ពលរដ្ឋដែលមានជម្លោះដីធ្លីជាមួយឧកញ៉ា ឃុន សៀ សម្រេចទទួលសំណងពីក្រុមហ៊ុន ជាថ្នូរនៃការចាកចេញ។ ទំនាស់ដីធ្លីរវាងពលរដ្ឋ ៣គ្រួសារ ជាមួយក្រុមហ៊ុន ឃុន សៀ អភិវឌ្ឍន៍ នៅសង្កាត់បឹងកក់១ ខណ្ឌទួលគោក បានអូសបន្លាយពេលវេលាអស់ជាង ១ឆ្នាំទៅហើយ។
កាលពីថ្ងៃទី៥ សីហា គ្រួសាររបស់ លោកស្រី សុខ ហ៊ុច ព្រមទទួលសំណងពីក្រុមហ៊ុន បន្ទាប់ពីមានការចរចាព្រមព្រៀងរួចមក។
កូនប្រុសរបស់ លោកស្រី សុខ ហ៊ុច គឺលោក ហីង សុខចាង មិនបានទម្លាយឲ្យដឹងពីប្រាក់សំណង ដែលត្រូវទទួលបានពីក្រុមហ៊ុនទេ តែប្រាប់ថា វាជាសំណងសមរម្យដែលគ្រួសារលោកអាចទទួលយកបាន ហើយក្រុមហ៊ុនទុកពេល១សប្ដាហ៍ ឲ្យគ្រួសារលោករើចេញពីតំបន់ជម្លោះនោះ៖ «វាបានលុយសមរម្យសម្រាប់ខ្ញុំនៅ ខ្ញុំសប្បាយ តែបើពិបាករស់នៅជាងកន្លែងខ្ញុំ ខ្ញុំមិនសប្បាយទេ»។
ពលរដ្ឋទាំង ៣គ្រួសារ ធ្លាប់ត្រូវបានក្រុមហ៊ុនប្ដឹងប៉ូលិសឲ្យចាប់ដាក់ខ្នោះ បញ្ជូនទៅតុលាការ និងមានជនមិនស្គាល់មុខយកពូថៅកាប់ ឆាឆៅអុកឡុកស្ទើររាល់ថ្ងៃ ពិសេសគ្រួសារ លោក លី ស្រ៊ាងខេង ជួបទុក្ខទោសច្រើនជាងគេ រហូតមានជនមិនស្គាល់មុខមួយក្រុម បោះពស់វែក ៣ក្បាល ចូលផ្ទះទាំងកណ្ដាលយប់ ប៉ុនប៉ងសម្លាប់មួយពូជ។
យ៉ាងណា រហូតមកដល់ពេលនេះ នៅសល់តែគ្រួសារ លោក លី ស្រ៊ាងខេង ទេដែលមិនព្រមទទួលយកសំណងពីក្រុមហ៊ុន ហើយកូនប្រុសស្រី២នាក់របស់គ្រួសារនេះ នៅជាប់បណ្ដឹងតុលាការ ដែលប្ដឹងដោយក្រុមហ៊ុននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។