គម្រោងស៊ើបអង្កេតនេះ បន្ទាប់ពីគេបានទទួលបណ្ដឹងមួយដែលថា ទាហានមួយក្រុមកំពុងតែយកដីស្រែអ្នកភូមិចំនួន ៨ហិកតារ ទៅធ្វើជាទីតាំងយោធា បណ្ដាលឱ្យប្រជាពលរដ្ឋគ្មានដីធ្វើកសិកម្ម។
ប្រជាពលរដ្ឋ ៣គ្រួសារ ដែលរស់នៅភូមិផ្អុង សង្កាត់កូនក្រៀល បានអះអាងថា ទាហានមួយក្រុមដែលទើបតែទៅបោះទីតាំងនៅក្បែរនោះ បានហាមឃាត់ពួកគេមិនឱ្យចូលទៅភ្ជួររាស់ដីស្រែដែលធ្លាប់ធ្វើជារៀងរាល់ឆ្នាំបានទៀតទេ នៅរដូវវស្សាឆ្នាំនេះ។
អ្នកភូមិព្រួយបារម្ភថា ប្រសិនបើពួកគេមិនបានធ្វើស្រែទេ គឺនឹងជួបប្រទះជីវភាពលំបាក ព្រមទាំងដាច់ស្បៀងនៅឆ្នាំក្រោយជាមិនខាន។
បុរសឈ្មោះ យឹម យឿត គឺជាអ្នកភូមិផ្អុង ម្នាក់ក្នុងចំណោមអ្នកដែលទាហានហាមឃាត់មិនឱ្យចូលទៅភ្ជួរស្រែ។ គាត់បានមានប្រសាសន៍កាលពីរសៀលថ្ងៃសៅរ៍ ទី១ ខែមិថុនា ថា ទាហានមួយកងទើបតែចូលទៅបោះទីតាំងនៅជិតដីស្រែរបស់គាត់ កាលពីក្រោយបុណ្យចូលឆ្នាំខ្មែរ។ ប៉ុន្មានថ្ងៃមកនេះ គាត់ព្យាយាមចូលទៅភ្ជួរស្រែ ក៏ប៉ុន្តែ ក្រុមទាហានទាំងនោះហាមឃាត់។ បុរសដដែលបានបញ្ជាក់ថា គាត់មានដីស្រែទំហំ ៣ហិកតារកន្លះ រួមទាំងដីកូនផង គឺ ៤ហិកតារកន្លះ ជាច្រើនលើកមកហើយ។
គាត់ព្យាយាមចូលទៅភ្ជួរស្រែ ដើម្បីដាំស្រូវឱ្យទាន់រដូវវស្សា ក៏ប៉ុន្តែក្រុមទាហានបានហាមឃាត់ជានិច្ច៖ «ពួករថក្រោះគេយកត្រាក់ទ័រទៅឈូសភ្លឺស្រែខ្ញុំចោល ហើយគេពូនរងដំឡូង។ ពីដើមមិញ ថាមិនឱ្យមានចូលតាមផ្លូវ! ខ្ញុំក៏ចូលពីក្រោយ ដល់ចូលពីក្រោយគេដេញខ្ញុំមិនឱ្យភ្ជួរលើកទី១។ ដល់លើកទីពីរ ខ្ញុំទៅទៀត គេដេញទៀត។ គេសម្លុត គេថាចង់យ៉ាងម៉េច បានមកភ្ជួរដីនេះ? ព្រោះថាដីនេះមេភូមិ និងមេឃុំបានឱ្យគេដាក់រថក្រោះហើយ។ ដល់ខ្ញុំទៅសួរដល់សាលាសង្កាត់ ដល់មេភូមិ គេថាគេមិនដឹងដែរ»។
ស្ត្រីម្នាក់ទៀតឈ្មោះ មាស មឿត បានមានប្រសាសន៍ថា ដីស្រែរបស់គាត់ចំនួន ៣ហិកតារដែលនៅជាប់គ្នានោះ ក៏ត្រូវកងទាហានហាមឃាត់មិនឱ្យចូលទៅភ្ជួររាស់ដែរ៖ «គេយកដាក់រថក្រោះនោះហើយ។ ដល់ខ្ញុំទៅសុំភ្ជួរមួយកំណាត់ដែលអត់បានដាក់រថក្រោះទាហានមិនឱ្យភ្ជួរ គេថាមិនឱ្យទៅប៉ះពាល់កន្លែងគេរហេតរហូតទេ។ គេទុកចល័តរថក្រោះ។ ព្រួយបារម្ភខ្លាចគេយកដីអស់មិនមានអីធ្វើស្រែ។ ខ្ញុំអត់មានដីស្រែទៀតទេ ហើយកូនខ្ញុំឡើង ១១នាក់»។
ក្រុមអ្នកភូមិបានឱ្យដឹងថា ដីស្រែរបស់ពួកគេដែលទាហានកំពុងហាមឃាត់មិនឱ្យចូលទៅភ្ជួរនោះសរុបទាំងអស់ចំនួន ៨ហិកតារ ហើយដីស្រែទាំងនោះ គឺពួកគេបានកាប់គាស់ដាំស្រូវតាំងតែពីឆ្នាំ១៩៩៣ មក។
ទោះយ៉ាងណា វិទ្យុអាស៊ីសេរី មិនអាចទាក់ទងមេបញ្ជាការយោធាទីនោះ ដើម្បីបំភ្លឺជុំវិញការចោទប្រកាន់បានថាយ៉ាងណានៅឡើយ។
ជាមួយគ្នានេះដែរ ចៅសង្កាត់កូនក្រៀល គឺលោក លឿង ណុច ក៏មិនបានទទួលទូរស័ព្ទដើម្បីពន្យល់អំពីបញ្ហានោះដែរ។
ចំណែកអ្នកស្រី វង្ស ស៊ីថា ជាមេភូមិផ្អុង បានមានប្រសាសន៍ថា អ្នកស្រីបានដឹងថាទាហានដែលទៅបោះទីតាំងតំបន់នោះ គឺបានប៉ះពាល់ដីស្រែរបស់ប្រជាពលរដ្ឋខ្លះ ក៏ប៉ុន្តែ អ្នកស្រីគ្មានសមត្ថភាពដោះស្រាយរឿងនោះទេ៖ «គេគ្រាន់តែមកប្រាប់យើងថា គេយករថក្រោះ មកដាក់នៅទីតាំងហ្នឹង ដើម្បីងាយស្រួលចល័ត ហើយខ្ញុំសួរថា បើយករថក្រោះមកដាក់លើដីប្រជាជន ចុះប្រជាជនខ្ញុំបានអីធ្វើកសិកម្មចិញ្ចឹមគ្រួសារ។ ហើយទាហានថា ខ្ញុំបានយកដីឯណា? គាត់ថាគាត់មកជម្រាបឱ្យតែដឹងថាកុំឱ្យប្រជាជនឆ្លងកាត់ប៉ុណ្ណឹង។ ហើយគាត់រង់ចាំថ្ងៃណាដែលទាហានដកចេញ គាត់នឹងប្រគល់ឱ្យវិញប៉ុណ្ណឹងឯង»។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្តរមានជ័យ លោក ស្រី ណារ៉េន បានមានប្រសាសន៍ថា លោកទើបតែបានទទួលបណ្ដឹងពីអ្នកភូមិអំពីករណីនេះ កាលពីថ្ងៃទី៣១ ខែឧសភា កន្លងទៅ ហើយលោកនឹងចុះស៊ើបអង្កេតឱ្យបានឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។