ប្រជាពលរដ្ឋនៅឃុំបាក់ស្នា ស្រុកបារាយណ៍ ខេត្តកំពង់ធំ បាននាំគ្នាចេញទៅហាមឃាត់ត្រាក់ទ័រដែលបានធ្វើការឈូសឆាយលើដីចម្ការរបស់ខ្លួននៅក្បែរភូមិ។ ប្រជាពលរដ្ឋបញ្ជាក់ថា ពួកគាត់បានស្នើឱ្យអាជ្ញាធរវាស់វែងដីជូនពួកគាត់ ប៉ុន្តែអាជ្ញាធរបែរជាធ្វើខុសអ្វីដែលពួកគាត់ស្នើទៅវិញ។ អាជ្ញាធរវិញបានឱ្យដឹងថា អាជ្ញាធរ គឺធ្វើទៅតាមការស្នើសុំរបស់ប្រជាពលរដ្ឋ ហើយរួមទាំងខាងខេត្តក៏បានឯកភាពគ្នាថាវាស់វែងដីជូនប្រជាពលរដ្ឋនោះ ប៉ុន្តែប្រជាពលរដ្ឋបែរជាជំទាស់ទៅវិញ។
ប្រជាពលរដ្ឋរស់នៅឃុំបាក់ស្នា ស្រុកបារាយណ៍ ខេត្តកំពង់ធំ អ្នកស្រី នួន អៀង បានឱ្យដឹងថា ប្រជាជនជិត ២០០គ្រួសារ បានធ្វើការស្នើសុំទៅខាងអាជ្ញាធរឱ្យជួយដោះស្រាយបញ្ហាវាស់វែងដីរបស់ខ្លួន ដែលពួកគាត់បានរស់នៅទីនោះ ប៉ុន្តែសកម្មភាពដែលអាជ្ញាធរបានអះអាងថាកំពុងធ្វើការវាស់វែងជូនប្រជាពលរដ្ឋនោះ បែរជាប្រជាពលរដ្ឋមិនដឹងទៅវិញ ហើយសកម្មភាពនោះ គឺផ្ទុយទៅនឹងអ្វីដែលប្រជាពលរដ្ឋបានស្នើសុំ។
អ្នកស្រីបន្តថា នៅថ្ងៃទី១៩ មីនា ឃើញមានត្រាក់ទ័រឈូសឆាយ ពីរគ្រឿង ទៅឈូសឆាយដីដែលប្រជាពលរដ្ឋបានធ្វើដំណាំជាច្រើនឆ្នាំមកហើយ ដោយអាជ្ញាធរប្រាប់ថា ជាការឈូសដើម្បីធ្វើផ្លូវ ប៉ុន្តែប្រជាពលរដ្ឋបារម្ភថា ដីនោះអាចនឹងមានអ្នកមានលុយទិញយក ពីព្រោះការឈូសឆាយប្រៀបបានទៅនឹងការធ្វើរបងព័ទ្ធដីរបស់ពួកគាត់ទៅវិញ។
អ្នកស្រី នួន អៀង៖ «អត់មានប្រាប់ប្រជាពលរដ្ឋទេលោកគ្រូមើល! ស្រាប់តែយកទៅឈូសឆាយហ្មង ប៉ុន្តែនេះប្រជាពលរដ្ឋខ្ញុំឃាត់បានប្រហែលជាបីបួនថ្ងៃហើយ វាអត់ហ៊ានឈូស ប៉ុន្តែវាអត់ដឹងអាប៊ុលចេញពីកន្លែងហ្នឹងសោះលោកគ្រូមើល។ វាថាចាំឡាន ខ្ញុំមកដឹងទើបខ្ញុំទៅ ព្រោះខ្ញុំដឹកមិនរួច ដល់សួរៗទៅ វាថាវាស៊ីឈ្នួលគេអីណាអីណី វាឆ្លើយថាអ៊ីចឹង មិនថាលក់ឱ្យអ្នកណា? អ្នកណាគេទិញយក? ប្រជាពលរដ្ឋកំពុងតែតាមដានថា អ្នកណាគេជាអ្នកលក់អ៊ីចឹងលោកគ្រូ»។
ប្រភពដដែលបន្តថា ប្រជាពលរដ្ឋមិនសូវទទួលព័ត៌មានច្រើនពីខាងអាជ្ញាធរក្នុងគម្រោងវាស់វែងដីជូនពួកគាត់នោះទេ ហើយអាជ្ញាធរឃុំដូចមិនសូវអើពើនឹងរឿងដីរបស់ពួកគាត់ឡើយ ហើយនៅពេលដែលប្រជាពលរដ្ឋធ្វើការវាស់វែងដោយខ្លួនឯង ត្រូវបានសមត្ថកិច្ចហាមឃាត់។
ប្រជាពលរដ្ឋម្នាក់ទៀត អ្នកស្រី ជ័យ សុខា មានប្រសាសន៍ថា ដីដែលពួកគាត់បានដាំដំណាំជាច្រើនឆ្នាំមកហើយនោះ ប៉ុន្តែមិនទាន់មានប្លង់ច្បាស់លាស់ ហើយកន្លងមកធ្លាប់មានបញ្ហាកើតឡើង ដូចនេះប្រជាពលរដ្ឋក៏ស្នើសុំឱ្យមានការវាស់វែងជាផ្លូវការ។ ឆ្លើយតបតាមការស្នើនោះ មុនការបោះឆ្នោត ក្រុមនិស្សិតបានទៅចុះប្លង់ដីនោះជូនប្រជាពលរដ្ឋ ប៉ុន្តែមិនបានឃើញដំណើរអ្វីឡើយរហូតដល់ថ្មីៗនេះ បែរជាលេចឮថាដីដែលពួកគាត់តវ៉ានោះ គឺមានអ្នកទិញយកទៅវិញ ដែលកាន់តែធ្វើឱ្យពួកគាត់ព្រួយបារម្ភខ្លាំងឡើងខ្លាចបាត់បង់ដីរបស់ខ្លួន។
អ្នកស្រី ជ័យ សុខា៖ «ប្រជាជនសព្វថ្ងៃមិនមែនថាព្រួយបារម្ភយ៉ាងម៉េចទេ គឺព្រួយបារម្ភស្នើជីវិត គ្មានអីរស់នៅប្រចាំជីវិតសម្រាប់ដីនេះឯង។ ប្រសិនបើរដ្ឋាភិបាលគ្រប់ជាន់ថ្នាក់ទាំងអស់ និងសម្ដេច ហ៊ុន សែន ដែលបានចារមកនេះ ចៅហ្វាយខេត្តមិនអនុវត្តតាមទេ ប្រជាជននៅបាក់ស្នា នេះមិនដឹងថារស់នៅទីពឹងអីនោះទេ ចាត់ទុកជីវិតមួយស្លាប់គ្មានមែកទំពឹងផ្អែកលោកគ្រូ»។
អ្នកស្រីបញ្ជាក់ថា ដីដែលប្រជាពលរដ្ឋកំពុងមានបញ្ហាមានទំហំ ៩០០ម៉ែត្រ គុណនឹង ៣ពាន់ម៉ែត្រ ហើយមានប្រជាពលរដ្ឋ ១៨៦គ្រួសារ បានអាស្រ័យផលនៅទីនោះ។
មេឃុំបាក់ស្នា លោក ម៉ី សារឿន មានប្រសាសន៍ថា រឿងដីនេះប្រជាពលរដ្ឋបានដាក់ប្ដឹងទៅក្រសួងមហាផ្ទៃ ហើយក្រសួងមហាផ្ទៃ ក៏បានចាត់ឱ្យខាងខេត្តធ្វើការដោះស្រាយជូនប្រជាពលរដ្ឋតាមសំណើ ប៉ុន្តែលោកមិនយល់ថា ប្រជាពលរដ្ឋមានគំនិតយ៉ាងណានោះទេ ពីព្រោះនៅពេលដែលខាងខេត្តឈូសឆាយធ្វើផ្លូវ និងធ្វើការវាស់វែងដីឱ្យនោះ បែរជាប្រជាពលរដ្ឋជំទាស់ទៅវិញ៖ «ជារឿងសិទ្ធិរំលោភរបស់គាត់ទេ មិនដឹងថាម៉េចសេរីភាពរបស់ប្រជាពលរដ្ឋ ខ្ញុំមិនដឹងធ្វើម៉េចដែរ។ គោលការណ៍របស់ខេត្តឱ្យគេឈូសឆាយសម្អាតធ្វើផ្លូវឱ្យគេ ដល់គាត់ឃើញគេធ្វើផ្លូវគាត់ទៅរារាំងខ្ញុំមិនដឹងធ្វើម៉េចដែរ»។
លោកបន្តថា ខាងឃុំតែងតែពន្យល់ចំពោះបញ្ហានេះទៅកាន់ប្រជាពលរដ្ឋទាំងនោះ ប៉ុន្តែពួកគាត់មិនទាន់យល់ពីបញ្ហានេះឡើយ។ លោកបញ្ជាក់ថា ខាងឃុំមានសិទ្ធិត្រឹមតែជាអ្នកសម្របសម្រួលតែប៉ុណ្ណោះ ចំណែកការដោះស្រាយ គឺអាស្រ័យទៅលើអាជ្ញាធរខេត្ត។
យ៉ាងណាក៏ដោយ ប្រជាពលរដ្ឋអះអាងថា ពួកគាត់ពិតជាបានស្នើសុំឱ្យមានការវាស់វែងមែន ប៉ុន្តែការវាស់វែងនោះវាខុសពីអ្វីដែលពួកគាត់ចង់បាន ចំណែកឯការឈូសឆាយនោះ គឺមិនមែនជាការឈូសឆាយដើម្បីធ្វើផ្លូវនោះទេ ហើយប្រសិនបើមានការឈូសឆាយមិនត្រឹមត្រូវតទៅទៀត ប្រជាពលរដ្ឋនៅតែធ្វើការរារាំងមិនឱ្យបន្តសកម្មភាពបាននោះឡើយ ដរាបណាគ្មានការដោះស្រាយឱ្យពួកគាត់ស្ងប់ចិត្តនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។