ទោះយ៉ាងណា អភិបាលរងខេត្តកោះកុង មានប្រសាសន៍ថា អាជ្ញាធរមិនអាចធ្វើតាមសំណើពលរដ្ឋនោះទេ ព្រោះកិច្ចការនេះជាសមត្ថកិច្ចរបស់ក្រសួងរៀបចំដែនដី នគរូបនីយកម្ម និងសំណង់។
ពលរដ្ឋភូមិព្រែកជីក ឃុំជីខក្រោម ស្រុកស្រែអំបិល ខេត្តកោះកុង មានប្រសាសន៍នៅមុខសាលាខេត្ត កណ្ដាលហ្វូងមនុស្សប្រមាណ ៨០នាក់ថា ពួកគាត់មកជួបជុំគ្នានាមុខសាលាខេត្តនេះ គឺសុំឲ្យអាជ្ញាធរខេត្តជួយបញ្ឈប់សកម្មភាពបណ្ដេញពលរដ្ឋចេញពីលំនៅឋាន។
អ្នកស្រី ផាវ ញើង ឲ្យដឹងទៀតថា អ្នកស្រីក៏ដឹងដែរថា ថ្ងៃទី១៩ ខែមិថុនា បើទោះបីពលរដ្ឋស្នើអាជ្ញាធរធ្វើប័ណ្ណកម្មសិទ្ធិជូនពលរដ្ឋក៏ដោយ ក៏អាជ្ញាធរមិនអាចធ្វើបានដែរ ព្រោះអាជ្ញាធររវល់នឹងការងាររបស់ខ្លួន ដូច្នេះពលរដ្ឋស្នើអាជ្ញាធរសរសេរជាលាយលក្ខណ៍អក្សរជូនពលរដ្ឋចំពោះក្បាលដីរបស់ពលរដ្ឋ។
ពលរដ្ឋម្នាក់ទៀតមកពីភូមិសម្រុងតាកែវ ឃុំព្រែកខ្សាច់ ស្រុកគីរីសាគរ អ្នកស្រី ទិត ទែន មានប្រសាសន៍ថា ផលប៉ះពាល់រឿងដីធ្លីនាតំបន់ដែលអ្នកស្រីរស់នៅ ហាក់មានមួយឃុំតែម្ដង ហើយកើតមកពីក្រុមហ៊ុន ញូញៀន ឌីវឺឡុបមែន (Union Development Group Company)។
ទាក់ទងនឹងបញ្ហានេះ ពលរដ្ឋទាំងបីស្រុកនោះ និងមន្ត្រីសិទ្ធិមនុស្សប្រចាំខេត្ត ឲ្យដឹងថា បញ្ហាដីធ្លីភាគច្រើន ក្រុមហ៊ុន ញូញៀន ឌីវឺឡុបមែន ជាអ្នកបង្កឡើង។
អ្នកសម្របសម្រួលសមាគមសិទ្ធិមនុស្សលីកាដូ (Licadho) លោក អ៊ិន គង់ជិត មានប្រសាសន៍ថា អាជ្ញាធរខេត្តគួររួសរាន់ចាត់ចែងដោះស្រាយបញ្ហាដីធ្លីនេះជូនពលរដ្ឋ ពុំនោះទេ បញ្ហានេះអាចរីករាលកាន់តែធំ ព្រោះបើតាមសង្កេតរបស់លោក ឃើញថាបញ្ហាកើតមានច្រើនរួចហើយក្នុងខេត្តនេះ។ លោកថា កន្លងមកលោកសង្កេតឃើញថា អាជ្ញាធរបានបង្កើតគណៈកម្មការការងារស្ទើរគ្រប់ស្រុក ដើម្បីដោះស្រាយបញ្ហាដីធ្លីជូនពលរដ្ឋ ប៉ុន្តែបញ្ហាដីធ្លីកើតឡើងហាក់ពុំអាចបញ្ចប់សោះ។
ឆ្លើយតបនឹងការទាមទាររបស់ពលរដ្ឋ អភិបាលរងខេត្តកោះកុង មានប្រសាសន៍ថា ការទាមទាររបស់ពលរដ្ឋនេះ លោកមិនអាចឆ្លើយតបបានទេ ព្រោះអាជ្ញាធរខេត្តពុំមានសមត្ថកិច្ចនោះទេ។ លោកបន្តទៀតថា ពាក់ព័ន្ធរឿងរ៉ាវនេះ ជាសមត្ថកិច្ចរបស់ក្រសួងរៀបចំដែនដី នគរូបនីយកម្ម និងសំណង់ ជាអ្នកទទួលខុសត្រូវ។
ពលរដ្ឋប្រមាណ៨០ មកពីស្រុកចំនួន៣ និងឃុំចំនួន៦ នាំគ្នាធ្វើបាតុកម្មដោយសន្តិវិធី។ ពលរដ្ឋដែលមកពីស្រុកចំនួន៣ នោះ រួមមានស្រុកស្រែអំបិល ស្រុកគីរីសាគរ និងស្រុកបុទុមសាគរ ខេត្តកោះកុង។
ទោះយ៉ាងណា លោកអភិបាលរងខេត្តកោះកុង មានប្រសាសន៍ថា ការដែលពលរដ្ឋលើកឡើងថា កងរាជអាវុធធ្វើទុក្ខបុកម្នេញពលរដ្ឋនោះ លោកហាក់មិនដែលដឹងឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។