ប្រជាពលរដ្ឋក្រីក្រ ហើយគ្មានដីបង្កបង្កើនផលប្រមាណជាង ១៨០គ្រួសារ នៅស្រុករុក្ខគីរី ខេត្តបាត់ដំបង អំពាវនាវឲ្យអាជ្ញាធរស្រុក និងមន្ត្រីពាក់ព័ន្ធ ពន្លឿនបែងចែកដីសម្បទានរបស់រដ្ឋដល់អ្នកភូមិឲ្យបានឆាប់។
ការអំពាវនាវនេះ កើតឡើងបន្ទាប់ពីពួកគាត់ទន្ទឹងរង់ចាំអាជ្ញាធរបែងចែកដីអស់ជាច្រើនខែមកហើយ តែពុំទទួលបានលទ្ធផលនៅឡើយទេ។
ក្រុមប្រជាពលរដ្ឋដែលទន្ទឹងរង់ចាំការបែងចែកដីធ្លីទាំងនោះ រៀបរាប់ឲ្យដឹងថា ដោយសារតែចង់បានដីធ្លីយកទៅដាំដុះ ដើម្បីដោះស្រាយជីវភាពគ្រួសារប្រចាំថ្ងៃដែលជួបការខ្វះខាតនោះ ធ្វើឲ្យពួកគេមិនហ៊ានចេញទៅស្វែងរកការងារធ្វើនៅឆ្ងាយពីភូមិស្រុករបស់ខ្លួននោះទេ ហើយពីមួយថ្ងៃទៅមួយថ្ងៃ ម្នាក់ៗចេះតែខ្វល់ខ្វាយរឿងដីធ្លីនោះមិនឈប់ឈរឡើយ។
តំណាងប្រជាពលរដ្ឋម្នាក់ឈ្មោះ លោក ចាន់ ឌី រស់នៅភូមិអូររំចេក ឃុំបាសាក់ ស្រុករុក្ខគីរី ខេត្តបាត់ដំបង ថ្លែងនៅថ្ងៃទី៤ ធ្នូ ថា ប្រជាពលរដ្ឋជាច្រើនគ្រួសាររួមទាំងលោកផង មិនបានចេញទៅស្វែងរកការងារធ្វើឆ្ងាយពីផ្ទះសម្បែងរបស់ខ្លួនប្រមាណ ៤ខែមកហើយ។ លោកថា ដោយហេតុថាជីវភាពក្រីក្រ បើទោះជារង់ចាំអស់រយៈពេលជាច្រើនខែយ៉ាងនេះក្ដី ឲ្យតែអាជ្ញាធរពាក់ព័ន្ធ បែងចែកដីសម្បទាននៅតំបន់ដែលខ្លួនរស់នៅនោះដល់ប្រជាពលរដ្ឋ គឺពុំមានជាបញ្ហាចោទនោះទេ។ លោកសោកស្ដាយចំពោះការយឺតយ៉ាវរបស់អាជ្ញាធរ ដែលអូសបន្លាយពេលវេលាមិនបែងចែកដីឲ្យប្រជាពលរដ្ឋជាបន្តបន្ទាប់មកនេះ។ លោកបន្តថា ការមិនបែងចែកដីធ្លីដល់ប្រជាពលរដ្ឋនេះ អាជ្ញាធរទំនងមានគោលបំណងមិនល្អចំពោះអ្នកភូមិនោះទេ៖ «ប្រសិនបើមិនបានដីហ្នឹងយកមកបង្កបង្កើនផលទេ ឃើញថាអាក្រហ្នឹងចេះតែក្រីក្រទៅមុខ ដោះស្រាយមិនចេញនោះទេ ពីព្រោះផ្ទៃដីដែលមានសព្វថ្ងៃបន្តិចបន្តួច មិនអាចដាំដុះចិញ្ចឹមជីវភាពគ្រួសារបានឡើយ»។
ផ្ទៃដីដែលអ្នកភូមិទន្ទឹងរង់ចាំការបែងចែកពីសំណាក់អាជ្ញាធរនោះ ជាដីសម្បទានរបស់រដ្ឋមានទំហំប្រមាណ ២ពាន់ហិកតារ ស្ថិតនៅភូមិអូររំចេក ឃុំបាសាក់ ស្រុករុក្ខគីរី ខេត្តបាត់ដំបង។ អ្នកភូមិអះអាងថា ដីចំនួននេះដើមឡើយ អាជ្ញាធរមូលដ្ឋានថានឹងបែងចែកឲ្យប្រជាពលរដ្ឋដែលគ្មានដីរស់នៅតំបន់នោះធ្វើជាកម្មសិទ្ធិ។ ប៉ុន្តែអាជ្ញាធរភូមិ បែបរក្សាដីនោះទុកដើម្បីផលប្រយោជន៍បក្ខពួករបស់ខ្លួនទៅវិញ។
ឆ្លើយតបនឹងបញ្ហានេះ អភិបាលស្រុករុក្ខគីរី លោក ពេជ្រ ម៉ាឡៃ មានប្រសាសន៍បញ្ជាក់ថា អាជ្ញាធរពុំមានគោលបំណងរក្សាដីនោះទុក ដោយពុំបែងចែកឲ្យប្រជាពលរដ្ឋនោះទេ។ ទោះយ៉ាងនេះក្ដី លោកទទួលស្គាល់ថា ប្រជាពលរដ្ឋនៅតំបន់នោះពិតជាខ្វះខាតដីបង្កបង្កើនផលមែន ហើយថា លោកនឹងទាក់ទងទៅស្ថាប័នពាក់ព័ន្ធ ដើម្បីដោះស្រាយជូនប្រជាពលរដ្ឋនៅពេលខាងមុខ៖ «យើងមានផែនការរបស់យើងទៅត្រួតពិនិត្យមើលដីរដ្ឋហ្នឹង យើងនឹងចុះបញ្ជីដីតំបន់នោះឲ្យបានត្រឹមត្រូវ ហើយប្រសិនបើមានដីដែលនៅសេសសល់ ដែលមានលក្ខណៈសមស្របអាចបែងចែកប្រជាពលរដ្ឋបាន យើងនឹងនាំរឿងហ្នឹងស្នើទៅអភិបាលខេត្តបាត់ដំបង ដើម្បីពិនិត្យ និងពិចារណាដល់ប្រជាពលរដ្ឋ»។
ទាក់ទងនឹងបញ្ហានេះដែរ មន្ត្រស៊ើបអង្កេតនៃអង្គការលីកាដូ (Licadho) ប្រចាំខេត្តបាត់ដំបង លោក ហេង សាយហុង មានប្រសាសន៍ថា ការអូសបន្លាយពេលមិនបែងចែកដីធ្លីដល់ប្រជាពលរដ្ឋនេះ ធ្វើឲ្យពួកគាត់ដែលក្រីក្រស្រាប់នោះ កាន់តែលំបាកខ្លាំងមួយកម្រិតទៀត ហើយអាជ្ញាធរពាក់ព័ន្ធ គួរគិតដល់ពួកគាត់ឲ្យបានឆាប់ជាប្រសើរ៖ «មុខរបរកន្លែងហ្នឹងពួកគាត់រស់នៅអាស្រ័យវិស័យខាងកសិកម្ម គឺការដាំដុះហ្នឹងឯង។ ហើយប្រសិនបើអាជ្ញាធរចេះតែអូសបន្លាយពេល មិនដោះស្រាយឲ្យគាត់អ៊ីចឹង ពួកគាត់គ្មានការងារធ្វើ ច្បាស់ជាធ្វើចំណាកស្រុកទៅប្រទេសថៃ ជាពុំខាននោះទេ។ អ៊ីចឹងដើម្បីជៀសវាងបញ្ហានេះកើតឡើង អាជ្ញាធរគួរតែដោះស្រាយឲ្យពួកគាត់ទៅ»។
ប្រជាពលរដ្ឋដែលក្រីក្រ ហើយគ្មានដីបង្កបង្កើនផលនៅតំបន់ដីសម្បទាននោះប្រមាណជិត ២០០គ្រួសារ។ សព្វថ្ងៃ ពួកគាត់កំពុងទន្ទឹងរង់ចាំឲ្យអាជ្ញាធរបែងចែកដីនោះ ដើម្បីយកទៅដាំដុះដោះស្រាយជីវភាពគ្រួសាររស់នៅប្រចាំថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។