ប្រជាពលរដ្ឋប្រមាណ ៤០នាក់ បានរារាំង និងប្រតិកម្មចំពោះកម្លាំងចម្រុះដែលជាក្រុមការងារដោះស្រាយទំនាស់ដីធ្លីខេត្តក្រចេះ ហើយចុះទៅអនុវត្តការងារដីធ្លី ដោយមិនអនុញ្ញាតឲ្យពួកគាត់បន្តកាន់កាប់ និងចាប់ខ្លួនអ្នកភូមិម្នាក់។
បុរសអ្នកភូមិម្នាក់នៅឃុំដំរីផុង ស្រុកឆ្លូង ត្រូវបានក្រុមការងារដោះស្រាយទំនាស់ដីធ្លីខេត្តក្រចេះ ចាប់ខ្លួនពីបទរារាំងមន្ត្រីរដ្ឋបាលអនុវត្តច្បាប់ បញ្ជូនទៅទីបញ្ជាការកងរាជអាវុធហត្ថខេត្តក្រចេះ រង់ចាំកសាងសំណុំរឿងទៅតុលាការ។
ប្រជាពលរដ្ឋរស់នៅភូមិក្រូច ឃុំដំរីផុស អ្នកស្រី ចាន់ធឿន ថ្លែងនៅថ្ងៃទី២០ ឧសភា ថា អ្នកភូមិប្រមាណ ៣០ ទៅ ៤០នាក់ បានរារាំងមិនឲ្យក្រុមការងារចម្រុះដែលមានទាំងគ្រឿងចក្រចំនួន ២គ្រឿងរបស់ក្រុមហ៊ុនវៀតណាម ឈ្មោះ ឌូវ ទៀង ឈូសដីដាំដំណាំរបស់ពួកគាត់ នៅចំណុចអូរផ្ដៅនោះទេ។ អ្នកស្រីបន្តថា ការរារាំងនេះ បុរសឈ្មោះ គីង ឈី អាយុ ៣៧ឆ្នាំ ត្រូវបានចាប់ខ្លួន។ អ្នកស្រីបញ្ជាក់ថា ក្រៅពីចាប់ខ្លួនគ្នាគាត់នោះ ក្រុមការងារបានឈូសផ្ដួល និងដុតផ្ទះ រួមទាំងរោងចាំចម្ការរបស់ពួកគាត់អស់ចំនួន ៦ខ្នង និងរោង។
អ្នកស្រី ចាន់ធឿន៖ «ប្រជាពលរដ្ឋទាំងអស់គ្នាហ្នឹងណា ទៅឃាត់គេ ដល់ពេលឈូសទៅពួកខ្ញុំទាំងអស់គ្នាហ្នឹង ឈ្មោះ ឈី អីហ្នឹងគេថាឲ្យរើឥវ៉ាន់ចេញទៅ រោងហ្នឹង រើសផ្ទះហ្នឹងណា ដល់ពេលទៅគាត់រើ ស្រាប់ដល់គាត់បានរើទេ ស្រាប់តែគេចាប់គាត់ហ្មង ទាហានក្រុមហ៊ុនហ្នឹង ទាហានការពារអាប៉ុលយួនឈូសហ្នឹងណា។ ដីហ្នឹងនិស្សិតគេវាស់ឲ្យខ្ញុំហើយ នរណាគេបានវាស់គេវាស់នរណាគេមិនបានវាស់គេអត់អ៊ីចឹងណា ដូចថានៅកណ្ដាលអ៊ីចឹងទៅ។ អ្នកគេវាស់ខាងៗអស់ហើយ នៅកណ្ដាលៗអ៊ីចឹងណា នៅមួយហិកតារ ២ហិកតារអ៊ីចឹងណា។ សូម្បីតែវាស់ហ្នឹងក៏មិនទាន់បានប្លង់បានអីដែរ នៅទាំងអស់បងអើយ ដីហ្នឹងពួកខ្ញុំដាំដំឡូងអស់ហើយ។ ក្រុមហ៊ុនហ្នឹងគេឈូសឆាយដាំកៅស៊ូហ្នឹងណា សុទ្ធតែក្រីក្រ គ្មានអីទេ អស់អាលីងហើយឥឡូវអស់ហើយទៅនៅឯណាវិញ?»។
ទាក់ទងបញ្ហានេះ មេបញ្ជាការកងរាជអាវុធហត្ថខេត្តក្រចេះ លោកឧត្ដមសេនីយ៍ កែវ ជា មានប្រសាសន៍ថា ក្រុមការងារដោះស្រាយទំនាស់ដីធ្លី ក្រោមការដឹកនាំរបស់អាជ្ញាធរខេត្ត កងកម្លាំងអន្តរាគមន៍ដល់ក្រុមការងារចម្រុះ ដែលក្រោមការដឹកនាំផ្ទាល់ពីព្រះរាជអាជ្ញារងសាលាដំបូងខេត្ត បានចុះទៅអនុវត្តទប់ស្កាត់ការកាប់ទន្ទ្រានដីព្រៃខុសច្បាប់ពីសំណាក់ពលរដ្ឋមួយចំនួន ដែលកំពុងកាន់កាប់ដីខុសច្បាប់។ ប៉ុន្តែ លោកមិនបញ្ជាក់ថា ពាក់ព័ន្ធជាមួយក្រុមហ៊ុនសម្បទានសេដ្ឋកិច្ចវៀតណាម ឈ្មោះ ឌូវ ទៀង ដូចដែលពលរដ្ឋអះអាងនោះទេ។ លោកថា ក្រុមការងារនឹងកសាងសំណុំរឿងដើម្បីបញ្ជូនទៅតុលាការ៖ «ព្រោះក្រុមការងារហ្នឹងដោះស្រាយទំនាស់ដីធ្លី ចុះទៅបង្ក្រាបដីធ្លីដែលយើងនិយាយថា ប្រជាពលរដ្ឋផងក៏បានថាជាជនដែលបានប្រព្រឹត្តល្មើសច្បាប់ ចូលទៅកាប់ទន្ទ្រានបំផ្លាញធនធាន ដើម្បីយកធ្វើជាកម្មសិទ្ធិនោះក៏បាន។ ដល់ពេលគេអនុវត្តទៅ គាត់មករារាំងនៅក្នុងការអនុវត្តរបស់មន្ត្រីអនុវត្តច្បាប់។ ខ្ញុំមិនដឹងពាក់ព័ន្ធដីរបស់ក្រុមហ៊ុន ឬក៏ដីរដ្ឋទេ ប៉ុន្តែទោះបីដីរបស់ក្រុមហ៊ុនក៏ដោយ ដីនេះក៏ដោយ វាស្ថិតជាដីរដ្ឋទាំងអស់»។
វិទ្យុអាស៊ីសេរី មិនអាចទាក់ទងអភិបាលរងខេត្តក្រចេះ ទទួលបន្ទុកដីធ្លី គឺលោក ខ័ណ្ឌ ចំណាន បានទេ នៅថ្ងៃទី២០ ឧសភា ដើម្បីបំភ្លឺជុំវិញវិវាទដីធ្លីនេះ ដោយទូរស័ព្ទលោកជាប់រវល់។
បញ្ហាទំនាស់ដីធ្លីនៅក្នុងស្រុកឆ្លូង ខេត្តក្រចេះ គឺមានភាពច្របូកច្របល់ ដោយទំនាស់រវាងក្រុមហ៊ុនដែលរដ្ឋាភិបាលផ្ដល់ដីសម្បទានសេដ្ឋកិច្ចផង និងដោយពលរដ្ឋចំណាកស្រុក ទៅកាប់រានព្រៃយកដី និងរស់នៅធ្វើចម្ការផងក៏មាន។ បញ្ហានេះ អាជ្ញាធរបានចាត់វិធានការជាញឹកញាប់។ ជាវិធានការនោះ គឺអាជ្ញាធរអាចឈានទៅចាប់ខ្លួនពលរដ្ឋក៏មាន។
កាលពីថ្ងៃទី២៥ និងទី២៦ ខែមេសា អាជ្ញាធរខេត្តក្រចេះ បានចាប់ខ្លួនមនុស្ស ៣នាក់ នៅភូមិថ្មសំលៀង ឃុំដំរីផុង ដោយចោទថារំខានដល់មន្ត្រីអាជ្ញាធរអនុវត្តច្បាប់ ដឹកនាំប្រជាពលរដ្ឋធ្វើការតវ៉ា និងប្រើអំពើហិង្សាចំពោះអាជ្ញាធរ ជាដើម។ ប៉ុន្តែ នៅថ្ងៃទី២៨ ខែមេសា សាលាដំបូងខេត្តសម្រេចដោះលែងពលរដ្ឋមួយរូបវិញ បន្ទាប់ពីបានរកឃើញថា គាត់មិនបានជាប់ពាក់ព័ន្ធទៅនឹងការតវ៉ារឿងដីធ្លីនាពេលកន្លងមកនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។