ពលរដ្ឋមានជម្លោះដីធ្លីនៅភូមិប្រមា ឃុំកំពង់ដំរី ស្រុកឆ្លូង បានអូសបន្លាយរ៉ាំរ៉ៃមិនទាន់ដោះស្រាយបញ្ចប់ឡើយ។ ឥឡូវនេះ អ្នកភូមិប្រមា ចោទអាជ្ញាធរខេត្តក្រចេះ ថាប្រើអំពើហិង្សាលើអ្នកភូមិ។ ការចោទប្រកាន់នេះ ធ្វើឡើងបន្ទាប់ពីកម្លាំងកងរាជអាវុធហត្ថប្រមាណ ៣០នាក់ប្រដាប់ដោយអាវុធ និងនគរបាល ចុះឃាត់ខ្លួនអ្នកភូមិប្រមា នៅពេលកំពុងធ្វើកសិកម្មដាំដុះមួយរយៈ ហើយក៏ដោះលែងវិញបន្ទាប់ពីអ្នកភូមិម្នាក់ បានដួលសន្លប់។ ចំណែកមន្ត្រីឃ្លាំមើលសិទ្ធិមនុស្ស ចាត់ទុកទង្វើសមត្ថកិច្ចទាំងនោះថា រំលោភសិទ្ធិមនុស្សធ្ងន់ធ្ងរ។
ទំនាស់ដីធ្លីដ៏រ៉ាំរ៉ៃរវាងអាជ្ញាធរខេត្តក្រចេះ និងអ្នកភូមិប្រមា រហូតដល់កើតមានជាអំពើហិង្សានៅព្រឹកថ្ងៃទី១៩ កក្កដា។ ការកើតមានអំពើហិង្សានេះ ធ្វើឡើងទំនងអាជ្ញាធរហាមពលរដ្ឋមិនឲ្យចូលធ្វើកសិកម្មលើដីកំពុងមានជម្លោះ។ តែយ៉ាងណាក៏ដោយ អ្នកភូមិប្រមា អះអាងថា ពួកគាត់មកធ្វើស្រែលើដីដែលពួកគាត់ធ្លាប់ធ្វើកន្លងមក ដើម្បីផ្គត់ផ្គង់ជីវភាពគ្រួសារ។
ពលរដ្ឋម្នាក់ដែលត្រូវមន្ត្រីអាវុធហត្ថឃាត់ខ្លួនកាលពីព្រឹកថ្ងៃទី១៩ កក្កដា ហើយបានដោះលែងវិញបន្ទាប់ពីស្ត្រីវ័យចំណាស់ម្នាក់ដួលសន្លប់ គឺអ្នកស្រី ស្រេង ភោ។ អ្នកស្រីនិយាយថា ដីស្រែអ្នកស្រីមាន ៣ហិកតារ ដែលគ្រប់គ្រងជិត ១០ឆ្នាំមកហើយ និងគ្រោងដាំស្រូវគ្រាន់ផ្គត់ផ្គង់ជីវភាពគ្រួសារដែលកំពុងខ្វះខាត ទោះបីដីទំនាស់នេះនៅមិនទាន់ដោះស្រាយក្តី៖ «ឈូសឆាយដំឡូងខ្ញុំអស់ហើយ ខ្ញុំដាំស្រូវ ចឹងលោកគ្រូ ដល់ទៅចាប់ៗចាប់យាយនោះចងស្លាបសេកឡើងឈាមផង គាត់ចាប់បោកយាយហ្នឹងទៅដីដួលទៅ»។
បុរសដែលត្រូវជាប្ដីស្ត្រីរងគ្រោះដែលសន្លប់នៅពេលដែលសមត្ថកិច្ចប្រើអំពើហិង្សា លោក សាយ យឹម និយាយថា អាជ្ញាធរបានឈូសឆាយផលដំណាំរបស់គាត់រាប់ពាន់ដើម និងប្រើអំពើហិង្សាលើប្រពន្ធលោក ដោយបោកផ្ទប់ទៅនឹងដីរហូតដល់សន្លប់ និងបានបញ្ជូនទៅមន្ទីរពេទ្យខេត្តក្រចេះ រហូតដល់រសៀលថ្ងៃដដែលទើបដឹងខ្លួន តែនៅមិនអាចដើរបាន៖ «ពួកវាមានសមត្ថកិច្ចសុទ្ធកាំភ្លើង វាថាម៉េចអាវែងតាអីណានែ៎ ដីដែលយើងមកធ្វើប្រពន្ធអ៊ំប្រហែលជាសន្លប់ហើយ ទន់អស់ហើយខ្លួនហ្នឹងលើកអត់រួចផង»។
វិទ្យុអាស៊ីសេរី មិនអាចទាក់ទងអភិបាលរងខេត្តក្រចេះ លោក ខណ្ឌ ចំណាន ដែលទទួលបន្ទុកដោះស្រាយទំនាស់ដីធ្លី ដើម្បីសុំការអធិប្បាយបញ្ហានេះបាននៅឡើយទេ នៅថ្ងៃទី១៩ កក្កដា។
ចំណែកអភិបាលស្រុកឆ្លូង លោក គុំ មុនី មិនផ្តល់អធិប្បាយ ដោយបញ្ជាក់ថា ករណីនេះហួសដែនសមត្ថកិច្ចអាជ្ញាធរស្រុក។
ទោះយ៉ាងណា អភិបាលខេត្តក្រចេះ លោក សរ ចំរុង ធ្លាប់អះអាងប្រាប់វិទ្យុអាស៊ីសេរី ថា អាជ្ញាធរមិនបានឈូសឆាយលើដីពលរដ្ឋណាស្របច្បាប់ឡើយ មានតែក្រុមពលរដ្ឋទាំងនោះទេដែលចូលមករស់នៅយ៉ាងអនាធិបតេយ្យលើដីរដ្ឋ។
មន្ត្រីស៊ើបអង្កេតនៃសមាគមអាដហុក (adhoc) ខេត្តក្រចេះ លោក ឌិន ខន្នី រកឃើញថា ការយកកម្លាំងប្រដាប់អាវុធរបស់អាជ្ញាធរខេត្តគំរាមពលរដ្ឋ កើតឡើងស្ទើរជាទម្លាប់ទៅហើយ។ លោកបញ្ជាក់ថា ការគំរាមកំហែង និងការចាប់ខ្លួនមិនមែនជាយន្តការដោះស្រាយជម្លោះដោយឈរលើមូលដ្ឋានច្បាប់ឡើយ ថែមទាំងជាទង្វើរំលោភលើសិទ្ធិពលរដ្ឋធ្ងន់ធ្ងរថែមទៀត។ លោកអំពាវនាវឲ្យអាជ្ញាធរខេត្ត គួរតែរង់ចាំការស៊ើបអង្កេតពីស្ថាប័នថ្នាក់ជាតិ និងស្ថាប័នរដ្ឋសភាជាមុនសិន មុននឹងសម្រេចលើបញ្ហាសំខាន់ៗទាក់ទិនជម្លោះដីធ្លីនេះ៖ «រកដំណោះស្រាយអត់ឃើញដោយសារតែខាងនេះជាប្រជាពលរដ្ឋ ខាងនោះក៏ជាប្រជាពលរដ្ឋ យើងយកកម្លាំងទាហានការពារប្រជាពលរដ្ឋម្ខាងឈូសឆាយដីបងប្អូនម្ខាងទៀតជាប្រជាពលរដ្ឋដែរ ចឹងមានន័យថា បេះពីម្ខាងដំបៅម្ខាង ដាក់ម្ខាងដដែលហ្នឹង»។
លោក ឌិន ខន្នី សង្កត់ធ្ងន់ថា ពលរដ្ឋ ៦៨គ្រួសារ បានធ្វើកសិកម្មលើដីកំពុងមានជម្លោះ ថាជាករណីខុសនីតិវិធីក៏ដោយ តែពួកគាត់ពុំមានជម្រើសដោយសារតែជីវភាពខ្វះខាត។ ដោយឡែកអាជ្ញាធរខេត្តទៅវិញទេ បានឈូសឆាយផលដំណាំអ្នកភូមិ និងយកគ្រឿងចក្រជីកកំណត់ទីតាំងព្រំដី ដើម្បីផ្តល់ដីសម្បទានសង្គមកិច្ចដល់ពលរដ្ឋ ៩៩៨ផ្សេងទៀតអស់ប្រហែល ៣០ហិកតារ ស្របពេលដែលដីនៅតំបន់នោះពុំទាន់ដោះស្រាយ។ លោករិះគន់អាជ្ញាធរខេត្តនេះថា ការផ្តល់ដីសម្បទានសង្គមកិច្ចដល់ពលរដ្ឋមួយក្រុមមករស់នៅ ហើយមានពលរដ្ឋមួយក្រុមផ្សេងទៀតត្រូវបណ្ដេញចេញ ថាមិនមែនជាដំណោះស្រាយដ៏ត្រឹមត្រូវសម្រាប់ប្រទេសលទ្ធិប្រជាធិបតេយ្យឡើយ និងផ្ទុយពីច្បាប់រដ្ឋធម្មនុញ្ញទៀតផង។
អនុក្រឹត្យរបស់រដ្ឋាភិបាលលេខ៥៤ ចុះថ្ងៃទី៦ ខែមេសា ឆ្នាំ២០១២ សម្រេចផ្ដល់ដីសម្បទានសង្គមកិច្ចចំនួន ៣.៦៧១ហិកតារ ឲ្យទៅក្រុមពលរដ្ឋ ៩៩៨គ្រួសារ នៅឃុំកំពង់ដំរី ស្រុកឆ្លូង ដែលអាជ្ញាធរខេត្តធ្លាប់បណ្ដេញពលរដ្ឋនៅភូមិប្រមា ទាំង ៦៨គ្រួសារនេះចេញ និងផ្តល់ដីដែលបណ្ដេញចេញនេះធ្វើជាដីសម្បទានសង្គមកិច្ចដល់ពលរដ្ឋចំនួន ៩៩៨គ្រួសារផ្សេងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។