខេត្តកំពត កំពុងវាស់បែងចែកដីរាល់ថ្ងៃ។ លោកមិនទាន់មានសេចក្ដីរាយការណ៍ថា ការចុះវាស់ដីនោះបានដល់ភូមិណានៅឡើយទេ៖ «ខ្ញុំក៏មិនដឹងថា នៅថ្ងៃណាដែរ ទាល់តែសួរទៅក្រុមការងាររបស់ខេត្ត»។
ក្រុមគណៈកម្មការវាស់វែងដី លោក ហេង វន្ថា ជាអភិបាលរងខេត្តកំពត អះអាងថា អាជ្ញាធរកំពុងចុះវាស់ដីជូនពលរដ្ឋនៅស្រុកឈូក។ ប៉ុន្តែនៅថ្ងៃ១៥ ខែកញ្ញា លោកឡើងមករាយការណ៍នៅទីស្ដីការគណៈរដ្ឋមន្ត្រី ដូច្នេះមិនបានចូលរួមវាស់ដីនេះទេ៖ «គេចុះធ្វើយូរហើយតើ ពីថ្ងៃ៧ (កញ្ញា) មកគេធ្វើរហូត»។
ប្រជាពលរដ្ឋឃុំតេជោអភិវឌ្ឍន៍ ឲ្យដឹងថា ដីដែលពលរដ្ឋបានរស់នៅ និងកាន់កាប់ពីឆ្នាំ២០០០ មក ហើយមិនទាន់បានប្លង់ច្បាស់លាស់នោះ គឺមាននៅភូមិតេជោអន្លង់ក្មេងលេង ភូមិតេជោក្បាលដំរី និងភូមិតេជោអង្កាញ់។ ចំពោះទំហំដីទាំង ៣ភូមិ មិនទាន់បានប្លង់ គឺពួកគាត់ដឹងមិនច្បាស់នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។