ប្រជាពលរដ្ឋរាប់រយគ្រួសារនៅស្រុកពញាឮ ខេត្តកណ្ដាល បានបិទផ្លូវជាតិលេខ៥ មិនឲ្យយានយន្តគ្រប់ប្រភេទធ្វើចរាចរណ៍ចន្លោះពីម៉ោង ១១ព្រឹក ដល់ម៉ោងជាង ១រសៀល ថ្ងៃទី២៩ ខែមេសា ដើម្បីទាមទារឲ្យមន្ត្រីក្រសួងពាក់ព័ន្ធ និងរដ្ឋាភិបាល ជួយរកដំណោះស្រាយទំនាស់ដីធ្លីដែលពួកគាត់ចោទថា ត្រូវក្រុមហ៊ុនផានអ៊ីម៉ិច ធ្វើប្លង់រំលោភយកដីកសិកម្មធ្លាប់បង្កបង្កើនផល។ ពលរដ្ឋបានយល់ព្រមបើកផ្លូវជាតិ ឲ្យដំណើរការជាធម្មតាវិញ នៅពេលអភិបាលស្រុកពញាឮ បានចេញមុខជួយរកដំណោះស្រាយលើទំនាស់ដីធ្លីជូនពលរដ្ឋ។
តំណាងប្រជាពលរដ្ឋមានទំនាស់ដីធ្លីម្នាក់ឈ្មោះ លោក សៅ ហៃសៀក បានឲ្យដឹងថា ដីទំនាស់នោះមានជាង ៦០ហិកតារ ជារបស់ប្រជាពលរដ្ឋជាង ១០០គ្រួសារ នៅភូមិចំនួន២ នៅឃុំពញាឮ ខេត្តកណ្ដាល។ លោកបន្តថា បន្ទាប់ពីប្រជាពលរដ្ឋបិទផ្លូវជាតិលេខ៥ និងដុតកង់ឡាន ឃើញមានអភិបាលស្រុកពញាឮ លោក តុង សាមី បានចេញមុខមកជួបប្រជាពលរដ្ឋ ហើយសន្យាថានឹងជួយរកដំណោះស្រាយលើជម្លោះដីធ្លី ទើបពលរដ្ឋបានបើកផ្លូវជាតិឲ្យដំណើរការវិញ។
ពលរដ្ឋផ្សេងទៀតឈ្មោះ លាង ឡេង ក៏បានឲ្យដឹងដែរថា ក្រុមហ៊ុនផានអ៊ីម៉ិច របស់អ្នកស្រី ស៊ុយ សុផាន បានលួចធ្វើប្លង់កម្មសិទ្ធិលើដីធ្វើស្រែប្រាំងរបស់ពួកគាត់ និងបានមកបោះបង្គោលព្រំដីនៅព្រឹកថ្ងៃទី២៩ ខែមេសា ទើបបង្កឲ្យពលរដ្ឋមានការភ្ញាក់ផ្អើលនិងផ្ទុះការតវ៉ា។
លោកបន្តថា តំណាងក្រុមហ៊ុនផានអ៊ីម៉ិច បានគំរាមប្រើកម្លាំងសមត្ថកិច្ចចាប់ដាក់ខ្នោះ និងឲ្យមេធាវីប្តឹងទៅកាន់តុលាការ បើហ៊ានចេញមុខតវ៉ាថែមទៀត៖ «ក្រុមហ៊ុនហ្នឹងគាត់លួចធ្វើប្លង់កម្មសិទ្ធិយូរមកហើយ ហើយដីហ្នឹងធ្វើប្លង់រឹងនៅដីកន្លែងផ្សេងទេ គឺនៅភូមិទួលអំពិល តែមួយទេ ប៉ុន្តែគាត់មកយកដីៗ នៅភូមិពញាឮ។ ដល់អ៊ីចឹងដីក្នុងប្លង់កម្មសិទ្ធិជាមួយដីដែលគាត់យកគឺខុសគ្នា។ ដល់ប្រជាជនសួរគាត់ថា ដីអ្នកឯកនៅទួលអំពិល រឿងអីអ្នកឯងមកយកដីនៅពញាឮ គាត់និយាយថា គាត់មកយកដីហ្នឹងដោយសារបច្ចេកទេសរបស់មន្ត្រីសុរិយោដីវាយភូមិខុស តាមពិតនៅក្នុងភូមិពញាឮ»។
វិទ្យុអាស៊ីសេរី មិនអាចទាក់ទងលោកស្រី ស៊ុយ សុផាន ប្រធានក្រុមហ៊ុនផានអ៊ីម៉ិច ដែលពលរដ្ឋចោទថា បានរំលោភធ្វើប្លង់ដីលើដីកសិកម្មរបស់ពួកគាត់ជាង ៦០ហិកតារ បានទេ តាមទូរស័ព្ទនៅថ្ងៃទី២៩ ខែមេសា។
អភិបាលស្រុកពញាឮ លោក តុង សាមី ដែលបានចុះជួបពលរដ្ឋមានទំនាស់ដីធ្លីនៅរសៀលថ្ងៃទី២៩ ខែមេសា បានស្នើឲ្យប្រជាពលរដ្ឋបើកផ្លូវជាតិលេខ៥ ឲ្យដំណើរការវិញ និងបានសន្យាថានឹងនាំយកបញ្ហាកង្វល់របស់ប្រជាពលរដ្ឋដាក់ជូនអភិបាលខេត្ត និងស្ថាប័នពាក់ព័ន្ធពិនិត្យ និងរកដំណោះស្រាយនៅថ្ងៃខាងមុខ។
លោក តុង សាមី៖ «គាត់បិទផ្លូវ តែខ្ញុំបានទៅដោះស្រាយជូនគាត់ កុំឲ្យគាត់ឃាត់ឡាន។ អ្នកចុះវាស់វែងដីហ្នឹងឲ្យគេទៅៗ ហើយខ្ញុំបានធានាដោះស្រាយចាត់ចែងជូនគាត់ និងសិក្សាពីអ្វីដែលគាត់មាន និងក្រុមហ៊ុនមាន យើងដោះស្រាយរួមគ្នា។ ក្រុមហ៊ុនហ្នឹងតាមខ្ញុំដឹងគាត់មានប្លង់យូរហើយ តាំងពីជំនាន់ខ្ញុំធ្វើការមុនម្ល៉េះ ហើយប្រជាជននិយាយថា គាត់អត់បានលក់ដីនោះទេ។ បញ្ហានៅត្រង់ហ្នឹង ហើយក្រុមហ៊ុនគេចង់ទៅបោះបង្គោលព្រំដែន ហើយវាមិនទាន់ច្បាស់ថា ទិសដីរបស់គាត់នៅត្រង់កន្លែងណាៗ ហើយពលរដ្ឋអះអាងមិនឲ្យបោះបង្គោល ក៏កើតរឿងបិទផ្លូវជាតិអ៊ីចឹងទៅ»។
ក្រុមប្រជាពលរដ្ឋឲ្យដឹងថា ទំនាស់ដីធ្លីនេះ អាចនឹងផ្ទុះការតវ៉ាឈានដល់បិទផ្លូវជាតិលេខ ៥ ជាថ្មីទៀត នៅថ្ងៃអនាគត បើអាជ្ញាធរគេចមិនជួយរកដំណោះស្រាយជូនប្រជាពលរដ្ឋ និងងាកទៅគាំទ្រក្រុមហ៊ុនវិញនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។