ពលរដ្ឋម្នាក់ក្នុងចំណោមអ្នកតវ៉ា អ្នកស្រី ឈុន សាវុធ បានថ្លែងនៅថ្ងៃទី១៩ វិច្ឆិកា ថា ពួកគាត់នាំគ្នាមកនេះ ដើម្បីសុំការអន្តរាគមន៍ពីលោកនាយករដ្ឋមន្ត្រី ហ៊ុន សែន ក្នុងគ្រាដែលបញ្ហារបស់ពួកគាត់បានអូសបន្លាយតាំងពីឆ្នាំ២០០៧ មក ហើយគ្មានដំណោះស្រាយនោះ។
អ្នកស្រីបន្តថា ដីចម្ការវិលជុំដែលកាន់កាប់ដោយពលរដ្ឋភាគច្រើនជាជនជាតិដើមភាគតិចស្ទៀង តាំងពីឆ្នាំ១៩៧៩ ប្រមាណ ១ពាន់ហិកតារ នៅឆ្នាំ២០០៧ ក្រុមហ៊ុន ស៊្រុន ម៉េងលាង និងទាហាន បានមកឈូសឆាយ រំលោភយក។ យ៉ាងណា មន្ត្រីខុទ្ទកាល័យលោកនាយករដ្ឋមន្ត្រី បានទទួលលិខិតពីពួកគាត់ហើយ។
អ្នកស្រីបញ្ជាក់ថា អភិបាលខេត្តបានរាយការណ៍ទៅក្រសួងដែនដីនគរូបនីយកម្ម និងសំណង់ ថាដី១ពាន់ហិកតារ ដែលពលរដ្ឋស្នើសុំនោះ មិនអាចផ្ដល់ឲ្យពលរដ្ឋបានទេ ដោយថា ដីមានប័ណ្ណកម្មសិទ្ធិរបស់សាលាខេត្តទៅវិញ។
អ្នកភូមិបន្តថា កាលពីយប់ថ្ងៃទី១៨ ខែវិច្ឆិកា រោងចាំចម្ការរបស់ពួកគាត់ចំនួន ៥៦រោង នៅចំណុចដីទំនាស់ត្រូវបានជនមិនស្គាល់មុខលួចដុតបំផ្លាញចោល ទើបពួកគាត់បង្ខំចិត្តសុំអន្តរាគមន៍ពីនាយករដ្ឋមន្ត្រីនៅថ្ងៃនេះ។ ពលរដ្ឋបានបន្តថា នៅថ្ងៃទី២០ វិច្ឆិកា ពួកគាត់និងយកលិខិតដដែលដាក់ជូនអភិបាលខេត្តកំពង់ចាមឲ្យជួយអន្តរាគមន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។