អាជ្ញាធរខេត្តបន្ទាយមានជ័យ កំពុងសើរើសំណុំរឿងទំនាស់ដីលំនៅឋានរបស់ប្រជាពលរដ្ឋចំនួន ៣៣៥គ្រួសារ នៅភូមិបី សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ឡើងវិញ ដើម្បីឈានទៅការដោះស្រាយបញ្ចប់ទំនាស់នៅក្រោយការបោះឆ្នោតជ្រើសតាំងតំណាងរាស្ត្រឆ្នាំ២០១៣។
អភិបាលរងខេត្តបន្ទាយមានជ័យ លោក ចុង ផែត ថ្លែងកាលពីថ្ងៃទី១៥ ខែមិថុនា ថា អាជ្ញាធរខេត្តបានទទួលបានពាក្យបណ្ដឹងពីប្រជាពលរដ្ឋ។ បច្ចុប្បន្ន កំពុងស្រាវជ្រាវ ហើយបានបញ្ជូនឯកសារ និងណែនាំឲ្យខាងមន្ត្រីជំនាញសុរិយោដី សហការជាមួយជំនាញដទៃទៀត ស្រាវជ្រាវប្រមូលព័ត៌មានឯកសារគតិយុត្តិយកសិក្សា បន្ទាប់មកឈានទៅរកការដោះស្រាយបញ្ចប់នៅក្រោយការបោះឆ្នោតជ្រើសតាំងតំណាងរាស្ត្រឆ្នាំ២០១៣។
លោក ចុង ផែត៖ «ព្រោះយើងត្រូវការស្រាវជ្រាវរកឯកសារគតិយុត្តិទាំងអស់ ពិនិត្យអង្គហេតុឡើងវិញ ព្រោះឯកសារខ្លះវាបាត់ ឥឡូវប្រមូលបាន នឹងឲ្យជំនាញស្រាវជ្រាវបណ្ដើរៗក្នុងនាមគណៈកម្មការសុរិយោដីថ្នាក់ខេត្ត វាក្រុមសម្រាប់ទៅទីតាំងជាក់ស្ដែង នៅពេលដែលយើងអនុវត្ត រួចបានប្រមូលគ្រប់ទាំងឯកសារគតិយុត្តិទាំងឡាយបានស្រាវជ្រាវ បានទីតាំងជាក់ស្ដែង បានដាក់កម្មវិធីប្រជុំគណៈកម្មការសុរិយោដី»។
កាលពីព្រឹកថ្ងៃទី១៣ ខែមិថុនា ឆ្នាំ២០១៣ ប្រជាពលរដ្ឋចំនួន ២៥គ្រួសារ តំណាងឲ្យប្រជាពលរដ្ឋ ៣៣៥គ្រួសារ បានលើកគ្នាទៅសាលាខេត្តសុំឲ្យអាជ្ញាធរខេត្តអន្តរាគមន៍ជួយផ្ដល់ប័ណ្ណកម្មសិទ្ធិស្របច្បាប់លើដីលំនៅឋាន ដែលពួកគាត់អះអាងថាបានកាន់កាប់រស់នៅតាំងពីឆ្នាំ១៩៧៩ មក។
ស្ត្រីឈ្មោះ ម៉ា កាន់ថៃ អាយុ ៦៨ឆ្នាំ ថ្លែងថា ប្រជាពលរដ្ឋទាំងនោះមានដីតូចធំខុសគ្នាអាស្រ័យទៅតាមលំនៅឋានរបស់ពួកគាត់។ ដីទាំងនោះស្ថិតនៅភូមិបី សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ កន្លងទៅនេះ ដីនោះត្រូវបានអាជ្ញាធរខេត្តមានទិសដៅដកហូតយកធ្វើចំណតរថយន្ត និងស្ថានីយប្រេង៖ «រាល់ថ្ងៃនេះ ដីខ្ញុំមាន ខ្ញុំធ្វើផ្ទះ ខ្ញុំមានរបង ខ្ញុំមានស្វាយ ខ្ញុំមានខ្នុរ ខ្ញុំមានក្រូច ខ្ញុំកាន់កាប់រាល់ថ្ងៃ តែអ្នកដែលប្ដឹងខ្ញុំនោះមិនទាន់មកយករបស់ខ្ញុំបានទេ។ លោក ថាច់ ឃន និងលោក ញ៉ឹក គឹមឈុន មិនធ្វើតាមចំណាររបស់សម្ដេចទេ ធ្វើ ៤គុណ២០ ហើយបែងចែកយកដីខ្ញុំឲ្យអ្នកដទៃ មានប្រជាជនខ្លះ មានរដ្ឋអំណាចខ្លះ ដែលមកនៅលើដីខ្ញុំ»។
អ្នកភូមិជាម្ចាស់ដីខ្លះត្រូវបានគេប្ដឹងជាបន្តបន្ទាប់ទៅតុលាការ ក្រោមការចោទប្រកាន់ពីបទប៉ះពាល់កម្មសិទ្ធិឯកជន និងអ្នកខ្លះត្រូវគេប្ដឹងចោទប្រកាន់ពីបទប៉ះពាល់សម្បត្តិសាធារណៈរបស់រដ្ឋ៖ «ពួកខ្ញុំកាន់កាប់នៅលើហ្នឹង គេថាពួកខ្ញុំនេះរស់នៅលើរបស់គេដែរ ហើយដីលំនៅឋានខ្ញុំនៅតាំងពីឆ្នាំ១៨៨០ ហើយខ្ញុំធ្វើចម្ការតាំងពីឆ្នាំ១៩៨០ មក។ វាអត់មានដីច្រើននៅសល់អីទេ មានតែទីផ្ទះរៀងខ្លួន ទទឹង ៥ម៉ែត្រ បណ្ដោយ ៤០ម៉ែត្រ»។
ទាក់ទិនបញ្ហានេះ អ្នកសម្របសម្រួលសមាគមអាដហុក (Adhoc) ប្រចាំខេត្តបន្ទាយមានជ័យ លោក ស៊ុំ ច័ន្ទគារ ថ្លែងថា ទំនាស់ដីចំកណ្ដាលក្រុងសិរីសោភ័ណ បានជាប់គាំងអស់រយៈពេលច្រើនឆ្នាំ។ អ្នកភូមិមួយចំនួនមិនហ៊ានសង់ផ្ទះធំទេ នៅពេលមានទឹកឡើងលិចលំនៅឋានរបស់គាត់ពិបាករស់នៅ។ ទន្ទឹមគ្នានេះ ទំនាស់ដីធ្លីនៅភូមិបី សង្កាត់ព្រះពន្លា នោះ មានមតិខ្លះលើកឡើងថា មានភាពស្មុគស្មាញផ្ទុយពីសមាគមដែលគិតថា ពុំមានអ្វីជាឧបសគ្គទេ អោយតែអាជ្ញាធរមានឆន្ទៈក្នុងការដោះស្រាយ៖ «យើងធ្វើដូចភ្លៀងរលឹម យកបញ្ហាទំនាស់ហ្នឹងមកធ្វើជាអាទិភាពដាក់លើតុដោះស្រាយ គោលការណ៍របស់ខេត្តមិនអាចដោះបាន សុំបញ្ជូនក្រសួង ហើយក្រសួងយកចិត្តទុកដាក់ដោះស្រាយមិនចាំបាច់ទៅសុំអន្តរាគមន៍ពីខុទ្ទកាល័យនាយករដ្ឋមន្ត្រី ទីស្ដីការគណៈរដ្ឋមន្ត្រីផង ក៏ខេត្តមានសមត្ថភាពសម្រាប់ធ្វើដែរ»។
កាលពីអំឡុងឆ្នាំ២០០០ ប្រជាពលរដ្ឋទាំង ៣៣៥គ្រួសារ បានធ្វើពាក្យបណ្ដឹងដាក់ទៅអាជ្ញាធរដោះស្រាយវិវាទដីធ្លីថ្នាក់ជាតិ ទីស្ដីការគណៈរដ្ឋមន្ត្រី រដ្ឋសភា និងដាក់ជូនទៅលោកនាយករដ្ឋមន្ត្រី ហ៊ុន សែន សុំកិច្ចអន្តរាគមន៍ជួយដោះស្រាយ។ ជាការឆ្លើយតបមកវិញ លោកនាយករដ្ឋមន្ត្រី ហ៊ុន សែន កាលពីថ្ងៃទី៣១ ខែសីហា បានចារលើលិខិតរបស់ទីស្ដីការគណៈរដ្ឋមន្ត្រី ដោយសម្រេចថា ដីដែលប្រជាពលរដ្ឋរស់នៅយូរហើយ ត្រូវតែជាកម្មសិទ្ធិស្របច្បាប់របស់ប្រជាជន មិនអាចដកហូតតាមទំនើងចិត្តបាននោះទេ។ ក្រសួងរៀបចំដែនដី និងនគរូបនីយកម្ម ត្រូវចាត់តាំងមន្ត្រីសុរិយោដីចុះវាស់វែងចេញកម្មសិទ្ធិជូនប្រជាជន តាមដីដែលគាត់ធ្លាប់បានកាន់កាប់ ដើម្បីឲ្យគាត់បានស្ងប់ចិត្ត និងកសាងជីវភាពរស់នៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។