ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា ឲ្យដឹងថា លោកនឹងស្នើឲ្យនាយករដ្ឋមន្ត្រីផ្អាកបណ្ដោះអាសន្នចំពោះការបូមខ្សាច់លុបលើដីកំពុងមានទំនាស់នៅតំបន់អភិវឌ្ឍន៍ក្រុងរណបជ្រោយចង្វារ និងចាត់វិធានការដោះស្រាយផលប៉ះពាល់ឲ្យចប់សព្វគ្រប់ជាមុនសិន មុននឹងអនុញ្ញាតឲ្យដំណើរការបន្តទៀត។
លោក អេង ឆៃអ៊ាង ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា មកពីគណបក្សសង្គ្រោះជាតិ ឲ្យដឹងនៅថ្ងៃទី១៦ ខែតុលា ថា លោកបានធ្វើសំណើទៅលោកនាយករដ្ឋមន្ត្រី ហ៊ុន សែន រួចហើយ ដោយរង់ចាំតែប្រធានរដ្ឋសភា លោក ហេង សំរិន ចុះហត្ថលេខាប៉ុណ្ណោះ។ លោកបន្តថា ក្នុងសំណើនោះ គឺលោកស្នើសុំឲ្យ លោក ហ៊ុន សែន ជួយអន្តរាគមន៍ផ្អាកសកម្មភាពបូមខ្សាច់បណ្ដោះអាសន្នរបស់ក្រុមហ៊ុន អូស៊ីអាយស៊ី (OCIC) ដោយត្រូវរង់ចាំការដោះស្រាយឲ្យបានរួចរាល់ជាមុនសិន។
លោកបន្ថែមទៀតថា ក្រៅពីជំរុញឲ្យអាជ្ញាធរដែលពាក់ព័ន្ធដោះស្រាយដោយប្រសិទ្ធភាព លោកនឹងដឹកនាំក្រុមការងារចុះពិនិត្យទីតាំងដែលកំពុងមានជម្លោះនោះដោយផ្ទាល់៖ «ខ្ញុំស្នើសុំឲ្យរាជរដ្ឋាភិបាលហ្នឹងជួយអន្តរាគមន៍ចាត់ការ ដោយឲ្យក្រុមហ៊ុនផ្អាកសិន។ ផ្អាកការបូមខ្សាច់ចាក់លើដីទំនាស់ហ្នឹងសិន ដើម្បីរង់ចាំឲ្យមានការដោះស្រាយឲ្យបានពេញលេញសិន ព្រោះកាលណាបើក្រុមហ៊ុននៅតែបន្តបូមខ្សាច់ចាក់តទៅទៀត ចាក់លុបទៅ វានឹងអាចធ្វើឲ្យទំនាស់ហ្នឹងវាកាន់តែជ្រាលជ្រៅ ហើយស្មុគស្មាញក្នុងការដោះស្រាយ។ អាហ្នឹង គឺជាចំណុចទីមួយ។ ហើយចំណុចទីពីរ គឺខ្ញុំសូមឲ្យរដ្ឋាភិបាលហ្នឹង ត្រូវតែជំរុញចាត់វិធានការឲ្យអាជ្ញាធរហ្នឹងដោះស្រាយរឿងហ្នឹងឲ្យបានឆាប់រហ័ស»។
ការប្រកាសពីជំហររបស់ លោក អេង ឆៃអ៊ាង នៅពេលនេះ គឺធ្វើឡើងតាមសំណើរបស់ប្រជាពលរដ្ឋដែលសុំឲ្យជួយដោះស្រាយជុំវិញជម្លោះដីអភិវឌ្ឍក្រុងរណបជ្រោយចង្វារ ជាមួយអាជ្ញាធរក្រុង និងក្រុមហ៊ុន អូស៊ីអាយស៊ី របស់លោកឧកញ៉ា ពុង ខៀវសែ នៅពេលនេះ ធ្វើឡើងបន្ទាប់ពីមានកិច្ចអន្តរាគមន៍ពីតំណាងប្រជាពលរដ្ឋមកពី ៣សង្កាត់ និង ៥ភូមិ កាលពីព្រឹកថ្ងៃទី១៦ ខែតុលា ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។