ចៅក្រមសាលាដំបូងខេត្តកោះកុង បានសម្រេចដោះលែងតំណាងប្រជាពលរដ្ឋមានទំនាស់ដីធ្លីម្នាក់ ឈ្មោះ ផន ណុល ឲ្យនៅក្រៅឃុំជាបណ្ដោះអាសន្ន បន្ទាប់ពីចាប់ឃុំខ្លួនកាលពីថ្ងៃទី២៧ ខែតុលា ឆ្នាំ២០១៤ ទៅតាមបណ្ដឹងក្រុមហ៊ុន អេស.អ៊ី.ហ្សិត (SEZ) របស់លោកឧកញ៉ា លី យ៉ុងផាត់។
លោក នាង បូរ៉ាទីណូ អ្នកសម្របសម្រួលសមាគមអាដហុក (Adhoc) ប្រចាំខេត្តកោះកុង ឲ្យវិទ្យុអាស៊ីសេរីដឹងថា តុលាការបានចេញដីកាបង្គាប់ឲ្យដោះលែង លោក ផន ណុល ពីពន្ធនាគារ នៅព្រឹកថ្ងៃចន្ទ ទី១០ ខែវិច្ឆិកា ឆ្នាំ២០១៤។ លោកបន្តថា ក្រោយតុលាការដោះលែង ក្រុមប្រជាពលរដ្ឋក៏បានវេចបង្វេចដើរហែក្បួន និងថ្លែងសារអរគុណចំពោះថ្នាក់ដឹកនាំសាលាខេត្តកោះកុង តុលាការ និងស្ថាប័នសង្គមស៊ីវិលមួយចំនួននៅខេត្តកោះកុង ដែលបានសម្របសម្រួលឲ្យតុលាការដោះលែងតំណាងពលរដ្ឋមានទំនាស់ដីធ្លី គឺលោក ផន ណុល ពីពន្ធនាគារ មុនពួកគាត់វិលទៅត្រឡប់ទៅកាន់លំនៅឋានរបស់ខ្លួនវិញ៖ «សំឡេង»។
លោក ផន ណុល ត្រូវតុលាចោទ និងចាប់ដាក់គុក តាមបណ្ដឹងរបស់ក្រុមហ៊ុនលោកឧកញ៉ា លី យ៉ុងផាត់ ដោយសារបានរក្សាទុកសម្ភារៈសំណង់ក្រុមហ៊ុន ដែលសង់របងលើដីធ្លី និងបិទផ្លូវទៅស្រែចម្ការរបស់ប្រជាពលរដ្ឋកាលពីដើមឆ្នាំ២០១៤។
លោក ឡុង លន់ មេធាវីការពារក្ដីឲ្យ លោក ផន ណុល ជាតំណាងពលរដ្ឋមានទំនាស់ដីធ្លី នៅឃុំព្រែកខ្សាច់ ខេត្តកោះកុង បានឲ្យដឹងថា មុននឹងឈានដល់តុលាការខេត្តកោះកុង សម្រេចដោះលែង លោក ផន ណុល គឺលោកបានដាក់ពាក្យស្នើសុំនៅក្រៅឃុំទៅកាន់តុលាការចំនួន ២លើក។ ហើយថាការសម្រេចដោះលែងលោក ផន ណុល របស់តុលាការ ឲ្យមានសេរីភាពវិញនៅពេលនេះ ក៏ដោយសារតែតំណាងប្រជាពលរដ្ឋចំនួន ១៣៥គ្រួសារ ដែលមានទំនាស់ដីធ្លីជាមួយក្រុមហ៊ុន លោកឧកញ៉ា លី យ៉ុងផាត់ បានប្រមូលផ្តុំគ្នាតវ៉ា និងស្នាក់នៅពីមុខតុលាការទាំងយប់ថ្ងៃអស់រយៈពេលជាង ១០ថ្ងៃ ដើម្បីទាមទារឲ្យតុលាការដោះលែង លោក ផន ណុល ពីពន្ធនាគារ។
លោកបន្តថា ទំនាស់ដីធ្លីរវាងប្រជាពលរដ្ឋជាមួយក្រុមហ៊ុន អេស.អ៊ី.ហ្សិត របស់លោកឧកញ៉ា លី យ៉ុងផាត់ គឺបានកើតមានតាំងពីឆ្នាំ២០០៥ មកម្ល៉េះ ហើយពលរដ្ឋធ្លាប់បានដាក់ពាក្យបណ្ដឹងនៅកាន់ស្ថាប័នពាក់ព័ន្ធ ជួយរកដំណោះស្រាយជាបន្តបន្ទាប់តាំងពីឆ្នាំ២០១០មក ប៉ុន្តែអត់មានដំណោះស្រាយទេ រហូតដល់ឆ្នាំ២០១៤នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។