តុលាការខេត្តព្រៃវែង បានកោះហៅប្រជាពលរដ្ឋចំនួន ៧នាក់ នៅក្នុងភូមិត្នោត ឃុំកំពង់ឫស្សី ស្រុកពោធិ៍រៀង ខេត្តព្រៃវែង ឲ្យចូលខ្លួនមកបំភ្លឺនៅសាលាដំបូងខេត្តនៅថ្ងៃទី១២ វិច្ឆិកា ឆ្នាំ២០១៤ ទាក់ទងករណីទំនាស់ដីរួមមួយកន្លែងនៅក្នុងសហគមន៍ ប៉ុន្តែមនុស្សដែលតុលាការកោះហៅនោះ មិនមានវត្តមានទេ បែរជាអ្នកភូមិបានលើកគ្នាមកមុខតុលាការជំនួសមនុស្សទាំង ៧នាក់។
ពលរដ្ឋនៅក្នុងភូមិត្នោត ឃុំកំពង់ឫស្សី ស្រុកពោធិ៍រៀង ខេត្តព្រៃវែង ជាង ១០០នាក់ បាននាំគ្នាធ្វើដំណើរដោយថ្មើរជើងចម្ងាយប្រមាណ ១០គីឡូម៉ែត្រពីភូមិរបស់ខ្លួន ដើម្បីមកកាន់តុលាការខេត្តព្រៃវែង នៅថ្ងៃទី១២ ខែវិច្ឆិកា ឆ្នាំ២០១៤។
ការឡើងមកជួបជុំគ្នានេះ គឺតបតាមការកោះហៅរបស់តុលាការខេត្តព្រៃវែង ឲ្យពលរដ្ឋ ៧នាក់មកបំភ្លឺទាក់ទងរឿងទំនាស់ដីមួយកន្លែងនៅក្នុងមូលដ្ឋានរបស់ពួកគាត់នោះ។
អ្នកស្រី យឹម ទូច ពលរដ្ឋនៅក្នុងភូមិត្នោត ដែលបានធ្វើដំណើរមកមុខតុលាការ បានថ្លែងថា ក្រុមអ្នកភូមិសម្រេចចិត្តដើរមក បើទោះនៅតាមផ្លូវមានការហាមឃាត់ និងត្រួតពិនិត្យច្បាប់ចរាចរណ៍ក៏ដោយ ក៏ការព្យាយាមនេះ គឺដើម្បីទុកដីសាលាឆទានជាសម្បត្តិរួម និងសម្រាប់អ្នកជំនាន់ក្រោយ។ អ្នកស្រីថ្លែងទៀតថា ដីដែលមានទំនាស់ទំហំជាង ៦០អា គឺជាសម្បត្តិរួម មិនមែនជាសម្បត្តិឯកជនរបស់មនុស្សតែ ៧នាក់នោះឡើយ។ ដូច្នេះ អ្នកភូមិបានឡើងមកទាំងអស់គ្នា ដើម្បីបញ្ជាក់ថា ជាដីកម្មសិទ្ធិសមូហភាព។
អ្នកស្រី យឹម ទូច៖ «តុលាការគេកោះហៅ ៧នាក់ ប៉ុន្តែប្រជាជនទាំងអស់គ្នាហ្នឹងមិនសុខចិត្តឲ្យមនុស្ស ៧នាក់ហ្នឹងមកដោះស្រាយទេ ព្រោះមិនមែនប្រយោជន៍ផ្ទាល់ខ្លួនរបស់អ្នក ៧នាក់ហ្នឹង ជាប្រយោជន៍រួម ហើយឆ្លើយអ្នកហ្នឹងធ្វើតំណាង គេមិនហ៊ានធ្វើទេ ព្រោះរបស់រួម ហើយក៏មិនមែនប្រយោជន៍អ្នកទាំង ៧នាក់ហ្នឹងទេ បានជាប្រជាជនសុខចិត្តតស៊ូហ្នឹង ព្រោះពេលធ្វើ គឺក្រោកឈរធ្វើទាំងអស់គ្នា ហើយដល់ពេលកោះហៅ គឺហៅតែ ៧នាក់ បានន័យថា សង្កត់តែអ្នក ៧នាក់ តែអ្នក ៧នាក់នោះ ក៏ធ្វើដូចជាអ្នករាប់រយនាក់ហ្នឹងដែរ»។
តាមរបាយការណ៍របស់មេឃុំកំពង់ឫស្សី បានសរសេរថា ដីមានទំនាស់ គឺជាដីរួមរបស់ភូមិសម្រាប់ធ្វើបុណ្យ ប៉ុន្តែត្រូវអធិការនគរបាលស្រុកពោធិ៍រៀង និងជំទប់ទី១ឃុំ បានឃុបឃិតគ្នាលក់ ទើបបណ្ដាលឲ្យមានទំនាស់ដល់អ្នកភូមិទាំងស្រុង។
ទោះយ៉ាងណា ការឡើងមកតវ៉ានៅមុខតុលាការខេត្តព្រៃវែង របស់អ្នកភូមិត្នោត នោះ គឺមិនមានលទ្ធផលណាមួយឡើយ ដោយអ្នកភូមិបានត្រឹមអង្គុយហេវហត់នៅមុខតុលាការ ហើយមិនមានមន្ត្រីតុលាការមកសួរនាំព័ត៌មានពីពួកគាត់ឡើយ។
អ្នកសម្របសម្រួលអង្គការអាដហុក (adhoc) ប្រចាំខេត្តព្រៃវែង អ្នកស្រី អ៊ាង គឹមលី ថ្លែងថា ករណីរឿងព្រហ្មទណ្ឌ គឺតុលាការចោទបុគ្គលណា គឺបុគ្គលម្នាក់នោះជាអ្នកទទួលខុសត្រូវ ដោយមិនជាប់ពាក់ព័ន្ធអ្នកផ្សេងនោះឡើយ ប៉ុន្តែការឡើងមកស្រុះគ្នារបស់អ្នកភូមិ គឺជាការឈឺឆ្អាលរបស់ពួកគាត់ចំពោះអ្នកភូមិដូចគ្នា និងដើម្បីការពារទ្រព្យសម្បត្តិរួមផង។ អ្នកស្រីថ្លែងទៀតថា តុលាការគួរតែស៊ើបអង្កេតឲ្យបានច្បាស់ចំពោះករណីដីរួមរបស់អ្នកភូមិនេះ។
អ្នកស្រី អ៊ាង គឹមលី៖ «អ៊ីចឹងអ្នកភូមិគាត់ថារឿងដីហ្នឹង គឺជារឿងរបស់គាត់ទាំងអស់គ្នា ត្រង់ហ្នឹងតុលាការត្រូវធ្វើការស៊ើបអង្កេតថែមទៀត ថាតើអ្នកភូមិទាំង ៧នាក់ហ្នឹង គាត់បានប្រើអំពើហិង្សាទៅលើអ្នកកាន់កាប់ដោយស្របច្បាប់មែន ឬក៏ជារឿងអីផ្សេង។ អ៊ីចឹងត្រូវការធ្វើការស៊ើបអង្កេតឲ្យបានច្បាស់ ថាតើហេតុអ្វីបានជាអ្នកភូមិហ្នឹងគាត់នាំគ្នាមកតវ៉ា គាត់បោះបង់ស្រែចម្ការ គាត់សុខចិត្តអត់ធ្វើការងារ គាត់សុខចិត្តអត់បាយដល់ទៅកូនគាត់ទៀត គឺសុខចិត្តឡើងមកតវ៉ារឿងដីហ្នឹង»។
អ្នកភូមិសម្រេចត្រឡប់ទៅផ្ទះរៀងៗខ្លួនវិញ បន្ទាប់អង្គុយនៅមុខតុលាការជិត ៣ម៉ោងដោយមិនមានលទ្ធផលអ្វីទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។