នាយសេនាធិការរងវីរសេនាធំលេង៤២ ខេត្តស្ទឹងត្រែង រងការចោទថា បានប្រើអំណាចនិងយកអាវុធគំរាមពលរដ្ឋរឿងទំនាស់ដីធ្លីចំនួន ៦គ្រួសារ រស់នៅឃុំអូរឫស្សីកណ្ដាល ស្រុកសៀមបូក ខេត្តស្ទឹងត្រែង។ ពលរដ្ឋចោទថា នាយទាហានរូបនេះបានកាប់បំផ្លាញផលដំណាំរបស់ពួកគេក្នុងរឿងទំនាស់ដីធ្លីដែលអូសបន្លាយតាំងពីឆ្នាំ២០១០ មក។ មន្ត្រីឃ្លាំមើលសិទ្ធិមនុស្សចាត់ទុកថា ការគំរាមកំហែងរបស់មន្ត្រីយោធានោះ គឺជាករណីរំលោភសិទ្ធិមនុស្សធ្ងន់ធ្ងរ។
ពលរដ្ឋ ៦គ្រួសារ បានមកដាក់ពាក្យប្ដឹងសមាគមអាដហុក (Adhoc) ខេត្តស្ទឹងត្រែង នៅថ្ងៃ៣ ខែសីហា ដើម្បីសុំអន្តរាគមន៍ទាក់ទិនការគំរាមកំហែងដោយមន្ត្រីយោធាម្នាក់ គឺនាយសេនាធិការរងវីរសេនាធំលេខ៤២ លោក គង់ ប៊ុនយ៉ន ព្រោះតែទំនាស់ដីធ្លី។ ក្រុមពលរដ្ឋទាំងនោះចោទប្រកាន់ថា ការគំរាមនេះ កើតឡើងដោយសារតែមន្ត្រីយោធាទាំងនោះ ព្យាយាមយកដីឋិតនៅភូមិអូរកណ្តៀរ ឃុំអូរគ្រៀង ស្រុកសំបូរ ខេត្តក្រចេះ ជាប់ព្រំប្រទល់ខេត្តស្ទឹងត្រែង ជិត ២០ហិកតារ ធ្វើជាទីតាំងបាញ់ស៊ីបសម្រាប់សមយុទ្ធ។ កាលពីជិត ១០ឆ្នាំមុន ដីនៅតំបន់នោះឋិតនៅទឹកដីខេត្តស្ទឹងត្រែង។
តំណាងពលរដ្ឋ អ្នកស្រី ផាន់ ស៊ីណា ចោទប្រកាន់ថា នាយសេនាធិការរងវីរសេនាធំលេខ៤២ លោក គង់ ប៊ុនយ៉ុន មានចេតនាគំរាមកំហែងគ្រួសារអ្នកស្រី បន្ទាប់ពីការឈ្លោះប្រកែកគ្នាខ្លាំងៗទាក់ទិនទំនាស់ដីធ្លី។ អ្នកស្រីបន្តថា យោធាទាំងនោះបានកាប់បំផ្លាញផលដំណាំអ្នកភូមិនៅពេលយប់ជាបន្តបន្ទាប់ ដូចជា ស្វាយចន្ទីជិត ១០០ដើម និងដើមចេកជិត ១០០ដើម និងដំណាំផ្សេងទៀត។
អ្នកស្រីថា កាលពីឆ្នាំ២០១០ មន្ត្រីយោធាទាំងនោះបានខ្ចីដីអ្នកភូមិ ៦គ្រួសារ ដោយមានទាំងអ្នកស្រីផង សរុបទាំងអស់ចំនួនជិត ២០ហិកតារ ដើម្បីយកទីតាំងតំបន់នោះជាកន្លែងបង្ហាត់យោធាបាញ់ស៊ីប ហើយពលរដ្ឋក៏សម្រេចឲ្យខ្ចីតាមសំណើ។ បន្ថែមពីលើនេះទៀត យោធាទាំងនោះ បន្ទាប់ពីខ្ចីដីអ្នកភូមិបាន ក៏មិនព្រមចាកចេញ បន្ទាប់មកក៏សម្រេចយកដីនៅតំបន់នោះថា ជាដីទីតាំងបាញ់ស៊ីបសម្រាប់យោធាតែម្ដង។
អ្នកស្រី ផាន់ ស៊ីណា៖ «ធ្វើបាបក្រុមខ្ញុំប្រជាពលរដ្ឋ ដាំអីកាប់ចោលៗ ហើយទីធ្វើហ្នឹងអត់មានធ្វើពេលថ្ងៃទេ ធ្វើតែពេលយប់។ អត់មានបាញ់ទេ គាត់មានកាំភ្លើង មកអាមេ មានកាំបិតមានអី ហើយមេ យ៉ុន ហ្នឹងវិញទេ គាត់ទៅទិញកាំភ្លើង»។
ឆ្លើយតបការចោទប្រកាន់នេះ នាយសេនាធិការរងវីរសេនាធំលេខ៤២ លោក គង់ ប៊ុនយ៉ុន មិនផ្ដល់អធិប្បាយដល់វិទ្យុអាស៊ីសេរី តាមទូរស័ព្ទបានទេ លោកនិយាយថា ច្រឡំលេខ។
មេឃុំអូរគ្រៀង លោក កែវ បុប្ផា ឲ្យដឹងនៅថ្ងៃទី៣ ខែសីហា ថា លោកពុំទាន់ទទួលដំណឹងស្ដីពីការចោទប្រកាន់នោះនៅឡើយទេ។ តែយ៉ាងណាលោកថា ដីនៅតំបន់នេះអាជ្ញាធរខេត្តបានសម្រេចប្រគល់សិទ្ធិឲ្យទៅនាយសេនាធិការវីរសេនាធំលេខ៤២ ដើម្បីជាទីតាំងបាញ់ស៊ីប ព្រោះជាដីនៅតំបន់ភ្នំ។
លោកបន្តថា នៅរសៀលថ្ងៃទី៣ ខែសីហា អាជ្ញាធរ រួមទាំងអាវុធហត្ថ និងយោធាបានចុះដាក់ស្លាកហាមឃាត់មិនឲ្យពលរដ្ឋធ្វើចំការនៅទីតាំងនោះ ព្រោះអាជ្ញាធរខេត្តសម្រេចប្រគល់សិទ្ធិឲ្យទៅយោធាខេត្តស្ទឹងត្រែង កាលពីអតីតអភិបាលខេត្តក្រចេះ លោក ខាំ ភឿន ជាអភិបាលខេត្ត៖ «កន្លែងបាញ់ស៊ីប គឺទីតាំងហ្នឹង គឺភ្នំភូមិភាគ១ គាត់បាញ់ស៊ីបជារៀងរាល់ឆ្នាំ គាត់ធ្វើការជូនដំណឹងជិតទីតាំង ជិតកន្លែងបាញ់ស៊ីបហ្នឹង ហើយឥឡូវហ្នឹងយើងមានការដោះស្រាយមួយ គឺកុំឲ្យទាក់ទាមថា ដីហ្នឹងជាដីរាស្ត្រ ឬក៏ដីរបស់យោធា»។
មន្ត្រីសម្របសម្រួលសមាគមអាដហុក ខេត្តស្ទឹងត្រែង លោក ហូ សំអុល និយាយថា ការយកអាវុធដើម្បីគំរាមកំហែងដើម្បីដោះស្រាយបញ្ហា មិនមែនជាដំណោះស្រាយដោយឈរលើគោលការណ៍ច្បាប់ និងមូលដ្ឋានសិទ្ធិមនុស្សនោះទេ ថែមទាំងរំលោភសិទ្ធិពលរដ្ឋធ្ងន់ធ្ងរ។
លោកយល់ឃើញថា អាជ្ញាធរខេត្តក្រចេះ សម្រេចកាត់ដីប្រជាពលរដ្ឋចំនួន ៦គ្រួសារ ដើម្បីប្រគល់ឲ្យយោធាខេត្តស្ទឹងត្រែង ដោយមិនបានផ្ដល់សំណងដល់ពលរដ្ឋ និងមិនប្រគល់ដីនៅទីតាំងផ្សេងជាការដោះដូរ គឺជាការអនុវត្តការងារខុសនីតិវិធី ថែមទាំងប៉ះពាល់ធ្ងន់ធ្ងរដល់ជីវភាពរស់នៅពលរដ្ឋ ព្រោះពលរដ្ឋទាំងនោះសុទ្ធតែមានប្លង់កម្មសិទ្ធិកាន់កាប់ដីធ្លី ទទួលស្គាល់ដោយអាជ្ញាធរមូលដ្ឋាន៖ «ធម្មតាបើទៅលួចកាប់របស់គាត់ គាត់មានការតវ៉ាហើយ អ៊ីចឹងបើកើតចេញពីការតវ៉ាណាមួយ អ្នកឯងប្ដឹងផ្ដល់ប្រជាពលរដ្ឋទៅ មិនមែនមានសិទ្ធិយកកាំភ្លើងទៅគំរាមកំហែងទេ ព្រោះទាហានសម្រាប់ការពារពលរដ្ឋ និងការពារជាតិ»។
លោក ហូ សំអុល បន្ថែមថា ប្រសិនបើអាជ្ញាធរខេត្តត្រូវការដីនៅទីតាំងនោះ ដើម្បីជាទីតាំងបង្ហាត់កងទ័ព ឬបាញ់ស៊ីប គួរតែផ្ដល់ជាដីសម្បទានសង្គមកិច្ចនៅតំបន់ផ្សេងទៀតជូនប្រជាពលរដ្ឋវិញ ដើម្បីជាការដោះដូរ ដោយមានការឯកភាពពីពលរដ្ឋដែលបានកាន់កាប់តាំងពីឆ្នាំ១៩៩៦។
ពលរដ្ឋជាង ៣០នាក់ រស់នៅឃុំអូរគ្រៀង បានផ្ដិតមេដៃធ្វើជាសាក្សីដឹងឮ ថាដីនោះឋិតនៅភូមិអូរកណ្តៀរ ឃុំអូរគ្រៀង ជាប់ផ្លូវជាតិលេខ ៧អា ពិតជាដីកម្មសិទ្ធិគ្រប់គ្រងរបស់ពលរដ្ឋចំនួន ៦គ្រួសារ ពិតមែន។ ចំណែកពលរដ្ឋទាំង ៦គ្រួសារគ្រោងដាក់ញត្តិទៅរដ្ឋសភា ខុទ្ទកាល័យនាយករដ្ឋមន្ត្រី និងស្ថាប័នពាក់ព័ន្ធមួយចំនួនទៀត បន្ទាប់ពីអាជ្ញាធរខេត្តក្រចេះ នៅតែពន្យារពេលមិនដោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។