តំណាងដែលមានជម្លោះដីធ្លី ១៨គ្រួសារ អ្នកនាង សន កញ្ញា ឲ្យដឹងនៅថ្ងៃទី១០ មិថុនា ថា ពលរដ្ឋទាំងអស់មិនស្ងប់អារម្មណ៍ ខណៈពេលអភិបាលរងខេត្តក្រចេះ លោក ខាន់ ចំណាន ដោះស្រាយចំពោះក្បាលដីចម្ការ និងដីភូមិដែលមានបញ្ហាជាមួយក្រុមហ៊ុនសុវណ្ណវុទ្ធី ជូនលោក គីន ស៊ីដូ ដែលជាសន្តិសុខនៃក្រុមហ៊ុនសុវណ្ណវុទ្ធី។
អ្នកស្រី សន កញ្ញា ថ្លែងបន្តថា ពលរដ្ឋមកដាក់ញត្តិជូនក្រសួងដែនដី នគរូបនីយកម្ម នារាជធានីភ្នំពេញ និងដាក់ចូលទីស្ដីការគណរដ្ឋមន្ត្រីរួចរាល់ហើយនៅថ្ងៃទី១០មិថុនា។ អ្នកស្រី សន កញ្ញា បញ្ជាក់បន្ថែមថា មន្ត្រីផ្នែករដ្ឋបាលនៃក្រសួង និងមន្ត្រីនៃទីស្ដីការគណៈរដ្ឋមន្ត្រីចេញមកទទួលសំណើពលរដ្ឋហើយ ហើយមន្ត្រីនៃទីស្ដីការគណៈរដ្ឋមន្ត្រីអះអាងថា គេផ្ដល់ដំណឹងជូនពលរដ្ឋវិញ បើសិនថ្នាក់លើប្រាប់មកថា គួរចាត់ចែងបញ្ហានេះយ៉ាងណានោះ។
អ្នកស្រី សន កញ្ញា បញ្ជាក់បន្ថែមថា ការប្រគល់ដីរបស់ពលរដ្ឋដែលខំប្រឹងប្រែងកាប់ឆ្ការព្រៃតាំងពីឆ្នាំ២០១០ ដើម្បីកាន់កាប់ដីនេះទៅឲ្យលោក គីន ស៊ីដូ វាគឺជារឿងអយុត្តិធម៌ដែលពលរដ្ឋពិបាកទទួលនូវដំណោះស្រាយនេះ។ បន្ថែមលើនេះ អ្នកស្រី កញ្ញា អះអាងទៀតថា ពលរដ្ឋដែលមានជម្លោះដីធ្លីក្នុងចំណោម ១៨គ្រួសារនោះ ភាគច្រើនប្ដេជ្ញាចិត្តថា បើអាជ្ញាធរមូលដ្ឋានដោះស្រាយរឿងរ៉ាវនេះមិនផ្ដល់យុត្តិធម៌ជូនពួកគាត់ ពួកគាត់នឹងស៊ូប្ដឹងផ្ដល់មកថ្នាក់លើទៀត លុះអាជ្ញាធរថ្នាក់លើជួយរកយុត្តិធម៌ជូនពលរដ្ឋ។
ឆ្លើយតបនឹងការចោទប្រកាន់របស់ពលរដ្ឋនេះ អភិបាលរងខេត្តក្រចេះ លោក ខាន់ ចំណាន មានប្រសាសន៍ថា លោកមិនអាចស្រាយបំភ្លឺបានទេនៅថ្ងៃ១០ មិថុនា នេះ ដោយលោកបញ្ជាក់ថា ពលរដ្ឋដែលមានបញ្ហាដីធ្លីនោះ មិនដឹងជាស្ថិតនៅតំបន់ណានោះទេ។ លោកបញ្ជាក់ថា កន្លងមកលោកដោះស្រាយពីបញ្ហានេះច្រើនពេក។
ទាក់ទងបញ្ហាជម្លោះដីធ្លីនេះដែរ ពលរដ្ឋឲ្យដឹងថា ដំបូងឡើយជម្លោះដីធ្លីកើតឡើយដោយក្រុមហ៊ុនសុវណ្ណវុទ្ធី ដែលច្បាមយកដីពលរដ្ឋនៅតំបន់នោះដាំដើមកៅស៊ូ។
ក្រោយមកកងរាជអាវុធហត្ថមួយក្រុមដឹកនាំដោយលោក កែវ ជា ចុះឈូសឆាយដីពលរដ្ឋនៅនាំ២០១០។ បន្ទាប់ពីបញ្ហានេះកើតឡើង ស្របពេលក្រុមនិស្សិតស្ម័គ្រចិត្តរបស់លោកនាយករដ្ឋមន្ត្រីបានចុះវាស់វែងដីជូនពលរដ្ឋ។ ពលរដ្ឋដែលមានជម្លោះដីធ្លីនោះបានសុំឲ្យក្រុមនិស្សិតនោះជួយវាស់វែងពួកគេក៏ជួយវាស់វែងដីធ្លីជូនពួកគាត់។ ប៉ុន្តែក្រោយពីក្រុមនិស្សិតស្ម័គ្រចិត្តបញ្ចប់សកម្មភាពរបស់គេ ស្រាប់តែអភិបាលរងខេត្តក្រចេះ លោក ខាន់ ចំណាន យកដីមានបញ្ហានេះជូនលោក គីន ស៊ីដូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។