តំណាងពលរដ្ឋស្ថិតនៅភូមិសំរោងស្រែស្រាយ ចំណុចគីឡូម៉ែត្រ១១៣ ឃុំខ្សឹម ស្រុកស្នួល ខេត្តក្រចេះ អ្នកស្រី ម៉ា សុខា ឲ្យដឹងនៅថ្ងៃទី២៦ ខែមិថុនា ថា កងយោធាសឹករងនៃស្រុកស្នួល ខេត្តក្រចេះ ស្លៀកពាក់ស៊ីវិល ប្រាប់ថា ពលរដ្ឋចាំបាច់ផ្ដល់ស្នាមមេដៃឲ្យពួកគេ ដើម្បីយកស្នាមមេដៃនោះដោះស្រាយបញ្ហាដីធ្លីនៅតុលាការ។
អ្នកស្រីអះអាងទៀតថា បុរស ២នាក់នោះគំរាមពលរដ្ឋទៀតថា បើមិនផ្ដល់ស្នាមមេដៃទេ តុលាការនឹងចាប់ខ្លួនដាក់គុក ព្រោះពលរដ្ឋមកធ្វើលំនៅឋានលើដីដែលគេមានប្លង់រួចរាល់ហើយ។ អ្នកស្រី ម៉ា សុខា បញ្ជាក់ទៀតថា បុរស ២នាក់នោះបញ្ជាក់អត្តសញ្ញាណខ្លួនមិនច្បាស់លាស់ទេ ប៉ុន្តែកាលពីព្រឹកថ្ងៃទី២៦ មិថុនា បុរស ២នាក់នោះអះអាងថា គេមកពីកងយោធាសឹករងស្រុកស្នួល។ ក្រោយនោះបន្តិចនៅថ្ងៃដដែល ម៉ោងប្រមាណ ១រសៀល បែរជាអះអាងថា ពួកគាត់ជាកងរាជអាវុធហត្ថទៅវិញ។
អ្នកស្រីឲ្យដឹងបន្តថា បុរស ២នាក់នោះបានរំខានអ្នកគ្រូម្នាក់ ស្ថិតក្នុងភូមិសំរោងស្រែស្រាយ ខណៈពេលអ្នកគ្រូនោះកំពុងបង្រៀនសិស្ស ដោយបញ្ជាឲ្យអ្នកគ្រូនោះផ្ដល់ស្នាមមេដៃ។ ទោះយ៉ាងណា អ្នកគ្រូពុំបានធ្វើតាមការបញ្ជារបស់បុរសនោះទេ។
ពលរដ្ឋដែលមានបញ្ហាដីធ្លីនេះ បានអះអាងថា ពួកគាត់បានតាំងលំនៅឋាននៅលើក្បាលដីតំបន់នោះ កាលពីឆ្នាំ២០០៧។ ក្បាលដីអ្នកភូមិ ១៨គ្រួសារ ចាប់កើតបញ្ហាខណៈពេលដែលក្រុមហ៊ុន សុវណ្ណ វុទ្ធី បានឈូសឆាយដីតំបន់នេះដាំកៅស៊ូ ប៉ះពាល់ដីពលរដ្ឋជាច្រើន។ ក្រោយក្រុមហ៊ុនធ្វើឲ្យប៉ះពាល់ដីពលរដ្ឋ ពលរដ្ឋបានក្រោកឡើងតវ៉ាធ្វើបាតុកម្មប្រឆាំងក្រុមហ៊ុននេះ។ ក្រុមហ៊ុន សុវណ្ណ វុទ្ធី ធ្វើឲ្យប៉ះពាល់ដីពលរដ្ឋកាលពីឆ្នាំ២០១០។ ក្រោយមក ក្បាលដីមានជម្លោះត្រូវអភិបាលរងខេត្ត លោក ខាន់ ចំណាន ផ្ដល់សិទ្ធិឲ្យលោក គីន ស៊ីដូ។ ពលរដ្ឋអះអាងថា ដីមានជម្លោះនេះ ត្រូវក្រុមនិស្សិតចុះវាស់វែង និងផ្ដល់សលាកបត្រជូនពលរដ្ឋរួចហើយ ដោយរង់ចាំទទួលប្លង់រឹង។
ផ្ទុយពីការអះអាងរបស់ពលរដ្ឋនេះ អភិបាលស្រុកស្នួល លោក សាន់ ណាល់ អះអាងថា សលាកបត្រដែលពលរដ្ឋកំពុងកាន់នោះ កំពុងធ្វើឲ្យអាជ្ញាធរឈឺក្បាល។ លោកបញ្ជាក់ថា សលាកបត្រដែលពលរដ្ឋកាន់កាប់នោះ មិនមែនជាសលាកបត្រដីធ្លីនោះទេ។ តែទោះយ៉ាងណា លោកបានឲ្យទៅទាក់ទងសួរបញ្ជាក់ពីអភិបាលរងខេត្តក្រចេះ។
វិទ្យុអាស៊ីសេរី មិនអាចសុំការបំភ្លឺពីអភិបាលរងខេត្តក្រចេះ លោក ខាន់ ចំណាន បានទេនៅថ្ងៃទី២៦ ខែមិថុនា។
ប៉ុន្តែកន្លងមក លោកធ្លាប់ប្រាប់វិទ្យុអាស៊ីសេរី ថា លោកមិនអាចបកស្រាយបានទេពីបញ្ហានេះ ដោយលោកបញ្ជាក់ថា ពលរដ្ឋដែលមានជម្លោះដីធ្លីហាក់ច្រើនពេក ហើយលោកក៏ទទួលភារៈច្រើនក្នុងការដោះស្រាយបញ្ហានេះ។
ទោះយ៉ាងណា ទាក់ទងនឹងបញ្ហានេះ អ្នកសម្របសម្រួលនៃអង្គការការពារសិទ្ធិមនុស្សអាដហុក (Adhoc) ខេត្តក្រចេះ អ្នកស្រី ធីម ណារីន មានប្រសាសន៍ថា រដូវនេះជារដូវវស្សា ដូច្នេះអាជ្ញាធរគួររួសរាន់ដោះស្រាយបញ្ចប់ជម្លោះដីធ្លីនេះ។ ម្យ៉ាងទៀត បើទោះបីអាជ្ញាធរថ្នាក់ជាតិមិនទាន់ដោះស្រាយ ក៏អាជ្ញាធរមូលដ្ឋានគួរប្រញាប់សម្រួលធ្វើយ៉ាងណាផ្ដល់ទីតាំងដល់ពលរដ្ឋធ្វើទីលំនៅបណ្ដោះអាសន្នសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។