ប្រជាពលរដ្ឋមកពីខេត្តក្រចេះ ជាង ៣០០គ្រួសារ បន្តស្នាក់នៅក្នុងវត្តសាមគ្គីរង្សី រាជធានីភ្នំពេញ ដើម្បីទាមទាររកដំណោះស្រាយបញ្ហាដីធ្លីជាមួយក្រុមហ៊ុនវៀតណាម។
នៅព្រឹកថ្ងៃទី២៦ ខែឧសភា ក្រុមពលរដ្ឋទាំងនោះបានរៀបចំក្បួនហែញត្តិទៅកាន់ផ្ទះរបស់លោកនាយករដ្ឋមន្ត្រី ហ៊ុន សែន ប៉ុន្តែអាជ្ញាធររាជធានីភ្នំពេញ មិនអនុញ្ញាតឡើយ។ សាលារាជធានីភ្នំពេញ ចាត់តាំងអភិបាលរងខណ្ឌមានជ័យ លោក ហៀក ចាន់លាង ជាអ្នកមកទទួលញត្តិ ហើយសន្យាថា នឹងបញ្ជូនសំណើនេះទៅដល់ដៃលោកនាយករដ្ឋមន្ត្រី ហ៊ុន សែន។
តំណាងប្រជាពលរដ្ឋ លោក ងួន វិបុល មានប្រសាសន៍ថា ក្រុមពលរដ្ឋទាំងអស់នឹងមិនព្រមត្រលប់ទៅខេត្តក្រចេះវិញឡើយ បើសិនណាជារដ្ឋាភិបាលមិនដោះស្រាយបញ្ហានេះទេនោះ។ មួយវិញទៀត បើពលរដ្ឋទាំងនោះត្រលប់ទៅរស់នៅទីតាំងចាស់ក៏មិនអាចរស់នៅបានដែរ ព្រោះថា ទីតាំងនោះត្រូវបានអាជ្ញាធរមូលដ្ឋាន និងក្រុមហ៊ុនវៀតណាម កាន់កាប់បាត់ទៅហើយ។
លោក ងួន វិបុល៖ «ខ្ញុំមានឆន្ទៈ ខ្ញុំឈឺចាប់ ព្រោះតែរដ្ឋអំណាចពុករលួយមួយចំនួនបានឲ្យដៃទៅជនបរទេស ជនឆ្លៀតឱកាស ក្នុងនាមពលរដ្ឋរងគ្រោះម្នាក់ដែរនោះ ខ្ញុំត្រូវតែតស៊ូ ដើម្បីតវ៉ាយកដីដែលយើងមានបន្តិចបន្តួចទៅតាមជីវភាពរបស់យើង»។
ក្រុមប្រជាពលរដ្ឋមកពីខេត្តក្រចេះ ទាំងនោះ ទាំងក្មេងទាំងចាស់ ហើយក៏មានស្ត្រីពោះធំផងនោះ សម្រាកនៅវត្តសាមគ្គីរង្សី ក្នុងសង្កាត់ស្ទឹងមានជ័យ ដោយមានការជ្រោមជ្រែងពីព្រះសង្ឃនៅក្នុងវត្ត និងមន្ត្រីគណបក្សប្រឆាំង។ ពលរដ្ឋទាំងនោះបញ្ជាក់ថា ពួកគាត់ធ្លាប់សុំវត្តផ្សេងៗទៀតនៅម្តុំជិតផ្ទះលោក ហ៊ុន សែន ដើម្បីស្នាក់អាស្រ័យបណ្ដោះអាសន្នតែវត្តទាំងនោះមិនអនុញ្ញាត។
ក្រុមប្រជាពលរដ្ឋទាំងអស់បានចូលរស់នៅ និងកាន់កាប់ដីព្រៃនៅភូមិសាស្ត្រ ឃុំឃ្សឹម ស្រុកស្នូល ខេត្តក្រចេះ កាលពីឆ្នាំ២០០៨។ អ្នកទាំងនោះជាជនចំណាកស្រុកពីខេត្តកំពង់ចាម ព្រៃវែង និងខេត្តក្រចេះ។ ពួកគាត់បានកាប់ឆ្ការព្រៃដាំដំណាំលើដីចំនួនជាង ២ពាន់ហិកតារ ហើយដីធ្លីនៅទីនោះរាប់រយហិកតារ បានត្រូវយុវជនស្ម័គ្រចិត្តរបស់លោក ហ៊ុន សែន វាស់វែងនិងចេញសលាកបត្រសំគាល់កម្មសិទ្ធិរួចដែរ ហើយយុវជនវាស់ដីប្រាប់ថា អ្នកដែលនៅសល់នឹងវាស់ឲ្យពេលបោះឆ្នោតរួច ។ ប៉ុន្តែក្រោយបោះឆ្នោត គឺមិនមានយុវជនចុះទៅវាស់ដីនៅទីនោះបន្តទេ ហើយនៅដើមខែឧសភានេះ ក្រុមហ៊ុនវៀតណាម ឈ្មោះ ប៊ិញ ភឿក ២ បានសហការជាមួយអាជ្ញាធរខេត្តក្រចេះ ចុះដុតផ្ទះពលរដ្ឋយកដីឲ្យក្រុមហ៊ុនតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។