ក្រុមពលរដ្ឋមានទំនាស់ដីធ្លីជាមួយក្រុមហ៊ុនស្ករអំពៅ នៅខេត្តកោះកុង រិះគន់មន្ត្រីដោះស្រាយវិវាទដីធ្លីរបស់ក្រសួងដែនដី នគរូបនីយកម្ម និងសំណង់ថា មិនបានចូលរួមចំណែកដោះស្រាយវិវាទដីធ្លីដ៏រ៉ាំរ៉ៃមួយនេះ។ ការលើកឡើងនេះ ដោយសារតែការចរចាជាមួយក្រុមហ៊ុនរកដំណោះស្រាយកាលពីថ្ងៃទី២០ ខែមករា មិនទទួលបានលទ្ធផល។
ក្រុមពលរដ្ឋមានទំនាស់ដីធ្លីប្រមាណ ១០០នាក់ មកពីខេត្តកោះកុង តវ៉ានៅមុខក្រសួងរៀបចំដែនដី នគរូបនីយកម្ម និងសំណង់ នៅព្រឹកថ្ងៃទី២ ខែកុម្ភៈ ដើម្បីតាមដាន និងស្នើក្រសួងឱ្យពន្លឿនការដោះស្រាយវិវាទដីធ្លីជាមួយក្រុមហ៊ុនស្ករអំពៅ របស់ឧកញ៉ា ហេង ហ៊ុយ និងក្រុមហ៊ុនស្ករអំពៅរបស់ឧកញ៉ា លី យ៉ុងផាត់ តាំងពីឆ្នាំ២០០៦។
ពលរដ្ឋប្រមាណ ១០០នាក់នេះ គឺតំណាងឱ្យពលរដ្ឋប្រមាណ ១៧៥គ្រួសារ មកពីស្រុកចំនួនពីរនៅខេត្តកោះកុង គឺស្រុកស្រែអំបិល និងស្រុកបុទុមសាគរ។
ក្នុងការតវ៉ានេះ ពលរដ្ឋចង់ឱ្យក្រសួងដាក់សម្ពាធលើក្រុមហ៊ុនទាំងពីរដែលទទួលបានដីសម្បទានពីរាជរដ្ឋាភិបាល ឈូសឆាយបំផ្លាញដីធ្លីរបស់ពលរដ្ឋដែលធ្លាប់អាស្រ័យផលយកទៅធ្វើវិនិយោគ។
ការឡើងមកតវ៉ានៅរាជធានីភ្នំពេញ ជាងពីរខែនេះ ក្រសួងបានរៀបចំឱ្យពលរដ្ឋដែលមានទំនាស់ដីធ្លីជាមួយក្រុមហ៊ុនឧកញ៉ា ហេង ហ៊ុយ ចំនួន ១៧គ្រួសារ បានជួបជជែកជាមួយតំណាងក្រុមហ៊ុនដើម្បីរកដំណោះស្រាយ កាលពីថ្ងៃទី២០ ខែមករា កន្លងទៅ តែពុំទទួលបានលទ្ធផល។
តំណាងពលរដ្ឋមានទំនាស់ដីធ្លី លោកស្រី ផាវ ញ៉ឺង ថ្លែងថា មូលហេតុដែលមិនអាចឈានដល់ការផ្ដល់ដំណោះស្រាយ ដោយសារក្រុមការងារដោះស្រាយវិវាទដីធ្លីរបស់ក្រសួង មិនព្យាយាមដោះស្រាយវិវាទមួយនេះ៖ «ពីព្រោះខ្ញុំឃើញគាត់ទៅអង្គុយដែរ ហើយគាត់អត់មាននិយាយថា នែ! បងប្អូនកាន់កាប់លើដីហ្នឹងហើយ ដឹងហើយថាបងប្អូនមានភស្តុតាងគ្រប់គ្រាន់ ប៉ុន្តែឥឡូវលោក ហេង ហ៊ុយ បានប្ដឹងផ្ដល់ជាមួយបងប្អូនវាខាតពេលវេលា ប៉ុណ្ណេះ ប៉ុណ្ណោះ ដើម្បីឆាប់បញ្ចប់ជម្លោះ បងប្អូនត្រូវធ្វើអ៊ីចេះៗ ដើម្បីផ្ដល់ជាយុទ្ធសាស្ត្រក្នុងការដោះស្រាយខ្លះ អាហ្នឹងឆាប់ទៅមុខ។ ឧទាហរណ៍ ដូចមនុស្សកំពុងមានកំហឹងជាមួយគ្នា ឈ្លោះគ្នាទៅវិញទៅមក អ្នកណាក៏ចង់បានទាំងអស់ដែរ ជាពិសេសប្រជាជនខ្ញុំអ្នកកាន់កាប់ដី ជាក់ស្ដែងមែន មិនមែនទៅបំភ្លៃការពិតឯណា អ៊ីចឹងពួកគាត់ទាមទាររបស់គាត់ទាំងអស់អ៊ីចឹងហើយ»។
ទាក់ទងនឹងការលើកឡើងរបស់ពលរដ្ឋនេះ អនុរដ្ឋលេខាធិការ និងជាប្រធានក្រុមការងារដោះស្រាយវិវាទដីធ្លីរបស់ក្រសួងបានអះអាងថា លោកមិនអាចធ្វើអ្វីបានលើសពីការសម្របសម្រួលភាគីទំនាស់នោះឡើយ៖ «អត់ទេ! ខ្ញុំអត់អាចដាក់សម្ពាធទៅលើគេ ដែលគេមានសាលដីកាពីតុលាការ មានតែសម្របសម្រួល... កុំណា! កុំឱ្យខ្ញុំទៅដាក់សម្ពាធលើគេអត់បានដាច់ខាត អត់បានទេ ហើយចង់អ្នកណាគេចោទថា ម៉េចថាទៅ ខ្ញុំអត់អាចបំពានលើអំណាចតុលាការបានទេ»។
កាលពីថ្ងៃទី២០ ខែមករា ការប្រជុំដោះស្រាយវិវាទមិនអាចឈានដល់ការបញ្ចប់បានទេ តែភាគីក្រុមហ៊ុនចង់ជួបចរចាជាមួយពលរដ្ឋទាំង ១៧គ្រួសារ ម្ដងមួយគ្រួសារៗ នៅសាលាឃុំជីខលើ ឬផ្ទះរបស់ឧកញ៉ា ហេង ហ៊ុយ នៅថ្ងៃទី៥ ឬទី៦ ខែកុម្ភៈ។
ទាក់ទងនឹងការជួបចរចាជាមួយក្រុមហ៊ុនឧកញ៉ា ហេង ហ៊ុយ នេះ លោកស្រី ផាវ ញ៉ឺង ថានឹងជជែកជាមួយក្រុមពលរដ្ឋជាមុនសិន តែលោកស្រីថា មិនមានសង្ឃឹមថា នឹងទទួលបានដំណោះស្រាយនោះឡើយ។
ដោយឡែកទំនាស់រវាងក្រុមពលរដ្ឋចំនួន ១៧៥គ្រួសារ ជាមួយក្រុមហ៊ុនរបស់ឧកញ៉ា លី យ៉ុងផាត់ នោះ ប្រធានក្រុមការងារដោះស្រាយវិវាទដីធ្លី លោក ទេព ធន ថ្លែងថា នៅមិនទាន់មានដំណោះស្រាយយ៉ាងណានោះទេ។
មន្ត្រីសម្របសម្រួលរបស់អង្គការលីកាដូ (Licadho) នៅខេត្តកោះកុង លោក អ៊ិន គង់ជិត ដែលបានតាម ដានវិវាទមួយនេះថ្លែងថា វិវាទមួយនេះ កើតឡើងដោយសាររាជរដ្ឋាភិបាលមិនបានសិក្សាផលប៉ះពាល់ឱ្យបានច្បាស់លាស់មុននឹងសម្បទានដីដល់ក្រុមហ៊ុនដើម្បីវិនិយោគ។ ទោះយ៉ាងណាលោកថា វិវាទមួយនេះគឺនៅមានផ្លូវដោះស្រាយជូនពលរដ្ឋ ប្រសិនបើមន្ត្រីសម្របសម្រួលរបស់ក្រសួងហ៊ានអារកាត់៖ «នៅឆ្នាំ២០១២ នេះ រដ្ឋាភិបាលបានចេញបទបញ្ជាលេខ ០១ មួយដែលជាមធ្យោបាយមួយក្នុងការដោះស្រាយ។ នៅក្នុងហ្នឹងគឺសង្កត់ធ្ងន់ថា ក្រុមហ៊ុនដែលអនុវត្តគម្រោងដែលបានទទួលដីសម្បទាន ហើយប៉ះពាល់ទៅលើដីរបស់ប្រជាពលរដ្ឋ ដីអភិរក្ស ដីសមូហភាពអីហ្នឹង គឺត្រូវតែកាត់ឆ្វៀលឱ្យប្រជាពលរដ្ឋ»។
មន្ត្រីអង្គការលីកាដូ លោក អ៊ិន គង់ជិត ផ្ដល់អនុសាសន៍ថា ក្រុមហ៊ុនគួរផ្ដល់ដីសម្បទានដីដល់ពលរដ្ឋវិញ។ ចំណែកឯមន្ត្រីរបស់ក្រសួង ដែលតំណាងឱ្យលោករដ្ឋមន្ត្រីក្រសួងដែនដី គួរហ៊ានប្រើប្រាស់សិទ្ធិអំណាច និងប្រើប្រាស់ឯកសារគតិយុត្តិទៅបង្ហាញក្រុមហ៊ុនដើម្បីផ្ដល់ដំណោះស្រាយជូនពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។