ពលរដ្ឋចំនួន ៣ឃុំ រស់នៅក្នុងស្រុកខ្សាច់កណ្ដាល ខេត្តកណ្តាល គ្រោងដាក់ញត្តិស្នើសុំឲ្យប្រមុខរដ្ឋាភិបាល ជួយអន្តរាគមន៍ក្រុមឈ្មួញឯកជនដែលកំពុងឈូសឆាយរំលោភយកដីស្រែប្រាំងរបស់ពួកគាត់ជិត ២០០ហិកតារ យកធ្វើជាកម្មសិទ្ធិ ដោយខាងអាជ្ញាធរមូលដ្ឋានមិនមានដំណោះស្រាយជូនពួកគាត់។
អាជ្ញាធរស្រុកបញ្ជាក់ថា ដីតំបន់នោះស្ថិតក្រោមការគ្រប់គ្រងរបស់ក្រុមហ៊ុនឯកជនមួយ ដែលទទួលសិទ្ធិវិនិយោគពីរដ្ឋាភិបាល ហើយអាជ្ញាធរកំពុងរៀបចំឆ្វៀលដីខ្លះទុកជូនពលរដ្ឋ តាមគោលនយោបាយរបស់រដ្ឋ។
ពលរដ្ឋចំនួន ៧៦គ្រួសារ រស់នៅក្នុងឃុំព្រែកហ្លូង ឃុំព្រែកតាកូវ និងឃុំស្វាយជ្រុំ ក្នុងស្រុកខ្សាច់កណ្ដាល ខេត្តកណ្តាល ស្នើសុំឲ្យអាជ្ញាធរវាស់វែងដីដែលរដ្ឋាភិបាលឆ្វៀលទុកជូនពលរដ្ឋឲ្យបានឆាប់។
តំណាងពលរដ្ឋចំនួន ៧៦គ្រួសារ លោក ណុប វុទ្ធី បញ្ជាក់ថា រាជរដ្ឋាភិបាលបានសម្រេចផ្តល់ដីសម្បទានសេដ្ឋកិច្ចប្រមាណ ២ពាន់ហិកតារ ឲ្យក្រុមហ៊ុន ស៊ិន ដាយ វិនិយោគ។ តែក្រុមហ៊ុនមួយនេះមិនទាន់មានសកម្មភាពអ្វីលើដីសម្បទាននោះនៅឡើយ តាំងពីឆ្នាំ២០០៩ មក ក្រៅតែពីលើកទំនប់សម្គាល់ព្រំដី ទើបពលរដ្ឋនៅតែបន្តធ្វើស្រែប្រាំងនៅលើដីចាស់របស់ខ្លួនដដែល។ លោកបន្តថា ដីដែលរដ្ឋាភិបាលសម្បទានឲ្យក្រុមហ៊ុននោះ គឺជាន់នឹងដីស្រែប្រាំងរបស់ពលរដ្ឋ។ ប៉ុន្តែ រដ្ឋាភិបាលបានចេញសេចក្តីជូនដំណឹង ឬ ស.ជ.ណ ឆ្វៀលដីខ្លះសម្រាប់ពលរដ្ឋប្រកបរបរកសិកម្ម។
តំណាងរូបនេះបន្តថា តំបន់ដីឆ្វៀលតាមលិខិតរបស់រដ្ឋាភិបាលកាលពីខែមេសា ឆ្នាំ២០០៨ សម្រេចកាត់ដីជិត ៤០០ហិកតារ (៣៥៥,៦១ហិកតារ) សម្រាប់ឲ្យពលរដ្ឋ ១៤៧គ្រួសារនោះ អាជ្ញាធរនៅមិនទាន់វាស់វែងជូនពលរដ្ឋនៅឡើយ។ ស្រាប់តែមានឈ្មួញឯកជនម្នាក់ឈ្មោះ គ្រី ទូច និងបក្ខពួក បានចេញមុខមកទិញដីពីពលរដ្ឋ និងឈូសឆាយដីស្រែប្រាំងរបស់ពួកគាត់ ហើយរារាំងពលរដ្ឋមិនឲ្យធ្វើស្រែបណ្ដេញទឹក និងដាំឈូកដូចរាល់ដង៖ «ចង់សួររកអាជ្ញាប័ណ្ណរបស់ លោក គ្រី ទូច ហ្នឹងមើល ថាក្រុមហ៊ុន ស៊ិន ដាយ ផ្ទេរឲ្យគាត់ជាម្ចាស់អាជ្ញាប័ណ្ណ ឬក៏ក្រុមហ៊ុន ស៊ិន ដាយ មិនបានបំពេញកាតព្វកិច្ចទេតាមសម្ដីសម្ដេច (ហ៊ុន សែន) តាមរយៈសារាចរ០២ ចុះថ្ងៃទី២៧ មីនា ឆ្នាំ២០០១ បាននិយាយត្រង់ចំណុច «ខ» ថាត្រូវចុះបញ្ជីកម្មសិទ្ធិជូនប្រជាពលរដ្ឋវិញ។ បទបញ្ចា០១ ថាក្រុមហ៊ុនទាំងឡាយណាមិនបានបំពេញកាតព្វកិច្ចរបស់ខ្លួន គឺត្រូវដកអាជ្ញាប័ណ្ណវិញជូនរដ្ឋ បើដីនោះពលរដ្ឋអាស្រ័យផលត្រូវចេញប័ណ្ណកម្មសិទ្ធិឲ្យពលរដ្ឋ»។
តំណាងពលរដ្ឋរូបនេះបន្តថា ឈ្មួញឯកជនឈ្មោះ គ្រី ទូច នោះបានឲ្យមេខ្យល់ ៣នាក់ ដើរប្រមូលទិញដីពីពលរដ្ឋប្រមាណ ១០០ហិកតារ។ តែពេលឈូសឆាយដីជាក់ស្តែង បែរជាឈូសយកដីរហូត ៧០០ហិកតារ។
ពលរដ្ឋដែលមានទំនាស់ជាមួយឈ្មោះ គ្រី ទូច នោះក៏ធ្លាប់ដាក់ពាក្យប្ដឹងទៅអាជ្ញាធរភូមិឃុំ និងស្រុក ឲ្យដោះស្រាយដែរ តែអាជ្ញាធរមិនបានដោះស្រាយឲ្យពួកគេទេ ហើយសន្យាឲ្យពួកគេរង់ចាំមួយរយៈពេលសិន។
ទាក់ទងបញ្ហានេះ អភិបាលរងស្រុកខ្សាច់កណ្ដាល លោក សឹង្ហ គីលីន ឲ្យដឹងនៅថ្ងៃទី១៧ ឧសភា ដីតំបន់នោះ គឺស្ថិតក្រោមការគ្រប់គ្រងរបស់ក្រុមហ៊ុន ស៊ិន ដាយ ដែលរដ្ឋាភិបាលផ្តល់ឲ្យវិនិយោគ។ តែពលរដ្ឋបែរជាទៅវាតយក និងលក់ឲ្យក្រុមឈ្មួញខុសច្បាប់។ លោកបន្តថា អាជ្ញាធរបានចុះវាស់វែងដីដែលរាជរដ្ឋាភិបាលសម្រេចឆ្វៀលចេញ ប្រគល់ឲ្យពលរដ្ឋដែលពាក់ព័ន្ធរួចហើយ តែមិនទាន់ចេញប្លង់កម្មសិទ្ធិជូនពួកគាត់នៅឡើយ៖ «ឃើញលិខិតដាក់ដល់ខេត្តហូរហែ តែមិនទាន់មានដំណោះស្រាយ និងថ្នាក់លើជាអ្នកដោះស្រាយ មិនមែនមូលដ្ឋានថ្នាក់ស្រុកដោះស្រាយទេ។ ដីនោះជារបស់រដ្ឋថ្នាក់ជាតិ និងរដ្ឋាភិបាលជាអ្នកសម្រេច»។
លោក គ្រី ទូច មិនអាចទាក់ទងសុំការបំភ្លឺជុំវិញការចោទប្រកាន់របស់ពលរដ្ឋបានទេ ដោយលោកមិនលើកទូរស័ព្ទ។ រីឯតំណាងក្រុមហ៊ុន ស៊ិន ដាយ ក៏មិនអាចទាក់ទងបានដែរ។
តំណាងពលរដ្ឋចំនួន ៧៦គ្រួសារ នៅក្នុងឃុំចំនួន៣ ក្នុងស្រុកខ្សាច់កណ្ដាល ឲ្យដឹងថា កាលពីខែមេសា ឆ្នាំ២០០៨ រដ្ឋាភិបាលបានចេញសេចក្តីជូនដំណឹង២ គឺទីមួយ សម្រេចឆ្វៀលដីទំហំជិត ៥០០ហិកតារ (៤៨១,៩៨ហិកតារ) ឲ្យពលរដ្ឋជិត ៣០០គ្រួសារ (២៨៦គ្រួសារ) នៅក្នុងស្រុកល្វាឯម ដែលរងផលប៉ះពាល់ពីការផ្តល់ដីសម្បទានឲ្យក្រុមហ៊ុន ស៊ិន ដាយ។ មួយទៀត រាជរដ្ឋាភិបាលក៏បានឆ្វៀលដីជិត ៤០០ហិកតារ (៣៥៥,៦១ហិកតារ) ចែកជូនពលរដ្ឋជាង ១០០គ្រួសារ (១៤៧គ្រួសារ) រស់នៅឃុំព្រែកហ្លូង ព្រែកតាកូវ និងឃុំស្វាយជ្រុំ ក្នុងស្រុកខ្សាច់កណ្ដាល។ ប៉ុន្តែ ការវាស់វែងនោះ អាជ្ញាធរបានវាស់ឲ្យពលរដ្ឋនៅស្រុកល្វាឯម រួចហើយ ប៉ុន្តែពលរដ្ឋនៅស្រុកខ្សាច់កណ្ដាល បានវាស់វែងឲ្យពលរដ្ឋខ្លះ ដែលមានលុយឲ្យអាជ្ញាធរ ហើយពលរដ្ឋដែលមិនមានលុយនោះ គឺអាជ្ញាធរឲ្យរង់ចាំរហូត ទើបពលរដ្ឋខ្លះបង្ខំចិត្តទៅធ្វើស្រែប្រាំង និងដាំឈូកលើដីចាស់របស់ពួកគេ ប៉ុន្តែឥឡូវ ឈ្មួញឯកជនឈ្មោះ គ្រី ទូច បានរារាំង និងឈូសឆាយដីទាំងនោះ។
ពលរដ្ឋនៅស្រុកខ្សាច់កណ្ដាល ដែលមានទំនាស់ដីធ្លី គ្រោងឡើងដាក់ញត្តិនៅខុទ្ទកាល័យលោកនាយករដ្ឋមន្ត្រី ហ៊ុន សែន ក្នុងពេលឆាប់ៗ ដើម្បីឲ្យជួយអន្តរាគមន៍រឿងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។