អ្នករស់នៅក្នុងសហគមន៍ដីមាស សង្កាត់ព្រែកលៀប ត្រូវអាជ្ញាធរខណ្ឌជ្រោយចង្វារ និងក្រុមហ៊ុន អូស៊ីអាយស៊ី (OCIC) ដោះស្រាយសំណងដោយផ្ដល់ផ្ទះជាលក្ខណៈខុនដូ (Condo) ក្នុងអគារបុរីរុងរឿង នៅថ្ងៃទី២៨ តុលា។ ពលរដ្ឋជាង ១០០គ្រួសារ យល់ព្រមទទួលយកការដោះស្រាយនេះ។
ពលរដ្ឋនៅក្នុងសហគមន៍ដីមាស ១៣៧គ្រួសារ នៅសង្កាត់ព្រែកលៀប ខណ្ឌជ្រោយចង្វារ ព្រមយកសំណងផ្ទះកម្ពស់ ៤ជាន់ នៅក្នុងបុរីរុងរឿង ដោយមួយគ្រួសារទទួលបានមួយបន្ទប់ និងតូបលក់អីវ៉ាន់មួយ ជាថ្នូរនឹងផ្ទេរការរស់នៅដែលប៉ះពាល់ការពង្រីកផ្លូវតំបន់អភិវឌ្ឍន៍ក្រុងរណបជ្រោយចង្វារ របស់ក្រុមហ៊ុន អូស៊ីអាយស៊ី។
អភិបាលខណ្ឌជ្រោយចង្វារ លោក ឃ្លាំង ហួត ប្រាប់ទៅពលរដ្ឋសហគមន៍ដីមាសថា បន្ទប់មួយក្នុងខុនដូបុរីរុងរឿង និងតូបមួយនេះ សុំឲ្យអ្នកភូមិរស់នៅ និងលក់ដូរឲ្យបានយ៉ាងតិចពីរឆ្នាំ ទើបអាជ្ញាធរអនុញ្ញាតឲ្យផ្ទេរកម្មសិទ្ធិទៅអ្នកផ្សេង ឬលក់ដូរបន្តបាន។ លោកថា មានពលរដ្ឋដែលរស់នៅក្នុងភូមិមានប្លង់ដីត្រឹមត្រូវ ហើយព្រមចេញពីក្នុងភូមិមករស់នៅក្នុងបុរីរុងរឿង គឺក្រុមហ៊ុនផ្តល់ផ្ទះមួយល្វែងកម្ពស់ ២ជាន់ ទទឹង ៤ម៉ែត្រ បណ្តោយ ១២ម៉ែត្រ៖ «គាត់រស់នៅលើដីអីដែលយើងទទួលស្គាល់គាត់ថារស់នៅស្របច្បាប់ អាហ្នឹងគឺគាត់បានមួយជុង។ នេះវារបៀបដូចខុនដូអ៊ីចឹង ៤,២ម៉ែត្រ និង ១៤ម៉ែត្រនេះ គឺគាត់រស់នៅលើផ្លូវ»។
អនុប្រធានក្រុមហ៊ុន អូស៊ីអាយស៊ី លោក ទូច សំណាង ថ្លែងថា ក្រុមហ៊ុន អូស៊ីអាយស៊ី ទទួលបានដីទំហំជាង ៣៨៧ហិកតារ វិនិយោគតំបន់អភិវឌ្ឍន៍ក្រុងរណបជ្រោយចង្វារ ជិត ១០០ឆ្នាំ។ លោកថា ក្នុងទំហំដីនោះ អាជ្ញាធរក្រុងស្នើសុំឲ្យឆ្វៀលចេញនូវភូមិចាស់ៗស្ថិតក្នុងការអភិវឌ្ឍ ដែលក្រុមហ៊ុន អូស៊ីអាយស៊ី កំពុងពិចារណាសំណើនេះ៖ «ត្រូវតែកាត់ភូមិចាស់ចេញ ត្រូវតែអភិវឌ្ឍឲ្យប្រជាពលរដ្ឋដែលនៅមូលដ្ឋានហ្នឹងប្រសើរជាងមុន មិនមែនឲ្យគាត់វេទនា ឲ្យគាត់នេះទេ។ ដូច្នេះហើយ បានជាក្រុមហ៊ុនចូលរួមបដិភាគក្នុងការអភិវឌ្ឍរួមគ្នា ធ្វើជាតំបន់មួយដែលមានបរិស្ថានល្អមានផ្សារ»។
លោក ស៊ុន ឆេងអ៊ី រស់នៅភូមិស្វាយជួរ សង្កាត់ព្រែកលៀប ឲ្យដឹងថា គាត់មានដីភូមិដែលក្រុមហ៊ុន អូស៊ីអាយស៊ី គូសផែនទីប៉ះដី និងផ្ទះគាត់អស់ទំហំ ៥ម៉ែត្រ បណ្តោយ ១៧ម៉ែត្រ។ លោកថា លោកព្រមទទួលយកបន្ទប់ខុនដូក្នុងបុរីរុងរឿងតាមការសម្របសម្រួលរបស់អាជ្ញាធរខណ្ឌជ្រោយចង្វារ ប៉ុន្តែក្រុមហ៊ុនមិនឲ្យគាត់រស់នៅក្នុងបន្ទប់ផ្ទាល់ដីទេ គឺតម្រូវឲ្យចាប់ឆ្នោតយកបន្ទប់ខុនដូពីជាន់ទី១ឡើងទៅ ទើបគាត់ឆ្ងល់៖ «រួចមិនដឹងថាជាអ្នកណាត្រូវបានជាន់ទីប៉ុន្មានទេ អាហ្នឹងបើយើងនិយាយពីភាពសុចរិតទៅ វានៅរឿងថាហេងស៊យនៅឡើយ វាអត់ទាន់ប្រាកដថា យើងត្រូវបានប៉ុន្មាន»។
តំណាងក្រុមហ៊ុន អូស៊ីអាយស៊ី លោក បញ្ញា បំភ្លឺថា បន្ទប់ផ្ទាល់ដី គឺក្រុមហ៊ុនផ្តល់អាទិភាពជូនគ្រួសារពិការ ជនមានជំងឺធ្ងន់ធ្ងរ មិនអាចឡើងចុះដោយជើងទៅកាន់ជាន់ទី៣ ទី៤បាន។ លោកថា ក្រុមហ៊ុននឹងឲ្យពលរដ្ឋសហគមន៍ដីមាសទាំង ១៣៧គ្រួសារ ចាប់ឆ្នោតផ្សងសំណាងយកបន្ទប់ស្នាក់នៅក្នុងអគារខុនដូបុរីរុងរឿង ក្រោយព្រះរាជពិធីបុណ្យអុំទូក៖ «សំឡេង»។
ការចរចាដោះស្រាយដីធ្លីនៅថ្ងៃទី២៨ ខែតុលា នៅក្នុងខណ្ឌជ្រោយចង្វារ នោះ ក្រុមហ៊ុនសម្រេចប្រគល់តូបមួយដែលមានទទឹង ២ម៉ែត្របួនជ្រុង ឲ្យប្រជាពលរដ្ឋលក់ដូរអីវ៉ាន់ និងអាចដោះដូរកម្មសិទ្ធិបាន។ ប៉ុន្តែផ្ទះក្នុងអគារខុនដូបុរីរុងរឿង មានកម្មសិទ្ធិតាមគ្រួសារហើយ គឺពលរដ្ឋមិនអាចលក់បន្តបានទេ ដរាបណាគ្រួសារនីមួយៗមិនបានរស់នៅក្នុងខុនដូនោះជាក់លាក់ឲ្យបានពីរឆ្នាំទេ។ ពលរដ្ឋបានស្នើសុំទៅក្រុមហ៊ុន និងអាជ្ញាធរខណ្ឌ សុំឲ្យក្រុមហ៊ុនតភ្ជាប់បណ្ដាញទឹក និងភ្លើងមិនយកកម្រៃ។ ប៉ុន្តែពលរដ្ឋព្រមបង់ជូនថ្លៃប្រើប្រាស់ភ្លើងតាមគីឡូវ៉ាត់ និងទឹកតាមម៉ែត្រគូបដែលរដ្ឋកំណត់តម្លៃ មិនមែនក្រុមហ៊ុនកំណត់តម្លៃខ្ពស់ជាងតម្លៃរដ្ឋនោះទេ។
ទោះជាមានការដោះស្រាយបណ្ដើរៗនេះក្តី នៅក្នុងតំបន់អភិវឌ្ឍន៍ក្រុងរណបជ្រោយចង្វារ លើទំហំផ្ទៃដីជាង ៣៨៧ហិកតារ មានអ្នករស់នៅយូរយារណាស់មកហើយក្នុងភូមិចាស់ៗ ៣សង្កាត់ទៀត គឺភូមិកៀនឃ្លាំង សង្កាត់ព្រែកលៀប ភូមិដើមគរ សង្កាត់ជ្រោយចង្វារ និងភូមិព្រែកតាសេក សង្កាត់ព្រែកតាសេក។
ពាក់ព័ន្ធបញ្ហានេះ អភិបាលខណ្ឌជ្រោយចង្វារ លោក ឃ្លាំង ហួត អះអាងថា លោកស្នើសុំឲ្យឆ្វៀលចេញពីការវិនិយោគនូវភូមិចាស់ៗដែលមានផ្ទះសង់តាំងពីសម័យបារាំង គ្រប់គ្រងកម្ពុជា ជាភស្តុតាង ហើយរងនូវការវិនិយោគដែលនឹងអាចក្រុមហ៊ុនវាយបំផ្លាញចោល៖ «គាត់សុខចិត្តរស់នៅភូមិរបស់គាត់ កេរដូនតា ដូច្នេះកេរដូនតា យើងត្រូវតែថែរក្សាឲ្យគេ មិនបានទេ កុំប៉ះពាល់ឲ្យសោះ»។
ពលរដ្ឋរស់នៅក្នុង ៣សង្កាត់នោះ ដោយបារម្ភអំពីការវិនិយោគដែលក្រុមហ៊ុនបូមដី និងខ្សាច់ ចាក់ពីលើដីពួកគាត់កំពុងអាស្រ័យផល បានប្ដឹងទៅតុលាការសាលាដំបូង និងសាលាឧទ្ធរណ៍ សុំឲ្យរក្សាការពារដី តែត្រូវតុលាការទាំងពីរថ្នាក់ បង្វិលសំណុំរឿងទៅឲ្យសាលារាជធានីភ្នំពេញ និងក្រុមហ៊ុន អូស៊ីអាយស៊ី ដោះស្រាយវិញ។
មេធាវីការពារក្តីឲ្យពលរដ្ឋ ៣សង្កាត់នោះ លោក ណន អូនី ឲ្យដឹងថា ពលរដ្ឋស្នើសុំឲ្យអភិបាលខណ្ឌជ្រោយចង្វារ និងក្រុមហ៊ុន អូស៊ីអាយស៊ី បើកវេទិកាសាធារណៈពិគ្រោះយោបល់ ដើម្បីឲ្យការដោះស្រាយអាចទទួលយកបានទាំងសងខាង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។