ប្រជាពលរដ្ឋស្រុកគីរីសាគរ ខេត្តកោះកុង បានចោទក្រុមហ៊ុនចិន ឈ្មោះ យូញៀន ឌីវឺឡុបមែន (Union Development Group Co., Ltd.) ឬ យូ.ឌី.ជី (UDG) ថាបានបន្តប្រើគ្រឿងចក្រលួចឆ្មក់ឈូសបំផ្លាញដុតផ្ទះពលរដ្ឋអស់ជាង ១០ខ្នង និងឈូសបំផ្លាញដំណាំកសិកម្មអស់ជាច្រើនហិកតារ នៅពេលពួកគាត់ចេញទៅនេសាទសមុទ្រ។
បញ្ហានេះ ក្រុមប្រជាពលរដ្ឋបានស្នើកិច្ចអន្តរាគមន៍ទៅអាជ្ញាធរស្រុកគីរីសាគរ និងខេត្តកោះកុង ឲ្យជួយអន្តរាគមន៍បញ្ឈប់សកម្មភាពរបស់ក្រុមហ៊ុនចិន ដែលរំលោភបំពានផលប្រយោជន៍ពួកគាត់ទាំងបំពានដូចប្រទេសគ្មានច្បាប់។
ក្រុមប្រជាពលរដ្ឋមានគ្នាប្រមាណជិត ៥០នាក់ នៅព្រឹកថ្ងៃទី១៣ ខែវិច្ឆិកា បានប្រមូលផ្តុំគ្នាប្រឆាំងតទល់នឹងសកម្មភាពប្រើគ្រឿងចក្ររបស់ក្រុមហ៊ុនចិន យូ.ឌី.ជី ដែលលួចឆ្មក់ឈូស ឆាយបំផ្លាញផ្ទះ និងផលដំណោះកសិកម្មពលរដ្ឋនៅស្រុកគីរីសាគរ ខេត្តកោះកុង ពេលពលរដ្ឋចេញទៅនេសាទ។
ស្ត្រីឈ្មោះ សេស សេងហៀង ស្ថិតក្នុងចំណោមពលរដ្ឋជាង ១០គ្រួសារទៀត ដែលត្រូវក្រុមហ៊ុនចិន ឈូសនិងដុតផ្ទះនៅស្រុកគីរីសាគរ ខេត្តកោះកុង បានប្រាប់វិទ្យុអាស៊ីសេរីថា ផ្ទះនិងផលដំណាំពួកគាត់មានដូចជាស្វាយចន្ទី ដូង និងខ្នុរជាដើម ត្រូវក្រុមហ៊ុនចិន យូ.ឌី.ជី ប្រើគ្រឿងចក្រឈូសបំផ្លាញនៅពេលពួកគាត់ចេញទៅនេសាទ។
ស្ត្រីរូបនេះបន្តថា សកម្មភាពលួចឆ្មក់ឈូសបំផ្លាញដុតផ្ទះ និងផលដំណាំប្រជាពលរដ្ឋ ផ្ដើមដោយក្រុមហ៊ុនចិន យូ.ឌី.ជី បានធ្វើឡើងនៅទីតាំងផ្សេងៗគ្នា ប៉ុន្តែក្នុងស្រុកគីរីសាគរ តែមួយ។ ស្ត្រីរងគ្រោះបង្ហាញភាពអស់ជំនឿទៅលើអាជ្ញាធរពាក់ព័ន្ធស្រុក និងខេត្តកោះកុង ដែលមិនជួយទប់ស្កាត់សកម្មភាពល្មើសរបស់ក្រុមហ៊ុនចិន នៅពេលពួកគាត់ស្វែងរកកិច្ចអន្តរាគមន៍ជាបន្តបន្ទាប់៖ «ព្រោះអីថ្នាក់ខេត្តបាននិយាយថា មានតែថ្នាក់អន្តរក្រសួងទេដែលមានសិទ្ធិ។ ឥឡូវអន្តរក្រសួងអត់ឃើញចុះមកដោះស្រាយផង ហើយសកម្មជនចេះតែមកបំផ្លាញដូចចោរអ៊ីចឹង។ សំណូមពរឲ្យខាងអន្តរក្រសួងចុះមកអន្តរាគមន៍ឲ្យបានឆាប់ ទើបប្រជាពលរដ្ឋរស់នៅបានសេចក្ដីសុខ»។
ទាក់ទិនបញ្ហានេះ លោក ឃឹម ចន្ទឌី អភិបាលស្រុកគីរីសាគរ បានប្រាប់ពលរដ្ឋដែលទៅស្នើសុំកិច្ចអន្តរាគមន៍ដល់សាលាស្រុកថា ករណីនេះខាងភាគីក្រុមហ៊ុនបានធ្វើសកម្មភាពដោយឯកតោភាគី។ លោកបន្តថា នឹងលើកយកញត្តិ ឬកង្វល់របស់ប្រជាពលរដ្ឋដាក់ជូនទៅថ្នាក់ដឹកនាំខេត្តជួយមានវិធានការបន្ត។
យ៉ាងនេះក្តី លោក ប៊ុន លឺត អភិបាលខេត្តកោះកុង ថ្លែងថា អាជ្ញាធរខេត្តមិនអាចបញ្ឈប់សកម្មភាពក្រុមហ៊ុនចិន យូ.ឌី.ជី បានទេ ហើយថា ករណីនេះលោកនឹងផ្ដល់ព័ត៌មានជូនថ្នាក់លើបន្តទៀត៖ «ខ្ញុំមិនច្បាស់ដែរ គ្រាន់តែខ្ញុំបានដឹងដំណឹងហ្នឹងដែរ។ ប៉ុន្តែអាហ្នឹងវាទាក់ទងជាមួយក្រុមហ៊ុន។ ខ្ញុំថាឲ្យធ្វើរបាយការណ៍ដាក់ជូនអន្តរក្រសួងទៅ ព្រោះកន្លែងហ្នឹងខាងអន្តរក្រសួងជាអ្នកសម្របសម្រួល។ ខ្ញុំអត់មានសិទ្ធិផ្អាកសកម្មភាពក្រុមហ៊ុនទេ ប៉ុន្តែយើងពិនិត្យ និងផ្ដល់សេចក្ដីជូនដំណឹងទៅក្រសួងវិញ»។
លោក អ៊ិន គង់ជិត មន្ត្រីសម្របសម្រួលអង្គការលីកាដូ (Licadho) ប្រចាំខេត្តកោះកុង ឲ្យដឹងថា ទំនាស់ដីធ្លីរបស់ប្រជាពលរដ្ឋជាមួយក្រុមហ៊ុនចិន យូ.ឌី.ជី នេះ បានកើតមានតាំងពីឆ្នាំ២០០៩ មកម្ល៉េះ ហើយពលរដ្ឋបានស្វែងរកកិច្ចអន្តរាគមន៍ទៅកាន់ស្ថាប័នពាក់ព័ន្ធជាបន្តបន្ទាប់ មានគណៈរដ្ឋមន្ត្រីជាដើម។ លោកបន្តថា សកម្មភាពរបស់ក្រុមហ៊ុនចិន យូ.ឌី.ជី គឺបានអនុវត្តផ្ទុយទៅនឹងសេចក្ដីជូនដំណឹងរបស់ទីស្ដីការគណៈរដ្ឋមន្ត្រី កាលពីខែកុម្ភៈ ឆ្នាំ២០១៤ ដែលតម្រូវឲ្យផ្អាកសកម្មភាពឈូសឆាយលំនៅឋានរបស់ប្រជាពលរដ្ឋនៅស្រុកគីរីសាគរ និងតម្រូវឲ្យរកដំណោះស្រាយដោយសន្តិវិធី។
លោកបន្តថា ទំនាស់នេះ បានប៉ះពាល់ប្រជាពលរដ្ឋ ១.៩៦៣គ្រួសារ ប៉ុន្តែក្នុងចំណោមនេះ នៅមានប្រជាពលរដ្ឋចំនួន ២៩៣គ្រួសារ មិនព្រមចាកចេញពីលំនៅឋានចាស់តាមសំណើក្រុមហ៊ុនទេ។
លោកអះអាងថា ចាប់តាំងពីដើមខែវិច្ឆិកា មកដល់ថ្ងៃទី១៣ ខែវិច្ឆិកា ក្រុមហ៊ុនចិន បានលួចឆ្មក់ប្រើគ្រឿងចក្របំផ្លាញ និងដុតផ្ទះពលរដ្ឋអស់ចំនួន ១៣ខ្នង និងបំផ្លាញដំណាំកសិកម្មជាច្រើនហិកតារ ប៉ុន្តែអាជ្ញាធរស្រុកខេត្ត មិនបានជួយទប់ស្កាត់ទេ ដោយទុកឲ្យក្រុមហ៊ុនចិន ប្រើគ្រឿងចក្រឈូសឆាយផ្ទះ និងផលដំណោះពលរដ្ឋមកដល់ពេលនេះ។
លោក អ៊ិន គង់ជិត៖ «លោក លី តឹកហៃ ហ្នឹងគេនាំកម្លាំងសន្តិសុខ ៣២នាក់ ជិះអូប័រ ទៅរុះរើផ្ទះប្រជាពលរដ្ឋអស់ ៤ខ្នង ហើយដុតអស់ ៧ខ្នង កាលពីម្សិលម្ង៉ៃ ខណៈពេលដែលពួកគាត់ចេញទៅនេសាទ។ ពួកគាត់ហ្នឹងអត់ទាន់បានយល់ព្រមចាកចេញទេ ពួកគេចង់រស់នៅភូមិចាស់របស់ពួកគាត់ហ្នឹង ហើយព្រឹកមិញពួកគាត់បានឡើងទៅផ្ទះលោកមេឃុំ ដើម្បីតវ៉ាឲ្យមានការដោះស្រាយ។ បើនិយាយទៅរុះរើអស់ ៦ខ្នង និងដុត ៧ ហើយថ្ងៃនេះរុះរើតែ ១ខ្នងទេ»។
សេចក្ដីជូនដំណឹងរបស់ទីស្ដីការគណៈរដ្ឋមន្ត្រី ចុះថ្ងៃទី១៩ ខែកុម្ភៈ ឆ្នាំ២០១៤ បានកំណត់ឲ្យអភិបាលខេត្ត និងមន្ត្រីស្ថាប័នពាក់ព័ន្ធ បន្តដោះស្រាយវិវាទដីធ្លីរវាងពលរដ្ឋជាមួយក្រុមហ៊ុនចិន យូ.ឌី.ជី និងតម្រូវឲ្យផ្អាកសកម្មភាពរុះរើខ្ទម ឬផ្ទះពលរដ្ឋ ដែលមកសង់នៅក្នុងភូមិចាស់តាមមាត់សមុទ្រជាបណ្ដោះអាសន្ន ព្រមទាំងត្រូវរៀបចំតែងតាំងសមាជិកគណៈកម្មការអន្តរក្រសួង ដើម្បីសម្របសម្រួល និងដោះស្រាយវិវាទដីធ្លីទាំងនេះឲ្យបានត្រឹមត្រូវ។ ត្រូវរៀបចំកំណត់ភូមិនៅក្នុងឧទ្យានជាតិបុទុមសាគរ ជាតំបន់សហគមន៍ និងរៀបចំធ្វើអនុបយោគតំបន់នោះសម្រាប់ផ្តល់ប័ណ្ណកម្មសិទ្ធិជូនប្រជាពលរដ្ឋជាដើម។ ប៉ុន្តែសេចក្ដីជូនដំណឹង ឬបទបញ្ជានេះ ត្រូវបានប្រជាពលរដ្ឋនិងសង្គមស៊ីវិលខេត្តកោះកុង រិះគន់ថា អភិបាលខេត្តកោះកុង ឬក្រុមហ៊ុនចិន យូ.ឌី.ជី មិនយកមកអនុវត្តតាមទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។