ដីមួយកន្លែងនៅជាប់ព្រំដែនកម្ពុជាវៀតណាម តំបន់ព្រែកចាក ខេត្តកំពត កំពុងប្រទាញប្រទង់ដណ្ដើមគ្នាកាន់កាប់ដោយអ្នកភូមិថ្កូវ និងក្រុមហ៊ុន វាន់ វណ្ណា។ បញ្ហាដណ្ដើមដីកាន់កាប់នេះ បណ្ដាលឲ្យមានការចាប់ខ្លួនមនុស្សប្រុស ២នាក់ និងរងរបួសស្ត្រី ២នាក់ កាលពីល្ងាចថ្ងៃទី២៥ ខែមិថុនា។ អាជ្ញាធរមូលដ្ឋានមិនបានដឹងរឿងជម្លោះនោះភ្លាមៗទេ ដោយសារដីទំនាស់នៅជាប់ព្រំដែន។
ពលរដ្ឋ ១២គ្រួសារ នៅភូមិថ្កូវព្រែកចាក លើកគ្នាទៅរារាំងរថយន្ត និងគ្រឿងចក្រក្រុមហ៊ុន វាន់ វណ្ណា ដែលយកអាចម៍ដីចាក់លុបដីពួកគាត់ទំហំជាង ១ហិកតារ ដើម្បីបំបាត់ភស្តុតាងផ្នូរដូនតា និងរបងព្រំដីនៅក្នុងភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
លោក អ៊ាង រតនា អ្នកភូមិថ្កូវព្រែកចាក អះអាងថា ក្រុមហ៊ុន វាន់ វណ្ណា មានចេតនារំលោភយកដីនោះតែម្តង ដោយសារតែដីនោះនៅមាត់ផ្លូវព្រំដែនចំកន្លែងដែលភ្ញៀវទេសចរវៀតណាម ចេញចូល។ លោកថា អ្នកភូមិបានប្ដឹងទៅតុលាការខេត្តកំពត បន្ទាប់ពីអាជ្ញាធរមូលដ្ឋានមិនអាចសម្របសម្រួលបាន។ សាលាដំបូងខេត្តកំពត មិនទាន់បានដោះស្រាយផង ស្រាប់តែក្រុមហ៊ុនប្រើក្រុមស្លៀកពាក់ឈុតខ្មៅ មកឡោមព័ទ្ធដីនោះ ហើយសម្រុកចាក់ដីលុបនៅរសៀលថ្ងៃទី២៥ ខែមិថុនា។
លោក អ៊ាង រតនា៖ «រឿងហ្នឹងកំពុងតែដំណើរការនៅតុលាការ ព្រោះខាងប្រជាពលរដ្ឋហ្នឹង គាត់បានដាក់ពាក្យបណ្ដឹងទៅតុលាការហើយ តែតុលាការអត់ទាន់បានសម្រេចទៅខាងណាទេ។ ហើយភាគីម្ខាងទៀតនោះ ក៏គេបានទៅឃុបឃិតជាមួយនឹងអាជ្ញាធរកម្លាំងសមត្ថកិច្ច ទៅចុះមកចាក់ដីតែម្តងទៅ ហើយបានរាំងស្ទះប្រជាពលរដ្ឋ មិនឲ្យចូលរួម ហើយចាប់ប្រជាពលរដ្ឋហ្នឹងឃុំខ្លួន។ ឥឡូវកំពុងចាប់ជ្រមុជទឹក ជ្រមុជអីមុនហ្នឹងមិញ ចាប់វាយខ្នោះ ប្រជាជនរត់ទៅចាប់បានម្នាក់ក្មេងប្រុសអាយុប្រហែលជា ៣០ឆ្នាំ ជាម្ចាស់ដីដែរ ក្នុងចំណោម ១២គ្រួសារហ្នឹង»។
ស្ត្រីឈ្មោះ សល់ ច្រឹម អះអាងថា ក្នុងជម្លោះនោះ គ្រឿងអលង្ការពាក់ជាប់ខ្លួនមួយចំនួន ត្រូវក្រុមឈុតខ្មៅដណ្ដើមយកអស់ច្រើនតម្លឹងមាស។ លោកស្រីបន្តថា ក្នុងការប្រតាយប្រតប់ដណ្ដើមគ្រឿងអលង្ការនោះ បានធ្វើឲ្យមានការវាយតប់គ្នាបណ្ដាលឲ្យមានអ្នករបួស និងសន្លប់៖ «ចាប់ខ្លួន ២នាក់ ហើយរបួសទៅពេទ្យអស់ ២នាក់ បាក់ធ្មេញ។ ហើយខ្សែក ខ្សែដៃខ្ញុំបាត់ វាកន្ត្រាក់យកតែម្តង»។
ក្នុងព្រឹត្តិការណ៍ទប់ស្កាត់ការចាក់ដីរបស់ក្រុមហ៊ុន វាន់ វណ្ណា នោះ មកលើដីអ្នកភូមិ ១២គ្រួសារនោះ ក្រុមស្លៀកពាក់ឈុតខ្មៅបានចាប់ខ្លួនម្ចាស់ដី ២នាក់ និងធ្វើឲ្យរបួសរហូតសន្លប់មនុស្សស្រីចំណាស់ ២នាក់។ អ្នកទាំង ៤នាក់មានឈ្មោះ សាំង វណ្ណនឿន អាយុ ៣២ឆ្នាំ លោក ទូ សឿន អាយុ ៦៥ឆ្នាំ ជាគណៈកម្មការភូមិ និងស្ត្រី ២រូបផ្សេងទៀតរងរបួស បញ្ជូនទៅព្យាបាលនៅមន្ទីរពេទ្យ ឈ្មោះ ហ៊ិន វី អាយុ ៤២ឆ្នាំ សន្លប់ និងបាក់ធ្មេញ និងស្ត្រីឈ្មោះ សល់ ក្រែង អាយុ ៤៦ឆ្នាំសន្លប់។
វិទ្យុអាស៊ីសេរី មិនអាចទាក់ទងក្រុមហ៊ុន វាន់ វណ្ណា ដែលរងនូវការចោទនោះបានភ្លាមៗទេ នៅថ្ងៃ២៥ ខែមិថុនា ឆ្នាំ២០១៤។
មេឃុំឫស្សីស្រុកខាងលិច លោក ថៃ សារិ ថ្លែងថា ដីជម្លោះនេះទំហំជាង ១ហិកតារ មានអ្នកភូមិមួយចំនួនបានគ្រប់គ្រងដីនោះ។ ប៉ុន្តែរឿងហេតុដែលកើតនៅថ្ងៃទី២៥ មិថុនា នេះ លោកមិនទាន់បានទទួលព័ត៌មានទេ៖ «ខ្ញុំអត់បានដឹងទេ អត់បានចូលរួមក្នុងហ្នឹងទេ»។
អ្នកស៊ើបអង្កេតអង្គការលីកាដូ (Licadho) ខេត្តកំពត លោក ម៉ម កេសី ថ្លែងថា ជម្លោះដីនៅភូមិថ្កូវព្រែកចាក បានកើតឡើងក្រោយពីអាជ្ញាធរជាតិខាងព្រំដែន បានបោះបង្គោលចប់សព្វគ្រប់។ លោកថា ក្រុមហ៊ុន វាន់ វណ្ណា បានសិទ្ធិឲ្យអភិវឌ្ឍព្រំដែនលើដីរបស់ពលរដ្ឋ ១២គ្រួសារជាម្ចាស់ដីនោះ។ នៅឆ្នាំ២០១២ ក្រុមហ៊ុន វាន់ វណ្ណា បានផ្តល់ប្រាក់គោលនយោបាយ ៤ម៉ឺនដុល្លារឲ្យពលរដ្ឋ ប៉ុន្តែពួកគាត់មិនព្រមយក ដោយគាត់ទារក្នុង១ម៉ែត្រការ៉េតម្លៃ ៦០ដុល្លារ ហើយក៏មានការប្ដឹងគ្នាកន្លងមក។ តុលាការចេញដីការក្សាការពារទៅឲ្យក្រុមហ៊ុន មុនការបើកសវនាការទៅទៀត។ លោកថា បញ្ហានេះទើបមានជម្លោះខ្លាំងឡើងមកដល់បច្ចុប្បន្ន៖ «តាមការសន្និដ្ឋានរបស់ខ្ញុំ គឺជាចេតនាមួយរបស់អាជ្ញាធរចង់ចាប់មនុស្ស ដើម្បីបំបាក់ស្មារតី»។
ជម្លោះដីទំហំជាង ១ហិកតារ នៅភូមិថ្កូវព្រែកចាក មិនទាន់បានស្ងប់នៅឡើយទេ។ អ្នកភូមិនៅតែការពារដីដដែល ហើយក្រុមហ៊ុនបន្តទុកគ្រឿងចក្រនៅទីនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។