តំណាងសហគមន៍ព្រៃឈើខេត្តកំពង់ឆ្នាំង ប្រតិកម្មនឹងមន្ត្រីយោធា និងអាជ្ញាធរឃុំអញ្ចាញរូង ស្រុកបរិបូរណ៍ ជុំវិញការបកស្រាយរឿងបទល្មើសទន្ទ្រានកាន់កាប់ដីព្រៃ។ ការប្រតិកម្មនេះ ធ្វើឡើងបន្ទាប់ពីដីព្រៃប្រមាណ ១០០ហិកតារនៅចំណុចខ្លុងរលើង នៃភូមិអញ្ចាញរូង ត្រូវពលរដ្ឋជួលគ្រឿងចក្រឈូសឆាយ ប៉ុន្តែមេឃុំ និងមន្ត្រីយោធា ថាដីនោះជាកម្មសិទ្ធិឯកជន។
តំណាងសហគមន៍ព្រៃឈើស្ទឹងខ្សាច់ស នៃឃុំអញ្ចាញរូង ប្រតិកម្មខ្លាំងៗចំពោះសម្ដីរបស់មេឃុំ និងមន្ត្រីយោធាម្នាក់ ដែលថ្លែងតាមរយៈវិទ្យុអាស៊ីសេរី កាលពីថ្ងៃទី២១ ខែកក្កដា ថា ដីដែលបានឈូសឆាយនោះជាដីពលរដ្ឋមានលិខិតកាន់កាប់ត្រឹមត្រូវ។ ប៉ុន្តែតំណាងសហគមន៍បញ្ជាក់ថា ទីតាំងដីឈូសនោះ គឺជាដីព្រៃសុទ្ធ សូម្បីក្រុមនិស្សិត និងមន្ត្រីសុរិយោដី ក៏មិនវាស់ចេញប្លង់កម្មសិទ្ធិឯកជនដែរ។
តំណាងសហគមន៍ លោកស្រី ប៉ិញ អាត មានប្រសាសន៍នៅថ្ងៃទី២៣ ខែកក្កដា ថា មេឃុំអញ្ចាញរូង និងមន្ត្រីយោធាឈ្មោះ មាស សារ៉េត ដែលដឹកនាំកម្លាំងគ្រឿងចក្រឈូសឆាយព្រៃ បាននិយាយភូតកុហកសាធារណជន ទាក់ទងនឹងបទល្មើសបំផ្លាញព្រៃសហគមន៍នៅក្នុងកម្មវិធីផ្សាយរបស់វិទ្យុអាស៊ីសេរី។ លោកស្រីចង់ឲ្យអាជ្ញាធរ ឬជំនាញរដ្ឋបាលព្រៃឈើ សម្រួលដល់សហគមន៍បានបោះបង្គោលថ្មកំណត់ព្រំប្រទល់ដីសហគមន៍ចំនួន ៩០ដើម ដើម្បីបញ្ចប់ការប្រទាញប្រទង់ដីនេះ៖ « សុរិយោដីដែលវាស់វែងជាលក្ខណៈប្រព័ន្ធហ្នឹង គេដាក់ឋិតនៅក្នុងព្រៃសហគមន៍ ហើយមួយទៀតនៅកន្លែងហ្នឹងក៏អត់មានវាស់ឲ្យពលរដ្ឋដែរ។ មកនិយាយថាដីហ្នឹងមានប័ណ្ណ ពេលដាំកូនឈើដែលសហគមន៍ទៅ គាត់ទៅចូលរួមដែរ។ អ៊ីចឹងឲ្យគាត់មុននឹងឆ្លើយ ឲ្យពិចារណាឲ្យបានដិតដល់ផង »។
មេឃុំអញ្ចាញរូង ធ្លាប់ឆ្លើយតបនឹងការចោទប្រកាន់របស់តំណាងសហគមន៍ថា ដីដែលឈូសនៅចំណុចខ្លុងរលើង គឺជាដីកម្មសិទ្ធិឯកជនមានលិខិតកាន់កាប់ទទួលស្គាល់ដោយមេឃុំចាស់។ ចំណែកមន្ត្រីយោធា លោក មាស សារ៉េត ឆ្លើយថា ទីតាំងដីដែលលោកស៊ីឈ្នួលឈូសឆាយនោះ មានពលរដ្ឋម្ចាស់ដីឈរចាំចង្អុលបង្ហាញឲ្យឈូស ហើយមានលិខិតកាន់កាប់ទទួលស្គាល់ដោយអាជ្ញាធរភូមិ-ឃុំខ្លះតាំងពីឆ្នាំ១៩៩៩ និងខ្លះឆ្នាំ២០០៨។
បន្ថែមលើនេះ មេឃុំអញ្ចាញរូង លោក ប្លង់ វ៉ាត ថាលោកមិនទាន់អាចឲ្យសហគមន៍បោះបង្គោលកំណត់ព្រំប្រទល់សហគមន៍នៅឡើយទេ ដើម្បីកុំឲ្យមានបញ្ហាកាន់តែវែងឆ្ងាយ។ លោកទទួលស្គាល់ថា ដីនៅតំបន់ដែលមានព្រំប្រទល់បីស្រុក គឺស្រុកបរិបូរណ៍ ស្រុករលាប្អៀរ និងស្រុកទឹកផុស នេះ ខាងជំនាញមិនទាន់វាស់មែន ដោយសារមានពលរដ្ឋងើបតវ៉ាពាក់ព័ន្ធនឹងព្រៃសហគមន៍ ហើយលោកក៏ធ្លាប់ស្នើទៅអាជ្ញាធរថ្នាក់ជាតិ ដើម្បីធ្វើបច្ចុប្បន្នភាពផ្ទៃដី និងវាស់បែងចែកឲ្យបានច្បាស់លាស់៖ « គេចាប់វាស់ ប៉ុន្តែអត់វាស់អាតំបន់ហ្នឹង ប្រជាជនទទូច ហើយខ្ញុំក៏សំណូមពរតាមរយៈធ្វើវេទិកា ចំពោះឯកឧត្ដមមកពីថ្នាក់ខេត្តអី ចេះតែសំណូមពរ តែអត់ទាន់ចេញសេចក្ដីសម្រេចនៅឡើយ។ ចង់បានញែកឲ្យដាច់ព្រៃសហគមន៍ប៉ុណ្ណា សល់ពីហ្នឹងចែកប្រជាជន។ ខ្ញុំចង់សំណូមពរត្រង់ហ្នឹងប្អូន។ ស្រួលខ្ញុំអាណត្តិទី៣ ទី៤ ទៀត វាចេះតែស្រួលថាដីតំបន់នេះចប់សព្វគ្រប់ហើយ »។
សហគមន៍ព្រៃឈើស្ទឹងខ្សាច់ស ដែលមានផ្ទៃដីជាង ១ពាន់ហិកតារ (១.៤៥៩,៥៧ហិកតារ) មិនទាន់ទទួលស្គាល់ជាផ្លូវការពីក្រសួងកសិកម្ម នៅឡើយទេ ប៉ុន្តែអាជ្ញាធរភូមិ ឃុំ ស្រុក និងរដ្ឋបាលព្រៃឈើ បានទទួលស្គាល់សហគមន៍នេះរួចហើយ។ ផ្ទៃដីសហគមន៍ លំបាកគ្រប់គ្រងដោយសារជនខិលខូចរំលោភយក ថែមទាំងឈូសរំលើងទាំងកូនឈើធ្នង់ បេង និងគគីរ ដែលប្រជាសហគមន៍នាំគ្នាដាំទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។