ពលរដ្ឋរស់នៅឃុំអូរឫស្សី ក្រុងក្រចេះ ខេត្តក្រចេះ ចោទអាជ្ញាធរខេត្តនេះថាឈូសឆាយដីស្រែពលរដ្ឋចំនួន ២៨គ្រួសារ ដែលធ្លាប់អាស្រ័យផលតាំងពីសម័យសង្គមរាស្ត្រនិយមមក។ ការចោទប្រកាន់នេះ គឺនៅបន្ទាប់ពីអាជ្ញាធរខេត្តក្រចេះ បានយកគ្រឿងចក្រឈូសឆាយដីស្រែផលដំណាំពលរដ្ឋប្រមាណប្រវែង ៦០០ម៉ែត្រ ដើម្បីធ្វើផ្លូវកាលពីថ្ងៃទី២០ មិថុនា។ ចំណែកមន្ត្រីសង្គមស៊ីវិល រិះគន់ចំណាត់ការរបស់អាជ្ញាធរខេត្តនេះ ថាមិនបានជូនដំណឹងដល់ពលរដ្ឋជាមុនសិន ទើបបង្កឲ្យប៉ះពាល់ដល់ផលដំណាំកសិកម្មពលរដ្ឋ។
ពលរដ្ឋជាង ៤០នាក់ក្នុងចំណោមពលរដ្ឋ ២៨គ្រួសារ នៅព្រឹកថ្ងៃទី២១ មិថុនា បានឃាត់គ្រឿងចក្ររបស់អាជ្ញាធរខេត្ត កំពុងឈូសឆាយមិនឲ្យឈូសឆាយដីរបស់ពួកគាត់។ ក្រុមពលរដ្ឋចាត់ទុកថា អាជ្ញាធរមានចេតនាដកហូតដីពួកគាត់ដែលគ្រប់គ្រង និងអាស្រ័យផលតាំងពីសម័យសង្គមរាស្ត្រនិយម។
ចំណែកអាជ្ញាធរអះអាងថា ដីដែលអាជ្ញាធរកំពុងឈូសឆាយជាដីព្រលានយន្តហោះ សម្រាប់កសាងសាកលវិទ្យាល័យ។
តំណាងពលរដ្ឋរស់នៅភូមិស្រែស្ដៅ សង្កាត់អូរឫស្សី ក្រុងក្រចេះ អ្នកស្រី អ៊ុង គឹមយាន រៀបរាប់នៅថ្ងៃទី២១ មិថុនា ថា ដីពលរដ្ឋចំនួន ៤៥ហិកតារ ស្នើនឹង ២៨គ្រួសារមានផ្ទះចំនួន ៧ខ្នង ដែលពលរដ្ឋគ្រប់គ្រង ថែមទាំងកាន់កាប់តាំងពីឆ្នាំ១៩៥៦ រហូតមកដល់បច្ចុប្បន្ន អាជ្ញាធរមិនបានធ្វើប្លង់កម្មសិទ្ធិស្របច្បាប់ជូនពលរដ្ឋឡើយ ថែមទាំងដកហូតដីពួកគាត់ទៅវិញ។ បន្ថែមពីលើនេះទៀត អាជ្ញាធរមិនដឹងថា យកស្នាមមេដៃពលរដ្ឋជាង ៣០គ្រួសារពីណាមក? ដែលសំអាងថា ពលរដ្ឋយល់ព្រមឲ្យឈូសឆាយ ស្របពេលដែលពួកគាត់នៅមិនទាន់ទទួលដំណឹងនៅឡើយ៖ «វាឈូសឆាយដីស្រែដីភូមិទាំងអស់ ប៉ុន្តែគ្រាន់តែគេសុំឈូសធ្វើផ្លូវ ពួកខ្ញុំប្រជាពលរដ្ឋ ២៨គ្រួសារអត់បានដឹងទេ ទើបម្សិលមិញមកលួចឈូស ហៅពួកប៉ូលិសខណៈឃុំខណៈខេត្ត ពលរដ្ឋអត់ដឹងអីផង»។
ស្ត្រីដដែលបន្ថែមថា អាជ្ញាធរមិនបានជូនដំណឹងដល់ពលរដ្ឋដែលកំពុងរស់នៅ និងធ្វើស្រែលើដីនេះ មុនពេលយកគ្រឿងចក្រមកឈូសឆាយ ថែមទាំងយកកម្លាំងប្រដាប់អាវុធដាក់ពង្រាយការពារគ្រឿងចក្រកំពុងឈូសឆាយកាលពីថ្ងៃទី២០ មិថុនា។
អភិបាលរងក្រុងក្រចេះ លោក វិន សុខខេង មិនធ្វើអត្ថាធិប្បាយចំពោះការចោទប្រកាន់ទេ លោកប្រាប់ថា ជាប់ប្រជុំនៅថ្ងៃទី២១ មិថុនា។
ចំណែកចៅសង្កាត់អូរឫស្សី អ្នកស្រី ញៀន ពុយភារុន ឲ្យដឹងនៅថ្ងៃទី២១ មិថុនា ថា អាជ្ញាធរគ្រោងយកទីតាំងដីនេះកសាងសាកលវិទ្យាល័យ ដូច្នេះ ចាំបាច់ត្រូវការដីព្រលានយន្តហោះនេះ។ បន្ថែមពីលើនេះទៀត ក្នុងចំណោមពលរដ្ឋដែលរស់នៅតាមព្រលានយន្តហោះនេះ អាជ្ញាធរធ្លាប់ផ្តល់សំណងជូនពួកគាត់ជាដីសម្បទានសង្គមកិច្ចនៅឃុំអង្ក្រង ស្រុកសំបូរ រួចហើយ។ ចំណែកពលរដ្ឋចំនួន ២៨គ្រួសារ អាជ្ញាធរត្រូវរង់ចាំសេចក្តីសម្រេចពីថ្នាក់ជាតិជាមុនសិន?៖ «តាមពិតដីចំព្រលានយន្តហោះ យើងដោះជូនពលរដ្ឋ គឺយើងមានគោលនយោបាយផ្តល់ជាថវិកា ដើម្បីរុះរើផ្ទះមួយ ហើយមួយទៀតយើងផ្តល់ដីសម្បទាន យើងអាចសាងសង់សាកលវិទ្យាល័យ ត្រឹមទៅចំណុចខាងក្រោយប្រហែលជា ៤០ហិកតារ»។
អនុក្រឹត្យរដ្ឋាភិបាលលេខ១៤៣ ចុះថ្ងៃទី១១ ខែកញ្ញា ឆ្នាំ២០១២ ឲ្យដឹងថា ការប្ដូរដីព្រលានយន្តហោះដែលមានទំហំ ១១២ហិកតារ មកជាដីសាងសង់សាកលវិទ្យាល័យភូមិន្ទកសិកម្ម មានទំហំដីជាង ៩៩ហិកតារ (៩៩,០១)។ ទោះយ៉ាងណា គណៈកម្មការទី១នៃរដ្ឋសភា បានចេញលិខិតស្នើសុំឲ្យអាជ្ញាធរខេត្តក្រចេះ កាត់ដីព្រលានយន្តហោះនេះមានទំហំ ៩៩,០១ហិកតារ ជូនពលរដ្ឋចំនួន ២៨គ្រួសារ តាមការស្នើ និងដីជាង ៤០ហិកតារទៀត កាលពីថ្ងៃទី២១ ខែមករា ឆ្នាំ២០១៤។
មន្ត្រីស៊ើបអង្កេតសមាគមអាដហុក (adhoc) ខេត្តក្រចេះ លោក ឌិន ខន្នី និយាយថា អាជ្ញាធរខេត្តគួរតែកាត់ដីជូនពលរដ្ឋជាង ៤០ហិកតារ ដែលពួកគាត់កាន់កាប់តាំងពីសម័យសង្គមរាស្ត្រនិយម តាមសំណើរបស់រដ្ឋសភា។ លោកថា ករណីឈូសឆាយដីអាស្រ័យផលពលរដ្ឋដោយមិនបានផ្ដល់ដំណឹងជូនពលរដ្ឋ ថាជាយន្តការខុសនីតិវិធី ស្របពេលដែលដីនៅទីតាំងនេះជាដីកំពុងមានជម្លោះមិនទាន់ដោះស្រាយ។ លោកអំពាវនាវឲ្យអាជ្ញាធរ អភិវឌ្ឍដោយឈរលើគោលការណ៍គោរពសិទ្ធិមនុស្ស និងអាចទទួលយកបាន៖ «ចំណាត់ការរបស់អាជ្ញាធរខ្ញុំគិតថា ខុសនីតិវិធី អាជ្ញាធរខេត្តបានធ្វើ គឺនៅលើដីដែលកំពុងមានជម្លោះ។ ទី១ គឺអាជ្ញាធរមិនបានជូនដំណឹងដល់ពលរដ្ឋ»។
តំណាងពលរដ្ឋឲ្យដឹងថា អាជ្ញាធរក្រុងក្រចេះ បានកោះហៅពលរដ្ឋចំនួន ២៨គ្រួសារមកប្រជុំសម្របសម្រួលបញ្ហានេះ កាលពីរសៀលថ្ងៃទី២១ មិថុនា។ នៅក្នុងកិច្ចប្រជុំនេះ ពលរដ្ឋបានស្នើឲ្យអាជ្ញាធរវាស់វែងផ្តល់ប្លង់កម្មសិទ្ធិដីធ្លីជូនពលរដ្ឋជាមុនសិន ទើបពលរដ្ឋសម្រេចឲ្យអាជ្ញាធរឈូសឆាយធ្វើផ្លូវឡើងវិញ។ ដោយឡែកអាជ្ញាធរក្រុងនិយាយថា អាជ្ញាធរនឹងយកសំណើនេះទៅប្រឹក្សាគ្នាជាមុនសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។