សាលាដំបូងខេត្តក្រចេះ សម្រេចដោះលែងប្រជាពលរដ្ឋមួយរូបកាលពីរសៀលថ្ងៃ២៨ មេសា បន្ទាប់ពីបានរកឃើញថា គាត់មិនបានជាប់ពាក់ព័ន្ធទៅនឹងការតវ៉ារឿងដីធ្លីជាពេលកន្លងមកនៅភូមិថ្មសំលៀង ឃុំដំរីផុង ខេត្តក្រចេះ នោះ។
ប្រជាពលរដ្ឋនៅភូមិថ្មសំលៀង ឃុំដំរីផុង ស្រុកឆ្លូង ខេត្តក្រចេះ លោក អ៊ួម ផា បានសម្ដែងអារម្មណ៍សប្បាយរីករាយ និងការសោកស្ដាយចំពោះការចាប់ឃុំខ្លួនលោកអស់រយៈពេលជាច្រើនថ្ងៃនោះ។ លោកបញ្ជាក់ថា កាលពីថ្ងៃទី២៥ មេសា ប្រជាពលរដ្ឋជាច្រើននាក់បាននាំគ្នាតវ៉ាទៅនឹងការឈូសឆាយដីពីសំណាក់ក្រុមហ៊ុន ប៉ុន្តែលោកគ្រាន់តែជាអ្នកធ្វើដំណើរឆ្លងកាត់កន្លែងកើតហេតុសោះ តែបែរជាត្រូវចាប់អាជ្ញាធរចាប់នឹងបានវាយដំ ដោយមិនមានកំហុសទៅវិញ ហើយលោកហៅការឃាត់ខ្លួនលោកនោះថាគឺជារឿងអយុត្តិធម៌។
លោក អ៊ួម ផា៖ «វាមិនសមទេបង! ការចាប់ខ្លួនខ្ញុំមិនមានទោសពៃរ៍អីសោះ គ្រាន់តែខ្ញុំធ្វើដំណើរទៅទិញអង្ករនៅស្វាយជ្រះ ត្រឡប់មកបានជួបគេនៅចំណុចថ្មសំលៀង។ គេក៏បានឃាត់ខ្លួនចាប់ខ្ញុំមកប៉ុស្តិ៍ប៉ូលិសនៅខេត្តក្រចេះហ្នឹង ហើយខ្ញុំមិនសូវដឹងកន្លុកកន្លែងដែរ ខ្ញុំនិយាយកាត់ៗ។ … ជាមួយប្រជាពលរដ្ឋផ្សេងៗខ្ញុំអត់បានជួប ហើយក៏មិនបានដឹងឮរឿងប្រជាពលរដ្ឋតវ៉ារឿងដីធ្លីក៏ខ្ញុំអត់បានដឹងផង ជារឿងអយុត្តិធម៌ណាស់ធ្វើហ្នឹង»។
លោកបន្ថែមទៀតថា លោកមានស្រុកកំណើតនៅស្រុកកញ្ជ្រៀច ខេត្តព្រៃវែង ហើយបានលក់ដីនៅឯស្រុកអស់ ហើយក៏បានមកទិញ និងបានកាប់រុករានបន្ថែមខ្លះគ្រាន់ធ្វើចម្ការចិញ្ចឹមប្រពន្ធកូន ហើយដីដែលលោកកាប់បន្ថែមនោះ ខាងក្រុមហ៊ុនវៀតណាម នៅទីនោះមិនទាន់ឈូសឆាយនោះទេ។
កាលពីថ្ងៃទី២៥ និង ២៦ មេសា អាជ្ញាធរខេត្តក្រចេះ បានចាប់ខ្លួនមនុស្សចំនួន ៣ នាក់ ដោយចោទប្រកាន់ថា បានបង្ករំខានដល់មន្ត្រីអាជ្ញាធរអនុវត្តច្បាប់ដឹកនាំប្រជាពលរដ្ឋធ្វើការតវ៉ា និងបានប្រើអំពើហិង្សាចំពោះអាជ្ញាធរជាដើម។
ចំណែកឯប្រជាពលរដ្ឋពីរនាក់ផ្សេងទៀត គឺលោក ទឹម ផល និងលោក ហម លី តុលាការមិនទាន់ដោះលែងនោះទេ ពីព្រោះតុលាការរកឃើញថា មានជាប់ពាក់ព័ន្ធនឹងការញុះញង់ប្រជាពលរដ្ឋឱ្យតវ៉ាប្រឆាំងនឹងអាជ្ញាធរ និងបានប្រើអំពើហិង្សាដោយចេតនាមានស្ថានទម្ងន់ទោស។ ប្រជាពលរដ្ឋខ្លះបានលើកឡើងថា ក្រោយពេលកើតហេតុនោះប្រជាពលរដ្ឋបាននាំផ្តិតមេដៃដើម្បីឱ្យដោះលែងមនុស្សពីរនាក់ដែលចាប់ខ្លួនដំបូង ជាថ្នូរនឹងការសន្យាចំពោះមុខអាជ្ញាធរ និងចំពោះមុខច្បាប់ ថាមិនធ្វើឱ្យប៉ះពាល់សន្តិសុខសណ្ដាប់ធ្នាប់សង្គមនិងសាធារណៈ ហើយអាជ្ញាធរក៏បានទទួលយកសំណូមពរនោះដោយទុកពេលបីថ្ងៃ ដើម្បីឱ្យមន្ត្រីអនុវត្តច្បាប់ពិនិត្យលើអង្គហេតុ និងអង្គច្បាប់តាមនីតិវិធី ប៉ុន្តែដល់ថ្ងៃកំណត់បែរជាតុលាការដោះលែងតែម្នាក់ទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។