ប្រជាពលរដ្ឋរស់នៅភូមិស្រែស្តៅ សង្កាត់រកាកណ្ដាល ក្រុងក្រចេះ ២៣គ្រួសារ នៅថ្ងៃច័ន្ទ ទី៦ ខែឧសភា ឆ្នាំ២០១៣ អំពាវនាវសុំឲ្យប្រមុខរាជរដ្ឋាភិបាល លោក ហ៊ុន សែន ស៊ើបអង្កេតជាបន្ទាន់ទៅលើសកម្មភាពរំលោភយកដីប្រជាពលរដ្ឋពីសំណាក់មន្ត្រីអាជ្ញាធរខេត្ត។
សេចក្ដីអំពាវនាវនេះធ្វើឡើងបន្ទាប់ពីអាជ្ញាធរខេត្ត កាលពីថ្ងៃទី៤ ខែឧសភា កន្លងទៅ បានដឹកនាំកងនគរបាល និងកងរាជអាវុធហត្ថ ចុះបោះបង្គោលកាត់យកដីជាង ៩៩ហិកតារ ក្នុងនោះដីជាង ៤០ហិកតារ ជាដីស្រែ និងដីលំនៅឋានប្រជាពលរដ្ឋ ២៣គ្រួសារ បានគ្រប់គ្រងដាំដុះជាក់ស្ដែងប្រមាណ ២០ឆ្នាំកន្លងទៅនេះ។
ប្រជាពលរដ្ឋភូមិរកាកណ្ដាល លោក សោម សុវណ្ណី មានប្រសាសន៍បញ្ជាក់ថា នេះគឺជាការរំលោភសិទ្ធិរស់នៅរបស់ពលរដ្ឋ និងជាការរំលោភសិទ្ធិមនុស្សធ្ងន់ធ្ងរ។ លោកបន្តថា អ្នកភូមិសំណូមពរឲ្យអាជ្ញាធរខេត្តកាត់ដីស្រែ និងដីលំនៅឋានប្រជាពលរដ្ឋចេញពីគម្រោងយកដីសាងសង់សាកលវិទ្យាល័យវិញ៖ «បងប្អូន ២៣គ្រួសារហ្នឹង មិនព្រមដោះដូរទេ ហើយមិនព្រមចាកចេញទេ គឺសុំសិទ្ធិកាន់កាប់ និងអាស្រ័យផល ហើយរស់នៅលើដីហ្នឹងតែម្ដង»។
សេចក្ដីរាយការណ៍របស់ប្រជាពលរដ្ឋ ២៣គ្រួសារ ឲ្យដឹងថា កាលពីឆ្នាំ១៩៩៨ អតីតដីព្រលានយន្តហោះខេត្តមានទំហំជាង ៥៩ហិកតារ ក៏ប៉ុន្តែអាជ្ញាធរខេត្តបានបោះបង្គោលពង្រីកដីដល់ជាង ១៥០ហិកតារ ធ្វើឲ្យប៉ះពាល់ដីប្រជាពលរដ្ឋជាង ១០០គ្រួសារ នៅសង្កាត់ចំនួនពីរ គឺសង្កាត់អូរឫស្សី និងសង្កាត់រកាកណ្ដាល។
ចៅសង្កាត់រកាកណ្ដាល លោក ស្រី កុសល មានប្រសាសន៍ទទួលស្គាល់ថា ប្រជាពលរដ្ឋនៅតំបន់នោះពិតជាបានមកគ្រប់គ្រងដីធ្វើស្រែចម្ការយូរឆ្នាំមកហើយ។ ចំណែកអាជ្ញាធរខេត្តសំអាងថា ដីនោះជាដីអតីតព្រលានយន្តហោះខេត្ត ក៏ប៉ុន្តែមន្ត្រីអាជ្ញាធរមិនបានធ្វើឲ្យប្រជាពលរដ្ឋដឹងច្បាស់ថា ដីព្រលានយន្តហោះមានទំហំប៉ុណ្ណានោះទេ។
លោកបន្តថា ប្រជាពលរដ្ឋមួយផ្នែកនៅតំបន់នោះសុខចិត្តចាកចេញជាមួយគោលនយោបាយផ្ដល់ដីសម្បទានសង្គមកិច្ច និងប្រាក់ឧបត្ថម្ភរុះរើសាងសង់លំនៅឋាន ហើយប្រជាពលរដ្ឋមួយផ្នែកទៀតមិនយល់ព្រមចាកចេញពីទីតាំងដីរបស់ពួកគាត់រស់នៅធ្វើស្រែចម្ការនោះឡើយ៖ «យើងឮតែរដ្ឋនិយាយ ដល់លិខិតស្នាមធ្វើការបង្ហាញឲ្យប្រជាជនប្រុងប្រយ័ត្នទៅលើដីរដ្ឋមិនជាចំហ។ ដល់អ៊ីចឹងប្រជាជនគាត់ប្រើប្រាស់ដីធ្លីហ្នឹងយូរហើយ ធ្វើស្រែធ្វើចម្ការខាងក្រោមហ្នឹង។ ប្រជាជនគាត់មិនព្រមថា ដីគាត់ៗ គាស់រើរានចេញជាភ្លឺស្រែ ហើយដល់គាត់ទៅមើលដីដែលរដ្ឋប្រគល់ឲ្យសុទ្ធតែដីព្រៃ»។
អភិបាលរងខេត្តក្រចេះ លោក ខាន់ ចំណាន មានប្រសាសន៍បញ្ជាក់ថា កាលពីឆ្នាំ១៩៩៨ អាជ្ញាធរខេត្ត និងអាជ្ញាធរអាកាសចរណ៍ស៊ីវិល ចុះហត្ថលេខារួមគ្នាកំណត់ផ្ទៃដីព្រលានយន្តហោះមានទំហំជាង ១១២ហិកតារ មុនពេលប្រជាពលរដ្ឋចូលតាំងទីលំនៅនៅតំបន់នោះ។
លោកបន្តថា ប្រជាពលរដ្ឋ ២៣គ្រួសារគួរយោគយល់ដល់គម្រោងសាងសង់សាកលវិទ្យាល័យជាប្រយោជន៍សាធារណៈ ហើយទទួលយកដីសម្បទានសង្គមកិច្ច និងប្រាក់ឧបត្ថម្ភរុះរើលំនៅឋាន៖ «២៣គ្រួសារហ្នឹងគាត់ទាមទារសំណងមួយហិកតារ ១ម៉ឺន៥ពាន់ដុល្លារ។ រដ្ឋមិនមានទេ ព្រោះរដ្ឋចាត់ទុកថា ជាដីរបស់រដ្ឋ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក(ADHOC) លោកស្រី ធីម ណារីម មានប្រសាសន៍បញ្ជាក់ថា ការអង្កេតទៅលើឯកសាររបស់ប្រជាពលរដ្ឋឃើញថា ប៉ុន្មានឆ្នាំកន្លងទៅនេះ អាជ្ញាធរខេត្តបានបោះបង្គោលកំណត់ផ្ទៃដីព្រលានយន្តហោះច្រើនលើក ហេតុនេះទើបផ្ទៃដីព្រលានយន្តហោះកើនឡើងដល់ជាង ១០០ហិកតារ។
លោកស្រីបន្តថា អ្នកភូមិបានតវ៉ាពីករណីពង្រីកផ្ទៃដីព្រលាន ធ្វើឲ្យប៉ះពាល់ដីស្រែចម្ការប្រជាពលរដ្ឋជាបន្តបន្ទាប់រហូតបច្ចុប្បន្ន៖ «ដោះស្រាយអាចជាគោលនយោបាយសំណង ឬជាគោលនយោបាយដីធ្លីកន្លែងថ្មីគួរតែដោះស្រាយជូនគាត់»។
របាយការណ៍របស់អាជ្ញាធរខេត្ត ប្រជាពលរដ្ឋដែលរស់នៅលើដីរដ្ឋមានចំនួន ៩៨គ្រួសារ ក្នុងនោះ ៤៥គ្រួសារ បានមកចាប់ឆ្នោតទទួលដីសម្បទានសង្គមកិច្ច។ គោលការណ៍ផ្ដល់ដីសម្បទាន គឺមួយគ្រួសារទទួលបានដីជាប់ផ្លូវជាតិលេខ៧ ទំហំ ១.២០០ម៉ែត្រក្រឡា និងប្រាក់ឧបត្ថម្ភរុះរើលំនៅឋាន ៣លានរៀល ចំពោះប្រជាពលរដ្ឋមានលំនៅឋានតូច និង ៥លានរៀលសម្រាប់អ្នកមានលំនៅឋានធំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។