អាជ្ញាធរខេត្តបន្ទាយមានជ័យ នឹងកោះហៅមេភូមិ អនុភូមិរស្មីមានជ័យ ពីរនាក់ និងអ្នកភូមិម្នាក់ ដើម្បីសួរនាំពីដំណើររឿងយកដីកសិកម្មទំហំជិត ១០០ហិកតារ នៅភូមិស្រឡៅជ្រំ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ទៅលក់ឲ្យអ្នកផ្សេង។ ដីនោះជាគម្រោងដីសម្បទានសង្គមកិច្ចរបស់រដ្ឋាភិបាល ដើម្បីរៀបចំបែងចែកទៅឲ្យប្រជាពលរដ្ឋចំនួន ៩១គ្រួសារ ដោយក្នុងមួយគ្រួសារអាចបានកន្លះហិកតារ។
អភិបាលរងខេត្តបន្ទាយមានជ័យ លោក ចុង ផែត បញ្ជាក់នៅថ្ងៃទី៧ ខែមិថុនា ថា អាជ្ញាធរខេត្តនឹងដោះស្រាយជម្លោះដីធ្លីដែលកំពុងកើតមាននោះឲ្យបានឆាប់។ ហើយនៅពេលឆាប់ៗខាងមុខនេះ សាលាខេត្តនឹងកោះហៅអាជ្ញាធរមូលដ្ឋានដែលជាប់ពាក់ព័ន្ធក្នុងជម្លោះដីធ្លីនោះមកសួរនាំ៖ «យើងនឹងអញ្ជើញមេភូមិអនុភូមិ ហើយនិងអ្នកស្រី ឡុង វណ្ណធឿន ទាំងបីនាក់មកជួបតំណាងប្រជាជនដែល ៩០គ្រួសារហ្នឹង។ ប្រជាជនបីនាក់ ហើយអភិបាលស្រុក មេភូមិ មេឃុំ ប្រជាពលរដ្ឋជជែកគ្នាជុំវិញបញ្ហាការមិនបែកដីធ្លីជូនប្រជាពលរដ្ឋ។ ឯកឧត្តមអភិបាល គាត់ឲ្យត្រួតពិនិត្យកិច្ចការនេះ ដោះស្រាយជូនប្រជាពលរដ្ឋឆាប់ៗ»។
ការឆ្លើយតបរបស់អាជ្ញាធរខេត្តនេះ បានធ្វើឡើងក្រោយពីអ្នកភូមិជាច្រើននាក់ តំណាងឲ្យប្រជាពលរដ្ឋចំនួន ៩១គ្រួសារ បានលើកគ្នាទៅសាលាខេត្តបន្ទាយមានជ័យ ទាមទារឲ្យអាជ្ញាធរខេត្តដោះស្រាយករណីទំនាស់ដីធ្លីជូនពួកគាត់ជាបន្តបន្ទាប់។ នៅក្នុងពាក្យបណ្ដឹងចុះថ្ងៃទី១០ ខែឧសភា ឆ្នាំ២០១៣ ចោទថា អាជ្ញាធរមូលដ្ឋានពុំបានបែងចែកដីកសិកម្មចំនួន ៨០ហិកតារនោះឲ្យអ្នកភូមិទេ។ ប៉ុន្តែ លោកមេភូមិ និងអនុភូមិ បានឃុបឃិតជាមួយឈ្មួញត្រៀមយកដីនោះលក់ និងលក់អស់ដីមួយចំនួនទៅហើយ។
ប៉ុន្តែកន្លងទៅនេះ មេភូមិរស្មីមានជ័យ លោក បិន សំបូរ អះអាងថា ដីដែលត្រូវយកមកបែងចែកជូនអ្នកភូមិនោះមានជាង ១០០ហិកតារ ប៉ុន្តែនៅជំហានដំបូងមានដីតែ ៨០ហិកតារយកមកចែកជូនអ្នកភូមិសិន ដោយក្នុងមួយគ្រួសារទទួលបានកន្លះហិកតារ ហើយនៅសល់ប្រជាពលរដ្ឋមួយចំនួនទៀត ដែលនៅពុំទាន់ទទួលបាន ត្រូវរង់ចាំនៅជំហានទី២។
ទោះជាមានការអះអាងយ៉ាងនេះក្តី តែតំណាងប្រជាពលរដ្ឋឈ្មោះ អឹម យ៉ាន ចោទថា លោកមេភូមិ និងអនុភូមិរស្មីមានជ័យ បានឃុបឃិតគ្នាយកដីកសិកម្មទំហំ ៨០ហិកតារលក់។ ដីនោះជាគម្រោងដីសម្បទានសង្គមកិច្ចរបស់រដ្ឋាភិបាល រៀបចំបែងចែកទៅឲ្យប្រជាពលរដ្ឋចំនួន ៩១គ្រួសារ៖ «ព្រោះដីហ្នឹងស្រុកកាត់ចែកឲ្យទៅឃុំជាកញ្ចប់រួចទៅហើយ ៨០ហិកតារ តែគាត់អត់បានបែងចែកឲ្យបងប្អូនប្រជាជនទេ។ គាត់បែរជាឃុបឃិតលក់ដូរទៅវិញ ដីបរិស្ថានដែលកាត់ពីបរិស្ថានមក ១.៥០០ហិកតារ»។
អភិបាលរងខេត្តបន្ទាយមានជ័យ លោក ចុង ផែត បញ្ជាក់ថា អតីតអភិបាលស្រុកម៉ាឡៃ លោក ទេព ឃុនណាល់ បានធ្វើពាក្យស្នើសុំទៅរដ្ឋាភិបាលកាត់ដីព្រៃបរិស្ថានក្នុងដែនជម្រកសត្វព្រៃរនាមដូនសំ ទំហំ ១.៥០០ហិកតារ ហើយលោកនាយករដ្ឋមន្ត្រី ហ៊ុន សែន ក៏បានចេញអនុក្រឹត្យកាត់ដីនោះចែកជូនប្រជាពលរដ្ឋជាង ៥០០គ្រួសារ។ ទីតាំងដីនោះស្ថិតក្នុងភូមិស្រឡៅជ្រំ ១ពាន់ហិកតារ និងនៅចំណុចភ្នំយាយសំ ក្នុងឃុំទួលពង្រ ស្រុកម៉ាឡៃ ៥០០ហិកតារ ក្នុងនោះមួយគ្រួសារត្រូវទទួលបាន ៥ហិកតារ នៅសល់ដីប៉ុន្មាន ត្រូវបែងចែកជូនប្រជាជននៅភូមិរស្មីមានជ័យ និងអ្នកអត់ខ្លះទៀតឲ្យបានគ្រប់គ្នា៖ «ធ្វើម៉េចកុំឲ្យប្រជាជនអត់ដីបង្កបង្កើនផល។ មកដល់ពេលនេះ រយៈពេលមួយខែជាង គាត់អត់ព្រមបែងចែក ឮសូរតាមមាត់ចាបមាត់សេកក្រៅផ្លូវការថា យកដីនោះលក់ ខ្ញុំបង្កើតការថ្មីមួយទៀត ដើម្បីទៅធ្វើការងារជាក់ស្តែងម្តងទៀត ដី ៨០ហិកតារ ម្តងទៀតជាមួយស្រុកជាមួយឃុំ»។
អ្នកសម្របសម្រួលអង្គការលីកាដូ (Licadho) ប្រចាំខេត្តបន្ទាយមានជ័យ លោក ភុន ឈិន ថ្លែងថា ប្រជាពលរដ្ឋនៅឃុំទួលពង្រ ឡើងទៅតវ៉ាជាបន្តបន្ទាប់នៅសាលាខេត្តបន្ទាយមានជ័យ ហើយអាជ្ញាធរខេត្តមានការសន្យាដោះស្រាយដែរ ប៉ុន្តែបញ្ហានៅតែកើតមានជាបន្ត៖ «ទាក់ទិនដីនៅភូមិស្រឡៅជ្រំ ហ្នឹង កន្លងមកមានអនុក្រឹត្យមួយកន្លងមកកាត់ដីពីរនាមដូនសំ ចំនួន ១.៥០០ហិកតារ ដោយដាក់ទីហ្នឹងជាតំបន់សហគមន៍ ហើយខាងខេត្តបានយកទីហ្នឹងជាគោលការណ៍ដើម្បីធ្វើការផ្តល់ជូនដល់ប្រជាពលរដ្ឋ ១៥០គ្រួសារ ដែលទៅពីភូមិរស្មីមានជ័យ ដែលក្នុងហ្នឹង ពួកគាត់ត្រូវទទួលបានដីកន្លះហិកតារ ការសន្យាមានភាពស្រដៀងគ្នាដូចខាងប្រជាពលរដ្ឋនៅភូមិបឹងស្នោ ដែរ»។
ទាក់ទិនករណីទំនាស់ដីនេះ អង្គការលីកាដូ ធ្លាប់ផ្ដល់អនុសាសន៍ទៅអាជ្ញាធរខេត្តបន្ទាយមានជ័យ ដើម្បីធ្វើសេចក្តីសម្រេចចិត្តយកដីទំហំ ១.៥០០ហិកតារ ដែលជាដីស្ថិតនៅដែនជម្រកសត្វព្រៃរនាមដូនសំ នោះ ដាក់ជាដីនៅក្នុងតំបន់វិនិច្ឆ័យ និងចុះបញ្ជីដីធ្លីជាប្រព័ន្ធចែកជូនប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។