ការរៀបចំដីសម្បទានសង្គមកិច្ច ចែកជូនគ្រួសារជនក្រីក្រអត់ដីធ្លីនៅកណ្ដាលក្រុងបាត់ដំបង កំពុងប្រឈមទៅនឹងការប្រឆាំងតវ៉ាពីសំណាក់អ្នកភូមិជាម្ចាស់ដី។
មូលហេតុដោយសារតែដីដែលគេរឹបអូសពីអ្នកភូមិ ធ្វើការវាស់វែងជាច្រើនឡូត៍នោះ ពុំត្រូវបានប្រគល់ទៅឲ្យគ្រួសារជនក្រីក្រពិតប្រាកដទេ ប៉ុន្តែបែរជាមានការឃុបឃិតគ្នាយកដីឡូត៍ទាំងនោះទៅលក់ឲ្យអ្នកមានលុយ និងចែកទៅឲ្យមន្ត្រីយោធាជិត ១០០នាក់ ដែលពុំមានឈ្មោះក្នុងការទទួលបានដីសម្បទានសង្គមកិច្ចទៅវិញ។
ប្រជាពលរដ្ឋនៅសង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង អំពាវនាវសុំរាជរដ្ឋាភិបាលបញ្ជូនក្រុមមន្ត្រីជំនាញ ចុះត្រួតពិនិត្យជាបន្ទាន់ចំពោះភាពមិនប្រក្រតីនៃការចែកដីសម្បទានសង្គមកិច្ច នៅទីរួមខេត្តបាត់ដំបង ដែលពោរពេញទៅដោយភាពចម្រូងចម្រាស គ្មានសមធម៌ និងគ្មានតម្លាភាព។
អ្នកភូមិដែលបានកាន់កាប់ដី និងភាគច្រើនមានលំនៅឋាន តាំងពីឆ្នាំ១៩៨២ មកនោះ ថ្លែងថា កាលពីថ្ងៃទី២៣ និងថ្ងៃទី២៥ ខែឧសភា អាជ្ញាធរក្រុងបាត់ដំបង និងមន្ត្រីយោធាភូមិភាគ៥ បានចុះរុះរើរបងនៅតាមដីឡូត៍របស់អ្នកភូមិ នៅក្នុងភូមិចម្ការឫស្សី និងភូមិ១៣មករា សង្កាត់ព្រែកព្រះស្ដេច ក្រុងបាត់ដំបង៖ «ធ្វើម៉េចឲ្យស្របហ្នឹងសម្ដេច ពីព្រោះខ្ញុំដឹងពាក្យពីសម្ដេចមក លោកថា បើដីអ្នកណាកាន់កាប់ពី ១០ឆ្នាំទៅ គឺគេមានកូនមានចៅកុំដករបស់គេ ឥឡូវនេះគេផ្សាយមីក្រូ គេថាយើងកាន់ដីខុសច្បាប់»។
កាលពីថ្ងៃទី២២ ខែឧសភា អាជ្ញាធរក្រុងបាត់ដំបង បានចេញសេចក្ដីណែនាំមួយ ដើម្បីអនុវត្តគម្រោងគំរូរៀបចំសុវត្ថិភាពដីធ្លី និងសុវត្ថិភាពលំនៅឋានជនក្រីក្រទីក្រុង នៅលើដីអតីតសួនច្បារសង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង។
អភិបាលក្រុងបាត់ដំបង លោក អឿម សុខុន បញ្ជាក់ថា ក្រុមអាជ្ញាធរបានអនុវត្តទៅតាមគម្រោងរបស់ខ្លួន៖ «ចម្រាសចម្រូងវាច្រើន ប៉ុន្តែទី១ យើងអនុវត្តអ្នកដែលបានចុះឈ្មោះនៅក្នុងគម្រោងដែលយើងបានលើកឡើងហ្នឹង គឺយើងអនុវត្តទៅតាមហ្នឹង។ អ្នកខ្លះគេឲ្យចុះឈ្មោះគាត់ចូលរួម អ្នកណាមានប័ណ្ណដែលយើងផ្សព្វផ្សាយកន្លងមក យើងធ្វើជូនអ្នកហ្នឹងមុន នេះគឺជានីតិវិធីរបស់យើង»។
ក្នុងនោះដែរ សាលាក្រុងមានសេចក្ដីណែនាំ ៥ចំណុច ប៉ុន្តែត្រូវបានអ្នកភូមិប្រតិកម្មថា គោលការណ៍ណែនាំមាននៅលើក្រដាស តែការជាក់ស្ដែង ពួកគេបានអនុវត្តផ្ទុយ ធ្វើឲ្យប្រជាពលរដ្ឋបាត់បង់ដីធ្លី។ ពួកគាត់ អះអាងថា ដីលំនៅឋានរបស់ប្រជាពលរដ្ឋជាច្រើនគ្រួសារនៅភូមិចម្ការឫស្សី ភូមិអូរខ្ចាយ និងភូមិ១៣មករា សង្កាត់ព្រែកព្រះស្ដេច ប្រហែល ៣០% ត្រូវបានគេវាស់វែងពុះជាឡូត៍ ៤គុណ១៦ម៉ែត្រ លក់ទៅឲ្យក្រុមអ្នកមានលុយកាក់ និងដីជិត ១០០ឡូត៍ទៀត ត្រូវគេប្រគល់ទៅក្រុមមន្ត្រីយោធា។ ចំណែកឯគ្រួសារក្រីក្រអត់ដីនៅក្នុងសហគមន៍នោះ អត់ទទួលបានដីដដែលជាដដែល៖ «ដាច់អហង្ការមិនអាចឲ្យទៅបានទេ ព្រោះថា បើថាយកទៅឲ្យប្រជាជននៅបានដូចគ្នា ខ្ញុំក៏នៅបានដូចគ្នា អាហ្នឹងគេនិយាយដាច់ខាតគ្រប់គ្នា អារឿងគេដកគេលក់គេដូរហ្នឹង វារឹបអូសដីពីយើងបានយកទៅលក់ឲ្យអ្នកមានហ្នឹងឯង»។
ក្នុងរយៈពេលប៉ុន្មានឆ្នាំកន្លងមក អ្នកភូមិទាំងនោះត្រូវបានអង្គការក្រៅរដ្ឋាភិបាលមួយ កៀងគរឲ្យបង្កើតជាសហគមន៍ក្រីក្រ។ សហគមន៍នោះបានតម្រូវឲ្យប្រជាពលរដ្ឋបង់លុយមួយគ្រួសារ ៣ពាន់រៀលក្នុងមួយខែ ដោយសន្យារកដីទំហំ ៤គុណនឹង ១៦ម៉ែត្រ សង់លំនៅឋានស្របច្បាប់ ចែកជូនមកវិញ។ ប៉ុន្តែសហគមន៍នេះបានស្ងប់ស្ងាត់ទៅវិញ ដោយសារតែអ្នកភូមិមិនគាំទ្រ។
ពីមុនមក ដីកំពុងមានជម្លោះនេះជាប្រភេទដីស្រែ ពុំមែនជាដីសួរច្បារសង្កាត់ព្រែកព្រះស្ដេច នោះទេ។ តែក្រោយមក ទើបអាជ្ញាធរខេត្តលើកគម្រោងយកដីនោះធ្វើជាដីសួនច្បារ ខណៈដែលប្រជាពលរដ្ឋ ២៤៥គ្រួសារ បានរស់នៅលើដីនោះតាំងពីឆ្នាំ១៩៨២ មកម្ល៉េះ។ ហើយនៅឆ្នាំ២០០៧ ដីសួនច្បារសាធារណៈរបស់រដ្ឋនោះ ត្រូវអាជ្ញាធរខេត្តធ្វើអនុប្រយោគ ប្រែក្លាយទៅជាដីឯកជនរបស់រដ្ឋ ដើម្បីរៀបចំដីសម្បទានសង្គមកិច្ច ចែកជូនប្រជាពលរដ្ឋអត់មានដីធ្លីរស់នៅ ប៉ុន្តែជាក់ស្ដែង ការរៀបចំដីនោះកំពុងកើតមានភាពចម្រូងចម្រាស ដោយសារតែអ្នកភូមិមើលឃើញនូវភាពប្រក្រតីជាច្រើន ដែលកើតមានជាបន្តបន្ទាប់មកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។