ពលរដ្ឋ ៩នាក់ ដែលអះអាងថា ជាតំណាងពលរដ្ឋ ៤១៩គ្រួសារ រស់នៅភូមិប៉ោ ដើមស្វាយ និងភូមិប៉ោដើមចេក ក្នុងឃុំឃ្សឹម ស្រុកស្នួល ខេត្តក្រចេះ ដាក់លិខិតស្នើសុំមួយទៅខុទ្ទកាល័យសម្ដេចនាយករដ្ឋមន្ត្រី ហ៊ុន សែន នៅព្រឹកថ្ងៃទី២៣ មិថុនា សុំឲ្យនាយករដ្ឋមន្ត្រីផ្ដល់ដីសម្បទានសង្គមកិច្ចដល់ពួកគេ។
ពលរដ្ឋម្នាក់ក្នុងចំណោម ៩នាក់ ដែលធ្វើដំណើរមករាជធានីភ្នំពេញ ដើម្បីដាក់លិខិតស្នើសុំទៅនាយករដ្ឋមន្ត្រី គឺលោក ហេង គង់ ឲ្យដឹងថា ពលរដ្ឋ ៤១៩គ្រួសារ ភាគច្រើនជាអ្នកចំណូលថ្មីមកពីខេត្តកំពង់ចាម ព្រៃវែង និងខេត្តស្វាយរៀង ហើយភាគច្រើនគ្មានផ្ទះ និងដីចម្ការបង្កបង្កើនផល បាននាំគ្នាមកកាប់រានព្រៃយកដីធ្វើចម្ការ និងស្នាក់នៅបណ្ដោះអាសន្ន នៅភូមិប៉ោដើមស្វាយ និងភូមិប៉ោដើមចេក។ ប៉ុន្តែត្រូវអាជ្ញាធរស្រុកស្នួល ដាក់កម្លាំងចម្រុះទៅដុតខ្ទមស្នាក់របស់ពួកគាត់កាលពីខែកុម្ភៈ កន្លងទៅ។
លោកបន្តថា សព្វថ្ងៃពលរដ្ឋជាង ៤០០គ្រួសារទាំងនោះ បានបោះតង់ស្នាក់នៅបណ្ដោះអាសន្ននៅតាមផ្ទះអ្នកភូមិ និងលើដីក្រុមហ៊ុនឯកជនខ្លះនៅក្បែរទីតាំងចាស់ ដើម្បីរង់ចាំអាជ្ញាធរដោះស្រាយផ្ដល់ដីសម្បទានសង្គមកិច្ចដល់ពួកគេ តែមិនឃើញមានដំណោះស្រាយ ទើបឡើងមកស្នើសុំឲ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍។
លោក ហេង គង់៖ «រាល់ថ្ងៃហ្នឹងគេដេញអត់ឲ្យយើងនៅលើដីកន្លែងហ្នឹង គេដាក់កម្លាំងយាមអត់ឲ្យយើងចូលទៅនៅនិងបង្កបង្កើនផលហើយប្រជាពលរដ្ឋក៏នាំគ្នាទៅនៅតាមដីក្រុមហ៊ុន ប៉ុន្តែនៅជិតៗ ដីហ្នឹងដដែល ហើយបោះតង់នៅអ៊ីចឹងទៅ។ ស៊ីឈ្នួលក្រុមហ៊ុនបានគេឲ្យនៅ ហើយអ្នកខ្លះទៀត ក៏ទៅស៊ីឈ្នួលផ្ទះឯកជនគេក៏សុំបោះតង់នៅទៅ»។
តំណាងខុទ្ទកាល័យនាយករដ្ឋមន្ត្រី ហ៊ុន សែន លោក គង់ ចំរើន ចេញមកទទួលយកលិខិតស្នើសុំពីពលរដ្ឋ។ ប៉ុន្តែមិនបានសន្យា ឬមានដំណោះស្រាយភ្លាមៗ ជូនពួកគាត់នៅឡើយ។
តំណាងពលរដ្ឋលោក ហេង គង់ បញ្ជាក់ថា ពលរដ្ឋស្នើសុំឲ្យរដ្ឋាភិបាលផ្តល់ដីទំហំជាង ១ពាន់ហិកតារ (១.២៨៥,៣៤) ដែលខំឆ្ការព្រៃធ្វើចំការនោះ ជាដីសម្បទានសង្គមកិច្ចដល់ពួកគាត់សម្រាប់បង្កបង្កើនផលនិងអាចសង់លំនៅឋានរស់នៅបាន។
មន្ត្រីស៊ើបអង្កេតអង្គការអាដហុក ប្រចាំខេត្តក្រចេះ លោក ហេង ភារៈ ប្រាប់ថា ពលរដ្ឋជាង ៤០០គ្រួសារនោះ ពីមុនធ្លាប់សង់តង់ស្នាក់នៅមុំគីឡូ១០៥ ក្នុងឃុំឃ្សឹម តែក្រោយពីអាជ្ញាធរបណ្ដេញពួកគាត់កុំឲ្យសង់សំណង់មិនរៀបរយនៅតំបន់នោះ ពួកគាត់ក៏ផ្លាស់ទៅរស់នៅភូមិប៉ោដើមស្វាយ និងភូមិប៉ោដើមចេក វិញ។
ស្មៀនឃុំឃ្សឹម លោក ស្រស់ ណារិន ប្រាប់ថា ពលរដ្ឋទាំងនោះជាអ្នកមកចំណូលថ្មី មកចាប់ដីរដ្ឋរស់នៅខុសច្បាប់ ដោយមិនបានជូនដំណឹង ឬរាយការណ៍ពីការស្នើសុំដីសម្បទានសង្គមកិច្ចដល់អាជ្ញាធរឲ្យដឹងជាមុនទេ។ លោកបន្តថា កាលពីខែកុម្ភៈ កន្លងទៅ អាជ្ញាធរស្រុកបានចុះអនុវត្តវិធានការក្តៅ ដោយដុតផ្ទះរបស់ពួកគាត់ចំនួន ២លើករួចមកហើយ ប៉ុន្តែពួកគេនៅតែមិនរាងចាល និងនៅតែបន្តរស់នៅខុសច្បាប់នៅជិតទីតាំងចាស់ដែលបានដុតនោះ។ រហូតមកដល់ពេលនេះ អាជ្ញាធរឃុំនិងស្រុកនៅមិនទាន់មានវិធានការច្បាស់លាស់ដោះស្រាយជូនពលរដ្ឋជាង ៤០០គ្រួសារនោះនៅឡើយទេ ដោយចាំការសម្រេចពីថ្នាក់លើជាមុនសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។