តំណាងប្រជាពលរដ្ឋជិត ១០០គ្រួសារ រស់នៅឃុំទំនប់រលក ស្រុកស្ទឹងហាវ ខេត្តព្រះសីហនុ បានប្រមូលផ្តុំគ្នាជួយធ្វើសាក្សីជូនមនុស្សចាស់ជរាពីរនាក់ប្ដីប្រពន្ធ ដែលអះអាងថា ត្រូវក្រុមហ៊ុន អៀង សុធារ៉ា រំលោភយកដីផ្ទះ និងចម្ការ ដោយសំអាងទៅលើប្លង់កម្មសិទ្ធិ ឬប្រព័ន្ធតុលាការ។
មនុស្សចាស់ជរាមានវ័យជិត ៨០ឆ្នាំទាំងពីរនាក់ អំពាវនាវដល់លោកនាយករដ្ឋមន្ត្រី ហ៊ុន សែន និងភរិយា ជួយអន្តរាគមន៍ទៅក្រុមហ៊ុន អៀង សុធារ៉ា ឲ្យសងដីលំនៅឋាន និងដីចម្ការជូនពួកគាត់វិញ។
មនុស្សក្មេងចាស់ប្រុសស្រី បានអះអាងកាលពីល្ងាចថ្ងៃច័ន្ទ ទី១៦ ខែមីនា នៅសាលាស្រុកស្ទឹងហាវ ថា ក្រុមហ៊ុន អៀង សុធារ៉ា បានប្រើកម្លាំងប្រដាប់អាវុធ និងប្រព័ន្ធតុលាការ ដើម្បីប្លន់យកដីមានទំហំជាង ៥ហិកតារ តាំងពីឆ្នាំ២០០៤ មកដល់ឆ្នាំ២០១៥។
ករណីនេះ ទាំងមេបញ្ជាការកងទ័ព និងប្រជាពលរដ្ឋរស់នៅមូលដ្ឋានឃុំទំនប់រលក ស្រុកស្ទឹងហាវ ក៏បានជួយធ្វើសាក្សីជូនមនុស្សវ័យចាស់ទាំងពីរថា ពិតជាបានមកសង់ផ្ទះ និងធ្វើចម្ការនៅលើដីដែលត្រូវក្រុមហ៊ុន អៀង សុធារ៉ា រំលោភយកនេះពិតមែន។
ក្រុមប្រជាពលរដ្ឋបានអះអាងថា មនុស្សវ័យចាស់ពីរនាក់ប្ដីប្រពន្ធមានឈ្មោះលោកតា នាង ឃិន និងលោកយាយ លាង យី ពិតជាបានកាន់កាប់ផ្ទៃដីមានទំហំជាង ៥ហិកតារ នៅឃុំកែវផុស ដែលកាលនោះមូលដ្ឋាននេះឋិតនៅក្នុងរដ្ឋបាលខេត្តកោះកុង ពិតមែន៖ «យាយតាចាស់ជរាទៅហើយ ប៉ុន្តែត្រូវក្រុមហ៊ុន អៀង សុធារ៉ា មករំលោភយកដីចម្ការ និងផ្ទះរបស់គាត់ទៀត។ ដីហ្នឹងគាត់កាន់កាប់តាំងពីខ្ញុំនៅតូចៗ ហើយកន្លងមកពួកខ្ញុំធ្លាប់បានទៅនេសាទ និងសម្រាកនៅផ្ទះរបស់គាត់ថែមទៀតពីអតីតកាល។ ប៉ុន្តែក្រោយមក ផ្ទះរបស់យាយតាទាំងពីរនាក់ប្ដីប្រពន្ធ ត្រូវក្រុមហ៊ុនប្រើកម្លាំងរុះរើ និងបំផ្លាញអស់គ្មានសល់ និងបានប្រើកម្លាំងទាហានបាញ់គំរាមបណ្ដេញពួកគាត់ឲ្យចេញពីផ្ទះទាំងបង្ខំថែមទៀត»។
ប្រជាពលរដ្ឋជាសាក្សីរស់នៅឃុំទំនប់រលក បានអះអាងថា ដោយសារតែមនុស្សវ័យចាស់ទាំងពីរនាក់មិនមានថវិកា ឬលទ្ធភាព ដើម្បីធ្វើប្លង់កម្មសិទ្ធិគ្រប់គ្រងដីធ្លាប់កាន់កាប់ក្រោយឆ្នាំ១៩៨៩ មកនោះ ក៏ត្រូវក្រុមហ៊ុន អៀង សុធារ៉ា ឃុបឃិតជាមួយស្ថាប័នពាក់ព័ន្ធ លួចធ្វើប្លង់កម្មសិទ្ធិរំលោភយកដីចម្ការ និងដីសង់លំនៅឋាន ដោយបានប្រើកម្លាំងទាហានបាញ់គំរាម ដើម្បីបណ្ដេញចេញពីលំនៅឋានកាលពីឆ្នាំ២០០៤ មកដល់ពេលនេះ។ ពលរដ្ឋចោទថា ទំនាស់ដីធ្លីនេះឈានដល់ក្រុមហ៊ុន អៀង សុធារ៉ា ដាក់ពាក្យប្ដឹងមនុស្សចាស់ទាំងពីរនាក់ប្ដីប្រពន្ធ និងអ្នកឈឺឆ្អាលមួយចំនួនទៅកាន់តុលាការ ដោយចោទពីបទធ្វើឲ្យខូចខាតទ្រព្យសម្បត្តិអ្នកដទៃ ហើយក្រុមហ៊ុននេះបានឈ្នះក្តីនៅតុលាការគ្រប់ជាន់ថ្នាក់ជារហូត ព្រោះតុលាការសំអាងថា ក្រុមហ៊ុនមានប្លង់កម្មសិទ្ធិកាន់កាប់ដីធ្លីត្រឹមត្រូវ៖ «ដីតំបន់នោះ គឺជាដីរបស់យាយតាពីរនាក់ហ្នឹងរស់នៅជាយូរមកហើយ ហើយឃើញពួកគាត់រស់នៅលើដីនោះរហូតដល់ឆ្នាំ១៩៩៣ ដែលកាលនោះខ្ញុំមានតួនាទីជាប៉ូលិសនៅស្រុកស្ទឹងហាវ។ ខ្ញុំទទួលស្គាល់ដីទំនាស់នោះជាដីយាយតាទាំងពីរនាក់ពិតមែន ប៉ុន្តែក្រោយមកផ្ទះរបស់គាត់ត្រូវក្រុមហ៊ុន អៀង សុធារ៉ា ប្រើកម្លាំងប្រដាប់អាវុធមករុះរើបំផ្លាញចោលគ្មានសល់។ ករណីនេះបង្ហាញពីភាពអយុត្តិធម៌នៅក្នុងសង្គមធ្ងន់ធ្ងរបំផុត»។
លោកតា នាង ឃិន និងលោកយាយ លាង យី ទាំងពីរនាក់ ក៏បានស្នើដល់លោកនាយករដ្ឋមន្ត្រី ហ៊ុន សែន និងភរិយា ជួយរកយុត្តិធម៌ជូនពួកគាត់ ព្រោះដីធ្លីធ្លាប់រស់នៅក្រោយឆ្នាំ១៩៨៩ មក ស្រាប់តែមកដល់ឆ្នាំ២០០៤ ត្រូវក្រុមហ៊ុនរបស់ លោក អៀង សុធារ៉ា ឃុបឃិតជាមួយស្ថាប័នពាក់ព័ន្ធ លួចធ្វើប្លង់កម្មសិទ្ធិរំលោភយកមកដល់សព្វថ្ងៃ។
ក្រោយពីត្រូវក្រុមហ៊ុន អៀង សុធារ៉ា បណ្ដេញចេញពីផ្ទះ និងដីចម្ការធ្លាប់រស់នៅ កាលពីឆ្នាំ២០០៤ មក បច្ចុប្បន្ននេះ លោកតា នាង ឃិន និងលោកយាយ លាង យី ដែលមានវ័យជិត ៨០ឆ្នាំ ទាំងពីរនាក់ប្ដីប្រពន្ធ បានមករស់នៅក្រោមដំបូលខ្ទមប្រក់ស័ង្កសីដ៏តូចចង្អៀតក្នុងឃុំទំនប់រលក ស្រុកស្ទឹងហាវ ដោយរំពឹងថា នៅមុនពេលរូបលោកទាំងពីរនាក់ត្រូវអស់សង្ខារលាចាកលោកនេះទៅ នឹងមានអ្នកជួយរកផ្តល់យុត្តិធម៌ដល់ពួកគាត់ទាំងពីរនាក់៖ «សូមសម្ដេចនាយករដ្ឋមន្ត្រីអាណិតមេត្តាជួយដោះស្រាយដីធ្លីឲ្យខ្ញុំឲ្យបានឆាប់ផង ឬយ៉ាងហោចឲ្យខ្ញុំបានឃើញយុត្តិធម៌ជាក់ស្តែង នៅពេលខ្ញុំមានជីវិតរស់នៅ។ រាល់ថ្ងៃ ខ្ញុំចុះទូកនេសាទដាក់អួនដាក់មង និងស្ទូចត្រីជាដើម ដើម្បីចិញ្ចឹមយាយតាខ្ញុំទាំងត្រដាបត្រដួស។ ប៉ុន្តែពេលនេះ ភ្នែកខ្ញុំមើលពុំសូវឃើញទេ និងគ្មានកម្លាំងកំហែងដើម្បីចុះទូកនេសាទស្ទើរលែងកើតទៀតឡើយ។ ដូច្នេះ សូមឲ្យសម្ដេច ហ៊ុន សែន ជួយឲ្យខ្ញុំបានដី ដើម្បីឲ្យខ្ញុំបានដាំដំណាំដាំដុះរហូតដល់ខ្ញុំអស់ព្រះជន្មាយុពីលោកិយនេះ។ ខ្ញុំមានអ្វីជាទីពឹងទេ គឺមានតែដីចម្ការធ្លាប់បង្កបង្កើនផល ឬដាំបន្លែ ដែលត្រូវក្រុមហ៊ុន អៀង សុធារ៉ា រំលោភយកនោះទេជាទីពឹង។ រហូតមកដល់ពេលនេះ ខ្ញុំមានអាយុ ៧៩ឆ្នាំទៅហើយ ហើយនៅបន្តចុះទូកដើម្បីនេសាទត្រីមកចិញ្ចឹមជីវិតតាយាយខ្ញុំដ៏លំបាកវេទនាបំផុត»។
កាលពីថ្ងៃទី១៦ ខែមីនា ឆ្នាំ២០១៥ នេះ នៅសាលាស្រុកស្ទឹងហាវ មនុស្សចាស់ទាំងពីរនាក់ប្ដីប្រពន្ធបានបង្ហាញជំនឿថា លោកនាយករដ្ឋមន្ត្រី ហ៊ុន សែន និងភរិយា នឹងអាចជួយរកយុត្តិធម៌ជូនពួកគាត់លើករណីក្រុមហ៊ុន អៀង សុធារ៉ា រំលោភបំពានដីផ្ទះ និងដីចម្ការមានទីតាំងនៅឃុំកែវផុស ស្រុកស្ទឹងហាវ ជាក់ជាមិនខាននៅមុនពួកគាត់ទាំងពីរនាក់លាចាកពីលោកនេះទៅ៖ «សូមសម្ដេចជួយខ្ញុំផង។ ចំពោះខ្ញុំ ខ្ញុំខំតស៊ូជួយជាតិមាតុភូមិច្រើនគួរសមដែរនាពេលកន្លងទៅ។ ក្នុងនោះក៏មានសកម្មភាព "ក៥" ក៏ខ្ញុំបានទៅបំពេញ និងរហូតដល់ខ្ញុំបានមកធ្វើចម្ការដាំដំណាំ ឬបន្លែបង្ការត្រីសាច់ជួយផ្គត់ផ្គង់ដល់កងទ័ពរដ្ឋាភិបាល ចម្អិនជាអាហារហូបជារៀងរាល់ខែថ្ងៃថែមទៀតកន្លងមក»។
ទាក់ទិនទំនាស់ដីធ្លីនេះដែរ កាលពីថ្ងៃច័ន្ទ ទី១៦ ខែមីនា ថ្នាក់ដឹកនាំស្រុកស្ទឹងហាវ បានបើកកិច្ចសម្របសម្រួលមួយជាមួយភាគីទំនាស់ទាំងពីរភាគីទៅតាមលិខិតស្នើអន្តរាគមន៍របស់គណៈកម្មាធិការសិទ្ធិមនុស្សកម្ពុជា ចុះថ្ងៃទី២៨ ខែមករា ឆ្នាំ២០១៥។
គណៈកម្មាធិការសិទ្ធិមនុស្សកម្ពុជា ដែលមាន លោក ម៉ក់ សម្បត្តិ ជាប្រធាន បានស្នើឲ្យអភិបាលខេត្តព្រះសីហនុ ជួយពិនិត្យដោះស្រាយករណីទំនាស់ដីធ្លីរវាងលោកតា នាង ឃិន និងលោកយាយ លាង យី ជាមួយ លោក អៀង សុធារ៉ា លើទំហំផ្ទៃដីជាង ៥ហិករតា (៥២.៤០០ម៉ែត្រការ៉េ) ឋិតនៅចំណុចពយយាយម៉ី ក្នុងភូមិកែវផុស ឃុំកែវផុស ស្រុកស្ទឹងហាវ ខេត្តព្រះសីហនុ។
លិខិតអន្តរាគមន៍មានចុះហត្ថលេខា លោក ម៉ក់ សម្បត្តិ ប្រធានគណៈកម្មាធិការសិទ្ធិមនុស្សកម្ពុជា ក៏បានសង្កត់ធ្ងន់ថា ទំនាស់ដីធ្លីនេះ ស្ថាប័នខ្លួនធ្លាប់បានចាត់មន្ត្រីចុះស៊ើបអង្កេតចំនួនពីរលើករួចមកហើយ ហើយរកឃើញថា ករណីនេះឋិតក្នុងសមត្ថកិច្ចរបស់ថ្នាក់ដឹកនាំខេត្តព្រះសីហនុ ត្រូវដោះស្រាយ ប៉ុន្តែរហូតមកដល់ពេលនេះ ពុំទាន់មានការជួយពិនិត្យដោះស្រាយជូនយាយតាទាំងពីរនាក់ប្ដីប្រពន្ធនៅឡើយទេ។
ទោះយ៉ាងណា នៅក្នុងកិច្ចប្រជុំសម្របសម្រួលទំនាស់ដីធ្លីរវាងលោកតា នាង ឃិន និងលោកយាយ លាង យី ជាមួយតំណាងក្រុមហ៊ុន អៀង សុធារ៉ា ដឹកនាំដោយ កញ្ញា ឈុន ដារី អភិបាលរងស្រុកស្ទឹងហាវ កាលពីល្ងាចថ្ងៃទី១៦ ខែមីនា នៅសាលាស្រុកស្ទឹងហាវ មិនមានលទ្ធផលទេ។
ត្រង់ចំណុចនេះ កញ្ញា ឈុន ដារី ឲ្យដឹងថា ទំនាស់នេះវាហួសពីដែនសមត្ថកិច្ចថ្នាក់ស្រុកត្រូវដោះស្រាយ ហើយថា ទំនាស់នេះភាគីលោកតា នាង ឃិន និងលោកយាយ លាង យី បានបន្តទាមទារយកដីសង់ផ្ទះ និងដីចម្ការជាង ៥ហិកតារមកកាន់កាប់វិញ។ ប៉ុន្តែខាងភាគីតំណាងក្រុមហ៊ុន អៀង សុធារ៉ា គឺលោក លួង ប៊ុនថន មិនយល់ស្របតាមទេ ដោយសំអាងថា ក្រុមហ៊ុននេះបានឈ្នះក្តីលើទំនាស់នេះនៅតុលាការគ្រប់ជាន់ថ្នាក់នាពេលកន្លងទៅ៖ «អាជ្ញាធរស្រុកគ្រាន់តែជាតួអង្គមួយសម្រាប់សម្របសម្រួលទំនាស់ផ្សេងៗតែប៉ុណ្ណោះ ហើយរាល់ការសម្រេចឈ្នះ ឬចាញ់ បើសិនជាភាគីទាំងពីរមិនសម្របសម្រួលគ្នាទេ គឺហួសដែនសមត្ថកិច្ចថ្នាក់ស្រុកត្រូវដោះស្រាយហើយ ហើយអាជ្ញាធរស្រុកមានតែធ្វើរបាយការណ៍បញ្ជូនទៅថ្នាក់ដឹកនាំខេត្តព្រះសីហនុ ជួយដោះស្រាយតាមផ្លូវច្បាប់តទៅទៀត»។
ទាក់ទិនបញ្ហានេះដែរ លោក ទឹម យ៉ុន បច្ចុប្បន្នជានាយរងសេនាធិការតំបន់ប្រតិបត្តិការសឹករងខេត្តព្រះសីហនុ និងជាអតីតជាមេបញ្ជាការយោធាខណ្ឌស្ទឹងហាវ ខេត្តព្រះសីហនុ បានទទួលស្គាល់ថា លោកតា នាង ឃិន និងលោកយាយ លាង យី ទាំងពីរនាក់ប្ដីប្រពន្ធ ពិតជាបានមកកាប់រុករានព្រៃសង់លំនៅ និងដីចម្ការនៅលើដីមានទំនាស់នៅភូមិកែវផុស ឃុំកែវផុស ដែលកាលនោះមូលដ្ឋាននេះឋិតនៅក្នុងការគ្រប់គ្រងរបស់ខេត្តកោះកុង ពិតមែន៖ «គាត់ដាំដំណាំនៅលើដីនោះច្រើនមុខណាស់មានចេក ដំឡូង ដូង និងបន្លែសព្វបែបយ៉ាង គឺខ្ញុំឲ្យគាត់កាប់រុករានដីព្រៃនៅតំបន់នោះនៅឆ្នាំ១៩៨៩ ដើម្បីដាំដំណាំផ្សេងៗ និងសង់ផ្ទះជាដើម ដែលកាលនោះខ្ញុំធ្វើជាមេបញ្ជាការយោធានៅតំបន់នោះ គឺនៅស្រុកស្ទឹងហាវ ខេត្តព្រះសីហនុ នោះតែម្តង។ ហើយម្យ៉ាងខ្ញុំយល់ថា ឲ្យគាត់សង់ផ្ទះរស់នៅទីនោះ គឺមានផលប្រយោជន៍ពីរយ៉ាង។ ទី១ គឺដើម្បីជីវភាពរបស់ពួកគាត់ និងទី២ ឲ្យគាត់ធ្វើជាភ្នាក់ងារឲ្យខ្ញុំ ឬកងទ័ព ដោយឲ្យជួយផ្តល់ដំណឹងពីខ្មាំងសត្រូវ ឬកងកម្លាំងខ្មែរក្រហមនៅតំបន់នោះជូនដល់កងទ័ពកម្ពុជា។ ខ្ញុំទទួលស្គាល់ថា គាត់ធ្វើចម្ការនៅលើដីដែលត្រូវក្រុមហ៊ុន អៀង សុធារ៉ា រំលោភយកតាំងពីយូរណាស់មកហើយ ឬតាំងពីចុងឆ្នាំ១៩៨៨ ឆ្នាំ១៩៨៩ រហូតមកដល់ពេលមានទំនាស់ឆ្នាំ២០០៤»។
ទោះយ៉ាងណា អភិបាលរងស្រុកស្ទឹងហាវ កញ្ញា ឈុន ដារី បញ្ជាក់ថា ករណីទំនាស់ដីធ្លីរវាងលោកតា នាង ឃិន និងលោកយាយ លាង យី ជាមួយ លោក អៀង សុធារ៉ា នៅឃុំកែវផុស ដែលគណៈកម្មាធិការសិទ្ធិមនុស្សកម្ពុជា បានស្នើឲ្យអភិបាលខេត្តព្រះសីហនុ ជួយពិនិត្យដោះស្រាយ គឺខាងអាជ្ញាធរស្រុកបានធ្វើរបាយការណ៍ជូនថ្នាក់ដឹកនាំខេត្តព្រះសីហនុ រួចហើយទៅតាមការលើកឡើងរបស់ភាគីទំនាស់ទាំងពីរ។ ប៉ុន្តែ កញ្ញាបញ្ជាក់ថា មិនទាន់ឃើញថ្នាក់ដឹកនាំខេត្តនេះអញ្ជើញភាគីទំនាស់ ដើម្បីជួបពិភាក្សាឈានដល់រកដំណោះស្រាយនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។